Yɛn Mma—Agyapade A Ɛsom bo

“Hwɛ, [Yehowa, NW] agyapade ne mmabanin, na yafunu mu aba yɛ akatua.”—DWOM 127:3.

 1. Ɛyɛɛ dɛn na wɔwoo akokoaa a odi kan no?

SUSUW anwonwade a Yehowa Nyankopɔn nam ɔkwan a ɔfaa so bɔɔ ɔbarima ne ɔbea a wodi kan no so ma esisii no ho hwɛ. Agya ne ɛna no nyinaa, Adam ne Hawa, de wɔn ho biribi mae maa enyinii wɔ Hawa awotwaa mu ma ɛbɛyɛɛ onipa foforo koraa—akokoaa a wodii kan woo no no. (Genesis 4:1) Ɛde besi nnɛ, nnipa pii bu abofra nyinsɛn ne n’awo sɛ anwonwade ankasa.

 2. Dɛn nti na wobɛka sɛ nea ɛkɔ so wɔ ɔpemfo awotwaa mu no yɛ anwonwade?

² Wɔ nnafua bɛyɛ 270 mu no, nkwaboaa a wɔde no to ɛna no yam bere a ɛna no ne agya no hyiam no nyin bɛyɛ akokoaa a ɔwɔ nkwammoaa ɔpepepepem pii. Akwankyerɛ wɔ nkwaboaa a odi kan no mu a ɛma otumi yɛ nkwammoaa a wogu ahorow bɛboro 200. Ɛdenam saa akwankyerɛ a ɛyɛ nwonwa a nnipa ntumi nte ase no akyi a nkwammoaa no di so no, nkwammoaa a wɔn ho yɛ nwonwa yi tumi yɛ wɔn adwuma pɛpɛɛpɛ ma wɔyɛ ɔteasefo foforo!

 3. Dɛn nti na nnipa pii a wosusuw nneɛma ho kɔ akyiri gye tom sɛ ɛbɛyɛ sɛ Onyankopɔn na ɔma wɔwo onipa?

³ Ɛnde, hena na wobɛka sɛ ɔyɛ akokoaa no ankasa? Ɛnyɛ obiara sɛ nkwa Bɔfo no. Bible mu dwontofo no too dwom sɛ: “Munhu sɛ [Yehowa, NW] ne Nyankopɔn, ɔno na ɔyɛɛ yɛn” na ɛnyɛ yɛn ankasa. (Dwom 100:3) Awofo, munim yiye sɛ ɛnyɛ mo nyansa a mowɔ nti na mutumi woo abofra a ɔsom bo saa no. Onyankopɔn bi a ne nyansa nni ano nkutoo na obetumi ama onipa foforo koraa anyin wɔ ne na yam anwonwakwan so saa. Mfirihyia mpempem pii na nnipa a wosusuw nneɛma ho kɔ akyiri de abofra a onyin wɔ ne na awotwaa mu ho nkamfo ama Ɔbɔadeɛ Kɛse no. So wo nso woyɛ saa?—Dwom 139:13-16.

 4. Nnipa sintɔ bɛn na yentumi nka da sɛ ebi wɔ Yehowa ho?

⁴ Nanso, so Yehowa yɛ Ɔbɔadeɛ a ne tirim yɛ den a ɔyɛɛ nhyehyɛe a ɔbarima ne ɔbea nam so bɛwo ara kwa? Nnipa binom tirim yɛ den de, nanso Yehowa nte saa koraa. (Dwom 78:38-40) Bible ka wɔ Dwom 127:3 sɛ: “Hwɛ, [Yehowa, NW] agyapade ne mmabanin [ne mmabea]; na yafunu mu aba yɛ akatua.” Afei ma yensusuw ade a wɔfrɛ no agyapade ne nea ɛkyerɛ ho nhwɛ.

Agyapade ne Akatua

 5. Dɛn nti na mma yɛ agyapade?

⁵ Agyapade te sɛ akyɛde. Mpɛn pii no, awofo de bere tenten yɛ adwumaden na ama wɔatumi agyaw wɔn mma agyapade. Ebetumi ayɛ sika, adan ne nsase, anaa ebia ahode bi a ɛsom bo paa. Sɛnea ɛte biara no, ɛda ɔdɔ a ɔwofo no wɔ adi. Bible ka sɛ Onyankopɔn de mmofra ama awofo sɛ wɔn agyapade. Wɔyɛ akyɛde a Yehowa fi ɔdɔ mu de ama wɔn. Sɛ woyɛ ɔwofo a, so wubetumi aka sɛ wo nneyɛe kyerɛ sɛ wubu wo mma sɛ akyɛde a amansan Bɔfo no de ahyɛ wo nsa ampa?

