“Syria Anhweatam So Hemmaa A Ne Ti Nhwi Tumm”

NÁ ƆYƐ nipa tuntum, ne se te sɛ nhene fitaa, n’aniwa yɛ tuntum hyɛnn. Ná ɔyɛ nhomanimfo, na na ɔte kasa ahorow. Wɔkyerɛ sɛ na ɔhemmaa kofo yi nim nyansa sen Cleopatra, na ebia na ɔne n’ahoɔfɛ yɛ pɛ. Esiane sɛ otumi ne ne bere so wiase tumidi a ɛsen biara dii asi nti, ɔbɛyɛɛ Kyerɛwnsɛm mu nkɔmhyɛ mu nipa. Ne wu akyi bere tenten no, nhoma akyerɛwfo kamfoo no, na mfoniniyɛfo yeyɛɛ ne mfonini fɛfɛ. Afeha a ɛto so 19 no mu anwensɛm kyerɛwfo bi yɛɛ ne mfonini sɛ “Syria anhweatam so hemmaa a ne ti nhwi tumm.” Ɔbea a wagye din kɛse yi ne Zenobia—Syria kurow Palmyra mu hemmaa.

Ɛyɛɛ dɛn na Zenobia gyee din? Amammui mu nsɛm bɛn na ɛma onyaa tumi? Dɛn na yebetumi aka afa ne suban ho? Dwuma bɛn na ɔhemmaa yi dii wɔ nkɔmhyɛ mu? Nea edi kan no, ma yensusuw baabi a asɛm no sii ho.

Anhweatam Ano Kurow

Na Zenobia kurow, Palmyra, da Damascus atifi fam apuei bɛyɛ kilomita 210, wɔ Syria Anhweatam no atifi fam tɔnn, baabi a Anti-Lebanon mmepɔw no siansian kosi asasetaw no so no. Na saa kurow yi da asasebere so wɔ bɛyɛ Mediterranea Po no atɔe fam ne Asubɔnten Eufrate apuei fam mfinimfini. Ebia na Ɔhene Salomo nim sɛ wɔfrɛ kurow no Tadmor, baabi a na ɛho hia ma n’ahenni no yiyedi esiane nneɛma abien nti: sɛ́ atifi fam asase no ano bansifo atrae ne akwantufo nkurow hye a ɛho hia. Enti, Salomo ‘kyekyee Tadmor wɔ sare so.’—2 Beresosɛm 8:4.

Wɔnka Tadmor ho asɛm biara wɔ Ɔhene Salomo nniso akyi mfirihyia apem ho abakɔsɛm mu. Sɛ wɔkyerɛ sɛ ɛno ara ne Palmyra a, ɛnde na edin a egyee no fii ase bere a Syria bɛyɛɛ Roma Ahemman no asraafo atrae wɔ afe 64 A.Y.B. mu no. Richard Stoneman ka wɔ ne nhoma Palmyra and Its Empire—Zenobia’s Revolt Against Rome mu sɛ: “Na Palmyra ho hia Rome wɔ akwan abien so, sikasɛm ne sraadi mu.” Esiane sɛ na kurow a mmɛ wom yi da aguadi kwan a efi Rome kɔ Mesopotamia ne Apuei fam ho nti, na wɔde tete wiase no aguadi mu nneɛma a ɛsom bo fa hɔ—ahuamhuamnne a wɔde fi Apuei fam India, sirikyi a wɔde fi China, ne nneɛma foforo a wɔde fi Persia, Mesopotamia Anafo fam, ne Mediterranea nsase so. Na saa nneɛma yi ho hia Romafo yiye.

