Mmofra Bisa Sɛ . . .

Dɛn Nti Na Ɛyɛ A Me Bo Fuw?

“Sɛ me bo fuw a, m’ani bere, na worempɛ sɛ wobɛn me. . . .M’anim nyinaa yɛ kɔɔ. Sɛ ɛtɔ da a meteɛteɛm.”​—Evan a wadi mfe 11.

WO NUABEA sɛe wo kaba a w’ani gye ho. Wo kyerɛkyerɛfo ma wo mma a ɛmfata wɔ sɔhwɛ mu. Bere a wuhia no kɛse mu no, afiri a wode popa wo ti nhwi mu no nyɛ adwuma. Wɔ mmofra pii fam no, afoforo nneɛma a wɔde nsa ka, ntɛnkyea, ne nneɛma a edi huammɔ saa no betumi ama woate abufuw nka kɛse.

Asɛm bi a epuei wɔ Health nsɛmma nhoma mu a Dr. Georgia Witkin-Lanoil na ɔkyerɛwee no kyerɛkyerɛ mu sɛ: “Bere a amemene no reyɛ nneɛma a ɛhyɛ abufuw ho dwuma no, ɛkanyan nea wɔfrɛ no autonomic nervous system (amemene ho ntini ahorow bi) no. Adrenaline, (nsu bi a efi asaabo no mu) fi ase hwie gu mogya ntini no mu, na ɛma sɛnea koma no bɔ ne fifiri a efi no kɔ anim, na ɛma asikre a wɔde asie a ɛbɛma aboɔden no nso fi ase hwie gu.”

Dɛn na efi mu ba? Dr. Witkin toa so sɛ: “Nea yɛyɛ wɔ yɛn ankasa adrelanine no nkɛntɛnso ase no taa yɛ nea yɛyɛ ma ɛboro so. Yɛteɛteɛm, keka nsɛm a emu fã nyɛ nokware bubu nneɛma, sɛe ade anaasɛ yɛde abufuhyew fi hɔ.” Asɛm bi a epuei wɔ ‘Teen nsɛmma nhoma mu ka saa ara sɛ abufuw “betumi ama woakeka nsɛm bi a wonhyɛɛ da, wɔahwere wo nnamfo​—na ama woate yaw mpo nka wɔ wo mu.”

So wo bo afuw pɛn? Sɛ saa a, ɛnyɛ wo nkutoo. Te sɛ yɛn mu pii no, akyinnye biara nni ho sɛ akyiri no wotee nka sɛ woayɛ ade a nyansa nni mu na wususuwii sɛ, ‘Dɛn nti na meyɛɛ saa? Yiw, dɛn nti na ɛyɛ den saa ma ebinom sɛ wɔbɛhyɛ wɔn abufuw so? So mmɔden a wobɛbɔ sɛ wobɛyɛ saa no fata?

Nea Enti a Yɛn Bo Fuw

Nea enti a yɛn bo tumi fuw wɔ bere ne bere mu no bi ne sɛ wɔyɛɛ yɛn “wɔ Onyankopɔn suban so.” (Genesis 1:27) Onyankopɔn ankasa bo tumi fuw! Sɛ nhwɛso no, ɔsomafo Paulo kae sɛ: “Na woyi Onyankopɔn abufuw adi fi soro gu nnipa a wɔde ade a ɛnteɛ siw nokware kwan no mmusubɔ ne ade a ɛnteɛ nyinaa so.”​—Romafo 1:18.

Nanso hyɛ no nsow sɛ Onyankopɔn abufuw no fi adetrenee ne atɛntrenee mu. Onyankopɔn abufuw no nyɛ sɛ ‘ne koma asɔre’ ara kwa. Ɔhyɛ n’abufuw so na oyi no adi wɔ​—trenee kwan so. Enti, bere a ɔde nsuyiri sɛee wiase bɔne bi no, wansɛe tebea no koraa. Mmom no, ɔkoraa “Noa . . . ne nnipa afoforo baason so.” (2 Petro 2:5, NW) Enti wobetumi aka Yehowa ho asɛm sɛ ɔyɛ “Onyankopɔn mmɔborohunufo ne ɔdomfo, nea n’abodwo kyɛ na n’adɔeyɛ ne ne nokware dɔɔso pii.”​—Exodus 34:6.

