Mmofra Bisa Sɛ . . .

Mɛyɛ Dɛn Atumi Agyina M’awofo Kasatia Ano?

“AWOFO bebree gye di sɛ ɔkwan pa a wɔnam so bɛboa wɔn mma ma wɔanya nkɔso ne sɛ wɔbɛkasa atia mfomso a wodi.” Saa na Clayton Barbeau kyerɛwee wɔ ne nhoma How to Raise Parents mu.

Sɛ woyɛ abofra a, akyinnye biara nni ho sɛ, ebia w’awofo teɛteɛ wo so daa te sɛ nea wɔma wo aduane daa no. Ɛtɔ mmere bi a eyi tumi yɛ ahoguan de, nanso ɔkasatia a ɛte sɛɛ nyɛ ade bɔne ankasa.a Yɛn nyinaa hia sɛ wɔteɛ yɛn so bere ne bere mu; ɔkasatia a ɛyɛ ne kwan so betumi ayɛ nea eye, nea mfaso wɔ so.

Nanso, ɛtɔ mmere bi a awofo yɛ ade ma ɛtra so, wɔde kasa haw wɔn mma araa kosi sɛ wɔma wɔpaw abaw. (Kolosefo 3:21) Anaasɛ ebia wɔma wɔn nkate di wɔn so na wɔyaw wɔn mma na wogu wɔn anim ase wɔ mfomso nketenkete ho. Nanso ɛmfa ho ɔkwan biara a wɔfa so de ɔkasatia no ma no, mfaso betumi afi mu aba. Ɔkwan biara so no, yiyedi ho hia w’awofo yiye. Sɛnea Bible kae bere tenten a atwam ni no, “ɔdɔfo pira yɛ nokware.” (Mmebusɛm 27:6) Ɛyɛ nokware, esiane sɛ w’awofo bɛn wo yiye no nti, wo ho mfomso a wohu no betumi apira wo kɛse. Nanso sɛ wusua sɛnea wubetumi ayɛ w’ade nyansam wɔ ɔkasatia ho a, wubetumi abrɛ ɛyaw no ase na woanya mu mfaso kɛse.

Ɔkwan a Enye No

Susuw abofra Stephanie osuahu ho. Stephanie ka se: “Bere a me maame fi adwuma baa fie no, ofii ase kasa de haw me wɔ nokwasɛm a ɛne sɛ na minya nsiesiee ofi hɔ anaasɛ menkɔtow wura no ngui no ho. Ɔkae sɛ, ‘Biribiara nni ha a wutumi yɛ no yiye, abonten pue na wunim.’ Me kae sɛ, ‘Ɔkasatia na, wunim.’ Ofii ase teɛteɛm guu me so na mefii n’anim kɔhyɛɛ me dan mu too ɔpon no mu na mante ne nne. Ne bo fuwii kɛse, na ɔteɛteɛm sɛ ɔbɛtwe m’aso.”​—My Parents Are Driving Me Crazy, a Ɔbenfo Joyce L. Vedral kyerɛwee.

So ɛyɛ nea wotaa te? Sɛ saa a ende na wunim sɛnea ɛyɛ yaw sɛ wɔbɛka akyerɛ obi sɛ “wunnim biribiara yɛ” no. Nanso, dɛn na Stephanie nya fii ne bo a efuw ne maame no mu? Nea hwene a wɔbɔ, nteɛteɛm, anaa atuatew yɛ ara ne sɛ ɛma ɔwofo da su horow a enye adi. Abotɔyam kakra biara a wunyae denam wobo a efuwii so no yɛ nea ɛnsɛ hwee sɛ wɔde toto asotwe a ebedi akyi aba ɔkwan biara so no ho a. Bio nso, Kristoni abofra a ɔkasa kyerɛ n’awofo animtiabu so no hu amane honhom mu​—obetumi ahwere Onyankopɔn hɔ anisɔ.​—Mmebusɛm 30:17; Efesofo 6:1, 2.

Ebia Stephanie maame anni nsɛm ho dwuma wɔ ɔkwan pa so. Nanso so ɛrenyɛ nokware sɛ na nokwasɛm bi wɔ asɛm a ɔka tiaa Stephanie no mu anaa? Enti ɛdenam ɔkasatia a ɔpowee so no, ɛnyɛ sɛ Stephanie maa n’asetra mu yɛɛ den nko na mmom ɔhweree hokwan a ɛbɛboa no ma wanya nkɔso a ohia no nso.

