Exodus​—Efi Nhyɛso Ase Kɔ Teokrase Nhyehyɛe Mu

YEHOWA tee wɔn su sɛ́ ‘nkoa wɔ nhyɛso ase.’ Ná bere adu sɛ ɔyɛ ho biribi, na ɔyɛɛ saa sɛ́ wɔn Gyefo Kɛse. Ɛno akyi bere tiaa bi no, Onyankopɔn hyehyɛɛ ne nkurɔfo a wɔapaw wɔn no yiye sɛ́ teokrase man.

Ne tiaa mu no, eyi ne kyerɛwtohɔ a ɛyɛ anigye a wubehu wɔ Bible mu nhoma Exodus mu. Hebrini diyifo Mose na ɔkyerɛwee, na ɛka Israelfo no suahu ahorow, efi 1657 besi 1512 A.Y.B., no kyerɛ. Anwonwade akɛse ne mmara horow a ɛso nni ka nneɛma a ɛda nsow kɛse wɔ nhoma no mu no ho.

Na so Exodus ho wɔ mfaso ankasa wɔ afeha a ɛto so 20 yi mu? Yiw, sɛnea yɛn nhwehwɛmu tiaa yi bɛda no adi no.

Exodus Mu Nsɛm

Bere a wɔte Misraim no, Yakob asefo dɔ ntɛmntɛm, ma ɛdenam ɔhene ahyɛde so no wɔma wohu amane sɛ ‘nkoa wɔ nhyɛso ase.’ Farao hyɛ mpo sɛ wonkunkum Israelfo mmabarima nyinaa. Obi a okwati owu a ɛte saa ne abofra bi a ne nã de no hyɛ mmɛw adaka mu de no kosi Nil asubɔnten no ho. Farao babea hu no na ɔde abofra no yɛ ne ba, to no din Mose, a ɛkyerɛ ‘nsu mu na woyii no fii.’ Ɛwom sɛ wɔtete no wɔ ahemfie hɔ de, nanso bere a wadi mfe aduanan no ɔde ne ho kɔbɔ n’ankasa ne nkurɔfo a wɔhyɛ wɔn so no ho, na okum Misrini bi. Bere a oguan no, ɔkɔ Midian, na ɔware tra hɔ sɛ́ oguanhwɛfo. Saa bere no mu no Farao wu, nanso Farao foforo hyɛ Israelfo no so. Bere bi akyi no Onyankopɔn te su a wosu hwehwɛ mmoa no.​—Exodus 1:1-2:25.

Da koro, Mose hu wura bi a ɛredɛw nanso, anwonwa kwan so no, ɛnhyew. Ɛdenam ɔbɔfo so no Yehowa hyɛ no sɛ ɔnsan nkɔ Misraim nkoyi Israelfo no mfi nkoasom mu. Onyankopɔn paw ne nua Aaron sɛ ɔnyɛ ne kasamafo.​—Exodus 3:1-4:31.

Mose ne Aaron kopue Farao anim, srɛ sɛ ɔmma Israelfo no nkɔhyɛ fã mma Yehowa wɔ sare no so. Misraim hene no pow ahantan so, nanso Yehowa yɛ biribi de gye din ma ne ho. Ɔhomasofo Farao ne ne nkonyaayifo no ntumi nnyina Mose a na Yehowa de no redi dwuma de ɔhaw ahorow a emu yɛ den aba no anim. Nanso ɔhaw ahorow akron no akyi mpo no, Misrini nhyɛsofo no da so pirim ne koma!​—Exodus 5:1-10:29.

Esiane ɔhaw a ɛto so du a na ɛreba no nti, Yehowa hyɛ sɛ Israelfo nni “twam.” Nisan 10 no, ofie biara fa oguammaa anaa abirekyi ba. Wokum aboa no Nisan 14 na wɔde ne mogya petẽ wɔn apongua ho ne atifi. Wɔtõtõ aboa no na wɔde fan nwenenwene ne apiti ka ho di bere a owia akɔtɔ. Bere a mmusuakuw yi nyinaa wɔ wɔn afie no, bɛyɛ ɔdasu mu no Yehowa bɔfo bɛsen fa asase no so nanso otwa Israelfo fi biara ho. Ɔhaw a ɛto so 10 no ba. Misrifo mmakan nyinaa wuwu, a Farao abakan nso ka ho. Eyi akyi no ɔma Israelfo kɔ.​—Exodus 11:1-12:36.