 6. Dɛn nti na Onyankopɔn maa nnipa tumi ma wɔde wo mma?

⁶ Nea enti a Yehowa de akyɛde yi mae ne sɛ wɔde Adam ne Hawa asefo bɛhyɛ asase so ma. (Genesis 1:27, 28; Yesaia 45:18) Yehowa ammɔ nnipa mmiako mmiako sɛnea ɔyɛe wɔ abɔfo ɔpepem pii ho no. (Dwom 104:4; Adiyisɛm 4:11) Mmom no, Onyankopɔn bɔɔ nnipa, na ɔmaa wɔn tumi a wɔde bɛwo mma a wɔbɛsɛ wɔn awofo wɔ akwan pii so. Hwɛ hokwan kɛse ne anigye a ɛyɛ sɛ ɛna ne agya bɛwo onipa foforo a ɔte saa na wɔahwɛ no! Sɛ́ awofo no, so moda Yehowa ase sɛ wama atumi ayɛ yiye ama mo nsa aka agyapade a ɛsom bo yi?

Suasua Yesu Nhwɛso No

 7. Nea ɛne nea awofo binom yɛ bɔ abira no, ɔkwan bɛn so na Yesu daa anigye ne ayamhyehye adi wɔ “nnipa mma” ho?

⁷ Awerɛhosɛm ne sɛ, ɛnyɛ awofo nyinaa na wobu wɔn mma sɛ akatua. Awofo pii nni wɔn mma ho ayamhyehye. Awofo a wɔte saa no nna su a Yehowa anaa ne Ba no wɔ no bi adi. (Dwom 27:10; Yesaia 49:15) Nea ɛne saa awofo yi su bɔ abira no, susuw sɛnea Yesu kyerɛɛ mmofra ho anigye no ho hwɛ. Ansa na Yesu reba asase so sɛ onipa no, bere a na ɔyɛ honhom mu onipa tumfoɔ mpo no, Bible kaa ne ho asɛm sɛ ‘n’ani ka nnipa mma mu.’ (Mmebusɛm 8:31) Ná ɔdɔ a ɔwɔ ma nnipa no mu yɛ den araa ma ofi ne pɛ mu de ne nkwa mae sɛ agyede sɛnea ɛbɛyɛ a yebenya daa nkwa.—Mateo 20:28; Yohane 10:18.

 8. Nhwɛso pa bɛn na Yesu yɛ maa awofo?

⁸ Bere a na Yesu wɔ asase so no, ɔyɛɛ nhwɛso pa titiriw bi maa awofo. Susuw nea ɔyɛe no ho hwɛ. Bere a na onni adagyew koraa na nsɛm hyɛ no so mpo no, onyaa bere maa mmofra. Ɔhwɛɛ wɔn bere a na wɔredi agoru wɔ gua so, na ɔde su a mmofra da no adi no bi dii dwuma wɔ ne nkyerɛkyerɛ mu. (Mateo 11:16, 17) Wɔ Yesu akwantu a etwa to a ɔde kɔɔ Yerusalem no, na onim sɛ obehu amane na wɔakum no. Enti bere a nkurɔfo de mmofra baa Yesu nkyɛn no, n’asuafo a ebia na wɔpɛ sɛ wɔma Yesu gye n’ahome no bɔɔ mmɔden sɛ anka wɔbɛpam mmofra no. Nanso Yesu kaa n’asuafo no anim. Bere a Yesu reda no adi sɛ ‘n’ani ka’ mmofra ho no, ɔkae sɛ: “Momma mmofra no kwan na wɔmmra me nkyɛn, na munnsiw wɔn kwan.”—Marko 10:13, 14.

 9. Dɛn nti na yebetumi aka sɛ yɛn nneyɛe ho hia pii sen nea yɛka?

⁹ Yebetumi asuasua Yesu nhwɛso no. Sɛ mmofra ba yɛn nkyɛn bere a yenni adagyew mpo a, yɛyɛ yɛn ade dɛn? So yɛyɛ no sɛnea Yesu yɛe no? Nea mmofra hia fi wɔn awofo hɔ titiriw ne nea na Yesu wɔ ɔpɛ sɛ ɔde bɛma wɔn no, bere a onya maa wɔn ne n’ani a ɔma ekuu wɔn ho. Ɛyɛ nokware sɛ nsɛm te sɛ “Medɔ wo” a yɛbɛka ho hia de, nanso nneyɛe kɔ akyiri pii sen ɔkasa. Ɛnyɛ nea woka nko na ɛda ɔdɔ a wowɔ adi, na mmom wo nneyɛe nso ka ho bi paa. Ɔkwan a wofa so hwɛ wo mma, wɔn ho adagyew a wunya, ne w’ani a woma eku wɔn ho yɛ ɔkwan a wofa so da no adi. Nanso, ebetumi aba sɛ eyinom nyinaa a wobɛyɛ no rensow aba a wubetumi ahu, ebia ɛrensow aba ntɛm sɛnea wohwɛ kwan no. Boasetɔ ho hia. Sɛ yesua sɛnea Yesu ne n’asuafo dii nsɛm no a, yebetumi anya boasetɔ.

Yesu Boasetɔ ne Ne Dɔ

10. Ɔkwan bɛn na Yesu faa so kyerɛɛ n’asuafo no ahobrɛase ho ade, na aba bɛn na ɛsowee mfiase no?

