Abrabɔ Ne Asɛnka Adesua Nhoma Nhwehwɛmu

AUGUST 3-9

Tweetwee Bible Mu

it-1 1117

Ɔkwantempɔn, Ɔkwan

Efi teteete nyinaa, wokɔ Palestina a, akwantempɔn ne akwan deda kurow no mu. Saa akwan no na aguadifo taa fa so. Enti sɛ wofi kurow baako so rekɔ kurow foforo so a, ɛnyɛ den. (Nu 20:17-19; 21:21, 22; 22:5, 21-23; Yos 2:22; Ate 21:19; 1Sa 6:9, 12; 13:17, 18; hwɛ KING’S ROAD.) Ɔkwan a na ɛda Egypt kosi Filistifo kurow Gasa ne Askalon no, wɔkyerɛ sɛ ɛhɔ paa na na nkurɔfo taa fa. Ɔkwan no kɔ araa kopue Megido a ɛwɔ Hasor atifi hɔ baabi. Ensi hɔ ara, ɛsan kopue Hasor a ɛwɔ Galilea Po no atifi fam, afei ɛde wo kopue Damasko. Israelfo refi Egypt akɔ bɔhyɛ asase so no, sɛ wɔfaa Filistia kwan yi so a, anka ɛyɛ tia. Nanso Yehowa amma Israelfo amfa saa kwan yi so, mmom ɔmaa wɔfaa baabi foforo. Nea enti a wamma Israelfo amfa saa kwan yi so ne sɛ, na Filistifo no betumi de ntɔkwaw ahyia wɔn, na na wei bɛma wɔn abam abu.—Ex 13:17.

it-1 782 ¶2-3

Bere a Israelfo Refi Egypt Akɔ Bɔhyɛ Asase No So

Ɛhe na Po Kɔkɔɔ no mu pae maa Israelfo faa mu no?

Ɛsɛ sɛ yɛhyɛ no nsow sɛ, bere a Israelfo fii Sukot kɔsoɛɛ Etarm a ɛwɔ “sare no ano” no, Onyankopɔn hyɛɛ Mose sɛ “wɔnsan wɔn akyi mmɛsoɛ wɔ Pihahirot anim ne . . . po no ntam.” Na wei bɛma Farao ate nka sɛ Israelfo no “ayera ma wɔn ani so atan wɔn.” (Ex 13:20; 14:1-3) Ɔkwan pɔtee a Israelfo faa so no, ɛsono nea obiara ka wɔ ho. Abenfo bi kyerɛ sɛ, ɛbɛyɛ sɛ Israelfo no faa el Haj kwan no so. El Haj kwan no da Egypt ahenkurow Cairo rekɔ Gulf of Suez. Abenfo no kyerɛ sɛ, Hebri adeyɛ asɛm a wɔkyerɛɛ ase “wɔnsan wɔn akyi” no nkyerɛ sɛ “wɔmman mfa baabi” anaa “wɔmpae mfa baabi foforo.” Mmom, adwene a na ɛwɔ akyi ne sɛ, wɔnsan wɔn akyi koraa mmɛfa baabi foforo. Abenfo yi kyerɛ sɛ, Israelfo no duu Gulf of Suez anaa Po Kɔkɔɔ no soro hɔ baabi no, wɔsan wɔn akyi bɛfaa bepɔw bi a yɛfrɛ no Jebel ʽAtaqah ho araa kopuee Gulf of Suez nsu no ano pɛɛ. Baabi a Israelfo dɔm kɛse no kopuei no, sɛ na obi retiw wɔn a, na Israelfo no rennya baabiara mfa, efisɛ na nsu no da wɔn anim.

Afeha a edi kan mu no, Yudafo atetesɛm nso kaa biribi saa. (hwɛ PI-HAHIROT.) Nanso nea ehia paa ne sɛ, sɛnea Bible kaa Israelfo akwantu no ho asɛm no ma yehu sɛ biribi sei na ɛtoo wɔn. (Ex 14:9-16) Enti ɛbɛyɛ sɛ efi Po Kɔkɔɔ no ti reba baabi pɔtee a nsu no mu pae maa Israelfo faa mu no, na emu ware kakra. Anyɛ saa a, anka Farao ne n’asraafo no betumi akɔwan Po Kɔkɔɔ no ho ahyia Israelfo no.—Ex 14:22, 23.

