Onyankopɔn yɛɛ Elisa abisade no maa no anaa? Bible ka sɛ: “Bere a wɔnam rekɔ na wɔrekasa no, hwɛ! ogya teaseɛnam ne ogya apɔnkɔ bɛtetew wɔn baanu ntam, na Elia faa ahum mu kɔɔ soro. Saa bere no nyinaa na Elisa rehwɛ nea ɛrekɔ so.”a Saa kwan yi na Yehowa faa so buaa Elisa abisade no. Elisa hui sɛ wɔrefa Elia akɔ, onyaa Elia honhom mu mmɔho abien, na obesii n’anan yɛɛ Onyankopɔn diyifo.​—2 Ahe. 2:11-14.

Nea Elisa hui bere a Elia faa ahum mu kɔɔ soro no maa ne ho dwiriw no paa. Obiara a obehu ogya teaseɛnam ne ogya apɔnkɔ bɛtaa n’anom! Eyi maa Elisa hui sɛ Yehowa ayɛ n’abisade no ama no. Ɛnnɛ yɛnhwɛ kwan sɛ Onyankopɔn rebua yɛn mpaebɔ a, yebehu ogya teaseɛnam ne ogya apɔnkɔ, nanso yehu adanse a ɛkyerɛ sɛ Onyankopɔn de tumi kɛse yɛ adwuma ma n’apɛde yɛ hɔ. Sɛ yɛhwɛ sɛnea Yehowa rehyira n’ahyehyɛde no fã a ɛwɔ asase so no a, ɛte sɛ nea yehu sɛ ne teaseɛnam no rekɔ n’anim.​—Hes. 10:9-13.