‘Monyɛ Kronkron Efisɛ Meyɛ Kronkron’
“Monyɛ kronkron, efisɛ me, Awurade mo Nyankopɔn, meyɛ kronkron.”—LEVITICUS 19:2.
1. Henanom ne nnipa bi a wiase no bu wɔn sɛ wɔyɛ kronkron?
WIASE no mu som atitiriw dodow no ara wɔ wɔn a wobu wɔn sɛ wɔyɛ kronkron. Wɔtaa bu Mother Teresa a wagye din kɛse wɔ India no sɛ ɔyɛ kronkron esiane ne ho a watu asi hɔ ama ahiafo no nti. Wɔfrɛ pope no “Agya Kronkron.” Katolekfo binom bu nnɛyi Katolek fekuw Opus Dei no farebae, José María Escrivá, sɛ “kronnyɛ ho nhwɛsofo.” Hindusom wɔ ne swami ahorow, anaa nnipa kronkron. Wɔde nidi maa Gandhi sɛ onipa kronkron. Buddhasom wɔ ne nkokorafo akronkronfo, na Nkramosom nso wɔ ne diyifo kronkron. Nanso sɛ́ obi bɛyɛ kronkron no kyerɛ dɛn ankasa?
2, 3. (a) Dɛn na nsɛmfua “kronkron” ne “kronnyɛ” kyerɛ? (b) Dɛn ne nsɛmmisa bi a ehia sɛ wobua?
2 Wɔakyerɛ asɛmfua “kronkron” no ase sɛ “1. . . . nea ɛbata onyame tumfoɔ ho; kronnyɛ. 2. Nea wɔde ɔsom anaa nidi ma no anaasɛ ɔfata . . . 3. Ɔsom anaasɛ honhom fam nhyehyɛe a emu yɛ den anaasɛ egyina abrabɔ a ɛkyɛn so so a wɔde tra ase . . . 4. Nea wɔahyɛ no agyirae anaa wɔayi asi hɔ ama ɔsom.” Wɔ Bible ntease mu no, kronkronyɛ kyerɛ “ɔsom mu ahotew anaa kurenyennyɛ; kronnyɛ.” Sɛnea Bible nhwehwɛmu nhoma Insight on the Scriptures kyerɛ no, “mfitiase Hebri [asɛmfua] qoʹdhesh no kura adwene a ɛne biribi a woyi si hɔ, ɛda nsow, anaa wohyira so ma Onyankopɔn, . . . yi a woyi biribi si hɔ ma Onyankopɔn som.”a
3 Wɔhyɛɛ Israel man sɛ wɔnyɛ kronkron. Onyankopɔn Mmara kae sɛ: “Mene Awurade mo Nyankopɔn, enti monyɛ mo ho kronkron na monyɛ kronkron, efisɛ meyɛ kronkron.” Ná hena ne kronnyɛ Fibea no? Ɔkwan bɛn so na na Israelfo a wɔnyɛ pɛ betumi ayɛ kronkron? Na asuade ahorow bɛn na yɛn ankasa betumi anya afi ka a Yehowa kae sɛ wɔnyɛ kronkron no mu nnɛ?—Leviticus 11:44.
Sɛnea Israel ne Kronnyɛ Fibea no Dii
4. Ɔkwan bɛn so na Israel yɛɛ Yehowa kronnyɛ ho nhwɛso?
4 Na ɛsɛ sɛ wobu biribiara a Israel de di dwuma wɔ Yehowa Nyankopɔn som mu no sɛ ɛyɛ kronkron na wodi ho dwuma saa. Dɛn nti na na ɛte saa? Efisɛ Yehowa ankasa ne kronnyɛ farebae ne ne fibea. Mose kyerɛwtohɔ a ɛfa ntamadan kronkron ne asɔfotade ne ahyehyɛde ahorow ho no nsɛm a etwa to no se: “Na wɔboroo sika amapa tratraa de yɛɛ abɔnim kronkron no, na wɔkyerɛw so nkyerɛwee sɛ nsɔanode so nkurukyerɛwee sɛ: Kronkron ma Awurade [Kronnyɛ yɛ Yehowa de, NW].” Na wɔde abɔnim hyɛnhyɛn a wɔde sika amapa ayɛ yi fam ɔsɔfo panyin no abotiten ho, na ɛkyerɛe sɛ wɔayi no asi hɔ ama ɔsom kronn soronko bi. Bere a Israelfo no hu sɛnkyerɛnne a wɔakyerɛw a ɛhyerɛn owia so no, na ɛkae wɔn Yehowa kronnyɛ bere nyinaa.—Exodus 28:36; 29:6; 39:30.