AUGUST 10-16

BIBLE MU AKORADE | EXODUS 15-16

it-2 454 ¶1

Dwom

Ɛbɛyɛ sɛ nnwom a na wɔbom to wɔ Israel no, nnwontofo akuw mmienu na na wɔto emu dodow no ara. Nea na wɔyɛ ne sɛ, sɛ kuw baako ma nnwom no so a, na baako nso agye so. Anaa sɛ onipa baako na ɔreto nnwom no a, na nnwontofo a aka no nso agye so. Wei na Bible frɛ no “nnyeso no.” (Ex 15:21; 1Sa 18:6, 7) Ɔkwan a wɔfaa so kyerɛw Dwom nhoma no fã ahorow bi di wei ho adanse. Ɛho nhwɛso na ɛwɔ Dwom 136 no. Afei nso, wohwɛ Nehemia bere so sei a, bere a wɔrehyira Yerusalem ɔfasu no so no, Bible ka sɛ nnwontofo akuw akɛse mmienu too aseda dwom wɔ dwumadi no ase. Sɛnea wɔkaa wɔn ho asɛm no ma yehu sɛ, wɔfaa saa kwan yi so na ɛtoo dwom no.—Ne 12:31, 38, 40-42; hwɛ DWOM.

it-2 698

Odiyifobea

Odiyifobea a odi kan a Bible ka ne ho asɛm ne Miriam. Ɛda adi sɛ, Yehowa faa Miriam so kaa nsɛm bi kyerɛɛ Israelfo no. Ɛbɛyɛ sɛ na Yehowa fa nnwom a Miriam to no mu nsɛm so na na ɛyɛ saa. (Ex 15:20, 21) Wei nti, bere a na ɔne Aaron rekasa akyerɛ Mose no, wɔkaa sɛ: “[Yehowa] mfa yɛn so nkasa bi anaa?” (Nu 12:2) Bere a odiyifo Mika reka sɛnea Onyankopɔn yii Israelfo fii Egypt ho asɛm no, ɔkaa sɛ Yehowa ankasa na ɔsomaa “Mose, Aaron ne Miriam” sɛ wonni Israelfo anim nyi wɔn mfi Egypt. (Mik 6:4) Ɛwom, Onyankopɔn faa Miriam so ne Israelfo kasae, nanso sɛ wode hokwan a Miriam nyae toto ne nua Mose de no ho a, na Miriam de no nnu baabiara. Esiane sɛ wamma n’ani ansɔ hokwan a onyae no nti, Onyankopɔn twee n’aso paa.—Nu 12:1-15.

Tweetwee Bible Mu

w11 9/1 14

Wunim Biribi?

Bere a Israelfo wɔ sare so no, Yehowa maa wɔn nkokɔhwerew wee. Ɛbɛyɛ sɛ adɛn nti na ɔde saa mmoa no maa wɔn?

Bere a Israelfo nam sare so rekɔ Bɔhyɛ Asase no so no, Onyankopɔn maa wɔn nam wee mprenu. Nam a ɔde maa wɔn no, na ɛyɛ nkokɔhwerew.—Exodus 16:13; Numeri 11:31.

Akokɔhwerew yɛ anomaa bi a ɔso sen abuburo, nanso onnu akokɔ papa. Sɛ wokɔ Asia atɔe fam ne Europe a, wɔnyɛ nna koraa. Wɔyɛ nnomaa bi a, wɔntena faako, kyerɛ sɛ wɔtaa tu kwan paa. Enti edu awɔwbere a, wɔde wɔn ani kyerɛ North Africa ne Arabia. Sɛ wɔretu kwan saa a, wobom yuu twa Mediterranea Po no ba Sinai mpɔtam hɔ.

The New Westminster Dictionary of the Bible ka sɛ, “sɛ nkokɔhwerew nam wim a, wɔde wɔn ani kyerɛ baabi a mframa no rebɔ kɔ. Nanso sɛ baabi a mframa no de n’ani akyerɛ no sesa anaa sɛ nnomaa no brɛ a, wɔn nyinaa tew begu fam. Ɛba saa a, wuhu sɛ wogugu hɔ a wɔabrɛbrɛ.” Sɛ wɔtew gu fam a, esiane sɛ wɔabrɛbrɛ nti, wɔda hɔ dakoro anaa nnanu ansa na wɔatoa wɔn akwantu no so. Wɔyɛ mmerɛw saa a, ɛnyɛ den koraa sɛ obi bɛkyere wɔn. Afe 1900 mu hɔ baabi no, na Egyptfo de nkokɔhwerew bɛyɛ ɔpepem mmiɛnsa na ɛkɔ aman afoforo so afe biara.

Mprenu a Onyankopɔn maa Israelfo nkokɔhwerew wee nyinaa, ɛbɛyɛ sɛ na ɛyɛ April mu. Ɛwom saa bere no, na nkokɔhwerew taa tu fa Sinai, nanso Yehowa na ɔmaa ‘mframa kɛse bi bɔe’ ma epiaa nkokɔhwerew no baa baabi a na Israelfo abɔ nsra no.—Numeri 11:31.