Wɔ sraadi mu no, Rome ne Persia, tumidi a na wɔko tia wɔn ho wɔn ho no de Syria mantam no dii dwuma sɛ ɔhye. Asubɔnten Eufrate na etwaa Rome ne nkurɔfo a na wɔte n’apuei fam no ntam wɔ Yɛn Bere yi mu mfe 250 a edi kan no mu. Na Palmyra da anhweatam no so pɛɛ, wɔ kurow Dura-Europos a ɛda Eufrate ho no atɔe fam. Esiane sɛ Roma ahempɔn te sɛ Hadrian ne Valerian hui sɛ Palmyra da baabi a ɛho hia nti, wɔkɔsraa hɔ. Hadrian sisii adan afɛfɛ kaa nea na ɛwɔ hɔ no ho, na oyii ntoboa pii. Valerian bɔɔ Palmyrani otitiriw bi a ne din de Odaenathus—Zenobia kunu—aba so wɔ 258 Y.B., yɛɛ no Rome temmufo, esiane sɛ na watumi atu Persia so sa adi nkonim atrɛw Roma Ahemman no hye mu akodu Mesopotamia nti. Zenobia dii dwuma titiriw bi wɔ tumi a ne kunu nyae no mu. Abakɔsɛm kyerɛwfo Edward Gibbon kyerɛwee sɛ: “[Zenobia] nyansa ne n’akokoduru a enni ano no ka ho pii na Odenathus dii yiye.

Saa bere no, Ɔhene Sapor a ofi Persia yɛe sɛ ɔbɛko atia Roma tumidi na wadi amantam a bere bi na ɛyɛ Persia de no nyinaa so. Ɔde asraafo a wɔyɛ den tuu aprenten kɔɔ atɔe fam, ko faa Roma bansifo nkurow Nisibis ne Carrhae (Haran), na otumi sɛee Syria atifi fam ne Cilicia pasaa. Ɔhempɔn Valerian ankasa bedii n’asraafo anim ko tiaa ntuafo no, nanso odii nkogu maa Persiafo no faa no dommum.

Odaenathus hui sɛ ɛyɛ papa sɛ ɔde akyɛde ahorow a ɛsom bo ne asomdwoesɛm kɔma Persia hene saa bere no. Ɔhene Sapor de ahantan kae sɛ wɔntow akyɛde no ngu Eufrate mu, na ɔhyɛe sɛ Odaenathus mmra n’anim sɛ obi a wɔafa no dommum a ɔrepa kyɛw. Mmuaema mu no, Palmyrafo boaboaa anhweatam so atutradifo ne Roma asraafo a aka ano, na wofii ase ko tiaa Persiafo a saa bere yi na wɔresan wɔn akyi no. Ntɛbɔ a na anhweatam so akofofo yi di nti, na Sapor asraafo—a wɔako abrɛ na nneɛma a wɔafow ayɛ wɔn so adesoa—no nni ahoɔden, na woguanee.

Bere a Valerian ba a odii n’ade, Gallienus, hui sɛ Odaenathus adi Sapor so nkonim no, ɔmaa Odaenathus abodin corrector totius Orientis (Apuei famfo nyinaa amrado). Bere bi akyi no, Odaenathus ankasa maa ne ho abodin “ahene mu hene.”

Zenobia Pɛ sɛ Ɔhyehyɛ Ahemman

Wɔ afe 267 Y.B., mu, bere a na Odaenathus tumidi adu ne mpɔmpɔn so no, wɔkyerɛ sɛ Odaenathus wɔfase weredifo bi kum ɔno ne nea obedi n’ade nyinaa. Zenobia kɔtraa ne kunu agua so, efisɛ na ne babarima no yɛ abofra koraa. Esiane sɛ na ne ho yɛ fɛ, na botae akɛse sisi n’ani so, ɔfata sɛ ɔmansohwɛfo, ɔne ne kunu a wawu no abom atu sa, na ɔte kasa pii nti, ne manfo buu no, na wɔboaa no—ɛnyɛ ade ketewa wɔ Bedouinfo mu. Ná Zenobia pɛ adesua, na ɔtraa animdefo mu. Na n’afotufo no mu biako ne Cassius Longinus a na ɔyɛ nyansapɛfo ne ɔnotewfo—a wɔkyerɛ sɛ na “ɔyɛ onimdefo kɛse” no. Nhoma kyerɛwfo Stoneman ka sɛ: “Odenathus wu akyi mfe anum mu no, . . . na Zenobia atumi ama ne nkurɔfo agye no atom sɛ Apuei fam hemmaa.”