5. Ɛyɛɛ dɛn na wotumi buu Israelfo a na wɔnyɛ pɛ no sɛ wɔyɛ kronkron?
5 Nanso na Israelfo no bɛyɛ dɛn ayɛ kronkron? Ná ɛnam wɔne Yehowa ntam abusuabɔ a emu yɛ den ne ɔsom kronn a wɔde bɛma no no so nkutoo. Na wohia “ɔkronkronni” no ho nokware nimdeɛ na ama wɔatumi de kronnyɛ asom no, wɔ honam fam ne honhom fam ahotew mu. (Mmebusɛm 2:1-6; 9:10) Enti na ɛsɛ sɛ Israelfo no de adwene ne koma a emu tew som Onyankopɔn. Na Yehowa ani rennye nyaatwom som biara ho.—Mmebusɛm 21:27.
Nea Enti a Yehowa Kasa Tiaa Israel
6. Malaki bere so Yudafo no buu Yehowa pon dɛn?
6 Wonyaa eyi ho nhwɛso a emu da hɔ bere a na Israelfo no fi koma a enni mũ mu de afɔrebɔde a ɛmfra na atɔ kyima ba asɔrefie hɔ no. Yehowa nam ne diyifo Malaki so kasa tiaa wɔn afɔrebɔde fõ no sɛ: “M’ani nsɔ mo hwee, asafo Awurade na ose, na mo nsam ayɛyɛde nyɛ me fɛ. Nanso muhura ho, sɛ moka sɛ: Awurade pon no, wɔakum ho, na ɛso ade, n’aduan no nso, yɛ ade a wotumi bu no animtiaa. Nso moka sɛ: Hwɛ, ɔbrɛ bɛn ni! Na mopeepee, asafo Awurade na ose, na mode afow ade ne apakye ne ɔyarefo ba, na mode bɛyɛ ayɛyɛde; so megye mo nsam ma ayɛ me fɛ anaa? Awurade na ose.”—Malaki 1:10, 12, 13.
7. Nneɛma a ɛho ntew bɛn na Yudafo no yɛe wɔ afeha a ɛto so anum A.Y.B. mu?
7 Gyama Onyankopɔn nam Malaki so kasa tiaa Yudafo no atoro nneyɛe no wɔ afeha a ɛto so anum A.Y.B. mu. Asɔfo no anyɛ nhwɛso pa, na na wɔn abrabɔ nyɛ kronn ɔkwan biara so. Ná nkurɔfo a wodi wɔn akyi no agow wɔn nnyinasosɛm ahorow mu, ma ɛbae mpo sɛ wogyaagyaee wɔn yerenom na ama wɔatumi awareware abosonsomfo mmabaa. Malaki kyerɛwee sɛ: “Awurade ayɛ wo ne wo mmerantebere mu yere ntam dansefo, ɔno na woatwa no nkontompo,b nanso ɔno ne wo hokafo ne w’apam yere no. . . . Enti monhwɛ mo ho yiye mo honhom ho, na ntwa wo mmerantebere mu yere nkontompo. Na metan awaregu, Awurade, Israel Nyankopɔn na ose.”—Malaki 2:14-16.
8. Ɔkwan bɛn so na nnɛyi adwene a wɔwɔ wɔ awaregyae ho no anya Kristofo asafo no mufo binom so nkɛntɛnso?
