3. Ɔkwan bɛn so na Yesu asɛm a ɛwɔ Yohane 5:16, 17 no kyerɛ sɛ na ɛda a ɛto so ason no mmaa awiei wɔ afeha a edi kan no mu?

³ Adanse abien bi nti na yebetumi aka sɛ wɔ afeha a edi kan Y.B. mu no, na ɛda a ɛto so ason no mmaa awiei. Nea edi kan, susuw asɛm a Yesu ka kyerɛɛ asɔretiafo a wɔkasa tiaa no sɛ wasa yare Homeda a na wosusuw sɛ ayaresa no yɛ adwuma no ho hwɛ. Awurade ka kyerɛɛ wɔn sɛ: “M’Agya ayɛ adwuma abesi sesɛɛ, na me nso mekɔ so yɛ adwuma.” (Yoh. 5:16, 17) Dɛn na na ɔrekyerɛ? Ná wɔrebɔ Yesu sobo sɛ wayɛ adwuma Homeda. Ɔmaa wɔn mmuae de bɔɔ sobo a wɔde bɔɔ no no gui sɛ: “M’Agya ayɛ adwuma abesi sesɛɛ.” Asɛm a na Yesu reka akyerɛ wɔn a wɔkasa tiaa no no ne sɛ: ‘Me ne m’Agya yɛ adwuma koro. Na esiane sɛ m’Agya akɔ so ayɛ adwuma wɔ ne Homeda a ne tenten yɛ mfe mpempem pii no mu nti, mewɔ hokwan paa sɛ mekɔ so yɛ adwuma, a ɛda a ɛyɛ Homeda mpo ka ho.’ Enti, nea na Yesu rekyerɛ ne sɛ ɛdefa asase ho de, na Onyankopɔn Homeda titiriw no, ɛda a ɛto so ason no mmaa awiei wɔ bere a na ɔwɔ asase so no.a

5. Ná ɛda a ɛto so ason no atirimpɔw ne dɛn, na bere bɛn na saa atirimpɔw no bɛbam koraa?

⁵ Nea ɛbɛyɛ na yɛanya saa asɛmmisa no ho mmuae no, ɛsɛ sɛ yɛkae ɛda a ɛto so ason no atirimpɔw. Genesis 2:3 kyerɛkyerɛ atirimpɔw no mu sɛ: “Onyankopɔn fii ase hyiraa da a ɛto so ason no na ɔyɛɛ no kronkron.” Yehowa ‘yɛɛ’ saa da no “kronkron,”—ɔtew ho, oyi sii nkyɛn—sɛnea ɛbɛyɛ a ɛbɛma n’atirimpɔw abam. Saa atirimpɔw no ne sɛ mmarima ne mmea a wɔyɛ osetie bɛtena asase so na wɔahwɛ asase no ne abɔde a nkwa wom a ɛwɔ so nyinaa so. (Gen. 1:28) Nea ɛbɛyɛ na saa atirimpɔw no abam nti na Yehowa Nyankopɔn ne Yesu Kristo a ɔyɛ “Homeda Wura” no “ayɛ adwuma abesi sesɛɛ” no. (Mat. 12:8) Onyankopɔn homeda no bɛkɔ so araa akosi sɛ n’atirimpɔw a ɛfa ne homeda no ho bɛbam koraa wɔ Kristo Mfirihyia Apem Nniso no awiei.