Nyansa a Yɛde “Behu Nea Ɛbɛba Daakye”

“WƆYƐ ɔman a wɔayera wɔn nyansa, na wonni ntease. Sɛ wɔyɛ anyansafo a, anka wɔbɛte eyi ase na wɔahu nea ɛbɛba wɔn so daakye.”—Deuteronomium 32:28, 29, Beck.

Mose na ɔkaa saa nsɛm yi kyerɛɛ Israelfo no bere a na wogyina Bɔhyɛ Asase no hye so no. Na Mose reka bere bi a wɔbɛpow Yehowa na wɔabu wɔn ani agu nea ebefi wɔn nneyɛe no mu aba so no ho asɛm. Wɔ mfehaha pii a edii hɔ mu no, Israel man—a ahemfo pii ka ho—buu wɔn ani guu Nyankopɔn kɔkɔbɔ ahorow so.

Sɛ nhwɛso no, na Salomo, nim Onyankopɔn mmara a ese ɛnsɛ sɛ wɔware abosonsomfo gye Yehowa asomfo nkutoo no. (Deuteronomium 7:1-4) Nanso, ɔwaree “mmea ananafo bebree.” Dɛn na efi mu bae? Bible kyerɛwtohɔ no ka sɛ: “Salomo nkwakoraabere mu no, ne yerenom kom ne koma kodii anyame foforo akyi, na ne koma anni mũ Yehowa ne Nyankopɔn ho sɛ n’agya Dawid koma.” (1 Ahene 11:1, 4) Ɛwom sɛ na Salomo yɛ onyansafo de, nanso ‘wanhu nea na ɛbɛba daakye,’ sɛ ɔyɛ Onyankopɔn so asoɔden a.

Yɛn nso ɛ? Sɛ yedi kan susuw gyinae ahorow a yesisi wɔ asetra mu no ho yiye a, yebetumi akwati ɛyaw kɛse a yebedi no. Sɛ nhwɛso no, wotu Kristofo fo sɛ ‘wɔnhohoro wɔn ho mfi ɔhonam ne honhom mu fi nyinaa mu.’ (2 Korintofo 7:1) Nyansa wɔ eyi mu, nanso nnipa pii nni nyansa a wɔde behu nea sɛ wobu wɔn ani gu Paulo afotu no so a ɛbɛba daakye no. Sɛ nhwɛso no, mmofra pii nom tawa de gu wɔn nipadua ho fĩ, na wosusuw sɛ ɛkyerɛ sɛ wɔn ani abue na wɔanyin. Hwɛ awerɛhosɛm ara a ɛyɛ sɛ akyiri yi, wɔn mu pii nya komayare, ahurututu mu kokoram, anaa esiane ɛno nti wɔhome a ensi so yiye no!

Ɛho hia sɛ yesusuw nea ebefi yɛn gyinaesi ahorow ne yɛn nneyɛe mu aba no ho anibere so. Ntease wom sɛ Paulo kyerɛwee sɛ: “Nea onipa gu no, ɛno ara na obetwa. Nea ogu gu ne honam so no fi honam mu betwa porɔwee, na nea ogu gu honhom so no fi honhom mu betwa daa nkwa.”—Galatifo 6:7, 8.