8 Wɔ nnɛ mmere yi mu no, awaregyae dodow akɔ soro wɔ aman pii a wɔma awaregyae ho kwan ntɛmntɛm no mu. Aka Kristofo asafo no mpo. Sɛ́ anka ebinom bɛhwehwɛ mpanyimfo mmoa na wɔde adi akwanside ahorow so, na wɔabɔ mmɔden ama wɔn aware agyina no, wɔpa gu hɔ ntɛm dodo. Mpɛn pii no, ɛde nkate fam ɔhaw kɛse ba mmofra no so.—Mateo 19:8, 9.
9, 10. Ɔkwan bɛn so na ɛsɛ sɛ yɛhwehwɛ ɔsom a yɛde ma Yehowa no mu?
9 Sɛnea yɛahu dedaw no, esiane honhom fam tebea bɔne a na ɛrekɔ so wɔ Malaki nna no mu no nti, Yehowa kasa tiaa Yuda aniani som no pefee, na ɔkyerɛe sɛ ɔsom kronn nkutoo na ɛbɛsɔ n’ani. So ɛnsɛ sɛ eyi ma yɛhwehwɛ yɛn som a yɛde ma Yehowa Nyankopɔn a ɔne Amansan Hene, kronnyɛ a edi mu Fibea no mu? Yɛde ɔsom kronn ankasa rema Onyankopɔn? Yekura honhom fam ahotew tebea mu?
10 Eyi nkyerɛ sɛ ɛsɛ sɛ yɛkɔ pɛyɛ a yentumi nnu ho mu, anaasɛ ɛsɛ sɛ yɛde yɛn ho toto afoforo ho. Na mmom ɛkyerɛ sɛ ɛsɛ sɛ Kristoni biara de ɔsom a edi mũ koraa ma Onyankopɔn sɛnea ne nsɛm tebea bɛma kwan. Eyi fa sɛnea yɛn som no yɛ papa ho. Ɛsɛ sɛ yɛn som kronn no yɛ nea ɛkyɛn so—ɔsom kronkron. Ɔkwan bɛn na wɔfa so yɛ saa?—Luka 16:10; Galatifo 6:3, 4.
Koma a Emu Tew De Ɔsom a Ɛho Tew Ba
11, 12. Ɛhe na abrabɔ a ɛho ntew fi ba?
11 Yesu kyerɛkyerɛe pefee sɛ nea ɛwɔ obi komam no bɛda adi wɔ nea ɔka ne nea ɔyɛ mu. Yesu ka kyerɛɛ Farisifo a wɔyɛɛ wɔn ho atreneefo, nanso wɔn ho ntew no sɛ: “Nhurutoa mma! Moyɛ abɔnefo yi, mobɛyɛ dɛn atumi aka nsɛm pa? Na nea ayɛ koma ma abu so no na ano ka.” Akyiri yi, ɔkyerɛe sɛ nnebɔne fi nsusuwii bɔne a ɛwɔ koma, anaa koma mu nipa no mu na ɛba. Ɔkae sɛ: “Nea efi anom fi adi de, efi onipa komam, na ɛno na egu onipa ho fi. Na koma mu na adwemmɔne, awudisɛm, ayerefasɛm, aguamansɛm, awifosɛm, adansekurum ne abususɛm fi. Eyinom ne nneɛma a egu onipa ho fi.”—Mateo 12:34; 15:18-20.
12 Eyi boa yɛn ma yehu na yɛte ase sɛ nneyɛe a ɛho ntew nyɛ nea ɛba prɛko pɛ kɛkɛ anaasɛ enni nnyinaso bi dedaw. Nea ɛde ba ne nsusuwii a ɛho ntew a asie koma no mu—kokoam nkate ne ebia nsusuwii hunu. Ɛno nti na Yesu tumi kae sɛ: “Moate sɛ wɔkae sɛ: Nsɛe aware! Na me de, mise mo sɛ, obiara a ɔhwɛ ɔbaa na ne kɔn dɔ no no, na wafa no ne komam dedaw.” Yɛbɛka no ɔkwan foforo so a, aguamammɔ ne awaresɛe gye ntini wɔ koma no mu ansa koraa na adeyɛ bi akɔ so. Afei, sɛ hokwan bue a, nsusuwii a ɛho ntew no bɛyɛ abrabɔ a ɛho ntew. Aguamammɔ, awaresɛe, nnipa a wokura bɔbeasu koro ntam nna, awifosɛm, abususɛnka ne ɔwae, bɛyɛ nneɛma a efi mu ba no bi.—Mateo 5:27, 28; Galatifo 5:19-21.