Ná Persia a Zenobia ne ne kunu abrɛ wɔn ase no wɔ n’ahenni no fã biako na Rome a ɛrehwe ase no nso wɔ ɔfã foforo. Ɛdefa tebea a na ɛwɔ Roma Ahemman no mu saa bere no ho no, abakɔsɛm kyerɛwfo J. M. Roberts ka sɛ: “Ná afeha a ɛto so abiɛsa . . . no yɛ bere a ɛyɛ hu ma Rome wɔ apuei ne atɔe fam nyinaa, bere a na ɔmanko foforo ne mpaapaemu bi afi ase wɔ kurow no mu no. Ahempɔn aduonu abien (a wɔn a wɔn ankasa yeyɛɛ wɔn ho ahempɔn nka ho) bedii ade kɔe.” Nanso, na Syria hemmaa no yɛ ɔhempɔmmaa a wagye ntini yiye wɔ n’agua so wɔ ne man mu. Stoneman ka sɛ: “Esiane sɛ na ɔreboa ma ahemman abien [Persia ne Roma] tumidi akari pɛ nti, na obetumi ahyehyɛ ahemman a ɛto so abiɛsa a ebetumi adi wɔn abien so.”

Zenobia nyaa hokwan sɛ ɔbɛtrɛw n’ahenni tumi mu wɔ 269 Y.B., mu, bere a obi a ɔyɛɛ ne ho ɔhempɔn wɔ Egypt sɔre tiaa Roma nniso no. Zenobia asraafo yɛɛ ntɛm kɔɔ Egypt, kɔsɛee atuatewfo no dii ɔman no so. Bere a ɔyɛɛ ne ho Egypt hemmaa no, otwaa sika wɔ ne din mu. Afei na n’ahenni mu atrɛw fi asubɔnten Nile so akosi Eufrate so. Wɔ n’asetram bere yi mu no, esiane sɛ na n’ahenni no di Daniel man no anafo fam so nti, ɔbɛyɛɛ “anafo fam hene” a wɔaka ne ho asɛm wɔ Daniel nkɔmhyɛ mu wɔ Bible mu no. (Daniel 11:25, 26, NW) Odii Asia Kumaa nsase dodow no ara so nso.

Zenobia hyɛɛ n’ahenkurow, Palmyra, den siesiei ma ɛbɛyɛɛ sɛ Roma ahemman no mu nkurow akɛse no bi. Wobu akontaa sɛ na emu nnipa boro 150,000. Ɔmanfo adan akɛse, asɔrefie, nturo, adum, ne nkaedum ahorow yɛɛ kurow no mu ma, na wɔkyerɛ sɛ na kurow no kɛse yɛ kilomita 21. Wosisii Korintofo adum a na ne tenten bɛboro mita 15 yeyɛɛ ntwironoo—bɛboro 1,500—sãã kurow no mu kwantempɔn ho. Wɔyeyɛɛ nnɔmmarima ne adefo ayamyefo ahoni pii wɔ kurow no mu. Wɔ 271 Y.B., mu no, Zenobia yɛɛ ɔno ne ne kunu a na wawu no ahoni. Na Palmyra hyerɛn sɛ abohene wɔ anhweatam no ano.