Ɛbo a Asɛm ɛ Wotie Som

Bible no de afotu yi ma: “Tie afotu na gye nteɛso, na woahu nyansa w’akyiri nna mu.” (Mmebusɛm 19:20) Yiw, siw ɔpɛ a wowɔ sɛ wubebu wo ho bem, abɔ wo hwene, anaasɛ wobɛka biribi de atia obi no, na fa w’adwene si asɛm pɔtee a wɔreka no ankasa so.’Teen nsɛmma nhoma kaa no saa kwan yi so sɛ: “Fa wo ti tie ɔkasatia na ɛnyɛ wo nkate.”

Saa a wobɛyɛ no boa wo ma wokwati nea wo ɔwofo no reka no a wobɛma ayɛ kɛse anaasɛ wubegugu mu. So ka ara ankasa na wo wofo no reka sɛ wo ho nni mfaso anaa womfata koraa, anaasɛ ka ara na ɔreka kwa sɛ woanka ɔdan a wɔde kar si mu ho aduru yiye anaasɛ woansiesie muka no ho yiye? Sɛ akyiri yi de no yɛ nokware a, dɛn nti na woyɛ ade ma ɛboro so? Bible se: “Obiara nni asase so a ɔyɛ papa bere nyinaa na onni mfomso da.” (Ɔsɛnkafo 7:20, Today’s English Version) Na mpo sɛ wudi nkogu wɔ adwuma pɔtee bi mu a, ɛnkyerɛ sɛ womfata wɔ asetra mu. Enti kae wo ho sɛ wowɔ nneɛma afoforo bi a wutumi yɛ ne su pa afoforo.

Kommyɛ Wɔ ɔnyɛ Ase

Agya bi kae sɛ, “Bere biara a ɔbɛyɛ nkwaseade no, meka sɛ, ‘Ɔkwasea.’” Na sɛ ɛba sɛ wo wofo nso toto wo din horow anaasɛ ɔyaw wo nso ɛ? Nea edi kan, di wo nkate horow so! “Nea ɔkyɛe ne nsɛm hu nimdeɛ, na nea ne honhom dwo yɛ nhumu nipa.”​—Mmebusɛm 17:27.

Mfa w’adwene nsi nea wususuw sɛ ɛnteɛ a ɛwɔ nea wɔaka no mu; ɛno bɛma wo bo afuw kɛse. Mmom no, fa w’adwene si nneɛma a ɛho hia sɛ wunya mu nkɔso no so. Kae wo ho sɛ w’awofo dɔ wo na ebia na ɛnyɛ sɛ wɔwɔ wo ho adwemmɔne (Agya a wɔfaa n’asɛm kae wɔ atifi hɔ no gye toom sɛ: “Ɛnsɛ sɛ mefrɛ no ɔkwasea bere nyinaa. Ɛrenkyɛ na wagye adi sɛ nneɛma ɛresesa.”) Ɛne wɔn nnye akyinnye sɛ ɛba sɛ adwumayɛ ama wɔabrɛ anaasɛ wɔahaw a. “Onipa nimdeɛ twentwɛn n’abufuw ase, na mfomso ho twa yɛ no anuonyam.”​—Mmebusɛm 19:11.b

Bere a kasa a wobɛka bi atia wɔn no renyɛpapa no, wubetumi ama ɛyaw no so atew. Sɛ nhwɛso no, bɔ mmɔden sɛ wobɛka wo wofo no nsɛm no ɔkwan foforo so, na san fa si ɔhaw a aba no so. Sɛ wo papa frɛ wo ɔkwasea, esiane sɛ n’ani anye sɛnea wo popaa abusua no kar ho nti a, bɔ mmɔden bua sɛ: “Wobo afuw esiane sɛ m’ampopa kar no ho yiye nti.” Anaasɛ wubetumi agye kasatia no atom tiawa. (Ɛyɛ nokware, papa. Ɛsɛ sɛ anka mitumi yɛ no yiye sen nea mayɛ yi.”) Anaasɛ bɔ mmɔden bisa akwan pɔtee a wubetumi afa so anya nkɔso. Mmebusɛm 15:1 ka sɛ: “Mmuae bɔkɔɔ sianka anibere, na asɛnnennen hwanyan abufuw mu.”

So wokae Ɔtemmufo Gideon? Bible no ka sɛ odii Israel man no anim ma wodii wɔn atamfo Midianfo so nkonim kɛse bi. Afei Gideon somaa abɔfo kɔɔ Efraim abusuakuw kɛse no nkyɛn kɔsee wɔn sɛ wonsiw Midianfo a wɔadi nkogu a wɔreguan no kwan. Efraimfo no yɛɛ saa, na wɔkyeree Midianfo ahemfo no mu abien. Nanso saa bere no abusuakuw no mufo a wɔyɛ ahantan no ne Gideon “hamee dennen pa.”! Ɛhaw wɔn sɛ wɔamfrɛ wɔn amma wɔankɔ ɔko no bi fi mfiase no.​—Atemmufo 8:1.

