“Sɛ Nkyene Dɛw Yera A”

WƆADI ako wɔ ho. Na wɔde tɔ ade. Wɔ tete China no, sɛ sika kɔkɔɔ nni hɔ a, ɛno na na edi hɔ. Yiw, adesamma fi bere tenten abu nkyene sɛ aguade a ɛsom bo. Ebesi nnɛ no, wɔde yɛ nnuru ahorow a wɔde sa yare ne nea wɔde siw yare ano, na wɔde to aduan mu ma ɛyɛ dɛ wɔ wiase nyinaa, na wɔde kora ade so.

Esiane sɛnea nkyene te ne nneɛma a wɔde yɛ nti, ɛnyɛ nwonwa sɛ wɔde di dwuma wɔ sɛnkyerɛnne kwan so wɔ Bible mu. Sɛ nhwɛso no, na Mose Mmara no hwehwɛ sɛ wɔde nkyene to biribiara a wɔde bɔ afɔre ma Yehowa wɔ afɔremuka so no mu. (Leviticus 2:13) Na ɛnyɛ sɛ nkyene no bɛma afɔre no ayɛ dɛ nti na na wɔyɛ saa, na mmom, ebia na ɛkyerɛ sɛ ɔporɔw biara nni ho.

Wɔ Yesu Kristo Bepɔw so Asɛnka a agye din no mu no, ɔka kyerɛɛ n’asuafo no sɛ: “Mone asase so nkyene.” (Mateo 5:13) Yesu nam saa asɛm yi so kyerɛe sɛ, Onyankopɔn Ahenni ho asɛmpa a wɔka kyerɛ afoforo no betumi akora wɔn atiefo no so, anaasɛ ebegye wɔn nkwa. Nokwarem no, wɔn a wɔde Yesu nsɛm no di dwuma no bɛbɔ wɔn ho ban afi aman a wɔte mu som no abrabɔ ne ne honhom fam ɔporɔw ho.—1 Petro 4:1-3.

Nanso, Yesu de kɔkɔbɔ mae sɛ: “Na sɛ nkyene dɛw yera a, . . . Enye mma hwee bio, gye sɛ wohwie gu, na nnipa tiatia so.” Ɔrekyerɛkyerɛ eyi mu no, Bible ho ɔbenfo Albert Barnes kae sɛ, na nkyene a ɛwɔ Yesu ne n’asomafo no bere so no nyɛ “papa, na nhabamma ne dɔte frafra mu.” Enti sɛ nkyene no yera ne dɛ a, “na ɛbɛka dɔte pii.” Barnes ka sɛ “eyi nyɛ mma hwee . . . gye sɛ wotow gu kwan so ma nnipa tiatia so, sɛnea yetiatia mmosea so no.”

Ɛsɛ sɛ Kristofo hwɛ yiye na bere a wɔde saa kɔkɔbɔ yi redi dwuma no, wɔannyae wɔn baguam adansedi no, anaasɛ wɔamfa wɔn ho anhyɛ nneyɛe bɔne biara mu. Anyɛ saa a wobewu wɔ honhom mu na wɔrenyɛ mma hwee, te sɛ ‘nkyene a ne dɛw ayera no.’