ADESUA 58
Kɔ So Di Yehowa Nokware
Nokware Kristofo asi wɔn bo sɛ, wɔremma obiara anaa biribiara mma wonnyae Yehowa som. Yenim sɛ wo nso, woasi wo bo sɛ wobɛyɛ saa, na Yehowa ani sɔ mmɔden a worebɔ sɛ wubedi no nokware no. (Kenkan 1 Beresosɛm 28:9.) Nanso tebea ahorow bi wɔ hɔ a ebetumi ama ayɛ den ama wo sɛ wubedi nokware. Ebi ne dɛn? Sɛ wuhyia tebea bi saa a, dɛn na ɛbɛboa wo ama woakɔ so adi Yehowa nokware?
1. Nneɛma bɛn na ebinom yɛ a ebetumi ama ayɛ den ama yɛn sɛ yebedi Yehowa nokware?
Ebinom de asi wɔn ani so sɛ wɔbɛma yɛagyae Yehowa som. Ebia wubebisa sɛ, hena koraa na ɔbɛyɛ biribi saa? Nea ɛte ne sɛ, wɔn a wɔafi Yehowa som mu no bi keka Yehowa ahyehyɛde no ho nsɛmmɔne, sɛnea ɛbɛyɛ a wɔbɛsɛe yɛn adwene. Yɛfrɛ saa nkurɔfo no awaefo. Ɛno pa ho a, asɔfo binom keka yɛn ho atosɛm. Sɛ obi te saa nsɛm no bi na wanyɛ ahwɛyiye a, ebetumi ama wagyae Yehowa som. Ɛno nti, ɛyɛ hu paa sɛ yɛne saa nkurɔfo no begye akyinnye, yɛbɛkenkan wɔn nhoma ahorow, yɛbɛkɔ wɔn wɛbsaet so, anaa yɛbɛhwɛ video a wɔayɛ. Wɔn a wɔde asi wɔn ani so sɛ wɔbɛma yɛagyae Yehowa som no, Yesu kaa wɔn ho asɛm sɛ: “Munnyaa wɔn. Wɔyɛ akwankyerɛfo anifuraefo. Na sɛ onifuraefo kyerɛ onifuraefo kwan a, wɔn baanu nyinaa bɛhwe amoa mu.”—Mateo 15:14.
2. Gyinae ahorow a yesisi wɔ asetena mu no bi betumi asɔ yɛn nokwaredi ahwɛ. Ebi ne nea ɛwɔ he?
Sɛ yɛdɔ Yehowa a, yɛbɛtwe yɛn ho afi atoro som ho koraa. Enti ɛsɛ sɛ yɛhwɛ sɛ, adwuma a yɛyɛ ne atoro som nni hwee yɛ. Saa ara nso na ɛnsɛ sɛ yɛkɔdɔm kuw bi anaa yɛyɛ biribi foforo biara a ɛne atoro som wɔ biribi yɛ. Yehowa bɔ yɛn kɔkɔ sɛ: “Mumfi [Babilon Kɛse] no mu, me man.”—Adiyisɛm 18:2, 4.
SUA PII KA HO
Sɛ obi ma ɛyɛ den ma wo sɛ wubedi Yehowa nokware a, dɛn na wobɛyɛ? Afei nso, wobɛyɛ dɛn atwe wo ho afi Babilon Kɛse no ho de akyerɛ sɛ wudi Yehowa nokware? Ɔfã yi bɛma woanya nsɛmmisa yi ho mmuae.
3. Hwɛ yiye wɔ akyerɛkyerɛfo atorofo ho
Sɛ yɛte Yehowa ahyehyɛde no ho nsɛmmɔne bi a, dɛn na ɛsɛ sɛ yɛyɛ? Monkenkan Mmebusɛm 14:15. Muwie a munsusuw asɛmmisa yi ho:
Ɛnyɛ asɛm biara a yɛbɛte na ɛsɛ sɛ yegye di. Adɛn ntia?
Monkenkan 2 Yohane 9-11. Muwie a munsusuw nsɛmmisa yi ho:
Wɔn a wɔyɛ awaefo no, sɛn na ɛsɛ sɛ yɛne wɔn di?
Sɛ yɛne awaefo anni nkɔmmɔ tẽẽ mpo a, ɛhefa na yebetumi akopue wɔn nkyerɛkyerɛ so?
Sɛ obi reka Yehowa anaa n’ahyehyɛde no ho nsɛmmɔne na yetie bi a, wohwɛ a Yehowa bɛte nka sɛn?
