Nsɛmmisa a Efi Akenkanfo Hɔ

• So Lusifer yɛ din a Bible no de ma Satan?

Edin Lusifer no pue pɛnkoro wɔ Kyerɛwnsɛm no mu ne Bible nkyerɛase ahorow bi pɛ mu. Sɛ nhwɛso no, King James Version no kyerɛ Yesaia 14:12 ase sɛ: “Ɛyɛɛ dɛn na wufi soro ahwe ase, O Lusifer, adekyee ba!”

Hebri asɛmfua a wɔkyerɛɛ ase “Lusifer” no kyerɛ “nsoromma hyerɛnfo.” Septuagint no de Hela asɛmfua a ɛkyerɛ “nea ɔde adekyee ba” na edi dwuma. Ne saa nti, nkyerɛase ahorow bi kyerɛ Hebri mfitiase asɛm no ase “anɔpa nsoromma” anaasɛ “Adekyee nsoromma.” Nanso Jerome Latin Vulgate no de “Lusifer” (hann kurafo) na edi dwuma, na eyi na ɛma saa asɛm no pue wɔ Bible nkyerɛase ahorow bi mu.

Hena ne Lusifer yi? Yehu asɛmfua “nsoromma hyerɛnfo,” anaasɛ “Lusifer,” wɔ nkɔm a Yesaia hyɛɛ Israelfo no sɛ wɔnka sɛ ɛyɛ ‘abebu a etia Babel hene’ no mu. Enti ɛka asɛm bi a wɔka tiaa Babilon adehye abusua no titiriw ho asɛm. Asɛm a ɛka sɛ: “Mmom asaman na woresian akɔ akodu amoa no ase tɔnn” no ma yehu sɛ wɔde edin “nsoromma hyerɛnfo” no ma onipa na ɛnyɛ honhom abɔde. Asaman yɛ adesamma nyinaa ɔdamoa—ɛnyɛ beae a Satan Ɔbonsam te. Bio nso, wɔn a wohu Lusifer sɛ waba saa tebea yi mu no bisa sɛ: “Ɔbarima a ɔmaa asase wosowee no ni?” Ɛda adi pefee sɛ, “Lusifer” gyina hɔ ma onipa, ɛnyɛ honhom abɔde.—Yesaia 14:4, 15, 16.

Adɛn nti na wɔde din titiriw yi ma Babilon adehye abusua no? Ɛsɛ sɛ yɛhyɛ no nsow sɛ Babilon hene no asehwe akyi nkutoo ansa na wɔbɛfrɛ no nsoromma hyerɛnfo, de atwa no mpoa. (Yesaia 14:3) Aniammɔnho na ɛmaa Babilon ahemfo no maa wɔn ho so sen nnipa a na wɔatwa wɔn ho ahyia no. Na adehye abusua no aniammɔnho kɔ akyiri ara ma wɔka wɔn ho asɛm sɛ wɔhoahoa wɔn ho ka sɛ: “Ɔsoro na mɛforo makɔ, Onyankopɔn nsoromma no atifi na mɛma m’ahengua so masi, na matra ahyiae bepɔw no so, benkum fam asasetifi ano nohɔ tɔnn; . . . mɛyɛ me ho sɛ ɔsorosoroni no.”—Yesaia 14:13, 14.

“Onyankopɔn nsoromma” no yɛ ahemfo a wofi Dawid adehye abusua mu. (Numeri 24:17) Efi Dawid so no “nsoromma” yi fii Sion Bepɔw so dii ade. Salomo sii asɔrefie no wiei wɔ Yerusalem no, wɔde edin Sion no too kurow mũ no nyinaa. Wɔ mmara apam no ase no, wɔhyɛɛ Israelfo mmarima nyinaa sɛ ɛsɛ sɛ afe biara wotu kwan kɔ Sion mprɛnsa. Ɛno nti ɛbɛyɛɛ “ahyiae bepɔw.” Na Nebukadnesar nam ne bo a osii sɛ ɔbɛbrɛ Yuda ahemfo ase na watu wɔn afi saa bepɔw no so no so reda n’atirimpɔw adi sɛ ɔbɛma ne ho so asen saa “nsoromma” no. Sɛ́ anka ɔbɛkamfo Yehowa wɔ nkonim a odii wɔ Yuda ahemfo no so no, ɔde ahantan yɛɛ ne ho sɛ Yehowa. Enti ɛyɛ bere a Babilon adehye abusua no ahwe ase akyi na wɔfrɛɛ no mpoatwa kwan so sɛ “nsoromma hyerɛnfo.”

