Sunem—Ɔdɔ ne Basabasayɛ Hyɛɛ no Agyirae

SUNEM kurow no da Yesreel asasetaw donkudonku no apuei fam pɛɛ, wɔ Galilea Kesee fam. Wodii Bible abakɔsɛm mu ako atitiriw abien wɔ kurow ketewa yi mu, nanso na agye din nso sɛ beae a wɔwoo mmea baanu bi a wɔyɛɛ nokware dɔ ho nhwɛso.

Ná Sunem akyi na bepɔw bi a wosusuw sɛ ɛyɛ More si, na na Bepɔw Gilboa si asasetaw no ntentenso bɛyɛ kilomita 8. Ná asasebere a nsu wɔ so—Israel nsase a ɛsow aba sen biara no nyinaa mu biako—da mmepɔw abien yi ntam.

Saa asasebere a atwa Sunem ho ahyia yi so na wɔkaa ɔdɔ ho nsɛm a ɛyɛ dɛ sen biara no mu biako—Salomo Dwom. Saa dwom yi ka ababaa hoɔfɛfo bi a na ɔte akuraase a ɔpɛe sɛ ɔware n’adamfo guanhwɛfo mmom sen sɛ ɔbɛpene so ama Ɔhene Salomo na wabɛyɛ ne yerenom mu biako no. Salomo de ne nyansa ne n’ahode nyinaa dii dwuma sɛ obenya ne dɔ. Ɔkamfoo no mpɛn pii sɛ: “Ɛhena ne oyi [ɔbea yi, NW] a opue sɛ adekyee, ne ho yɛ fɛ sɛ ɔsram, ne ho tew sɛ owia?” Na ɔhyɛɛ no bɔ korɔkorɔɔ no sɛ ɔde agude biara a ohia bɛma no.—Nnwom mu Dwom 1:11; 6:10.

Nea ɛbɛyɛ na Salomo ama ɔbea no ahu sɛnea adehye asetra te no, ɔfaa no kaa ne ho kɔɔ Yerusalem sɛ n’asomfo mu biako, a na n’asraafo pa a wɔsen biara 60 ka wɔn ho. (Nnwom mu Dwom 3:6-11) Ɔde ɔbea no kɔtraa n’ahemfie, ahemfie a ɛyɛ fɛ yiye a Seba hemmaa hui a “ne home tew no” no.—1 Ahene 10:4, 5.

Nanso ababaa a ofi Sunem no dii oguanhwɛfo abarimaa no nokware. Ɔkae sɛ: “Me dɔfo wɔ mmabanin ntam sɛ akutu a ɛwɔ kwae mu nnua ntam.” (Nnwom mu Dwom 2:3) Salomo mfa ne bobe nturo apem. Ná ababaa no bobeturo biako—ne ne dɔfo—no ara ye ma no. Na ne dɔ ntumi nhinhim.—Nnwom mu Dwom 8:11, 12.

Ɔbea hoɔfɛfo foforo traa ase wɔ Sunem. Yennim sɛnea na ne nipaduam ahoɔfɛ te, nanso akyinnye biara nni ho sɛ na ɔwɔ komam ahoɔfɛ. Bible ka sɛ ‘ɔhaw ne ho’—anaa ɔbrɛɛ ne ho—na ama watumi ama odiyifo Elisa aduan ne dabere daa.—2 Ahene 4:8-13.

Yebetumi ayɛ Elisa a na watwa kwan tenten abrɛ a ɔde anisɔ rehyɛn pia a ɔbea no ne ne kunu asiesie ama no no mu ho mfonini wɔ yɛn adwenem. Ɛbɛyɛ sɛ ɔkɔɔ wɔn fie hɔ mpɛn pii, efisɛ mfe 60 na ɔde yɛɛ ne som adwuma no. Dɛn nti na Sunemni bea yi hyɛɛ Elisa sɛ ɔmmɛtra wɔn fie bere biara a obetwam wɔ saa kwan no so no? Efisɛ na obu Elisa adwuma no. Saa odiyifo mmɔdenbɔfo hobrɛasefo yi dii dwuma sɛ ɔman no ahonim, kaee ahemfo, asɔfo, ne mpapahwekwa wɔ wɔn asɛyɛde ho sɛ wɔnsom Yehowa.

Akyinnye biara nni ho sɛ na Sunemni bea no ka nnipa a na wɔn ho asɛm wɔ Yesu adwenem no ho, bere a ɔkae sɛ: “Nea ogye odiyifo odiyifo din mu no, ne nsa bɛka odiyifo akatua.” (Mateo 10:41) Yehowa maa ɔbea a osuro Onyankopɔn yi akatua soronko. Ɛwom sɛ na ɔnwo mfe pii de, nanso ɔwoo ɔbabarima. Mfe bi akyi no, onyaa Onyankopɔn mmoa nso bere a mfe ason kɔm bi yɛɛ asase no pasaa no. Kyerɛwtohɔ a ɛka koma yi kae yɛn sɛ yɛn soro Agya ani mpa ayamye a yeyi no adi kyerɛ Onyankopɔn asomfo no so da.—2 Ahene 4:13-37; 8:1-6; Hebrifo 6:10.