¹⁰ Ná Yesu nim tumidi ho akansi a na ɛrekɔ so wɔ n’asuafo no mu no. Da bi, bere a Yesu ne n’asuafo no kɔɔ Kapernaum no, obisaa wɔn sɛ: “Dɛn na modwennwenee ho ɔkwan mu no? Na womuaa wɔn ano; efisɛ ɔkwan mu no wɔdwennwenee ho sɛ hena na ɔbɛyɛ wɔn mu ɔkɛse.” Sɛ́ anka Yesu de abufuw bɛka wɔn anim no, ofii boasetɔ mu yɛɛ nhwɛsode bi maa wɔn sɛnea ɛbɛyɛ a ɔbɛkyerɛ wɔn ahobrɛase. (Marko 9:33-37) So biribi pa bi fii mu bae? Biribi pa biara amfi mu amma amonom hɔ ara. Bɛyɛ asram asia akyi no, Yakobo ne Yohane maa wɔn maame kɔɔ Yesu nkyɛn kɔsrɛɛ dibea ahorow bi wɔ Ahenni no mu maa wɔn. Eyi ho nso, Yesu fi boasetɔ mu teɛteɛɛ wɔn nsusuwii no.—Mateo 20:20-28.

11. (a) Bere a Yesu ne n’asomafo no kɔɔ abansoro dan bi mu no, adwuma a ɛyɛ amanne bɛn na Yesu asomafo no anyɛ? (b) Dɛn na Yesu yɛe, na so ne mmɔdenbɔ no sow aba saa bere no?

¹¹ Ankyɛ na afe 33 Y.B. mu Twam afahyɛ no dui, na Yesu ne n’asomafo no hyiaam wɔ kokoam dii afahyɛ no. Bere a woduu abansoro dan no mu no, asomafo 12 no mu biara anyɛ n’adwene sɛ ɔbɛyɛ amanne a ɛne sɛ ɔbɛhohoro afoforo anan ho—adwuma a ɛba fam a na akoa anaa ɔbea a ɔwɔ ofie bi mu na ɔyɛ no. (1 Samuel 25:41; 1 Timoteo 5:10) Hwɛ sɛnea ɛbɛyɛ sɛ ɛhyɛɛ Yesu awerɛhow sɛ ohui sɛ n’asuafo no da so ara repere tumidi ne dibea no! Enti Yesu hohoroo wɔn mu biara nan ho, na afei ofii komam ka kyerɛɛ wɔn sɛ wonni ne nhwɛso no akyi nsom afoforo. (Yohane 13:4-17) So wodii akyi? Bible ka sɛ saa da no anwummere no “akasakasa bi nso baa wɔn mu sɛ wɔn mu hena na wobebu no kɛse.”—Luka 22:24.

12. Ɔkwan bɛn so na awofo betumi asuasua Yesu wɔ mmɔden a wɔbɔ sɛ wɔbɛtete wɔn mma no ho?

¹² Awofo, sɛ mo mma amfa mo afotu anyɛ adwuma a, so ɛma muhu sɛnea ɛbɛyɛ sɛ Yesu tee nka no? Monkae sɛ, ɛwom sɛ asomafo no ansiesie wɔn mmerɛwyɛ ahorow no ntɛm ara de, nanso Yesu ampa abaw. Awiei koraa no, ne boasetɔ no sow aba. (1 Yohane 3:14, 18) Awofo, ɛsɛ sɛ musuasua Yesu dɔ ne ne boasetɔ no, na mommpa abaw da wɔ mmɔden a mobɔ sɛ mobɛtete mo mma no ho.

13. Dɛn nti na ɛnsɛ sɛ ɔwofo bi de nteɛteɛm twa abofra bi asɛm a ɔrebisa so?

¹³ Ɛsɛ sɛ mmofra hu sɛ wɔn awofo dɔ wɔn, na wɔn ho hia wɔn. Ná Yesu pɛ sɛ ohu nea n’asuafo no redwennwen ho, enti sɛ na wobisa nsɛm bi a, na otie. Obisaa wɔn adwene wɔ nneɛma bi ho. (Mateo 17:25-27) Yiw, aso a wɔyɛ tie asɛm ne obi ho nokware anigye a wɔkyerɛ ka nkyerɛkyerɛ pa ho. Ɛsɛ sɛ ɔwofo bɔ mmɔden biara sɛ ɔremfa nteɛteɛm ntwa abofra bi asɛm a ɔpɛ sɛ obisa so sɛ: “Fi hɔ kɔ! Wunhu sɛ mereyɛ ade?” Sɛ ɔwofo bi nni adagyew ampa ara a, ɛsɛ sɛ ɔka kyerɛ abofra no sɛ wobesusuw asɛm no ho akyiri yi. Ɛno akyi no, ɛsɛ sɛ awofo no hwɛ hu sɛ wɔasusuw asɛm no ho. Saa kwan yi so no, abofra no behu sɛ ne ho hia ɔwofo no ampa, na ɛbɛyɛ mmerɛw ama no sɛ ɔbɛka ne tirim asɛm akyerɛ no.