Esiane sɛ Onyankopɔn bɔɔ yɛn wɔ ne suban so nti, yɛwɔ atɛntrenee ho adwene bi a wɔde ahyɛ yɛn mu. Enti sɛ yehyia nsisi anaa atɛnkyea a, ebia ɛbɛyɛ nea efi awosu mu sɛ yɛbɛte abufuw nka wɔ yɛn mu. Eyi too nnipa a wosuro Onyankopɔn no mu pii wɔ Bible mmere no mu.

Sɛ nhwɛso no, Mose a ɔno na na odi Israelfo no anim no bo fuwii bere a mmarima dodow bi dii anim ma wɔtew atua tiaa no no. (Numeri 16:1, 15) Na Yesu Kristo mpo yii abufuw adi! Bere a ohui sɛ nnipa binom redi gua wɔ asɔrefi a wɔsom Onyankopɔn wɔ mu mu no, ɔde abufuw hyɛe sɛ: “Momfa eyinom mfi ha, monnyɛ m’agya fi aguadi fi!” (Yohane 2:13-16) Enti abufuw a efi trenee mu ye ma Kristoni.

Nea enye no, yɛn abufuw no mu pii wɔ hɔ a emfi trenee mu. Nea enti a eyi te saa ne sɛ, sɛnea Bible ka no, ‘yɛhyɛ bɔne ase.’ Enti ɛtoa so sɛ: “Ɔtreneeni biara nni hɔ, obiako po nni hɔ.” (Romafo 3:9, 10) Ne saa nti, yɛn ankasa sintɔ​—ne afoforo de yɛ nneɛma a ɛde ahoyeraw ba. Abarimaa Stephanie se: “Ɛtɔ bere bi a nkurɔfo hyɛ wo abufuw dodo.”

Nanso yɛn bo taa fuw a enni ntease! Nea ɛnte sɛ Yehowa a ohu biribiara no, nneɛma ho adwene kakraa bi na yɛwɔ. (Hebrifo 4: 12, 13) Sɛ nhwɛso no, onyansafo Salomo kae sɛ “asɛnnennen hwanyan abufuw mu.” (Mmebusɛm 15:1) Nanso ɛtɔ bere bi a, wɔka ‘asɛm bi’ a wonni adwemmɔne biara, anaasɛ ɛyɛ aseresɛm anaa fɛwdi mu ade bi a wɔde redi agoru kɛkɛ. Bere a yenhu no saa no, yɛn bo fuw.

Nea etwa to no, nokwasɛm a ɛyɛ sɛ nkate ahorow sonosonoe no wɔ hɔ, na ɛte sɛ nea yɛn mu binom bo tumi fuw sen afoforo. Na sɛ́ abofra no, afei na worefi ase asua sɛ wubedi akɔnnɔ ne nhyɛso afoforo nyinaa a mpanyin mfe so a worenyin akɔ no de ba no so. Ebia worente wo ho ase, a wote nka kɛse wɔ akyinnye a wogye wo ho. Enkosi sɛ wubetumi adi wo nkate horow no so akodu baabi no, ɛbɛkɔ so ayɛ nea ɛnkyɛ na wo bo afuw titiriw wɔ abusua no mu. Lorie a wadi mfe 15 no ankasa se: “Me bo taa fuw me nuabea no. Onim sɛnea ɔbɛhyɛ me abufuw denam asɛm bi a ɛmfata a ɔka anaa biribiara a mɛka a ɔbɛteɛteɛ no so.” Saa ara nso na abufuw betumi aba wo ne w’awofo ntam.

Nanso nokwarem no, ɛte sɛ nea biribiara betumi ama wo bo afuw, sɛ wo ma ho kwan a. Asemmisa no ne sɛ: Wubedi abufuw nkate ahorow a ɛtete saa no ho dwuma dɛn?

Abufuw a Wonsiw Ano

Nhoma a wɔfrɛ no Reaching Your Teenager no ka sɛ “nnipa pii nnim sɛnea wobeyi wɔn abufuw adi wɔ nyansa mu.” Ebinom teɛteɛm te sɛ mmofra. Ebinom bɛyɛ keka, sɛ ebia wɔde wɔn ano anaasɛ wɔko ankasa. Afoforo nso de nna adi mma wonhu nanso na ɛhyɛ wɔn mu. Sɛnea abeawa bi kae no: “Sɛ me bo fuw a menkeka mu, meyɛ dinn na menkasa.” Ebinom nso foro tra wɔn kar mu na wɔnam sɛnea wɔka kar no so ma wɔn abufuw no ano brɛ ase.

