Nsemmisa A Efi Akenkanfo Hɔ

◼ Esiane sɛ Yehowa Adansefo nim sɛ awufo nnim hwee nti, dɛn nti na wɔte nka ara sɛ ɛho hia sɛ wɔkɔ wɔn mfɛfo gyidifo ayi ase?

Awufo tebea ho nokware nimdeɛ a efi Bible mu bɔ Yehowa Adansefo ho ban fi su horow a mfomso wom ne nneyɛe a nyansa nnim a efi mu ba wɔ ayi ase no ho. Afei nso ɛma wonya nea enti a ɛsɛ sɛ wɔkɔ Kristofo ayi ase no.

Onyankopɔn Asɛm kyerɛ pefee sɛ sɛ obi wu a ɔnkɔ so ntra ase sɛ ɔkra a enwu. (Ɔsɛnkafo 9:5) Owu akyi no, nipadua no san kɔ dɔte mu, sɛ ɛbɛporɔw ankasa anaasɛ wɔbɛhyew no no. Owufo no nte ase bio; sɛ Onyankopɔn nyan no daakye nkutoo a na ɔbɛsan atra ase bio.​—Yohane 5:28, 29; Asomafo no Nnwuma 24:15.

Enti, Yehowa Adansefo nni ayiyɛ nneyɛe ahorow a egyina gyidi a ɛne sɛ obi a wawu wɔ ɔkra a enwu a ɛkɔ so tra ase wɔ baabi so no akyi. Wɔmfa wɔn ho nhyɛ apesi a wɔteɛteɛm anaasɛ wosi apini dennen de hunahuna “ahonhom” anaasɛ anadwo mũ nyinaa apesi anaa awerɛhowdi a ɛtra so a wɔde pata awufo no mu.

Nanso, eyi nkyerɛ sɛ Onyankopɔn nkurɔfo nyɛ ayi. Obusuani anaa adamfo bi a ɔbɛn so wu yɛ awerɛhosɛm, ma nokware asomfo a wɔwɔ awufo ho nokware nimdeɛ no mpo. Sɛ nhwɛso no, bere a Yakob susuwii sɛ aboa bi akum Yosef no, agya panyin no ‘suu ne ba no kyɛe.’ Yɛkenkan sɛ “ne mmabarima ne ne mmabea nyinaa sɔree sɛ wɔbɛkyekye ne werɛ.” (Genesis 37:33-35) Bere a ɔnokwafo Yakob wui no, Yosef “hyɛɛ ne nkoa aduyɛfo sɛ wɔnhyɛ n’agya amu aduru” na “Misrifo suu no adaduɔson.” Bere a na ɛnyɛ nea Yakob abusua no kura Misrifo nsusuwii a ɛyɛ atoro a ɛfa awufo ho no, akyinnye biara nni ho sɛ Yakob wu no kaa wɔn. “Yosef fifo nyinaa ne ne nuanom” pɛe sɛ wosie Yakob sɛnea ɛfata, na nnipa afoforo mpo hui sɛ na wɔreyɛ ayi.​—Genesis 50:1-11.

Wobetumi abobɔ Bible mu nhwɛso afoforo pii a yɔnko ɔsomfo bi anaasɛ obusuani bi wu kaa Yehowa nkoa ampa ma enti wɔyɛɛ ayi a ɛfata.a Bere a na Yesu ne Lasaro abusuafo a na wɔredi awerɛhow no wɔ hɔ no, Yesu anyɛ te sɛ nea ɛmfa ne ho papa anaasɛ wamma n’ani annye bere a ɛnyɛ anigye bere. Ɛwom sɛ na Yesu wɔ owusɔre ahoɔden no mu ahotoso de, nanso osui. (Yohane 11:33-35) Yesu ankasa wui akyi no, n’asuafo no yɛɛ ayi, ɛwom sɛ na waka akyerɛ wɔn sɛ wobekum no, na wɔanyan no aba nkwa mu bio de.​—Mateo 16:21, 28; Yohane 16:17-20; 20:11.

Onyankopɔn nkoa a wɔwɔ hɔ nnɛ betumi ate awerɛhow a owu de ba no nka, na wɔte nka. Nanso, Bible mu ntease a wɔwɔ no boa wɔn ma wodwudwo wɔn su ano anaa wɔma ɛkari pɛ, ma ɛne 1 Tesalonikafo 4:13, 14 hyia: “Anuanom, wɔn a wɔadeda no ho de, mempɛ sɛ mekora mo so, na mo werɛ anhow sɛ wɔn a aka a wonni anidaso no. Na sɛ yegye di sɛ Yesu wui na wasɔre bio a, saa ara nso na Onyankopɔn de wɔn a wɔadeda’ no nam Yesu so bɛka ne ho aba.”

Ɛnde, Kristofo ayi (anaasɛ ogyidini bi nkae ɔkasa) ase a obi bɛkɔ nso ɛ? Bible mu ntease wɔ hɔ a enti Yehowa Adansefo te nka sɛ mfaso wɔ so sɛ wɔbɛyɛ biribi a ɛte saa na wɔbɛkɔ ase.

Kae sɛ bere a na ɛte sɛ nea Yakob ahwere ne ba no, ‘ne mmabarima ne ne mmabea nyinaa sɔree sɛ wɔkɔkyekye ne werɛ.’ (Genesis 37:35) Nsase pii so no, ɛyɛ amammerɛ sɛ abusuafo nyinaa behyia ayɛ ayi. Ɛno ma afoforo a wɔmmɛn wɔn kɛse ma enti ɛnka wɔn nkate mu kɛse no nya bere ka nsɛm de hyɛ wɔn den na wɔkyekye wɔn werɛ. Lasaro wui akyi no ‘Yudafo no mu pii baa Marta ne Maria nkyɛn sɛ wobegyam wɔn wɔn nua no nti.’ (Yohane 11:19) Eyi fa Kristofo a wɔpɛ sɛ ‘wotumi kyekye wɔn a wɔwɔ ahohia biara mu werɛ’ no ho.​—2 Korintofo 1:4.