AUGUST 17-23

BIBLE MU AKORADE | EXODUS 17-18

Tweetwee Bible Mu

it-1 406

Bible Mu Nhoma Ahorow

Adanse ahorow a ɛwɔ hɔ ma yehu sɛ, nsɛm a Mose kyerɛw no, efi Onyankopɔn hɔ anaa Onyankopɔn na ɔma ɔkyerɛwee, enti ɛka Bible mu nhoma ahorow ho. Saa ara nso na sɛ yɛhwɛ nsɛm a ɔkyerɛw no mu a, yenya akwankyerɛ ahorow a yebetumi ahwɛ so asom Onyankopɔn. Ɛnyɛ Mose ankasa na ɔfa too ne ho so sɛ obedi Israelfo no anim anaa ɔbɛyɛ wɔn kannifo; efisɛ mfiase no, ɔde nsɛm yiyii ne ho ano. (Ex 3:10, 11; 4:10-14) Mmom, Onyankopɔn na ɔde saa hokwan no maa Mose, na ɔsan mpo maa no tumi a obetumi de ayɛ anwonwade ahorow. Anwonwade a Mose yɛe no maa Farao akɔmfo no mpo gye toom sɛ, Onyankopɔn na ɔsomaa Mose. (Ex 4:1-9; 8:16-19) Ná ɛnyɛ biribi a esi Mose ani so sɛ daakye ɔbɛyɛ ɔkasafo anaa ɔkyerɛwfo. Mmom, nea ɛmaa Mose bɛyɛɛ ɔkasafo, na akyiri yi ɔkyerɛw Bible mu nhoma ahorow no bi ne sɛ, Onyankopɔn na ɔhyɛɛ no sɛ ɔnyɛ saa. Afei nso, ɔde ne honhom kaa no ma otumi yɛe.—Ex 17:14.

AUGUST 24-30

BIBLE MU AKORADE | EXODUS 19-20

w89 11/15 6 ¶1

Dɛn Na Yebetumi Asua Afi Mmara Nsɛm Du No Mu?

Ahyɛde nnan a edi kan wɔ Mmara Nsɛm Du no mu no ma yehu nea Yehowa pɛ sɛ yɛyɛ. (Nea Edi Kan) Onyankopɔn pɛ sɛ yɛsom ɔno nkutoo. (Mateo 4:10) (Mmienu) Ɔmpɛ sɛ ne somfo biara de ahoni bɛyɛ adwuma. (1 Yohane 5:21) (Mmiɛnsa) Ɛsɛ sɛ yedi Onyankopɔn din no ni, na ɛnsɛ sɛ yɛde di agoru. (Yohane 17:26; Romafo 10:13) (Nnan) Ɛsɛ sɛ yɛma nneɛma a yɛyɛ wɔ Onyankopɔn som mu di akoten wɔ yɛn asetena mu. Wei bɛma yɛahome, na yɛremmu yɛn ho atreneefo dodo.—Hebrifo 4:9, 10.

w89 11/15 6 ¶2-3

Dɛn Na Yebetumi Asua Afi Mmara Nsɛm Du No Mu?

(Nnum) Sɛ mmofra tie wɔn awofo asɛm a, ɛbɛma abusua no ayɛ baako, na ɛbɛma Yehowa nso ahyira wɔn. Ná wei ne “mmara a edi kan a na bɔhyɛ wɔ mu!” Enti sɛ mmofra di saa mmara yi so a, na ɛbɛma wɔanya anidaso. Ɛnyɛ sɛ ‘na ebesi wɔn yiye’ kɛkɛ mmom na ‘wɔbɛtena ase akyɛ wɔ asase so.’ (Efesofo 6:1-3) Seesei, yɛte “nna a edi akyiri” no mu, enti sɛ mmofra de saa afotu no yɛ adwuma a, wobenya anidaso sɛ wɔbɛtena ase daa.—2 Timoteo 3:1; Yohane 11:26.

Sɛ yɛdɔ yɛn yɔnko a, yɛrenyɛ nneɛma a ɛbɛhaw no te sɛ (Nsia) yebedi no awu, (Nson) yɛbɛsɛe aware, (Nwɔtwe) yebewia n’ade, ne (Nkron) yebedi adansekurum. (1 Yohane 3:10-12; Hebrifo 13:4; Efesofo 4:28; Mateo 5:37; Mmebusɛm 6:16-19) Nneɛma a ɛwɔ yɛn koma mu nso ɛ? Nea ɛto so (Du) no kasa tia anibere. Ɛma yehu sɛ, Yehowa pɛ sɛ yɛyɛ nea ɛteɛ wɔ n’ani so.—Mmebusɛm 21:2.