Nanso, ankyɛ na Misrini nhyɛsofo no ne n’asraafo dɔm fii ase tiw wɔn. Nanso Yehowa yɛ ogye nsiesiei denam asase kesee a wɔbɛfa so aguan a ɔma ɛbɛda Ɛpo Kɔkɔɔ no mu no so. Afei, bere a Israelfo akodu ɛpo no akyi dwoodwoo no, Onyankopɔn ma ɛpo no ka Farao ne ne dɔm no hyem na ɛfa wɔn nyinaa. Ɔkwan a ɛyɛ nwonwa a wɔnam so hu Yehowa ne ne tumi kɛse bɛn ni!​—Exodus 12:37-15:21.

Efi hɔ rekɔ Bepɔw Sinai ho wɔ Arabia no, Israelfo sua Yehowa ho nneɛma pii, bere a ɔma nsu nwenenwene dan nsu a ɛyɛ dɛ, ma wɔn mmoko pii, na ɔma wɔn aduan a ɛyɛ dɛ a wɔfrɛ no mana no. Ogyee wɔn fii Misraim nkoasom mu no akyi ɔsram a ɛto so abiɛsa no, wɔbɔ nsra wɔ Bepɔw Sinai ho. Ɛhɔ no wɔn nsa ka Onyankopɔn mmara horow, a “Nsɛm Du” (Mmara Nsɛm Du) no ka ho, na wɔne Yehowa, wɔn Gyefo Kɛse no, yɛ apam.​—Exodus 15:22-24:18; Deuteronomium 4:13.

Mose di nnafua 40 wɔ bepɔw no so a na ɔregye akwankyerɛ a ɛfa nokware som ne Yehowa ntamadan, asɔrefi ketewa, a wobesi no ho. Bere no mu no Israelfo de sika kɔkɔɔ yɛ nantwi ba na wɔsom no. Ofi bepɔw no so sianee no, Mose hu eyi na ne bo fuw ma obubu nsɛm du a wɔakyerɛw no anwonwa kwan so no. Bere a wɔde asotwe a ɛfata ama ahonisomfo nnebɔneyɛfo no akyi no, ɔsan kɔ bepɔw no so na ne nsa ka abopon ahorow foforo wɔ hɔ. Wɔma Mose hu Onyankopɔn anuonyam na ɔte sɛ Yehowa ka sɛ ɔyɛ mmɔborohunufo, nanso ɔmfa asotwe a ɛfata nkame.​—Exodus 25:1-34:7.

Bere a Mose fi bepɔw no so san ba nea ɛto so abien no, ntamadan no si fi ase, sɛnea akwankyerɛ a Yehowa de ama no to. Israel ahofadi afe a edi kan no awiei no, wowiee ntamadan fɛfɛ yi si ne emu siesie nyinaa. Wɔhyehyɛ ntamadan no ne emu biribiara, na Yehowa de n’anuonyam hyɛ no ma.​—Exodus 34:8-40:38.

Ebia saa nneɛma a ɛyɛ nwonwa yi ho nkɔmmɔbɔ akanyan wo kɛse. Nanso ebia Exodus nhoma no a wo ankasa wokenkan bɛma nsemmisa ahorow bi asɔre, na ebia yebenya ebinom ho mmuae bere a yɛbɔ nhoma no afã atitiriw abiɛsa no ho nkɔmmɔ wɔ nsemmisa ne mmuae kwan so no.

‘Nkoa Wɔ Nhyɛso Ase’

•3:1​—Ná Yetro, Mose asew no, yɛ ɔsɔfo bɛn?

Ɛda adi sɛ na Yetro yɛ Midianfo abusua no ti na na ɛyɛ n’asɛyɛde sɛ ɔkyerɛkyerɛ na odi wɔn anim wɔ asetra mu nsɛm ne ɔsom ho nsɛm mu. Esiane sɛ na Midianfo no yɛ Abraham asefo denam Ketura so nti, ná wɔkae Yehowa som a Abraham de kyerɛkyerɛɛ ne fifo nyinaa no. Yɛrentumi nhu sɛnea na abusua no som yɛ kronn fa wɔ Mose nna no mu. Nanso Yetro kyerɛɛ Yehowa ho anisɔ kɛse, ɛwom sɛ Onyankopɔn ampaw no tẽe de.​—Exodus 18:1-24.

•4:11​—So Yehowa na ɔma nneɛma te sɛ anifurae ba?