Ɛwom sɛ ebia Kristofo ahwɛfo nni adagyew koraa de, nanso ɛsɛ sɛ wodi anim sɛ wɔbɛkyekye nguan no werɛ. Wɔma ɛtra wɔn adwenem sɛ wɔhyɛɛ wɔn nhwɛsofo Yesu, Oguanhwɛfo Pa, no sɛ ‘ɔmmɛkyekye wɔn a wɔn koma abubu werɛ.’ (Yesaia 61:1, 2; Yohane 10:14) Ɛnyɛ bere a ɛyɛ mmerɛw mu nkutoo na Yesu de awerɛkyekye a ɛte sɛɛ mae. Na ɔwɔ ɔpɛ sɛ ɔde biribi bɛbɔ afɔre na ama wɔakɔka Lasaro abusuafo a ayi ato wɔn no ho​—na ɔne wɔn adi awerɛhow.​—Yohane 11:11, 17, 33.

Kristofo a wontumi nka nsɛm pii nkyerɛ wɔn a wɔn nnipa awu no wɔ ayi ase mpo betumi ayɛ adepa denam kɔ ara kwa a wɔbɛkɔ hɔ no so. Abusua mufo a wɔresu no betumi anya awerɛkyekye afi nnipa pii a wɔaba rebɛhyɛ wɔn den​—mmofra ne mpanyin​—a wofi Kristofo asafo mu no mu. Kae nea Yudafo binom kae bere a Yesu baa Lasaro nuabeanom a na wɔredi awerɛhow no nkyɛn no: “Hwɛ ɔdɔ a ɔdɔ no!” (Yohane 11:36) Adansefo dodow a wɔaba Kristoni bi ayi ase aka abusuafo a wonnye nni, afipamfo, anaa mfɛfo adwumayɛfo a wɔaba ayi no ase no koma ɔkwan pa so ma enti wɔayɛ aso yiye atie Bible mu nokware ahorow a wɔka kyerɛe no.

Ɛsɛ sɛ Adansefo a wɔkɔ hɔ nneyɛe fata tebea no. Ɛwom sɛ wonim sɛ nea wawu no nhu amane, na wɔwɔ ahotoso sɛ owusɔre wɔ hɔ ma anokwafo nyinaa de, nanso wɔma afotu yi tra wɔn adwenem:’Osu wɔ ne bere, na ɔserew wɔ ne bere, nkɔmmɔdi wɔ ne bere, na asaw wɔ ne bere.’ (Ɔsɛnkafo 3:4) Ayi anaasɛ afunsie bere nyɛ bere a wɔde kasa dennen serew. Ɛyɛ tema bere, a ɛne afotu yi hyia: “Mo ne anigyefo ani nnye, na mo ne asufo nsu.”​—Romafo 12:15.

Ntease foforo a enti Yehowa Adansefo kɔ ayi ahorow nso wɔ hɔ. Onyankopɔn Asɛm se: “Nkɔmmɔdi fi kɔ ye sen asanom fi kɔ, efisɛ ɛno ne nnipa nyinaa awiei, na ɔteasefo de hyɛ ne komam. Anyansafo koma wɔ nkɔmmɔdi fi, na nkwasea koma wɔ anigye fi.”​—Ɔsɛnkafo 7:2-4.

Bere a Yehowa Adansefo wɔ ntease a enti ɛsɛ sɛ wonya anidaso no, wɔde honhom kyerɛw saa nsɛm no na wɔde hyɛɛ Bible mu na ɛho aba yɛn mfaso. Wobetumi de ayi atoto “nkɔmmɔdi fi” ho. Bere a yɛkɔ ase no, yebetumi ayi yɛn adwene afi nneɛma anaa dwumadi ahorow a yedwen ho daa no so na yɛde asi sɛnea asetra yɛ tiawa no so. Sɛ ɛnam yare anaasɛ ‘akwanhyia’ so no, owu betumi aba yɛn mu biara so na ayi yɛn afi hɔ koraa ntɛmntɛm, efisɛ “onipa nnim ne bere.” (Ɔsɛnkafo 9:11, 12) Awofo a wɔde wɔn mma kɔ Kristofo ayi ase no betumi ahu sɛ eyi betumi ama wɔabɔ sɛnea owu yɛ paara, hia a yehia agyede no, ne nyansa a ɛwom sɛ yɛbɛsom “Onyankopɔn a onyan awufo” no ho nkɔmmɔ.​—2 Korintofo 1:9; Ɔsɛnkafo 12:1,13.

Yehowa Adansefo mmu ayi sɛ ɛyɛ ɔsom mu ade kronn bi, na mmom wohu sɛ awerɛhow mmere yi yɛ bere a wɔde ma awerɛkyekye. Ɛdenam kɔ a wɔbɛkɔ ase so no, Kristofo betumi adi ɔdɔ ne obu a na wɔwɔ ma wɔn yɔnko Kristoni no ho adanse. Na ebetumi aka wɔn ma wɔasusuw nea nkwa kyerɛ, sɛnea ɛsɛ sɛ wɔde wɔn ankasa nkwa di dwuma wɔ Onyankopɔn anim no ho anibere so.

[Ase hɔ asɛm]