Tweetwee Bible Mu

it-2 687 ¶1-2

Ɔsɔfo

Kristofo Asɔfodi. Na Yehowa ahyɛ Israelfo no bɔ sɛ, sɛ wodi apam a ɔne wɔn ayɛ no so a, wɔbɛyɛ “asɔfo ahemman ne ɔman kronkron.” (Ex 19:6) Nanso, na Aaron asɔfodi no bɛkɔ so ayɛ adwuma araa kosi sɛ nea na ɛyɛ kɛse sen ɛno a ɛyɛ ne sunsuma no bɛba. (Heb 8:4, 5) Na ɛbɛtena hɔ araa kosi sɛ mmara apam no bɛba awiei, na apam foforo no afi ase. (Heb 7:11-14; 8:6, 7, 13) Bɔhyɛ a ɛne sɛ, ebinom bɛyɛ ahemfo wɔ Onyankopɔn Ahenni no mu no, Onyankopɔn dii kan de hokwan no maa Israelfo nko ara. Nanso akyiri yi, ɔde hokwan no maa wɔn a wɔnyɛ Yudafo nso.—Aso 10:34, 35; 15:14; Ro 10:21.

Nnipa dodow a na Onyankopɔn hia ma wɔakɔyɛ asɔfo ahemman ne ɔman kronkron wɔ n’Ahenni mu no, wantumi annya wɔn nyinaa wɔ Israel man no mu, efisɛ Yudafo no mu kakraa bi na egyee Yesu dii. (Ro 11:7, 20) Israelfo no anni nokware. Ɛno nti Onyankopɔn maa odiyifo Hosea bɔɔ wɔn kɔkɔ sɛ: “Me man bɛyera efisɛ nimdeɛ abɔ wɔn. Na wo nso, nimdeɛ a woapo nti, me nso mɛpo wo sɛ me sɔfo; na esiane sɛ wo werɛ afi wo Nyankopɔn mmara nti, me nso me werɛ befi wo mma.” (Ho 4:6) Saa pɛpɛɛpɛ na Yesu nso ka kyerɛɛ Yudafo akannifo no. Ɔka kyerɛɛ wɔn sɛ: “Wobegye Onyankopɔn ahenni afi mo nsam na wɔde ama ɔman a ɛbɛsow aba.” (Mt 21:43) Nanso, bere a Yesu wɔ asase so no, na ɔhyɛ Mmara no ase, na na ogye tom sɛ Aaron asɔfodi no da so ara reyɛ adwuma. Ɛno nti, bere a ɔsaa akwatafo yare no, ɔka kyerɛɛ wɔn sɛ, wɔmfa wɔn ho nkɔkyerɛ ɔsɔfo no, na wɔmfa wɔn ayɛyɛde nso nka ho.—Mt 8:4; Mr 1:44; Lu 17:14.

AUGUST 31–SEPTEMBER 6

BIBLE MU AKORADE | EXODUS 21-22

it-1 271

Ɔhwe

Tete Israel no, sɛ obi tɔ akoa anaa afenaa, na ɔyɛ asoɔden anaa ɔtew atua a, na ne wura betumi de abaa ahwe no. Sɛ owura no reboro akoa no, na ɔfa mu wu a, wɔbɛtwe owura no aso. Nanso sɛ owura no boroo akoa no wiei no, dakoro anaa nnanu twaam ansa na akoa no rewu a, wɔrentumi nnyina ɛno so nka sɛ na owura no pɛ sɛ okum no. Nea enti a ɛte saa ne sɛ, sɛ akoa no yɛ asoɔden a, owura no wɔ hokwan sɛ ɔtwe n’aso efisɛ ɔyɛ ne “sika” anaa yɛbɛka a, ɔde ne sika na ɛtɔɔ no. Wohwɛ mu paa a, na Israelni biara nni hɔ a ɔbɛhyɛ da asɛe n’agyapade a ɔde ne sika atɔ. Afei nso, owura no hwee no no, sɛ dakoro anaa nnanu twaam ansa na akoa no rewu a, wɔrentumi nkyerɛ sɛ ɔhwe no na ekum no, anaa biribi foforo na ekum no. Enti sɛ ɔhwe no akyi no, sɛ akoa no tena ase dakoro anaa nnanu a, na wɔrenyɛ owura no hwee.—Ex 21:20, 21.

Tweetwee Bible Mu

it-1 1143

Abɛn

Asɛm a ɛwɔ Exodus 21:14 betumi akyerɛ sɛ, sɛ ɔsɔfo bi hyɛ da kum obi a, ɛsɛ sɛ wokum ɔno nso bi. Wei kyerɛ sɛ, sɛ okoso afɔremuka no mmɛn no mu mpo a, na ɔremfa ne ho nni.—Fa toto 1Ah 2:28-34 ho.