Nokwarem no Babilon ahemfo no ahantan daa no adi sɛ wɔwɔ “wi yi ase nyame”—Satan Ɔbonsam suban no bi. (2 Korintofo 4:4) Ɔno nso pɛ tumi na ɔpɛ sɛ ɔma ne ho so sen Onyankopɔn. Nanso Lusifer nyɛ din a wɔde ma Satan wɔ Kyerɛwnsɛm no mu.

• Adɛn nti na 1 Beresosɛm 2:13-15 ka sɛ Dawid yɛ Yisai ba a ɔto so ason, bere a 1 Samuel 16:10, 11 kyerɛ sɛ na ɔto so awotwe?

Bere a tete Israel hene Saul twee ne ho fii nokware som ho akyi no, Yehowa Nyankopɔn somaa odiyifo Samuel sɛ ɔnkɔsra Yisai mmabarima no mu biako sɛ ɔhene. Bible kyerɛwtohɔ a ɛfa abakɔsɛm mu asɛm yi ho, a Samuel ankasa na ɔkyerɛwee wɔ afeha a ɛto so 11 A.Y.B. no kyerɛ sɛ Dawid yɛ Yisai ba a ɔto so awotwe. (1 Samuel 16:10-13) Nanso ɔsɔfo Esra asɛm a ɔkyerɛwee bɛyɛ mfe 600 akyi no ka sɛ: “Yisai woo n’abakan Eliab ne Abinadab a otia abien ne Sima a ɔto so abiɛsa, Netanel to so anan, Radai to so anum, Osem to so asia, Dawid to so ason.” (1 Beresosɛm 2:13-15) Dɛn na ɛtoo Dawid nuanom mmarima no mu biako, na adɛn nti na Esra gyaw ne din?

Kyerɛwnsɛm no ka sɛ na Yisai wɔ “mmabarima baawɔtwe.” (1 Samuel 17:12) Ɛda adi sɛ ne mmabarima yi mu biako annyin ankyɛ pii, anware anwo mma. Esiane sɛ na onni asefo nti, na ɔrennya abusua agyapade no mu kyɛfa biara na saa ara na na ne ho renhia wɔ Yisai abusua anato kyerɛwtohɔ mu.

Afei ma yensusuw Esra nna no ho. Susuw tebea a na ɔwom a ɔde kyerɛw Beresosɛm no ho hwɛ. Ná Yudafo Babilon nnommumfa no aba awiei bɛyɛ mfe 77, na na wɔasan aba wɔn asase so. Na Persia hene no ama Esra tumi sɛ ɔmpaw atemmufo ne Onyankopɔn mmara ho akyerɛkyerɛfo na onsiesie Yehowa fie. Na ɛho hia sɛ wɔyɛ anato kyerɛwtohɔ a ɛyɛ pɛpɛɛpɛ na akyerɛ mmusua agyapade a ɛwɔ hɔ, na wɔahwɛ ahu sɛ nnipa a wɔfata nkutoo na wɔsom sɛ asɔfo. Enti Esra yɛɛ ɔman no abakɔsɛm nyinaa ho kyerɛwtohɔ, a Yuda ne Dawid anato ho kyerɛwtohɔ a edi mu nso ka ho. Enti Yisai babarima a owui a na onni ba no din ho renhia. Enti na Esra gyaw ne din no.