13. Nhwɛso horow bɛn na ɛkyerɛ sɛnea nsusuwii a ɛho ntew betumi akowie nneyɛe a ɛho ntew mu?
13 Wobetumi afa akwan horow so akyerɛkyerɛ eyi mu. Wɔ aman bi mu no, kyakyatow adan redɔɔso sɛ nkrane, enti ɛma nnipa nya hokwan pii tow kyakya. Ebetumi atwetwe obi ma ɔde ne ho ahyɛ nea ayɛ ne ho sɛ ɔhaw ano aduru yi mu de abɔ mmɔden sɛ ɔde bedi ne sikasɛm mu haw ahorow ho dwuma. Nnaadaasɛm yi betumi anya onua bi ma wapow Bible nnyinasosɛm ahorow anaa wabrɛbrɛ no ase.c Wɔ tebea foforo mu no, aguamansɛm a abu so kɛse, sɛ́ ɛwɔ TV so, video mu, kɔmputa so, anaa nhoma mu no, betumi de Kristoni akɔ abrabɔ a ɛho ntew mu. Nea ehia ara ne sɛ obebu n’ani agu ne honhom fam akode so, n’ani so bɛtetew no no, na ɔde ne ho ahyɛ ɔbrasɛe mu. Nanso mpɛn pii no, bɔne mu a wɔtɔ no fi ase wɔ adwene mu. Yiw, Yakobo nsɛm no ba mu wɔ tebea horow a ɛtete sɛ eyinom mu: “Wɔsɔ obiara hwɛ a, na ɛyɛ n’ankasa akɔnnɔ a egyigye na ɛdaadaa no na ɛsɔ no hwɛ; ansa na akɔnnɔ no nyinsɛn a, ɛwo bɔne.”—Yakobo 1:14, 15; Efesofo 6:11-18.
14. Ɔkwan bɛn so na nnipa pii atumi afi wɔn abrabɔ a ɛho ntew mu?
14 Anigyesɛm ne sɛ, Kristofo pii a wɔyɛ bɔne esiane mmerɛwyɛ nti no nya nokware ahonu, na mpanyimfo no tumi siesie saafo no bio wɔ honhom fam. Nnipa a ahonu a wɔnkyerɛ nti wotu wɔn no pii adwene ba wɔn ho so awiei koraa ma wɔsan gye wɔn ba asafo no mu. Wobehu sɛnea Satan nyaa wɔn so nkɛntɛnso wɔ ɔkwan a ɛyɛ mmerɛw so bere a wɔmaa kwan maa nsusuwii a ɛho ntew gyee ntini wɔ wɔn koma mu no.—Galatifo 6:1; 2 Timoteo 2:24-26; 1 Petro 5:8, 9.
Adeyɛ a Ɛnna Fam—Yɛn Mmerɛwyɛ So a Yebedi
15. (a) Dɛn nti na ehia sɛ yɛde yɛn ani si yɛn mmerɛwyɛ ahorow so? (b) Dɛn na ebetumi aboa yɛn ma yɛagye yɛn mmerɛwyɛ ahorow atom?
