Dɛnkyɛm a Wubehu no Yiye

EFI NYAN! KYERƐWFO A ƆWƆ KENYA HƆ

NÁ AMERIKANI kwantufo no ani abere retwitwa susono mfonini wɔ Asubɔnten Mara ano na ɔwatiriw fii abotan bi so tɔɔ mu. Aboa bi a ne nhoma yɛ den a na ɔreto awia saa bere no, dɛnkyɛm bi, huu no. Ɛmfa ho sɛ saa aboa a ɔwea fam yi taa we mpataa no, aduan dɛdɛ yi a ohui no yɛɛ no akɔnnɔ kɛse. Ntɛm ara na osii nsu no mu kɔhwɛe. Nea ɛyɛ anigye no, ɔkwantufo no hui sɛ dɛnkyɛm no reba, enti ofii asubɔnten no mu—ɔyɛɛ no ntɛmntɛm araa ma ɛyɛɛ te sɛ nea ɔrenantew nsu no so!

Ahɔho a wɔkɔhwehwɛ Afrika nsubɔnten, atare, ne awora taa hu adɛnkyɛm, ɛwom sɛ ɔkwantufo a ehu kaa no a yɛaka ne ho asɛm wɔ atifi hɔ no bɛnee no dodo de. Kenya na Nile mu adɛnkyɛm no wɔ. Edin a wɔde frɛ no wɔ Swahili kasa a wɔka wɔ hɔ mu ara ne mamba. Adɛnkyɛm yɛ mmoa a wɔwea fam a wɔn tenten tumi yɛ mita 7, na wɔn ho yɛ hare wɔ asase so ne nsu mu. Nea ɛma wɔn ho tumi yɛ hare kɛse wɔ nsu mu ne wɔn dua a ɛyɛ tratra te sɛ tabon no. Wotumi guare kilomita 40 dɔnhwerew biako mu! Na ɛnyɛ den mma wɔn sɛ wɔbɛtra nsu ase nnɔnhwerew abien, anaa abiɛsa mpo. Wotumi de ahoɔhare kɛse tutu mmirika ntiantia wɔ asase so.

Ɛnde, ɛnyɛ nwonwa sɛ ɛda adi sɛ Bible no ka ɔdɛnkyɛm ho asɛm sɛ Onyankopɔn abɔde a wɔn ho yɛ hu no biako a wɔfrɛ no Lewiatan. Hiob 41:8, 10 ka sɛ: “Fa wo nsa ka [Lewiatan] no, na hwɛ ɔko no, na worenyɛ bio! . . . Obi rensi ne bo sɛ ɔbɛhwanyan no.” Ɛyɛ kɔkɔbɔ a nyansa wom kɛse! Sɛnea nhoma The Fascination of Reptiles, a Maurice Richardson kyerɛwee kyerɛ no, wonim sɛ adɛnkyɛm to hyɛ ahyɛmma a ɛde afiri na ɛyɛ adwuma mpo so! Ɛfata sɛ Hiob 41:25 kae sɛ: “Ɔma ne ho so a, atumfo ho popo, na ehu ma wɔn ani so yɛ wɔn krakra.”

Dɛn nti na sɛ nkurɔfo hu aboa a ne ho wɔ abon yi a, wɔde ahopopo guan? Nkyekyem 14 kyerɛ ade biako nti a ɛte saa: “N’anim apon nso, hena na obehiɛ? Ne sẽ ho yɛ hu.” Dɛnkyɛm apantan a ɛwɔ soro, ne fam de no biara wɔ ɛsẽ 24 a n’atenten gu ahorow a foforo besi ananmu wɔ ne nkwa nna nyinaa mu. Nea ɛyɛ anika ne sɛ dɛnkyɛm sẽ a ɛto so anan a ɛwɔ n’apantan a ɛwɔ fam mu no pue abɔnten bɛhyɛ biribi mu wɔ n’apantan a ɛwɔ soro no mu, na sɛ ɔka n’apantan si so a, wotumi hu pefee. Eyi boa ma wotumi hu nsonsonoe a ɛwɔ ɔne ne nua mampam mu. Asɛm no ne sɛ, sɛ wobɛn no pii sɛ worekɔhwɛ ne sẽ yi kakra a, ebetumi akowie wo wɔ n’anom a worekan ne sẽ nyinaa!

Ɛno nti na ebia wobɛpɛ sɛ wugyina baabi a ɛbɛn a ɛhɔ nyɛ hu hwɛ dɛnkyɛm no, na mmeae ahorow bi wɔ Kenya a wubetumi ayɛ saa. Sɛ nhwɛso no, Mamba Akuraa yɛ Mombasa beae a wɔyɛn adɛnkyɛm wɔ hɔ.