14. Ɛdefa ɔdɔ a awofo bɛda no adi akyerɛ wɔn mma ho no, dɛn na wobetumi asua afi Yesu hɔ?

¹⁴ So ɛyɛ papa sɛ awofo de wɔn nsa bɛto wɔn mma kɔn mu na wɔayɛ wɔn atuu? Eyi yɛ ade foforo a awofo betumi asua afi Yesu hɔ. Bible ka sɛ ‘ɔyɛɛ mmofra no atuu de ne nsa guu wɔn so hyiraa wɔn.’ (Marko 10:16) Wususuw sɛ mmofra no yɛɛ wɔn ade dɛn? Akyinnye biara nni ho sɛ wɔn ani gyei, na wɔbɛn Yesu! Mo awofo, sɛ mopɛ mo mma asɛm na modɔ wɔn ankasa a, ɛrenyɛ den sɛ wobegye mo nteɛso ne mo nkyerɛkyerɛ atom.

Bere Dodow a Ɛsɛ sɛ Awofo Nya Ma Wɔn Mma

15, 16. Mmofra ntetee ho adwenkyerɛ bɛn na agye din, na ɛda adi sɛ dɛn na ɛma wɔkɔfa bae?

¹⁵ Ebinom ada adwenem naayɛ bi adi sɛ ebia ehia ankasa sɛ awofo nya bere pii de da ɔdɔ adi kyerɛ wɔn mma anaa. Wɔn a wɔwɔ mmofra ntetee ho nimdeɛ bi nam anifere kwan so ahyɛ adwenkyerɛ bi a wɔfrɛ no bere a ɛfata ho nkuran. Wɔn a wogyina saa adwenkyerɛ no akyi kyerɛ sɛ, mmofra nhia wɔn awofo bere pii, na mmom sɛ awofo di kan yɛ bere kakra a wobenya ama wɔn mma no ho nhyehyɛe pa na wosiesie wɔn ho yiye a, mmofra no nya so mfaso. So bere a ɛfata ho adwenkyerɛ no yɛ papa, na so mmofra yiyedi so na wogyina yɛɛ nhyehyɛe no?

¹⁶ Nhoma kyerɛwfo bi a na ɔne mmofra pii akasa kae sɛ, nea mmofra “hia fi wɔn awofo hɔ paa ne sɛ wobenya wɔn ho bere” na “wɔama wɔn ani aku wɔn ho yiye.” Ne titiriw no, ɔbenfo bi a ɔwɔ kɔlege bi mu kae sɛ: “Nim a awofo nim sɛ wontumi nyɛ nea ɛsɛ sɛ wɔyɛ nti na asɛm a ɛne [bere a ɛfata] no abenya nnyinaso no. Nkurɔfo nam saa asɛm yi so reyi wɔn ho ano wɔ bere kakraa bi pɛ a wonya ma wɔn mma no ho.” Bere dodow ahe na ɛsɛ sɛ awofo nya ma wɔn mma?

17. Dɛn na mmofra hia fi wɔn awofo hɔ?

¹⁷ Bible nka bere dodow no. Nanso, wɔka kyerɛɛ Israelfo a wɔyɛ awofo sɛ wɔne wɔn mma nkasa bere a wɔwɔ fie, bere a wɔnam kwan so, bere a wɔreda, ne wɔn sɔre mu. (Deuteronomium 6:7) Eyi kyerɛ pefee sɛ ɛsɛ sɛ awofo ne wɔn mma bɔ nkɔmmɔ da biara na wɔkyerɛkyerɛ wɔn bere nyinaa.

18. Ɔkwan bɛn so na Yesu de hokwan ahorow biara a onyae tetee n’asuafo, na dɛn na awofo betumi asua afi eyi mu?

¹⁸ Yesu tumi de ntetee maa n’asuafo no bere a na ɔne wɔn redidi, bere a na ɔne wɔn retu kwan, ne bere a na ɔne wɔn regye wɔn ahome mpo. Enti, ɔde hokwan biara a onyae kyerɛkyerɛɛ wɔn. (Marko 6:31, 32; Luka 8:1; 22:14) Saa ara na ɛsɛ sɛ Kristofo a wɔyɛ awofo ma wɔn ani da hɔ na wɔde hokwan biara a wobenya ne wɔn mma bɔ nkɔmmɔ a ɛfata, na wɔhwɛ ma nkitahodi pa ba wɔne wɔn mma ntam, na wɔtete wɔn wɔ Yehowa akwan so.

Ade a Ɛsɛ sɛ Wokyerɛ ne Ɔkwan a Wobɛfa so Akyerɛ

19. (a) Bere a yebenya ama mmofra akyi no, dɛn bio na ɛho hia? (b) Dɛn titiriw na ɛsɛ sɛ awofo kyerɛkyerɛ wɔn mma?

