Wɔyɛɛ Yehowa Apɛde

Elia Ma Nokware Nyankopɔn no So

ƆNE ɔbarima a na wɔrehwehwɛ no akye paa wɔ Israel. Akyinnye biara nni ho sɛ na ɔhene no nya no a obekum no. Ná hena ne ɔbarima a wɔrehwehwɛ no akyere no yi? Yehowa diyifo, Elia.

Ná ɔhene Ahab ne ne yere bosonsonni Isebel ama Baalsom anya nkɔso wɔ Israel. Ne saa nti, na Yehowa ama ɔpɛ asi asase no so a na adu n’afe a ɛto so anan so. Isebel a na ne bo afuw no yɛɛ nhyehyɛe sɛ ɔbɛma wɔakunkum Yehowa adiyifo, nanso na Elia titiriw na Ahab rehwehwɛ no. Elia na bɛboro mfe abiɛsa a na atwam no, ɔka kyerɛɛ Ahab sɛ: “Obosu anaa osu rentɔ mfe yi mu gye sɛ ɛnam m’asɛm so!” (1 Ahene 17:1) Ná ɔpɛ a ɛbae no da so ara gyina mu.

Wɔ tebea a ɛyɛ hu yi mu no, Yehowa ka kyerɛɛ Elia sɛ: “Fa wo ho kɔkyerɛ Ahab, na mɛma osu atɔ asase so.” Elia tiee Yehowa ahyɛde de ne nkwa too asiane kɛse mu.—1 Ahene 18:1, 2.

Atamfo Abien Hyiam

Bere a Ahab huu Elia no, obisae sɛ: “So wo a wohaw Israel no ni?” Elia fi akokoduru mu buae sɛ: “Menhaw Israel ɛ, na mmom wo ne w’agya fi sɛ moagyaw [Yehowa, NW] mmara nsɛm, na woakodi Baalim akyi.” Afei Elia hyɛe sɛ wɔnkɔboaboa Israelfo nyinaa ne “Baal adiyifo ahannan aduonum no, ne Asera adiyifo ahannan” no ano wɔ Kamel Bepɔw so. Afei Elia kasa kyerɛɛ nnipakuw no sɛ: “Da bɛn na mubehinhim nsɛm abien ntam akosi?a Sɛ [Yehowa, NW] ne Nyankopɔn a, munni n’akyi; sɛ Baal nso a, munni n’akyi ɛ!”—1 Ahene 18:17-21.

Ɔman no yɛɛ dinn. Ebia wohuu mfomso a wodii sɛ wɔamfa ɔsom kronn amma Yehowa no. (Exodus 20:4, 5) Anaasɛ ebetumi aba sɛ na wɔn ahonim awu araa ma na wonhu mfomso biara a ɛyɛ sɛ wɔbɛkyɛ wɔn nokwaredi mu ama Yehowa ne Baal. Sɛnea ɛte biara no, Elia ka kyerɛɛ ɔman no sɛ wɔmfa anantwinini abien mmra—Baal adiyifo no de biako na ne de nso biako. Ná wobesiesie anantwinini abien no nyinaa de abɔ afɔre, nanso na wɔrensɔ ogya biara. Elia kae sɛ: “Mommɔ mo nyame din, na me nso memmɔ [Yehowa, NW] din, na onyame a ɔde ogya begye so no, ɔno ne Nyankopɔn.”—1 Ahene 18:23, 24.

Wɔma Yehowa So

Baal asomfo no fii ase ‘huruhuruw twaa afɔremuka a wɔyɛe no ho hyiae.’ Wɔteɛteɛɛm anɔpa mũ nyinaa sɛ: “Baal, gye yɛn so!” Nanso Baal annye so. (1 Ahene 18:26) Afei Elia fii ase yii wɔn ahi sɛ: “Momma mo nne so mfrɛ na onyame ne no!” (1 Ahene 18:27) Baal adiyifo no fii ase de nkrante ne mpeaw bobɔɔ wɔn ho akam—ade a abosonsomfo taa yɛ na ama wɔn anyame ahu wɔn mmɔbɔ.b—1 Ahene 18:28.

Afei owigyinae twaam, na Baal asomfo no kɔɔ so ‘kɔmee’—asɛm a ekura adwene a ɛne sɛ wɔyɛɛ ade te sɛ abɔdamfo, na wɔanna ahosodi adi. Afei eduu anwummere no, Elia ka kyerɛɛ ɔman no nyinaa sɛ: “Muntwiw mmɛn me!” Wɔn nyinaa gyinaa hɔ hwɛɛ Elia haa bere a osiesiee Yehowa afɔremuka a abubu no, twaa ho ka hyiae, twitwaa anantwinini no asinasin de guu afɔremuka a nnyina gu so no so. Ɛno akyi no, ɔde nsu (akyinnye biara nni ho sɛ ɛpo nsu a wonya fii Mediterranea Po no mu) fɔw nantwinini no, afɔremuka no, ne nnyina no twɔnn. Afei Elia bɔɔ Yehowa mpae sɛ: “Nnɛ ma wonhu sɛ wo na wone Nyankopɔn Israel mu na mene w’akoa, na w’asɛm so na mayɛ ade yi nyinaa. Gye me so [Yehowa, NW], gye me so, na ɔman yi nhu sɛ wo [Yehowa, NW] ne Nyankopɔn, na wo nso woama wɔn koma asan akyiri aba.”—1 Ahene 18:29-37.

Mpofirim ara, ogya fi soro “bɛhyew ɔhyew afɔre no ne nnyina no ne abo ne dɔte no, na ɛyow nsu a ɛwɔ ɔkã no mu no.” Ntɛm ara na ɔman a na wɔrehwɛ no butubutuu fam kae sɛ: “[Yehowa, NW], ɔno ne Nyankopɔn! [Yehowa, NW], ɔno ne Nyankopɔn!” Na Elia hyɛe ma wɔkyeree Baal adiyifo no de wɔn sian kɔɔ Kison asubɔn ho, na wokunkum wɔn wɔ hɔ.—1 Ahene 18:38-40.

Asuade Ma Yɛn

Elia daa akokoduru a ɛte sɛ nea ɛboro nnipa de so adi. Nanso, Bible kyerɛwfo Yakobo ma yɛn awerɛhyem sɛ na “Elia yɛ onipa te sɛ yɛn ara.” (Yakobo 5:17) Ná ehu ne dadwen betumi aba ne so. Sɛ nhwɛso no, bere a akyiri yi Isebel kaa ntam sɛ obetua Baal adiyifo a wokunkum wɔn no so ka no, Elia kɔbɔɔ ne ho aguaa, na ɔsrɛɛ Yehowa wɔ mpaebɔ mu sɛ: “Ɛdɔɔso, afei, [Yehowa, NW], fa me kra.”—1 Ahene 19:4.

Yehowa amfa Elia kra amma wanwu. Mmom, ofi mmɔborohunu mu boaa no. (1 Ahene 19:5-8) Ɛnnɛ, Onyankopɔn asomfo betumi anya awerɛhyem sɛ Yehowa bɛyɛ saa ara ama wɔn bere a wohyia dadwen a emu yɛ den a ebia efi ɔtaa no. Nokwarem no, sɛ wɔbɔ mpae srɛ Yehowa mmoa a, obetumi ama wɔn “tumi a ɛboro so,” na sɛ ɛba sɛ ‘ade nyinaa mu wohiahia wɔn ho a,’ wɔn ‘ahome antew.’ Enti ɔbɛboa wɔn ma wɔagyina, te sɛ Elia.—2 Korintofo 4:7, 8.

[Ase hɔ nsɛm]