4. Onua bi yɛ bɔne a, kyerɛ sɛ wudi Onyankopɔn nokware
Sɛ yɛte sɛ obi a ɔwɔ asafo no mu ayɛ bɔne kɛse bi anaa bɔne a emu yɛ duru a, dɛn na ɛsɛ sɛ yɛyɛ? Ma yɛnhwɛ nnyinasosɛm bi a ɛwɔ Mmara a Onyankopɔn de maa tete Israelfo no mu. Monkenkan Leviticus 5:1.
Sɛnea saa kyerɛwsɛm yi ka no, sɛ yehu sɛ obi ayɛ bɔne a emu yɛ duru a, ɛsɛ sɛ yɛkɔ asafo mu mpanyimfo no nkyɛn, na yɛka nea yenim kyerɛ wɔn. Nanso ansa na yebetu saa anammɔn no, ne papa mu no, ɛsɛ sɛ yɛka kyerɛ nea wayɛ bɔne no sɛ, ɔno ankasa nkohu mpanyimfo no, na ɔnka ne bɔne nkyerɛ wɔn. Sɛ wankɔka a, ɛsɛ sɛ yɛn ankasa yɛkɔ mpanyimfo no hɔ na yɛkɔka nea yenim fa asɛm no ho kyerɛ wɔn. Yɛyɛ saa a, ɛkyerɛ sɛ yedi Yehowa nokware. Sɛ obi yɛ saa a, adɛn nti na ɛkyerɛ sɛ . . .
ɔdɔ Yehowa Nyankopɔn?
ɔdɔ onipa a wayɛ bɔne no?
ɔdɔ anuanom a ɛwɔ asafo no mu no?
Wuhu sɛ wo nua Kristoni bi nam baabi a ɛhɔ yɛ toro a, boa no!
5. Twe wo ho fi Babilon Kɛse no ho
Monkenkan Luka 4:8 ne Adiyisɛm 18:4, 5. Afei bisa wo ho sɛ:
Asɔre anaa ɔsom a na mewom no, makotwa me din afi mu anaa?
Medɔm kuw bi a ɛne ɔsom anaa asɔre bi wɔ biribi yɛ anaa?
Adwuma a meyɛ no, ɛboa ɔsom anaa asɔre bi wɔ ɔkwan bi so?
Mehwɛ m’abrabɔ mu a, metumi aka paa sɛ matwe me ho koraa afi atoro som ho, anaa meda so ara yɛ biribi a ɛkyerɛ sɛ mentwee me ho mfii atoro som ho?
Sɛ meda so ara ne atoro som wɔ biribi yɛ a, nsakrae bɛn na ɛsɛ sɛ meyɛ?
Gyinae biara a wubesi no, ma ɛnna adi sɛ wudi Yehowa nokware. Afei hwɛ sɛ, gyinae biara a wubesi no, ɛremma wo tiboa mmu wo fɔ.
Sɛ asɔre bi regyigye sika akɔyɛ nkurɔfo adɔe na wɔba wo nkyɛn a, dɛn na wobɛyɛ?
EBINOM KA SƐ: “Ɛsɛ sɛ mihu nea awaefo ka fa Yehowa Adansefo ho, na matumi abɔ nsɛm a wɔka no agu.”
Wohwɛ a ntease wom sɛ obi benya saa adwene no? Adɛn nti na woreka saa?
NEA YƐASUA
Sɛ yebetumi akɔ so adi Yehowa nokware a, wɔn a wɔpɛ sɛ wɔgyigye yɛn kɔ bɔne mu no, ɛsɛ sɛ yɛtwe yɛn ho fi wɔn ho.
Ntimu
Adɛn nti na ɛnsɛ sɛ yetie awaefo nsɛm?
Sɛ yehu sɛ onua bi ayɛ bɔne kɛse bi a, dɛn na ɛsɛ sɛ yɛyɛ?
Dɛn na yɛyɛ a ɛkyerɛ sɛ yɛatwe yɛn ho afi atoro som ho?
YƐ NHWEHWƐMU
Sɛ wote sɛ nkurɔfo rekeka Yehowa Adansefo ho atosɛm a, wobɛyɛ w’ade sɛn?
Wobɛyɛ dɛn ahu sɛ kuw bi anaa dwumadi bi ne Babilon Kɛse wɔ biribi yɛ?
“Yere Wo Ho Yɛ Pii Wɔ ‘Nna a Edi Akyiri’ Yi Awiei” (Ɔwɛn-Aban, October 2019, nkyekyɛm 16-18)
Nneɛma bɛn na ebinom yɛ sɛnea ɛbɛyɛ a wɔbɛsɛe yɛn gyidi?
Kenkan asɛm a yɛato din “Mifi Me Mmofraase Ahwehwɛ Onyankopɔn” a ɛwɔ Ɔwɛn-Aban yi mu no, na wubehu sɛnea Shinto sɔfo bi twee ne ho fii atoro som ho.