¹⁹ Ɛnyɛ bere a wubenya ama wo mma ne kyerɛ a wobɛkyerɛkyerɛ wɔn nko ne nea ehia na ama woatumi atete wɔn yiye. Ade a ɛho hia nso ne dekode a wobɛkyerɛ no. Hwɛ sɛnea Bible si nneɛma a ɛsɛ sɛ wokyerɛ no so dua. Ɛka sɛ: “Nsɛm yi a merehyɛ wo nnɛ yi . . . ; fa kyerɛkyerɛ wo mma yiye.” Dɛn ne “nsɛm yi” a ehia sɛ wɔde kyerɛkyerɛ mmofra no? Akyinnye biara nni ho sɛ ɛne nsɛm a na wɔadi kan aka dedaw yi: “Fa wo koma nyinaa ne wo kra nyinaa ne w’ahoɔden nyinaa dɔ [Yehowa, NW] wo Nyankopɔn.” (Deuteronomium 6:5-7) Yesu kae sɛ eyi ne Onyankopɔn mmara nsɛm no mu nea ɛho hia sen biara. (Marko 12:28-30) Ɛsɛ sɛ awofo kyerɛkyerɛ wɔn mma Yehowa ho ade titiriw, na wɔkyerɛkyerɛ wɔn nea enti a Yehowa nkutoo na ɔfata sɛ yefi yɛn kra nyinaa mu dɔ no na yɛsom no.

20. Dɛn na Onyankopɔn ka kyerɛɛ awofo a wɔtraa ase tete no sɛ wɔmfa nkyerɛkyerɛ wɔn mma?

²⁰ Nanso, saa “nsɛm yi” a wɔhyɛ awofo nkuran sɛ wɔmfa nkyerɛkyerɛ wɔn mma no kɔ akyiri sen obi kra nyinaa a ɔde bɛdɔ Onyankopɔn ara kwa. Wubehu sɛ Mose tĩĩ mmara a Onyankopɔn kyerɛw guu abopon so—Mmara Nsɛm Du—no mu wɔ Deuteronomium ti 5. Mmara yi bi ne sɛ ɛnsɛ sɛ wodi atoro, wowia ade, wodi awu, na wɔsɛe aware. (Deuteronomium 5:11-22) Enti wɔmaa awofo a wɔtraa ase tete no huu hia a ehia sɛ wɔkyerɛkyerɛ wɔn mma abrabɔ pa. Ɛsɛ sɛ Kristofo a wɔyɛ awofo nnɛ kyerɛkyerɛ wɔn mma nneɛma a ɛtete saa ara na atumi aboa wɔn ma wɔanya daakye a ahobammɔ ne anigye wom.

21. Akwankyerɛ a ɛne sɛ wɔmfa Onyankopɔn asɛm ‘nkyerɛkyerɛ’ mmofra ‘yiye’ no kyerɛ dɛn?

²¹ Hyɛ no nsow sɛ wɔkyerɛ sɛnea ɛsɛ sɛ awofo de saa “nsɛm yi,” anaa ahyɛde yi kyerɛkyerɛ wɔn mma: “Fa kyerɛkyerɛ wo mma yiye.” Asɛm a ɛne ‘kyerɛkyerɛ yiye’ no kyerɛ sɛ “wubetĩ asɛm bi mu mpɛn pii: anaa wode asɛm bedua obi adwenem.” Enti ɔkwan bi so no, Onyankopɔn reka akyerɛ awofo sɛ wɔnyɛ Bible nkyerɛkyerɛ ho nhyehyɛe a atirimpɔw a ɛwɔ akyi ne sɛ wɔde Onyankopɔn som ho nimdeɛ bedua wɔn mma adwenem.

22. Dɛn na wɔka kyerɛɛ Israelfo a wɔyɛ awofo sɛ wɔnyɛ mfa nkyerɛkyerɛ wɔn mma, na ɛno kyerɛ dɛn?

²² Egye mmɔdenbɔ na awofo atumi ayɛ adwuma a ɛte saa. Bible ka sɛ: “Fa [“nsɛm yi,” anaa Onyankopɔn mmara] yɛ sɛnkyerɛnne kyekyere wo nsa, na ɛnyɛ w’aniwa ntam nkae ntamabama; na kyerɛw gu wo fi apongua ho ne w’aponkɛse so.” (Deuteronomium 6:8, 9) Eyi nkyerɛ sɛ ɛsɛ sɛ awofo kyerɛw Onyankopɔn mmara gu wɔn apongua ho ne wɔn aponkɛse ho ankasa, na saa ara nso na ɛnkyerɛ sɛ ɛsɛ sɛ wɔde bi kyekyere wɔn mma nsa na wɔde bɔ wɔn aniwa ntam. Mmom no, nea ɛkyerɛ ne sɛ ɛsɛ sɛ awofo kae wɔn mma Onyankopɔn nkyerɛkyerɛ bere nyinaa. Ɛsɛ sɛ wɔkyerɛkyerɛ wɔn mma daa wɔ ɔkwan bi so a ɛbɛma ayɛ sɛ nea Onyankopɔn nkyerɛkyerɛ si mmofra no ani so daa.

