Enti wɔn baanu nkutoo toaa akwantu no so wɔ kwantenten a ɛkɔ Betlehem no so. Ebinom kyerɛ sɛ ɛbɛyɛ sɛ egyee wɔn nnawɔtwe ansa na wɔredu baabi a wɔrekɔ. Nanso nea ɛbɛyɛ biara no, obiara kyekyee ne yɔnko werɛ.

Afei mmea baanu no koduu Betlehem; ɛyɛ akuraa a ɛwɔ Yerusalem anafo fam, na efi hɔ rekɔ Yerusalem yɛ kilomita 10. Wutumi hu sɛ bere bi na Naomi ne n’abusua wɔ din wɔ saa kurow ketewa no mu, efisɛ bere a Naomi koduu hɔ no, obiara tee sɛ waba. Mmea no te a, wɔbɛhwɛ no bisa sɛ, “Naomi ni?” Ɛbɛyɛ sɛ ofi Moab bae no, na wasesa, na n’anim ne ne nipadua nyinaa kyerɛ sɛ wakɔbrɛ, na awerɛhow ahyɛ no ma.—Rut 1:19.