15 Ɛsɛ sɛ yɛbɔ yɛn ho mmɔden hu yɛn ankasa koma yiye. So yɛwɔ ɔpɛ sɛ yɛde yɛn ani besi yɛn mmerɛwyɛ so agye atom na yɛayere yɛn ho adi so? Yɛwɔ ɔpɛ sɛ yebebisa yɛn adamfo bi a ɔka nokware ma wakyerɛ yɛn ɔkwan a yebetumi afa so anya nkɔso, na afei yɛatie afotu no? Sɛ yɛbɛkɔ so ayɛ kronkron a, ɛsɛ sɛ yedi yɛn sintɔ ahorow so. Dɛn ntia? Efisɛ Satan nim yɛn mmerɛwyɛ ahorow. Ɔbɛfa n’anifere akwan no so atwetwe yɛn akɔ bɔne ne abrabɔ a ɛho ntew mu. Ɔnam ne nnɛɛdɛe akwan no so bɔ mmɔden sɛ ɔbɛtetew yɛne Onyankopɔn dɔ mu sɛnea ɛbɛyɛ a yɛn ho rentew mma yɛn so mma mfaso wɔ Yehowa som mu bio.—Yeremia 17:9; Efesofo 6:11; Yakobo 1:19.
16. Akameakame bɛn na na Paulo wɔ?
16 Na ɔsomafo Paulo wɔ n’ankasa haw ne sɔhwɛ ahorow sɛnea odii ho adanse wɔ ne krataa a ɔde kɔmaa Romafo no mu no: “Minim sɛ me mu, ɛne sɛ me honam mu de, papa bi nte mu; efisɛ ɔpɛ de, ɛwɔ me hɔ, na ɔyɛ a mɛyɛ nea eye no de, minhu. Na papa a mepɛ no, menyɛ, na mmom bɔne a mempɛ no, ɛno na meyɛ. . . . Me mu-nipa fam de, m’ani gye Onyankopɔn mmara ho; nanso mihu mmara foforo bi wɔ me honam akwaa mu a ɛne m’adwene mu mmara ko na ɛfa me dommum ma bɔne mmara a ɛwɔ me honam akwaa mu no.”—Romafo 7:18-23.
17. Ɛyɛɛ dɛn na Paulo tumi dii nkonim wɔ ne mmerɛwyɛ ahorow a ɔko tiae no mu?
17 Nea ɛho hia wɔ Paulo asɛm no mu ne sɛ ogyee ne mmerɛwyɛ toom. Ne nyinaa akyi no, otumi kae sɛ: “Me mu-nipa [honhom mu] fam de, m’ani gye Onyankopɔn mmara ho.” Na Paulo dɔ nea ɛteɛ na okyi nea ɛnteɛ. Nanso na biribi da so wɔ hɔ a ɛsɛ sɛ ɔko tia, akodi koro no ara a yɛn nyinaa wɔ—nea etia Satan, wiase no, ne ɔhonam no. Enti yɛbɛyɛ dɛn atumi adi nkonim wɔ ɔko no mu na yɛakɔ so ayɛ kronkron, ayi yɛn ho afi wiase yi ne ne nsusuwii mu?—2 Korintofo 4:4; Efesofo 6:12.
Yɛbɛyɛ Dɛn Akɔ so Ayɛ Kronkron?
18. Yɛbɛyɛ dɛn atumi akɔ so ayɛ kronkron?
18 Ɛnyɛ ɔkwan a ɛyɛ mmerɛw koraa a obi fa so anaa ahopɛ a ɔbɛyɛ na ɛbɛma wayɛ kronkron. Onipa a ɔte saa no bɛhwehwɛ n’abrabɔ ho anoyi bere nyinaa na wabɔ mmɔden de asodi no ato onipa foforo so. Ebia ɛho behia sɛ yesua sɛ yebegye yɛn nneyɛe ho asodi ato yɛn ho so na yɛnyɛ sɛ ebinom a wɔkyerɛ sɛ abusua a wɔwoo wɔn toom anaa awosu na ɛma wɔbaa saa tebea no mu. Nea ɛde ɔhaw no ankasa ba no wɔ onii no koma mu. So ɔdɔ trenee? ɔpɛ kronnyɛ? ɔpɛ Onyankopɔn nhyira? Odwontofo no maa hia a kronnyɛ ho hia no mu daa hɔ bere a ɔkae sɛ: “Yi bɔne ho akwa, na yɛ papa, hwehwɛ asomdwoe, na tiw no.” Ɔsomafo Paulo kyerɛwee sɛ: “Mommma nyaatwom mmfra ɔdɔ mu! Munkyi bɔne, mommata papa ho!”—Dwom 34:14; 97:10; Romafo 12:9.