Wubebisa sɛ, ‘Na dɛn koraa nti na obi bɛpɛ sɛ ɔyɛn adɛnkyɛm?’ Ade biako ne sɛ ɛbɛbɔ wɔn ho ban na wɔn ase antɔre. Adɛnkyɛm a wonni ayɛmmea mu ɔha biara mu 99 wuwu ansa na wɔadi afe. Ɛkame ayɛ sɛ akyekye, asukɔnkɔn, ne nnipa bi mpo di adɛnkyɛm nkesua ne wɔn mma nketewa no. Nanso adɛnkyɛm a wɔwɔ ayɛmmea a wɔhwɛ wɔn yiye dodow a wowuwu no so tew fi ɔha biara mu nkyem 10 ba nkyem 2. Wɔ afe biako mu no, adɛnkyɛm mma tumi yɛ atenten du mita 1.5—akyinnye biara nni ho sɛ wɔsõsõ sɛnea ɛsɛ a wobetumi abɔ wɔn ho ban wɔ asiane dodow no ara ho. Ebetumi agye mfe abiɛsa ansa na adɛnkyɛm mma a wonni ayɛmmea ayɛ atenten saa.

Adɛnkyɛm yɛmmea ahorow yɛn mmoa yi bi nso tɔn wɔn. Sɛ ɛba amanaman ntam aguadi mu a, wubetumi ahu mpaboa, abomu, bag, ne aguade afoforo a wɔde dɛnkyɛm afuru so nhoma a ɛyɛ mmerɛw no na ɛyɛe. Afe biara, wɔde nhoma bɛyɛ 2,000 fi Mamba Akuraa no ase kɔtɔn ma aman afoforo, te sɛ Italy ne France ma wɔhyɛ no aduru. Dɛn na wɔyɛ aboa no nam a ɛka no? Wɔ Kenya no, wɔde dɛnkyɛm nam som akwantufo hɔho sɛ ɛnam soronko.

Efi October kosi April na adɛnkyɛm tow. Abere a wonni ayɛmmea tumi tow nkesua fi 20 kosi 80. Saa bere no, abere a wɔwɔ ayɛmmea tumi tow nkesua bɛyɛ 36 wɔ atare ano. Ɛno akyi no, wɔsesaw nkesua no de kogu mfiri a wɔde huan mu. Eyi tumi di asram abiɛsa.

Wubetumi anya hokwan fɛfɛ wɔ Mamba Akuraa no ase agyina baabi a ɛhɔ nyɛ hu ahwɛ saa abɔde a wɔn ho yɛ nwonwa yi. Ɛwɔ abotubea bi a ne kɛse yɛ hekta 8 a wɔayɛ no foforo ma adan adɛnkyɛm yɛmmea, turo a nnua wom, asuboa yɛmmea, ne anigyebea kɛse. Mmoa a wɔwea fam yi bɛboro 10,000 na wɔwɔ ha. Nokwarem no, ɛnyɛ wɔn nyinaa na wubehu wɔn. Nanso sɛ wokɔ mmeae abien a wɔtow no a, wubetumi ahu wɔn a wɔanyinyin no bɛboro ɔha, na wɔ mmeae afoforo no, adɛnkyɛm mma ɔhaha pii a ɛsonsono mfe a wɔadi wɔ hɔ.

Sɛ adɛnkyɛm redidi a, wɔn ho yɛ anika ankasa. Ebi mpo huruw fi nsu no mu begye nam a wɔde asɛn ade so wɔ ɔtare no so no. Wubetumi ahu dɛnkyɛm a wagye dimmɔne a wɔfrɛ no Big Daddy a ohunahunaa nnipa a wɔwɔ Tana Asubɔnten no ano, na anyɛ hwee koraa no, okunkum nnipa baanum ansa na wɔrekyere no de no akɔ ayɛmmea hɔ no wɔ ha. Sɛ wusuro sɛ wode w’ani kan behu adɛnkyɛm a, wubetumi ahwɛ wɔn yiye wɔ video dan kɛse no mu.

Ebia dɛnkyɛm a wobɛbɛn no ahwɛ no yiye no bɛma w’ani agye anaa ebia ɛbɛbɔ wo hu. Nanso ɛbɛma woate nea enti a Bible no kaa dɛnkyɛm ho asɛm sɛɛ wɔ Hiob 41:34 no ase yiye: “Ɔne ahokyerɛ mma nyinaa hene.”

[Kratafa 27 mfonini]

Nifa so: Mamba Akuraa no ho mfonini a wofi soro twae

Nifa so nohoa: Ɔdɛnkyɛm bi a ɔredidi a wahuruw afi nsu no mu rebegye nam