23. Dɛn na yebesusuw ho wɔ dapɛn a edi hɔ adesua no mu?

²³ Dɛn ne nneɛma atitiriw bi a ɛsɛ sɛ awofo kyerɛkyerɛ wɔn mma? Dɛn nti na ɛho hia nnɛ sɛ wɔkyerɛkyerɛ mmofra na wɔtete wɔn ma wohu sɛnea wɔbɛbɔ wɔn ho ban? Mmoa bɛn na ɛwɔ hɔ nnɛ a ɛbɛboa awofo ma wɔatumi akyerɛkyerɛ wɔn mma yiye? Yebesusuw eyinom ne nsɛmmisa afoforo a ɛhaw awofo pii ho wɔ asɛm a edi hɔ no mu.

Awofo, Mommɔ Mo Agyapade A Ɛsom Bo Ho Ban

“Nyansa [yɛ akoban, Fante Bible] . . . nyansa gye ne wura nkwa.”—Ɔsɛnkafo 7:12.

 1. Dɛn nti na ɛsɛ sɛ awofo bu wɔn mma sɛ akyɛde?

AWOFO de ɔteasefo a ɔwɔ nipadua ne nipasu a ɛte sɛ wɔn ankasa de ba nkwa mu. Bible frɛ nkokoaa a wɔte saa no ‘Yehowa agyapade.’ (Dwom 127:3) Esiane sɛ Yehowa ne Nkwa Mafo ankasa nti, ɔde biribi a ɛyɛ ɔno ankasa de koraa na ahyɛ awofo nsa. (Dwom 36:9) Awofo, mubu akyɛde a ɛsom bo saa a Onyankopɔn de ma mo no dɛn?

 2. Bere a Manoa tee sɛ ɔrebɛyɛ agya no, dɛn na ɔyɛe?

² Akyinnye biara nni ho sɛ ɛsɛ sɛ yɛde ahobrɛase ne anisɔ gye akyɛde a ɛte saa. Bɛboro mfirihyia 3,000 a atwam no, bere a ɔbɔfo bi ka kyerɛɛ Israelni Manoa yere sɛ ɔrebɛwo ba no, Manoa gyee asɛm no wɔ saa kwan yi so. Bere a Manoa tee asɛmpa no, ɔbɔɔ mpae sɛ: “O [Yehowa, NW], ma Onyankopɔn nipa a wosomaa no no mmra yɛn nkyɛn bio, na ɔmmɛkyerɛ yɛn nea yɛnyɛ abofra a wɔrebɛwo no no.” (Atemmufo 13:8) Awofo, dɛn na mubetumi asua afi Manoa nhwɛso yi mu?

Nea Enti a Onyankopɔn Mmoa Ho Hia Nnɛ

 3. Dɛn nti na Onyankopɔn mmoa a wɔde tete mmofra ho hia titiriw nnɛ?

³ Ɛnnɛ ne bere a awofo hia Yehowa mmoa wɔ wɔn mma ntetee mu sen bere biara. Dɛn ntia? Efisɛ wɔatow Satan Ɔbonsam ne n’abɔfo afi soro agu asase so. Bible bɔ kɔkɔ sɛ: “Asase ne ɛpo nnue, efisɛ ɔbonsam asian aba mo nkyɛn, na wafa abufuw kɛse, efisɛ onim sɛ ne bere a ɔwɔ yɛ tiaa.” (Adiyisɛm 12:7-9, 12) Bible ka sɛ Satan “nam sɛ gyata a ɔbobom hwehwɛ nea obenya no amene.” (1 Petro 5:8) Mmoa a wɔn ho nyɛ den koraa no, titiriw wɔn mma nkumaa no, na agyata taa kyere wɔn. Ɛnde, nyansa wom sɛ Kristofo a wɔyɛ awofo bɛhwehwɛ akwankyerɛ afi Yehowa hɔ de abɔ wɔn mma ho ban. Mmɔden bɛn na worebɔ de ayɛ saa?

 4. (a) Sɛ awofo bi nim sɛ gyata bi nenam wɔn mpɔtam a, dɛn na ɛsɛ sɛ wɔyɛ? (b) Dɛn na mmofra hia de abɔ wɔn ho ban?