Nanso, abufuw a wonsiw ano ho nni mfaso. Ɔbenfo Gary Schwartz a ɔwɔ Yale Sukuupɔn mu no ka sɛ abufuw ‘ka koma no kɛse sen sɛnea nkate foforo biara, a ehu mpo ka ho, bɛyɛ.’ Dr. Bedford B. Williams, Jr, a ɔwɔ Duke Sukuupɔn mu no kae sɛ: “Nhwehwɛmu pii a wɔayɛ mprempren kyerɛ sɛ ɔpatuwu pii wɔ hɔ a ebia efi ɔtan.” Ɛyɛ nokware sɛ ɛrenyɛ papa sɛ ‘wobɛpae’ wɔ biribiara a ɛhyɛ abufuw no ho. Tete bɛ bi se: “Komam dwo yɛ ɔhonam nkwa.”​—Mmebusɛm 14:30.

Bio nso, abufuw a wonsiw ano no ma tebea a enye no sɛe kɛse. Kae Bible mu asɛm a ɛfa anuanom baanu a wɔfrɛ wɔn Simeon ne Lewi a obi ne wɔn nuabea dae gurow no ho no. Ntease mu no, bere a wɔtee no, wɔn bo fuwii yiye! Nanso ɔkwan bɛn so na woyii wɔn abufuw no adi? Bible no kyerɛ sɛ wɔfaa nyansa kwan so sɛnea ɛbɛyɛ a wobetumi akum abarimaa a ɔtoo mmonnaa no​—a mmarima a wɔwɔ n’abusua mu ne ne kurom nyinaa ka ho!​—Genesis, ti 34.

Mfe bi akyi wɔ wɔn agya Yakob wupa so no, ɔkaee saa ade a wɔde abufuw yɛe yi. So ɔkamfoo wɔn sɛ wɔde abufuw dii were no? Nea ɛne no bɔ abira no, ɔdomee wɔn abufuw no “sɛ ɛso, ne wɔn anibere, sɛ emu yɛ den.” (Genesis 49:7) Yiw, ná nea wɔyɛe bere a wɔannsiw wɔn abufuw ano no nye koraa sen nea ɛde abufuw no bae no! Wɔannya biribiara a na ɛho wɔ mfaso nanso wɔsɛee wɔn din.

Enti, ɛnyɛ nwonwa sɛ ɛbɛ no se: “Nea ne bo nkyɛ fuw di agyimisɛm.” (Mmebusɛm 14:17) Ɛyɛ den sɛ obi a ne bo afuw betumi asusuw ade ho anaasɛ wayɛ ade wɔ nyansa mu. Ɛyɛ den sɛ obi a ne bo afuw dennen no bɛfa Kristofo kwan so de asiesie nneɛma a atoto. Enti Bible kyerɛwfo Yakobo nsɛm no yɛ nokware: “Onipa abufuw nyɛ Onyankopɔn trenee mu ade.” (Yakobo 1:20) Abufuw a ɛma wɔteɛteɛm, atɛnnidi, ne kommyɛ ho nni mfaso.

Ampa, ebia obi a wafom wo no a wobɛkeka nsɛm akyerɛ no no bɛma wo ho atɔ wo bere bi mu. Nanso mpɛn pii no wunu wo ho wɔ ɔkasa a ano yɛ den no ho​—titiriw bere a onii no yɛ adwumawura, ɔkyerɛkyerɛfo, anaa ɔwofo no! (Fa toto Ɔsɛnkafo 10:4 ho.) Enti Mmebusɛm 29:11 se: “Ɔkwasea yi ne honhom nyinaa adi [bere a ne bo afuw no], na onyansafo dwudwo no ma ɛka akyiri.”

Nanso ɔkwan bɛn so na wubetumi ayɛ saa? Asɛm bi a ɛbɛba akyiri yi bɛkyerɛkyerɛ eyi mu.

[Asɛm a wɔafa aka wɔ kratafa 16]

Yɛn ankasa sintɔ​—ne afoforo de​—yɛ nea ɛde ahoyeraw ba

[Kratafa 18 adaka]

“Nhoran wo bo nnebɔneyɛfo nti, mma wo bo nhaw wo, amumɔyɛfo ho; na ɛrenni da bi na wɔatwa wɔn agu sɛ sare, na wɔakisa sɛ wura momono. Bata [Yehowa] ho na yɛ papa, tra asase so na di nokware, na wama wo nea wo koma pɛ. . . . Ma abufuw ntwa, na gyae bo bɔne yɛ, nhoran wo bo, na ebewie bɔne nko.”​—Dwom 37:1-4, 8.

[Kratafa 17 mfoni]

So ɛfata sɛ wo bo befuw wɔ ho?