Nsemmisa a Efi Akenkanfo Hɔ

◼ So Yudani ababaa Ester ne Persia hene no bɔɔ aguaman sɛnea ɛbɛyɛ a obenya n’anim dom na ama wanya mfaso ahorow anaa?

Ebetumi aba sɛ asɛm no ho amanneɛbɔ a efi wiasefo nkyɛn ama ebinom asusuw saa, nanso Bible no kyerɛwtohɔ a wotumi de ho to so no kyerɛ sɛ nsusuwii yi nyɛ nokware.

Yudani abakɔsɛm kyerɛwfo Flavius Josephus de amanneɛbɔ bi ma sɛ Persia hemmaa Wasti ampene sɛ ɔbɛba ne kunu, Ahasweros anim. Ɛno maa ɔhene no a ɛda adi sɛ ɔne Xerxes 1 a ɔtraa ase afeha a ɛto so anum A.Y.B. mu no, de abufuw powee Wasti na ɔpenee so sɛ wɔnhwehwɛ ɔhemmaa foforo wɔ n’aheman no mu nyinaa. Wɔboaboaa mmaabun a wɔn ho yɛ fɛ ano na wɔde bere tenten srasraa wɔn nnuru na ama wɔn ho ayɛ fɛ.

“Afei, bere a [ɔhene no piani] susuwii sɛ mmaabun no anya ɔhwɛ a ɛfata . . . na wɔfata afei sɛ wɔbɛba ɔhene no mpa mu no, ɔmaa obiako biara ne ɔhene no kɔdae da biara, na bere a ɔne no ada awie ara pɛ, ɔma ɔsan kɔ piani no nkyɛn. Nanso, bere a Ester baa ne nkyɛn no, n’ani gyee ne ho, na ɔdɔ a ɔdɔɔ no nti, ɔyɛɛ no ne mmara kwan so yere na wohyiaa ayeforo.”​—Jewish Antiquities, Nhoma XI, 184-202, a Ralph Marcus kyerɛɛ ase, (Nhoma 11, ti 6, nkyekyem 1, 2, sɛnea William Whiston kyerɛɛ ase).

Saa amanneɛbɔ a efi wiasefo nkyɛn yi betumi ama obi asusuw sɛ mmaabun no ne ɔhene no bɔɔ aguaman na nea ɛyɛ soronko wɔ Ester ho ne sɛ n’aguamammɔ no ma ɔwaree no na ɔbɛyɛɛ ɔhemmaa. Nanso, Bible no ma yɛn amanneɛbɔ a ɛyɛ nokware yiye na ntease wom.

Bible no kaa sra nnuru a wɔde siesiee wɔn a na ɛbɛma wɔn ho ayɛ fɛ ho asɛm wiei no, ɛka sɛ: “Na ababaa [biara] de saa kɔ ɔhene nkyɛn; . . . Anadwofa na ɔkɔ, na anɔpa na ɔsan kɔ mmea fi a etia abien a ɛhyɛ ɔhene piani Saasgas a ɔhwɛ ayefam so no ase no mu. Na ɔnkɔ ɔhene nkyɛn bio, gye sɛ ɔhene no pɛ na ɔbɔ ne din frɛ no.”​—Ester 2:13, 14.

Kyerɛwnsɛm no se “wɔde” Ester “baa mmea no fi” na wɔde bere tenten de sra nnuru asiesie no: “Na wɔde Ester kɔɔ ɔhene Ahasweros nkyɛn . . . Na ɔhene no dɔ Ester sen mmea no nyinaa, na onyaa anuonyam ne ɔdom n’anim sen mmabaa no nyinaa, na ɔde ɔhemmaadi abotiri no bɔɔ ne ti, na ɔma odii hemmaa Wasti ananmu.”​—Ester 2:8, 9, 16, 17.

So wohyɛɛ baabi a wɔde mmea no kɔ bere a wɔne ɔhene no akɔda akyi no nsow wɔ Bible kyerɛwtohɔ no mu? Wɔkɔ mmea fi a etia abien a ɛhyɛ nea ɔhwɛ ayefam no so ase no.’ Enti na wɔabɛyɛ ayefam. Ná Mordekai a ɔkyerɛw Ester nhoma no yɛ Hebrini, na saa bere no, na wobu ɔyefam sɛ ɔyere a otia abien wɔ ne nkurɔfo mu. Ɔsoro mmara maa hokwan sɛ Israelni barima betumi afa ɔnanani abaawa a wɔafa no nnommum wɔ ɔko mu ayɛ n’ayefam, anaa ɔyere a otia abien, a ɔwɔ hokwan ahorow ne ahobammɔ. (Deuteronomium 21:10-17; fa toto Exodus 21:7-11 ho.) Wobu mmofra a mmara kwan so ɔyefam a ɔte sɛɛ wo wɔn no sɛ mma a wɔfata na wobetumi adi agyapade. Ná Yakob mmabarima 12, a wɔyɛ Israel mmusuakuw 12 no agyanom no yɛ ne yerenom ne ne mmara kwan so ayefam mma.​—Genesis 30:3-13.

Nea wɔyɛe ne sɛ bere a mmaabun no akɔ Persia hene no nkyɛn akyi no, wɔkɔɔ ayefam fi. Eyi kyerɛ sɛ wɔbɛyɛɛ ne yerenom a wotia abien.

Na Ester nso ɛ? Bible no anka sɛ ɔne ɔhene no dae ma enti onyaa n’anim dom. Ɛnka sɛ wɔde no kɔɔ ayefam fi, na mmom nea ɛka tiawa ne sɛ: “Na wɔde Ester kɔɔ ɔhene Ahasweros nkyɛn n’ahemfi . . . Na ɔhene no dɔ Ester sen mmea no nyinaa.” Kae sɛ Ester dii kan nyaa “mmea no hwɛfo Hegai anim anuonyam” wɔ bere a na ɔne no nnae na ɔde asɛe ne baabun a ɔyɛ no. Bio nso: “Ester nyaa wɔn a wohu no nyinaa anim anuonyam.” (Ester 2:8, 9, 15-17) Enti ɛda adi pefee sɛ ɔhene no ani gyee Ester ho na obuu no, sɛnea na afoforo nso bu no no.

Hwɛ sɛnea ɛsɛ sɛ yɛde aseda ma sɛ yetumi nya nokwasɛm ahorow ne nhumu a Bible no de ma yɛn no! Ɛwom sɛ nsɛm yi sisii mfe mpempem a atwam no mu de, nanso yɛwɔ nea ɛma yenya awerɛhyem sɛ Ester de abrabɔ pa yɛɛ ade ma ɛne Onyankopɔn nnyinasosɛm hyiae.