Na Owia Asɔrefie yɛ adan a ɛyɛ fɛ sen biara wɔ Palmyra no mu biako, na akyinnye biara nni ho sɛ egyee din wɔ nyamesom mu wɔ kurow no mu. Ɛda adi sɛ, Zenobia nso som nyame bi a ɔne owia nyame wɔ abusuabɔ. Nanso, na Syria a ɛwɔ hɔ wɔ afeha a ɛto so abiɛsa mu no yɛ asase a na nyamesom pii wɔ so. Ná nkurɔfo a wɔfrɛ wɔn ho Kristofo, Yudafo, nsoromma mu ahwɛfo, ne owia ne ɔsram asomfo wɔ Zenobia ahemman mu. Su bɛn na na ɔwɔ wɔ nyamesom ahorow a na ɛwɔ ne nniso ase no ho? Nhoma kyerɛwfo Stoneman ka sɛ: “Sodifo nyansafo biara nni hɔ a obebu n’ani agu amammerɛ biara a ɛte sɛ nea eye ma ne nkurɔfo no so. . . . Ná wosusuw sɛ anyame no . . . abɔ Palmyra ho ban.” Enti, ɛda adi sɛ na Zenobia wɔ nyamesom ahorow ho koma. Nanso, so na anyame no “abɔ Palmyra ho ban” ampa? Dɛn na na ɛrebɛto Palmyra ne ne “sodifo nyansafo” no?

Ɔhempɔn Bi ‘Ma Ne Koma’ Sɔre Tia Zenobia

Aurelian bɛyɛɛ Roma ɔhempɔn wɔ afe 270 Y.B., mu. N’asraafodɔm no tuu ahamufo a na wɔwɔ atifi fam no gui twee wɔn aso. Wɔ afe 271 Y.B., mu—bere a na Aurelian abegyina hɔ sɛ “atifi fam hene” a ɔwɔ Daniel nkɔmhyɛ mu saa bere no—‘ɔmaa ne tumi ne ne koma sɔre tiaa anafo fam hene’ a na Zenobia gyina hɔ ma no. (Daniel 11:25a) Aurelian somaa n’asraafo no bi kɔɔ Egypt tee, na ɔde n’asraafo ankasa kɔɔ apuei fam kɔfaa Asia Kumaa.

Anafo fam hene—sodifo kuw a na Zenobia da wɔn ano—‘bɛkanyan ne ho’ “de dɔm a ɛyɛ den bebree pa” a asahene baanu, Zabdas ne Zabbai di wɔn anim no bɛko tiaa Aurelian. (Daniel 11:25b) Nanso Aurelian ko faa Egypt, na afei ɔtoaa so kɔɔ Asia Kumaa ne Syria. Zenobia dii nkogu wɔ Emesa (mprempren Homs), na ɔsan n’akyi kɔɔ Palmyra.

Bere a Aurelian kaa Palmyra hyɛɛ mu no, Zenobia a na ɔwɔ anidaso sɛ obenya mmoa no ne ne babarima guan kɔɔ Persia, nanso Romafo no kyeree no wɔ Asubɔnten Eufrate so. Palmyrafo de wɔn kurow no mae wɔ afe 272 Y.B. mu. Aurelian ne kurow no mufo dii no ayamye mu, na ɔfow nneɛma pii, a na Owia Asɔrefie hɔ honi ka ho, na ɔkɔɔ Rome. Roma hempɔn no ankum Zenobia, na ɔde no yɛɛ guasode tuu nkonimdi aprenten faa Rome nyinaa wɔ afe 274 Y.B. mu. Ɔtraa Rome sɛ ɔbaapanyin ne nkwa nna a aka nyinaa.

Wɔsɛee Anhweatam so Kurow No

Aurelian ko faa Palmyra akyi asram kakraa bi no, Palmyrafo kunkum Roma bansifo a na wagyaw wɔn wɔ hɔ no. Bere a Aurelian tee atuatew yi ho asɛm no, ntɛm ara na ɔka kyerɛɛ n’asraafo sɛ wɔnsan nkɔ wɔn akyi, na saa bere yi de, ɔde aweredi a ɛyɛ hu baa kurom hɔfo so. Wɔde wɔn a wɔankunkum wɔn atirimɔden so no kɔɔ nkoasom mu. Wotuu kurow a na ɛyɛ ahantan no gui, na wɔsɛee no pasaa. Enti, kurow kɛse a na emu yɛ hyew no san kɔɔ ne kan tebea mu—‘Tadmor a ɛwɔ sare so.’