Dabi, ɛnyɛ Yehowa na ɔma nipadua mu sintɔ ahorow te sɛ anifurae ne asoti nyinaa ba. Eyinom aba esiane sɛ Onyankopɔn ama kwan ma adesamma abusua a wɔyɛ abɔnefo akɔ so atra hɔ, bere a na Adam ne Hawa a wɔyɛ abɔnefo ayera wɔn pɛyɛ na enti tumi a wɔwɔ sɛ wɔbɛwo mma a wɔyɛ pɛ abɔ wɔn no nti. (Hiob 14:4; Romafo 5:12) Bere a wɔn asefo woo mma no, sintɔ ahorow pii, a nipadua mu sintɔ ahorow ka ho, abɛda adi. Ɛdenam saa tebea yi a wama kwan ma aba nti, Onyankopɔn tumi ka ne ho asɛm sɛ “ɔyɛ” mum anaa ɔsotifo anaa onifuraefo. Mmere horow bi nkutoo, wɔ atirimpɔw horow pɔtee bi nti, na Yehowa ama nnipa ani afura anaasɛ wɔatɔ mum. (2 Ahene 6:18; Luka 1:20-22, 62-64; Asomafo no Nnwuma 13:8-11) Sɛ nkurɔfo paw sɛ wɔbɛyɛ asotifo ne anifuraefo honhom mu a, ɔma kwan ma wɔkɔ so wɔ gyidi a wonni ne pow a wɔpow n’asɛm no mu, na saa kwan no so no “ɔyɛ” wɔn asotifo ne anifuraefo honhom mu. (Yesaia •6:9, 10) Nanso Yehowa ama wɔn a wɔhwehwɛ sɛ wɔsɔ n’ani no aso ne wɔn aniwa abue honhom mu. Afei nso, ɛdenam n’Ahenni a, ɛnam Yesu Kristo so no so no, Yehowa Nyankopɔn a ɔwɔ ɔdɔ no bɛma adesamma ade wɔn ho afi ɔhonam fam anifurae ne sintɔ afoforo nyinaa ho.​—Yesaia 61:1, 2; 1 Yohane 4:8; Adiyisɛm 21:1-4.

•4:24-26​—Ná hena nkwa na ɛda asiane mu, na dɛn na ɛbae?

Esiane sɛ saa asɛm yi mu nna hɔ yiye nti, nea yesusuw ne sɛ: Wɔpɛe sɛ wokum Mose babarima no esiane sɛ na wontwaa no twetia nti, sɛnea twetiatwa apam a edi kan no kyerɛ no. (Genesis 17:9-14) Wotwaa abofra no twetia akyi no, Sipora tow nea edi adanse sɛ wayɛ saa no kyenee ɔbɔfo a na wafa ɔdesani nipadua no nan ase, de kyerɛe sɛ biribiara nni hɔ bio a enti ɛsɛ sɛ ne babarima no wu. Sɛ na ɔnam ɔbɔfo no so rekasa akyerɛ Yehowa sɛ “mogya ayeforokunu” a, na ɛte sɛ nea wagye ɔyere gyinabea no atom wɔ twetiatwa apam no mu, a na Yehowa ne okunu no.

•6:3​—Esiane sɛ Abraham, Isak ne Yakob de edin Yehowa no dii dwuma nti, ɔkwan bɛn so na na Onyankopɔn nnaa no adi nkyerɛɛ wɔn?

Edin Yehowa no asekyerɛ ankasa ne “Ɔma Ɛyɛ,” kyerɛ sɛ, sɛnea Onyankopɔn atirimpɔw te. Abraham, Isak ne Yakob de din kronkron no dii dwuma na wonyaa bɔhyɛ ahorow fii Yehowa nkyɛn. Nanso na wonnim anaasɛ wɔanhu Yehowa sɛ nea ɔmaa saa bɔhyɛ ahorow yi baa mu koraa. (Genesis 12:1, 2; 15:7, 13-16; 26:24; 28:10-15) Nanso, na ɛrenkyɛ Yehowa din no bɛda adi kɛse ma n’asefo, Israelfo no, ahu. Ná wɔbɛba abehu nea ɛkyerɛ ankasa bere a Yehowa bedi n’atirimpɔw wɔ Israelfo ho no ho dwuma denam nhyɛso ase a obegye wɔn afi na ɔde asase a wahyɛ ho bɔ no ama wɔn ma apam a ɔne wɔn agyanom yɛe no abam no so.

•7:22​—Ɛhe na Misrifo asɔfo no nyaa nsu a na ennya nnanee mogya no fii?

Ebetumi aba sɛ wɔde nsu a na wɔasaw afi Nil Asubɔnten no mu dedaw ansa na ɔhaw yi reba no dii dwuma. Nanso, ɛte sɛ nea na wobetumi anya nsu a ɛnnanee mogya nso denam abura a na wobetutu wɔ Nil ho no so. (Exodus 7:24) Ebetumi aba sɛ asɔfo no de nsu a ɛte saa dii dwuma wɔ wɔn nkonyaayi no mu.