⁴ Sɛ wunim sɛ gyata bi nenam wo mpɔtam a, akyinnye biara nni ho sɛ wo mma ho ban a wobɛbɔ bɛyɛ w’ahiade titiriw. Satan yɛ owudifo. Ɔpɛ sɛ ɔsɛe Onyankopɔn nkurɔfo, na ɔma wɔbɛyɛ nkurɔfo a Onyankopɔn ani nsɔ wɔn. (Hiob 2:1-7; 1 Yohane 5:19) Otumi nya mmofra ntɛm ara. Ɛsɛ sɛ mmofra hu Yehowa na wɔyɛ osetie ma no na amma wɔantɔ Ɔbonsam mfiri mu. Ɛho hia sɛ wonya Bible mu nimdeɛ. Yesu kae sɛ: “Eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yohane 17:3) Afei nso, ɛsɛ sɛ mmofra hu nyansa, ɛsɛ sɛ wotumi te nea wosua no ase na wɔde di dwuma. Esiane sɛ “nyansa gye ne wura nkwa” nti, ɛsɛ sɛ mo awofo mo de nokware no dua mo mma koma mu. (Ɔsɛnkafo 7:12) Ɔkwan bɛn so na mobɛfa ayɛ eyi?

 5. (a) Yɛbɛyɛ dɛn atumi ama obi ahu nyansa? (b) Ɔkwan bɛn so na Mmebusɛm kyerɛkyerɛ mfaso a ɛwɔ nyansa so mu?

⁵ Wubetumi akenkan Onyankopɔn Asɛm akyerɛ wo mma, na ɛsɛ sɛ woyɛ saa. Nanso, sɛ́ wobɛboa wɔn ma wɔadɔ Yehowa na wɔayɛ osetie ama no no hwehwɛ pii sen saa, ɛhwehwɛ sɛ wɔn ankasa nya ntease. Mfatoho bi ni: Wobetumi aka akyerɛ abofra bi sɛ sɛ ɔrebetwa karkwan mu a ɛsɛ sɛ ɔhwɛ benkum ne nifa ansa na watwam. Nanso, mmofra binom nyɛ saa. Dɛn ntia? Ebia wɔntaa nkyerɛkyerɛ bɔ a kar betumi abɔ abofra no mu yiye nkyerɛ no. Anaasɛ wɔnkyerɛkyerɛ mu wɔ ɔkwan a ɛbɛma wate asiane a ebetumi ato no wɔ ahwɛyiye a ɔrenyɛ ho no ase, sɛnea ɛbɛyɛ a obedi “agyimisɛm” a ebetumi ama asiane bi ato no no so. Egye bere ne boasetɔ pii na wɔde akyerɛkyerɛ obi ama wahu nyansa. Nanso, hwɛ mfaso ara a ɛwɔ nyansa so! Bible ka sɛ: “N’akwan yɛ akwan a ɛyɛ fɛ, na n’asa nyinaa yɛ asomdwoe. Ɛyɛ nkwa dua ma wɔn a woso no mu, na nhyira ne nea okura mu.”—Mmebusɛm 3:13-18; 22:15.

Nkyerɛkyerɛ a Ɛma Nyansa

 6. (a) Dɛn nti na mmofra ntaa nyɛ wɔn ade nyansam? (b) Ɔko bɛn na ɛrekɔ so?

⁶ Mpɛn pii na mmofra di mfomso a ɛnyɛ sɛ wɔnkyerɛkyerɛɛ wɔn nea ɛteɛ, na mmom nea ɛkyerɛ ne sɛ nkyerɛkyerɛ no nkaa wɔn koma, anaasɛ ennuu wɔn koma mu. Ɔbonsam ayere ne ho denneennen sɛ obenya mmofra koma so tumi. Ɔbonsam abɔ ne tirim sɛ ɔbɛma nneɛma bɔne a ɛrekɔ so wɔ wiase no anya mmofra so nkɛntɛnso bɔne. Ɔbɔ mmɔden nso sɛ ɔbɛma wɔn koma a ɛtɔ kɔ bɔne so no akanyan wɔn ma wɔakɔyɛ bɔne. (Genesis 8:21; Dwom 51:5) Ɛsɛ sɛ awofo hu sɛ wɔn mma koma so a wobedi ho akodi bi rekɔ so ankasa.

 7. Dɛn nti na nea ɛteɛ anaa nea ɛnteɛ ho asɛm a wɔbɛka akyerɛ abofra nko ara nnɔɔso?

⁷ Awofo taa ka nea ɛteɛ ne nea ɛnteɛ ho asɛm kyerɛ wɔn ba, a wogye di sɛ wɔnam saa a wɔyɛ no so kyerɛkyerɛ no abrabɔ pa. Ebia wɔbɛka akyerɛ abofra no sɛ atorodi ne awi nye, anaasɛ ɛyɛ bɔne sɛ wo ne ɔbarima anaa ɔbea a ɔnyɛ wo kunu anaa wo yere bɛda. Nanso, abofra no hia biribi a emu yɛ den a ɛbɛboa no ma wadi saa ahyɛde yi so sen sɛ n’awofo bɛka akyerɛ no kɛkɛ. Eyinom yɛ Yehowa mmara. Ɛsɛ sɛ abofra no hu sɛ nyansa wom sɛ obedi Onyankopɔn ahyɛde ahorow so.—Mmebusɛm 6:16-19; Hebrifo 13:4.