19, 20. (a) Yɛbɛyɛ dɛn atumi ayɛ yɛn adwene yiye? (b) Egye dɛn na wɔatumi ayɛ kokoam adesua a etu mpɔn?
19 Sɛ yɛde Yehowa adwene susuw nsɛm ho na sɛ yenya Kristo adwene a, yebetumi ‘abata papa ho.’ (1 Korintofo 2:16) Ɔkwan bɛn na wɔfa so yɛ eyi? Ɛdenam Onyankopɔn Asɛm a yebesua adwennwen ho daa no so. Hwɛ mpɛn dodow a wɔde saa afotu yi ama! Nanso yebu no aniberesɛm sɛnea ɛsɛ? Sɛ nhwɛso no, ɛyɛ a wusua nsɛmma nhoma yi ankasa, hwehwɛ Bible mu nsɛm no, ansa na woaba asafo nhyiam no ase? Sɛ yɛka adesua a, ɛnkyerɛ sɛ wobɛsensan nsɛm kakraa bi ase wɔ nkyekyem biara mu kɛkɛ. Wobetumi de bɛyɛ simma 15 ahwɛ adesua asɛm mu asensan ase. Ɛno kyerɛ sɛ yɛasua asɛm no? Nokwarem no, ebetumi agye dɔnhwerew biako anaa abien na wode asua adesua asɛm biara ama honhom fam mfaso a ɛwom no aka wo tirim.
20 Ebia ɛho hia sɛ yɛteɛ yɛn ho so na yegyae TV hwɛ nnɔnhwerew kakraa bi wɔ dapɛn biara mu, na yɛde yɛn adwene si yɛn ankasa kronnyɛ so yiye. Adesua a yɛyɛ no daa no hyɛ yɛn den honhom mu, na ɛkanyan adwene no ma esisi gyinae a ɛfata—gyinaesi ahorow a ɛkowie “abrabɔ kronkron” mu.—2 Petro 3:11; Efesofo 4:23; 5:15, 16.
21. Asɛmmisa bɛn na aka a ɛsɛ sɛ yebua?
21 Asɛmmisa a ɛwɔ hɔ seesei ne sɛ, Dwumadi ahorow ne abrabɔ bɛn bio mu na sɛ́ Kristofo no, yebetumi ayɛ kronkron sɛnea Yehowa nso yɛ kronkron no? Asɛm a edi hɔ no de asɛm a aba wom bɛto gua.
[Ase hɔ nsɛm]
a Watchtower Bible and Tract Society of New York, Inc., na wotintim saa nhwehwɛmu nhoma a ɛyɛ apo abien yi.
b Sɛ wopɛ nkyerɛkyerɛmu a ɛkɔ akyiri a ɛfa nea “nkontompo,” no kyerɛ ho a, hwɛ April 8, 1994 Nyan!, Kratafa 26, “Awaregyae Bɛn na Onyankopɔn Kyi?”
c Wopɛ nsɛm pii a ɛfa nea enti a kyakyatow yɛ abrabɔ a ɛho ntew ho a, hwɛ August 8, 1994 Engiresi Nyan!, a Watchtower Bible and Tract Society of New York, Inc., na wotintimii no nkratafa 14-15.
Wokae?
◻ Ɔkwan bɛn so na wɔdaa kronnyɛ Fibea no adi wɔ Israel?
◻ Akwan bɛn so na na Israelfo som ho ntew wɔ Malaki bere so?
◻ Ɛhe na abrabɔ a ɛho ntew fi ase fi?
◻ Sɛ yɛbɛyɛ kronkron a, dɛn na ɛsɛ sɛ yehu?
◻ Yɛbɛyɛ dɛn atumi akɔ so ayɛ kronkron?