Bible No Adwene

So Woatra Ase Pɛn?

“MEKAE me kan asetra no mu pii​—na meyɛ ɔbarima wɔ mmere horow bi mu, na wɔ mmere afoforo nso mu no, na meyɛ ɔbea.” Agorudifo Shirley MacLaine kyerɛkyerɛ sɛnea onyaa saa adwene no mu wɔ ne nhoma a wɔtɔ sen biara a wɔfrɛ no Out on a Limb no mu. Nea edi kan no, ɛyɛɛ no “nwonwa sɛ ohui sɛ ɛnyɛ sɛ obi a owu na ɔsan ba ma wɔwo no bio no ka gyidi pii a ɛwɔ Apuei Fam no ho nko . . . na mmom anyansafo pii a wɔwɔ Atɔe Fam nso gye eyi di.”

Yiw, nnipa a wɔdɔɔso sen sɛnea wususuw a Buddafo ne Hindufo ne ɔpepehaha pii ka ho​—gye di sɛ wɔatra ase pɛn. Wogye di sɛ biribi a ɛwɔ wɔn mu​—wɔn mu pii frɛ no ɔkra​—nya nkwa tra ase wɔ wɔn wu akyi na wɔsan wo no ma ɔbɛtra ase bio mpɛn pii. Saa “ade” yi san tra ase sɛ onipa, anaasɛ sɛnea ebinom ka no, sɛ aboa anaasɛ nnuadewa mpo. Wɔn mu pii gye tom sɛ atirimpɔw a ɛwɔ eyi mu ne sɛ ɛbɛma ɔkra no ho atew nkakrankakra anaasɛ awiei koraa no, ɛde onii no bɛkɔ pɛyɛ mu.

Yegye tom sɛ adwene a ɛkyerɛ sɛ woatra ase pɛn na ebia wubetumi atra ase bio no betumi ayɛ anigye ne awerɛkyekye mpo. Nanso ɛyɛ nokware?

So Woatra Ahonhom Trabea?

Asɔre a wɔtaa frɛ emufo sɛ Mormonfo no ka sɛ “Yiw.” James E. Talmage a na ɔyɛ ɔsomafo wɔ asɔre no mu a wawu no kyerɛw “adanse ahorow a ɛwɔ kyerɛwnsɛm mu a ɛkyerɛ sɛ adesamma ahonhom atra ase pɛn ansa na wɔreba asase so​—tebea a na abɔde a wonim nyansa yi wom a wɔde hokwan a wɔwɔ sɛ wɔpaw nea wɔpɛ dii dwuma ansa na wɔbɛtraa ase wɔ honam mu no” ho asɛm.

Ampa, Yesu, Onyankopɔn Ba no, traa ɔsoro ansa na ɔbɛtraa asase so. (Yohane 6:38, 62) Nokwarem no, eyi na ɛmaa Talmage kyerɛwee sɛ “ɛfata sɛ yɛbɛka sɛ sɛ́ na N’asase so awo yɛ ka a honhom bi a atra ase pɛn ne ɔhonam nipadua bi ka boom a, ɛnde saa ara na adesamma abusua no muni biara awo nso te.”

Bere a Yesu wɔ ɔsoro no, na otie n’Agya bere nyinaa. Enti ɛnyɛ atirimpɔw nti a ɔbaa asase so ne sɛ “wɔbɛsɔ no ahwɛ wɔ asase so” te sɛ nea ɔyɛ ɔbɔnefo. Nea ɛne eyi bɔ abira no, na ɔyɛ onipa a ɔyɛ pɛ a onni bɔne a otumi gye abɔnefo na otumi de ‘ne kra yɛɛ agyede maa nnipa pii.’ (Mateo 20:28) Enti Yesu yɛ onipa a ɔda nsow, “Onyankopɔn ne nnipa ntamgyinafo koro.” (1 Timoteo 2:5, 6) Adwuma a ɔbɛyɛɛ wɔ asase so no yɛ bere tiaa bi mu de. Bere a owiei no, otumi san kɔɔ ne fie ankasa a ɛyɛ ɔsoro.

Nanso esiane nokwasɛm ahorow yi nti, so yebetumi aka sɛ ɔsoro yɛ yɛn fi te sɛ nea obetumi aka no?

Wɔwɔ Nnipa Tebeam Nanso Wɔnyɛ Nnipa

Wɔ mmere bi a atwam no mu no, honhom abɔde a aniwa ntumi nhu wɔn, abɔfo, tumi dan wɔn ho nnipa denam Onyankopɔn akwankyerɛ so. (Genesis 19:1; Luka 1:26-28) Nanso wɔ Noa nna no mu no, wɔn mu binom fi wɔn ankasa pɛ mu yɛɛ saa. Dɛn ntia? Esiane pɛ a na wɔpɛ sɛ wɔne mmea nya nna mu kyɛfa nti. (Genesis 6:2) Esiane sɛ na eyi nyɛ nhyehyɛe a Onyankopɔn ayɛ ama abɔfo nti, nea wɔyɛe no kyerɛ asoɔden. Bible no ka wɔn ho asɛm sɛ “abɔfo a wɔankora wɔn panyinni na mmom wogyaw wɔn ankasa trabere” no. (Yuda 6) Ɛnde ɛda adi pefee sɛ ɔsoro ne abɔfo “trabere” te sɛnea asase yɛ nnipa de no.​—Fa toto Dwom 115:16; 1 Korintofo 15:39, 40 ho.