•12:29​—So wobuu mmarima ne mmea nyinaa sɛ mmakan?

Ná mmarima nkutoo na wobu wɔn sɛ mmakan. Eyi da adi wɔ nokwasɛm a ɛyɛ sɛ, akyiri yi, bere a wɔde Lewifo no maa Yehowa de sesaa mmakan no, mmarima no nkutoo na wɔkan wɔn. (Numeri 3:40-51) Ná Farao ankasa yɛ abakan, nanso wɔankum no efisɛ na ɔwɔ n’ankasa ne fifo, na ɛnyɛ agya no na owui saa Twam anadwo no, na mmom ɔbabarima a ɔyɛ abakan wɔ fie hɔ no.​—Exodus 12:12.

Yehowa Gyee Wɔn

•15:8​—Esiane sɛ Ɛpo Kɔkɔɔ no asorɔkye “gyinae sɛ kuw” nti, so ɛkyenee anaa?

Hela asɛmfua a wɔkyerɛ ase wɔ ha sɛ “gyinae sɛ kuw” no kyerɛ sɛ́ biribi kyenkyen anaasɛ epiw. Wɔ Hiob 10:10 no wɔ e asɛmfua no di dwuma fa nufusu a epiw bere a ɛredan kyiis ho. Enti ɛnkyerɛ sɛ nsu a egyinae te sɛ fasu no kyenee ankasa. Esiane sɛ na biribiara a aniwa hu nsiw nsu no ano nti, na ɛbɛyɛ te sɛ nea apiw anaasɛ akyenkyen na atumi akɔ so agyina. Sɛ mframa a wodii kan bɔɔ din no ano yɛɛ nwini araa ma ɛmaa nsu no kyenee a, akyinnye biara nni ho sɛ anka wɔbɛka awɔw kɛse a ɛbae no ho asɛm.​—Exodus 14:21.

Wɔhyehyɛɛ Wɔn Teokrase Kwan So

•20:5​—So eyi kyerɛ sɛ wɔbɛtwe anokwafo aso?

Dabi, efisɛ onipa biara, bere a wadu mpanyin afe so no, wobu no atɛn sɛnea n’ankasa ne nneyɛe ne ne su te. (Fa toto Hesekiel 18:20 ho.) Nanso, bere a Israel man no dan kɔɔ ahonisom so no, wohuu saa adeyɛ a ɛmfata yi ho amane awo ntoatoaso pii. Wɔantwe anokwafo a wɔwɔ mu no asõ tẽe wɔ ɔman no bɔne ho. ɛwom sɛ ɛkaa wɔn wɔ ɔkwan bi so. Ná ɛyɛ den sɛ saa mudi mu kurafo yi bɛtwe wɔn ho afi ɔman no nyamesom mu nneyɛe a ɛmfata no ho, nanso saa yɛ mu no wonyaa Yehowa dom.

•23:20-23​—Hena ne ɔbɔfo a wɔka ne bo asɛm wɔ ha no, na ɔkwan bɛn so na na Yehowa din “wɔ no mu”?

Yesu Kristo a na ɔwɔ soro ansa na ɔrebɛyɛ ɔdesani no akyi no, wɔnam abɔfo afoforo so de Onyankopɔn mmara maa Mose. (Yohane 1:1-3, 14; Hebrifo 2:2, 3) Nanso ɛyɛ nea ntease wom sɛ yɛbɛka sɛ ɔbɔfo a Yehowa kae sɛ “me din wɔ no mu” no yɛ Yesu bere a na ɔwɔ soro ansa na ɔrebɛyɛ ɔdesani no. Ɔma odii Israelfo anim bere a wɔrekɔ Bɔhyɛ Asase no so no. (1 Korintofo 10:1-4) Yesu, a ne din ase kyerɛ “Yehowa Nkwagye” no na ɔkamfo n’Agya din kyerɛ na ɔhyɛ no anuonyam titiriw.

•32:25​—Dɛn nti na wɔantwe Aaron aso sɛ ɔyɛɛ sika kɔkɔɔ nantwi ba no?