Bere a Zenobia sɔre tiaa Rome no, na ɔno ne Ɔhempɔn Aurelian reda wɔn ho adi sɛ ‘anafo fam hene’ ne ‘atifi fam hene’ a wɔmaa nkɔmhyɛ a na Yehowa diyifo adi kan akyerɛkyerɛ mu yiye bɛyɛ mfe 800 a atwam no fã bi nyaa ne mmamu a na wonnim. (Daniel, ti 11) Esiane sɛ na Zenobia ho yɛ fɛ nti, nnipa pii ani gyee ne ho. Nanso, nea na ɛho hia sen biara ne dwuma a odii, sɛ ɔbɛyɛɛ Daniel nkɔmhyɛ no mu amammui mu nipa no. N’ahenni no ammoro mfe anum. Mprempren, Palmyra a na ɛyɛ Zenobia ahemman no ahenkurow no yɛ akuraa. Roma Ahemman kɛse no mpo ayera, na akɔhyɛ nnɛyi ahenni ahorow ase. Dɛn na ɛbɛba saa tumidi ahorow yi so daakye? Bible nkɔmhyɛ no ka nea ɛbɛba wɔn nso so ho asɛm ankasa.—Daniel 2:44.

[Kratafa 29 adaka]

Nea Zenobia De Bae

Bere a Ɔhempɔn Aurelian dii Zenobia, Palmyra hemmaa, so nkonim na ɔsan kɔɔ Rome no, osii owia asɔrefie. Ɔde owia nyame honi a ɔfa fii Zenobia kurom no sii ɔdan no mu. Bere a nsɛmma nhoma History Today reka nea ɛkɔɔ so bio ho asɛm no, ɛka sɛ: “Ɛkame ayɛ sɛ nneɛma a Aurelian yɛe nyinaa mu nea atra hɔ akyɛ sen biara ne owia afe afe afahyɛ a esi December 25, wɔ awɔw bere mu, bere a esum ba ntɛm, a ɔde sii hɔ YB 274 mu no. Bere a ahemman no mufo bɛdan Kristofo no, wɔde saa da yi bɛyɛɛ Kristo awoda, na ama wɔn a na wodi afahyɛ dedaw no ani agye ɔsom foforo no ho kɛse. Ɛyɛ nwonwa de, nanso ɛbɛyɛ sɛ yɛn Buronya a [nkurɔfo] di yi . . . fi Ɔhempɔmmaa Zenobia ankasa.”

[Asase mfonini/Mfonini wɔ kratafa 28, 29]

(Wopɛ nsɛm a wɔahyehyɛ awie no a, hwɛ nhoma no mu)

MEDITERRANEA PO

SYRIA

Antiokia

Emesa (Homs)

PALMYRA

Damasko

MESOPOTAMIA

Eufrate

Carrhae (Haran)

Nisibis

Dura-Europos

[Nsɛm Fibea]

Map: Mountain High Maps® Copyright © 1997 Digital Wisdom, Inc.

Colonnade: Michael Nicholson/Corbis

[Kratafa 29 mfonini]

Romafo sika a mfonini a ɛwɔ so betumi ayɛ Aurelian de

[Kratafa 30 mfonini]

Owia asɔrefie wɔ Palmyra

[Asɛm Fibea]

The Complete Encyclopedia of Illustration/J. G. Heck

[Kratafa 31 mfonini]

Ɔhemmaa Zenobia a ɔrekasa kyerɛ n’asraafo

[Asɛm Fibea]

Giovanni Battista Tiepolo, Queen Zenobia Addressing Her Soldiers, Samuel H. Kress Collection, Photograph © Board of Trustees, National Gallery of Art, Washington

[Mfonini Fibea wɔ kratafa 28]

Detail of: Giovanni Battista Tiepolo, Queen Zenobia Addressing Her Soldiers, Samuel H. Kress Collection, Photograph © Board of Trustees, National Gallery of Art, Washington