Ɛda adi pefee sɛ na saa sobo yi nteɛ. Na sɛ anka Gideon yɛ onipa a ne bo haw no ntɛm a, anka ɔbɛka n’adwene akyerɛ Efraimfo no​—na ɛde ɔmanko aba. Mmom no obuae sɛ: “Dɛn na mayɛ afei a ɛte sɛ mo de? So Efraim mpɛpɛwadi nye nsen Abieser bobetew nyinaa?” (Atemmufo 8:2) Gideon mmuae no kyerɛ sɛ denam Midianfo ahemfo no a wɔakyere wɔn so no, Efraimfo no ayɛ ade kɛse asen nea ɔno Gideon ayɛ. Gideon mmuae a odwo ne ahobrɛase wom no siw ɔkasatia a na ɛmfata no ano na ɛmaa asomdwoe kɔɔ so traa wɔn mu.

Dɛn na yesua fi mu? Sɛ w’awofo kasa tia wo a, kwati sɛ wobɛyɛ ade ma atra so. Komm a wobɛyɛ no betumi ama woakwati sɛ wobɛka anaasɛ wobɛyɛ biribi a akyiri yi wubenu wo ho wɔ ho.​—Fa toto Ɔsɛnkafo 10:4 ho.

Biribi a Wobɛyɛ

Nanso, nsɛm a wɔka no bɔkɔɔ nkutoo nnɔɔso. Yɛ biribi! Kae, “nyansa a efi soro no de . . . ɛwɔ asoɔmmerɛw.” (Yakobo 3:17) Fi ase siesie ɔdan no mu, popa kar no ho, yi wo ti nhwi no, yɛ nsakrae wɔ ntade a wohyɛ mu, anaasɛ fi ase yɛ nsakrae biara a w’awofo pɛ sɛ woyɛ no. Eyi ne ɔkwan a ɛsen biara a wobɛfa so asiw wo ho mfomso a wɔbɛkɔ so anya no ano.

Nanso, ebia nokwarem no na wo ne wɔn nyɛ adwene wɔ ɔkasatia no ho. Efisɛ, awofo a woye sen biara no mpo tumi fom. Nanso sɛ́ anka wobɛbɔ mmɔden adi nsɛm ho dwuma denam nteɛteɛm so no, twɛn ‘bere a ɛfata’ no, na afei wo ne w’awofo nkasa. (Mmebusɛm 15:23) Mmebusɛm 13:10 ka sɛ, “Wɔn a wotie afotu, nyansa ne wɔn na ɛte.” Fa wo haw horow to w’awofo anim odwo so, te sɛ obi a n’ani afi, na ma w’awofo no nhu nea enti pɔtee a wone wɔn nyɛ adwene. Ebia wubetumi adan wɔn ti ma wɔne wo ayɛ adwene. Sɛ ɛnte saa a, ebia gye ara na ɛsɛ sɛ wokɔso gye wɔn tumidi no tom sɛ awofo.​—Mmebusɛm 6:20.

Nanso, awiei koraa no, wɔn nteɛso a wubegye atom no betumi ayɛ mfaso ama wo. Yesu mpo a ɔyɛ pɛ no ‘suaa amane a ohui no mu osetie.’ (Hebrifo 5:8) Wo nso wowɔ asuade a ɛsom bo bebree sua. Woasua sɛnea wogyina akyerɛkyerɛfo kasatia ano dedaw. Daakye no, wubetumi ahyia adwumawuranom a wone wɔn bedi nsɛm. Sua sɛnea wogyina ɔkasatia ano mprempren.

Bere kɔ so no wubetumi abɛte w’awofo nsusuwii no ase mpo. Aberante bi a ɔde James ka wɔ n’awofo ho sɛ: “Ná wɔyɛ katee wɔ me so wɔ nneɛma te sɛ sukuu, asafo, ne ofie nnwuma mu. Ɛtɔ dabi a na mintumi nnye m’ahome mpo! Nanso minyinii yi, mabehu sɛ mmɔdenbɔ gye adwumaden.” So ɛno nyɛ asuade a ɛsom bo a osuae? Na sɛ wusua sɛnea wogyina ɔkasatia ano a, wo nso wubenya asuade ahorow a ɛsom bo saa ara.

[Ase hɔ asɛm]

[Mfonini wɔ kratafa 20]

Nteɛteɛm, hwene a wobɔ, anaasɛ wo ho bem a wubu taa ma ɔwofo da su horow a enye adi

[Mfonini wɔ kratafa 20]

Wo wofo a wubebisa no akwan a wobɛfa so atumi anya nkɔso no tumi yi ɛyaw a ɛwɔ ɔkasatia mu