Aaron yɛɛ eyi esiane hyɛ a nkurɔfo no hyɛɛ no nti, na ɛnyɛ pɛ a na ɔpɛ ahonisom nti. Akyiri yi, ɛda adi sɛ ɔhyɛɛ mfɛfo Lewifo no nkuran sɛ wonnyina Yehowa afã nko ntia wɔn a wɔsɔre hyɛɛ Mose saa bere yi no. Wokunkum nnipa 3,000 (ɛda adi sɛ wɔn a na wodi anim no) , nanso na pii di fɔ efisɛ bere a wɔakunkum 3,000 no akyi no, Mose kaee ɔman no sɛ wɔayɛ bɔne kɛse. Enti nnipa pii nyaa Yehowa mmɔborohunu saa bere no, a ɛnyɛ Aaron nkutoo.​—Exodus 32:1-6, 26-35.

•34:26​—Ná dɛn na ahyɛde a wɔde mae sɛ ɛnsɛ sɛ wɔnoa oguammaa anaa abirekyi ba wɔ ne nã nufusu mu no kyerɛ?

Wɔbɔ amanneɛ sɛ na abirekyi ba a wɔnoa wɔ ne nã nufusu mu no yɛ abosonsom amanne bi a wɔkyerɛ sɛ ɛma osu tɔ. Enti ebetumi aba sɛ wɔde mmara yi maa Israelfo na ama wɔatwe wɔn ho afi nneyɛe a ɛtete saa ho. Nanso ɛda adi sɛ saa ahyɛde yi, ne afoforo a wɔde mae no fi nokwasɛm a ɛyɛ sɛ nhyehyɛe pa wɔ hɔ wɔ adeyɛ biara mu no so dua. Yehowa de ɛnã nufusu no mae na ɔde ayɛn ne ba. Na sɛ́ wɔbɛnoa ne ba no wɔ mu no bepira no na akum no, ade a ɛbɔ atirimpɔw a enti wɔde nufusu no mae abira koraa. Ɛte sɛ nea saa mmara yi nso maa Onyankopɔn nkurɔfo a ɔne wɔn ayɛ apam no hui sɛ ɛnsɛ sɛ wɔyɛ ade atirimɔden kwan so, na mmom ɛsɛ sɛ wonya ayamhyehye.

Nea Ɛkyerɛ Ankasa Ma Nnipa Anokwafo

Exodus yɛ kyerɛwtohɔ fɛfɛ a ɛfa nkoasom a emu yɛ den, ogye a ɛfi soro ne teokrase man a wɔhyehyɛɛ ho. Nanso dɛn na afeha a ɛto so 20 yi mu Yehowa adansefo betumi asua afi nhoma yi mu?

Yehowa hyɛ ne nkurɔfo den. Ɔyɛɛ eyi denam Israelfo a ɔhwɛɛ wɔn so na ohyiraa wɔn bere a na wɔyɛ ‘nkoa wɔ nhyɛso ase’ no so. (Exodus 1:7, 14) Saa pɛpɛɛpɛ na Yehowa hyɛ ne nnɛyi adansefo den wɔ ɔtaa a emu yɛ den mpo mu.

Yehowa yɛ Ogyefo a obiara ne no nsɛ. Hwɛ sɛnea eyi daa adi wɔ Ɛpo Kɔkɔɔ no mu! Ne saa nti, ne nnɛyi adansefo betumi anya ahotoso sɛ, sɛ́ kuw no, wobetwa “ahohiahia kɛse” a ɛreba no wɔ Ogyefo Kɛse yi nsa a ɛyɛ den no ase.​—Mateo 24:20-22; Adiyisɛm 7:9, 14.

Yehowa yɛ Onyankopɔn a ɔpɛ teokrase nhyehyɛe. Ne mmara horow no, bere a wodii so no, ɛmaa Israelfo no tumi som no wɔ ɔkwan pa a ahotɔ ne anigye wom na ɛhyɛ ne din anuonyam so. Saa pɛpɛɛpɛ na Yehowa ahyehyɛ n’adansefo a wɔwo ho nnɛ no pɛpɛɛpɛ sɛ anuanom kuw a wowɔ ahotɔ ne anigye. Ɛnde, sɛnea ɛbɛyɛ na yɛanya asomdwoe ne anigye no, ɛsɛ sɛ yɛde nokwaredi som Onyankopɔn sɛ́ teokrase asafo a ɛhyɛ ne din kronkron no anuonyam no fã.​—Dwom 100:1-5; 1 Petro 2:17.

Eyinom ka mfaso horow a yebetumi anya afi Exodus nhoma no mu no ho. Momma ɛnhyɛ yɛn gyidi den bere a yesusuw kyerɛwtohɔ fɛfɛ a ɛfa ɔsoro ogye fi nhyɛso ase ko teokrase nhyehyɛe mu no ho no.

[Kratafa 8 mfoni]

Wɔ Bepɔw Sinai ho no Yehowa hyehyɛɛ Israelfo teokrase kwan so