• Ɔmaa Ne Nyankopɔn Kyekyee Ne Werɛ
    Suasua Wɔn Gyidi

    • 20, 21. (a) Ka nea Elia hui bere a na ogyina ɔbodan no ano wɔ Bepɔw Horeb so no ho asɛm. (b) Dɛn na sɛnea Yehowa daa ne tumi adi no maa Elia hui?

      20 Dɛn na Yehowa yɛe de boaa Elia wɔ ehu a na aka no ne nneɛma a na ɛhaw no no ho? Ɔbɔfo no ka kyerɛɛ Elia sɛ ommegyina ɔbodan no ano. Ɔyɛɛ saa a na onnim nea na ɛrebobɔ ba. Mframa kɛse bi bɔe! Ɛbɛyɛ sɛ ɛyɛɛ dede paa, efisɛ na ano yɛ den araa ma ɛpaapaee mmepɔw ne abotan mu. Wo de, twa Elia ho mfonini sɛ ɔde ne nsa asiw n’anim na bere koro no ara okura aboa nhwi atade yuu a emu yɛ duru no mu na mframa rebɔ kyekyere ne ho no hwɛ. Afei na ɛsɛ sɛ ɔbɔ mmɔden sɛ obegyina ne nan so yiye efisɛ na asase a ogyina so no rewosow biribiri—asasewosow sii ɔmantam no mu! N’ani so antetew no koraa na ogya kɛse bi bɔ faa hɔ ma ɔsan kɔhyɛɛ ɔbodan no mu sɛnea ɛbɛyɛ a ɔhyew a ano yɛ den no renka no.—1 Ahe. 19:11, 12.

      Elia gyina ɔbodan bi ano, na ɔde ne ho ahintaw sɛnea ɛbɛyɛ a ogya no renhyew no

      Yehowa de ne tumi kɛse no kyekyee Elia werɛ, na ɔhyɛɛ no den

      21 Kyerɛwnsɛm no ka sɛ na Yehowa nni mframa a ɛbɔe, asase a ɛwosowee, anaa ogya a ɛbɔ faa hɔ no mu biara mu. Ná Elia nim sɛ Yehowa nyɛ atoro nyame bi te sɛ Baal a na n’asomfo a wadaadaa wɔn no kamfo no sɛ “ɔte omununkum so,” anaasɛ ɔma osu tɔ no. Yehowa ne Onii a tumi a ɛwɔ amansan yi mu nyinaa fi no, na ɔsan nso wɔ tumi koraa sen biribiara a wabɔ. Ɔsoro mpo ntumi nkora no! (1 Ahe. 8:27) Ɔkwan bɛn so na eyinom nyinaa boaa Elia? Kae sɛ, na ehu aka no. Enti sɛ na Onyankopɔn a ɔne Yehowa, Onyankopɔn a ɔyɛ tumi nyinaa Wura no wɔ Elia afã a, ɛnde dɛn na na Ahab ne Yesebel betumi de ayɛ no?—Monkenkan Dwom 118:6.

      22. (a) Ɔkwan bɛn so na ‘ɛnne bi a ɛwɔ fam a ɛkasa kyerɛɛ Elia bɔkɔɔ’ no ma ɔsan nyaa awerɛhyem sɛ ɔsom bo? (b) Ɛbɛyɛ sɛ hena na saa ‘ɛnne a ɛwɔ fam a ɛkasae bɔkɔɔ’ no fi no? (Hwɛ ase hɔ asɛm no.)

      22 Bere a ogya no twaam no, ɛhɔ yɛɛ dinn, na Elia tee sɛ ‘ɛnne bi a ɛwɔ fam rekasa bɔkɔɔ.’ Ɛmaa Elia san kasae bio, na ɔkaa nneɛma a ɛhaw no no ne mprenu so.a Ɛbɛyɛ sɛ saa asɛm a ɔkae no maa ne koma tɔɔ ne yam kɛse. Nanso, akyinnye biara nni ho sɛ, asɛm a edi hɔ a saa ‘ɛnne a ɛwɔ fam a ɛkasa kyerɛɛ Elia bɔkɔɔ’ no kae no kyekyee ne werɛ paa. Yehowa san maa Elia awerɛhyem sɛ ɔyɛ ne somfo a ɔsom bo paa. Ɔkwan bɛn so? Onyankopɔn maa Elia huu ɔko a na ɔde reba Baal som so wɔ Israel no ho nsɛm pii. Ɛda adi sɛ, na Elia mmrɛ ngui, efisɛ na Onyankopɔn rebɛyɛ biribi atia Baal som. Bio nso, na Elia bedi akoten wɔ saa ɔko no mu efisɛ Yehowa de akwankyerɛ pɔtee bi maa no sɛ ɔnsan nsim nkɔyɛ ho adwuma.—1 Ahe. 19:12-17.

  • Ɔmaa Ne Nyankopɔn Kyekyee Ne Werɛ
    Suasua Wɔn Gyidi

    • a Ɛbɛyɛ sɛ honhom abɔde a wɔde “Yehowa asɛm” a ɛwɔ 1 Ahene 19:9 no somaa no no ara na saa ‘ɛnne a ɛwɔ fam a ɛkasae bɔkɔɔ’ no fi no. Wɔka honhom abɔde yi ho asɛm tiawa wɔ 1 Ahene 19:15 sɛ, ɛyɛ “Yehowa.” Ebia yɛbɛkae ɔbɔfo a Yehowa ma odii Israelfo no anim wɔ sare no so ne nea Onyankopɔn kaa no ho asɛm sɛ: “Me din da no so” no. (Ex. 23:21) Nokwarem no, yɛrentumi nsi no pi nka sɛ ɔbɔfo yi yɛ Yesu, nanso ɛsɛ sɛ yɛhyɛ no nsow sɛ ansa na Yesu reba asase so no na ɔno ne “Asɛm no,” Ɔkasamafo titiriw ma Yehowa asomfo no.—Yoh. 1:1.