Yesu “bɛyɛɛ ɔhonam” ankasa bere a ɔbaa asase so no. (Yohane 1:14) Amma saa wɔ abɔfo yi fam. Wɔfaa ɔhonam nipadua na wogyaw guu hɔ wɔ Nsuyiri no mu sɛnea ɛbɛyɛ a wobɛkɔ ahonhom trabea no. Esiane wɔn atuatew no nti, Onyankopɔn de wɔn guu “asaman amanehunu bon mu, sɛ wɔmfa wɔn nsie atemmu.” Wɔrentumi mfa ɔhonam nipadua bio na ama wɔatumi atra asase so.​—2 Petro 2:4.

Enti wɔrentumi mfa Yesu ne abɔfo a wɔdanee wɔn ho nnipa nhwɛso no nni dwuma mfa nkyerɛ sɛ na adesamma atra ase wɔ ahonhom atrabea ansa na “wɔbɛtraa asase so” sɛnea Mormonfo kyerɛkyerɛ no. Nanso so eyi betumi akyerɛ sɛ tra a wɔatra asase yi so pɛn sɛ nnipa no nyɛ nokware?

Atirimpɔw Nti a Onyankopɔn Bɔɔ Ɔkra No

Nokwarem no, ade a yebegyina so de ahu sɛ ebia onipa atra ase pɛn​—wɔ ahonhom trabea anaasɛ asase so​—anaasɛ ɛnte saa ne​—gyina hu a yebehu sɛ ɔwɔ ɔkra a enwu da anaasɛ dabi no so. Genesis 2:7 ka ɔdesani kra a edi kan a wɔbɔe no ho asɛm sɛɛ se: “Na [Yehowa] Nyankopɔn de fam dɔte nwenee onipa, na ohuw nkwa home guu ne hwene mu, na onipa yɛɛ ɔkra teasefo.”

Hyɛ no nsow sɛ wɔanka sɛ ɔkra no yɛ biribi soronko a atew ne ho wɔ nipadua a nkwa nnim no ho. Nokwarem no, ɛyɛ bere a Onyankopɔn “huw nkwa home” guu nipadua a nkwa nnim no mu na ofii ase homee no akyi na Adam a ɔyɛ ɔkra no baa nkwa mu. Sɛ egyae home na nkwa tumi no gyae adwuma yɛ a, nipadua no san dan nea nkwa nnim. Onipa ‘san kɔ ne dɔte mu, da no ara ne tirim a ɔbobɔe yera.’ (Dwom 146:4) Ɛsɛ sɛ ɔtwɛn kosi da a wobenyan no na ama wasan atra ase bio. (Yohane 5:28, 29) Saa bere a wawu no de, ɔrentumi nyɛ adwuma na saa ara na onni adwene, nimdeɛ ne nyansa.’ (Ɔsɛnkafo 9:5, 10) Sɛ yɛbɛka no tiaa a, ɔkra no awu.

Bible mu kyerɛw nsɛm pii kyerɛ sɛ wotumi sɛe ɔkra no ma enti ɛkyerɛ pefee sɛ onipa kra no tumi wu. (Hesekiel 18:4, 20; Dwom 22:29; Asomafo no Nnwuma 3:23; Adiyisɛm 16:3) Bere a ɔkra no awu no, dɛn na ɛkɔ so tra ase wɔ nipadua foforo mu no? Wɔ eyi akyi no, dɛn nti na ɛho hia sɛ ɛsɛ sɛ biribiara wu? Bere a Onyankopɔn bɔɔ akra a wɔyɛ nnipa no, ɔkae sɛ “eye papa.” Na obetumi aka eyi efisɛ ɔbɔɔ wɔn pɛ a wɔasiesie wɔn ama tra a wɔbɛtra asase so daa. (Genesis 1:31) Ná wɔyɛ akra a ɛho nhia sɛ wɔtew wɔn ho; na wɔn ho tew dedaw wɔ abrabɔ fam. Saa ara na na wɔnyɛ akra a ɛho hia sɛ wowu sɛnea ɛbɛyɛ a wobetumi atra ase bio. Daa nkwa wɔ sɛnea wɔbɔɔ wɔn mfitiase sɛ wɔntra asase so no ne wɔn anidaso.

Mmuae a Bible no de ma wɔ sɛ ebia woatra ase pɛn​—wɔ ahonhom trabea anaasɛ asase so​—ho no mu da hɔ pefee. Saa ara na hokwan a Onyankopɔn de si w’anim sɛ wobɛtra ase daa wɔ paradise asase so da bi no nso te. So wobɛpɛ sɛ wusua ho ade pii?

[Kratafa 27 mfoni]

So woayɛ nnipa ahorow yi nyinaa pɛn?