Akodi Atitiriw Abien

Ɛwom sɛ yɛkae Sunem sɛ mmea anokwafo baanu yi kurom de, nanso wodii ako atitiriw abien a ɛsakraa Israelfo abakɔsɛm wɔ hɔ. Ná beae bi a eye ma akodi bɛn hɔ—asasetaw a ɛda mmepɔw More ne Gilboa ntam no. Na Bible mmere mu asahene bɔ nsra wɔ mmeae a nsu ne pempe a wobehintaw akyi wɔ, na sɛ wobenya a, baabi a ɛbɛma wɔahu asasetaw bi a ɛso wo na wobenya baabi ama wɔn dɔm, apɔnkɔ ne nteaseɛnam agyinagyina bere nyinaa. Ná Sunem ne Gilboa yɛ baabi a ɛte saa.

Wɔ atemmufo no mmere mu no, Midianfo, Amalekfo, ne afoforo asraafodɔm 135,000 bɔɔ nsra wɔ asasetaw a ɛda More anim no so. Ná wɔn yoma “dodow te sɛ mpoano nhwea.” (Atemmufo 7:12) Wɔn a na wɔrebehyia wɔn wɔ asasetaw no so wɔ Harod asubura ho wɔ Bepɔw Gilboa ase ne Israelfo a na Ɔtemmufo Gideon a na ɔwɔ asraafo 32,000 pɛ da wɔn ano no.

Wɔ nna a na edi ɔko bi anim mu no, na ɔfã biara bɔ mmɔden bu ɔfoforo abam. Ná fɛw a asraafodɔm di, yoma ahorow a wɔde di ako, nteaseɛnam, ne apɔnkɔ betumi ama ehu aka asraafo a na wɔnam fam no. Akyinnye biara nni ho sɛ, Midianfo—a na wɔaboaboa wɔn ho ano dedaw bere a na Israelfo retoto nneɛma—no, yɛɛ ahwɛde a na ɛyɛ hu. Bere a Gideon bisae sɛ, “Hena na osuro na ne koma atu?” no, n’asraafo no abiɛsa biara mu abien fii akonno.—Atemmufo 7:1-3, NW.

Afei Israel asraafo 10,000 pɛ na wɔkae a na wɔhwɛ wɔn atamfo asraafo 135,000 a wɔwɔ asasetaw no ntentenso no, na ankyɛ na Yehowa huan Israel asraafo no dodow so ma wɔbɛkaa 300 pɛ. Sɛnea Israelfo amammerɛ te no, wɔkyɛɛ kuw ketewa yi mu abiɛsa. Ɔdasu mu no, wɔkyekyɛɛ wɔn mu ma wogyinagyinaa atamfo no nsra afã abiɛsa. Afei wɔ Gideon akwankyerɛ ase no, asraafo 300 no bobɔɔ nkuruwa a ɛkatakata wɔn agyatɛn no so no, momaa agyatɛn yi so, na wɔteɛteɛɛm sɛ, “[Yehowa, NW] ne Gideon nkrante!” Wɔkɔɔ so hyenhyɛnee wɔn ntorobɛnto no. Wɔ ɔdasu mu no, asraafo a wɔabɔ birim a na wɔadi afra no susuwii sɛ asraafo 300 no atow ahyɛ wɔn so. Yehowa maa wɔn mu biara sɔre tiaa ne yɔnko, na “nsra no nyinaa bɔɔ wi, na wɔteɛteɛɛm na woguanguanee.”—Atemmufo 7:15-22; 8:10.

Ɔko a ɛto so abien kɔɔ so wɔ baabi a ɛbɛn Sunem wɔ Ɔhene Saul bere so. Bible bɔ amanneɛ sɛ “Filistifo no boaboaa wɔn ho ano bae bɛbɔɔ nsra Sunem. Na Saul boaboaa Israelfo nyinaa ano, na wɔbɔɔ nsra Gilboa,” sɛnea Gideon asraafo yɛe mfe bi a atwam no pɛpɛɛpɛ. Nanso na Saul a ɔnte sɛ Gideon no nni Yehowa mu ahotoso pii, ma enti ɔkɔɔ abisa wɔ ɔsamanfrɛfo bi hɔ wɔ En-dor. Bere a ohuu Filistifo nsra no, “osuroe, na ne koma tui papaapa.” Israelfo guanee, na wodii nkogu kɛse wɔ ɔko no mu. Saul ne Yonatan nyinaa hweree wɔn nkwa.—1 Samuel 28:4-7; 31:1-6.

Saa na ɛyɛe ma ɔdɔ ne basabasayɛ, Yehowa ne adaemone mu ahotoso nyinaa bɛhyɛɛ Sunem abakɔsɛm agyirae. Wɔ saa asasetaw donkudonku yi mu no, mmea baanu de nokwaredi daa ɔdɔ ne ahɔhoyɛ su adi, na Israel akannifo baanu dii ako atitiriw abien wɔ hɔ. Nhwɛso ahorow anan no nyinaa kyerɛ nea enti a ɛho hia sɛ yɛde yɛn ho to Yehowa a otua wɔn a wɔsom no ka bere nyinaa no so.

[Kratafa 31 mfonini]

Ɛnnɛyi akuraa Sulam a ɛwɔ beae a na tete Sunem wɔ, a More si akyi

[Asɛm Fibea]

Pictorial Archive (Near Eastern History) Est.