 8. Nkyerɛkyerɛ bɛn na ebetumi aboa mmofra ma wɔayɛ wɔn ade nyansam?

⁸ Amansan yi mu nneɛma bebrebe, gu a abɔde a nkwa wom gu ahorow, ewim nsakrae—nneɛma a ɛtete saa nyinaa betumi aboa abofra bi ma wahu sɛ Ɔbɔadeɛ a ɔyɛ nyansa nyinaa wura bi wɔ hɔ. (Romafo 1:20; Hebrifo 3:4) Afei nso, ɛsɛ sɛ wɔkyerɛkyerɛ abofra no ma ohu sɛ Onyankopɔn dɔ no, na ɔnam Ne Ba no afɔrebɔ so ayɛ nsiesiei sɛ ɔbɛma no daa nkwa, na sɛ otie Onyankopɔn asɛm a obetumi ama Onyankopɔn ani agye. Sɛ ɛba saa a, ɛmfa ho mmɔden a Ɔbonsam bɔ sɛ obesiw abofra no kwan no, obesi gyinae asom Yehowa.—Mmebusɛm 22:6; 27:11; Yohane 3:16.

 9. (a) Dɛn na nkyerɛkyerɛ a egye nkwa hwehwɛ? (b) Dɛn na wɔaka akyerɛ agyanom no sɛ wɔnyɛ, na eyi hwehwɛ sɛ wɔyɛ dɛn?

⁹ Nkyerɛkyerɛ a ɛbɔ abofra ho ban na ɛkanyan no ma ɔyɛ nea ɛteɛ no gye bere, ani a wɔma ekũ abofra no ho, ne nhyehyɛe pa. Ɛhwehwɛ sɛ awofo gye akwankyerɛ fi Onyankopɔn hɔ. Bible ka sɛ: ‘Agyanom monyɛn mo mma Yehowa kasakyerɛ ne nyansakyerɛ mu.’ (Efesofo 6:4) Ɛno kyerɛ dɛn? Wɔ mfitiase Hela kasa mu no, nea “nyansakyerɛ” kyerɛ ne sɛ “wɔde adwene hyɛ obi mu.” Enti wɔreka akyerɛ agyanom sɛ wɔmfa Yehowa adwene nhyɛ wɔn mma mu. Hwɛ ahobammɔ a ɛno bɛma mmofra no anya! Sɛ mmofra nya Onyankopɔn adwene, sɛ wɔde ne nsusuwii hyɛ wɔn adwenem a, ɛbɔ wɔn ho ban, na ɛmma wɔnnyɛ bɔne.

Ɔpɛ a Efi Ɔdɔ Mu

10. Sɛ wubetumi akyerɛkyerɛ wo ba yiye a, dɛn na ɛho hia sɛ wuhu?

¹⁰ Sɛ wubetumi atete wo ba yiye sɛnea wopɛ no no a, ɛsɛ sɛ wo mmɔdenbɔ no fi ɔdɔ mu. Ade a ɛho hia ne nkitahodi pa. Hu nea ɛrekɔ so wɔ wo ba no asetram, ɛne adwene a okura. Bere a moregye mo ahome a mo ani agye no, fa anifere kwan so ne no mmɔ nkɔmmɔ. Ɛtɔ mmere bi a, nea ɔbɛka no bɛma wo ho adwiriw wo. Nanso hwɛ yiye paa na woanyɛ ade antra so. Mmom no, ma onhu sɛ asɛm a ɔreka no ho hia wo.

11. Ɔwofo bi bɛyɛ dɛn de Onyankopɔn adwene ahyɛ abofra bi mu?

¹¹ Ɛwom, ebia woakenkan Onyankopɔn mmara a ɛfa nna mu ɔbrasɛe ho afi Bible mu akyerɛ wo ba pɛn, ebia woayɛ saa mpɛn pii mpo. (1 Korintofo 6:18; Efesofo 5:5) Ebia eyi ama wo mma no ahu nea ɛsɔ Yehowa ani ne nea ɛnsɔ n’ani. Nanso, Yehowa adwene a wode bɛhyɛ abofra mu no hwehwɛ pii. Mmofra hia mmoa na wɔde asusuw Yehowa mmara ho ahu so mfaso. Ehia sɛ wɔte ase sɛ Yehowa mmara teɛ na ɛyɛ papa, na ɛsodi yɛ nea ɛfata na ɛkyerɛ ɔdɔ. Sɛ wo ne wo mma susuw Kyerɛwnsɛm no ho ma wogye Onyankopɔn nsusuwii tom nkutoo a, ɛnna yebetumi aka sɛ wode n’adwene ahyɛ wɔn mu.

12. Ɔwofo bi bɛyɛ dɛn atumi aboa ne ba ma wanya nna ho adwene a ɛfata?

¹² Sɛ woreka nna ho asɛm a, wubetumi abisa no sɛ, “So wususuw sɛ Yehowa mmara a ɛka sɛ ɛnsɛ sɛ obi nya nna mu kyɛfa kosi sɛ ɔbɛware no so a obedi no bɛma wahwere anigye?” Hyɛ wo ba no nkuran ma ɔnkyerɛkyerɛ mmuae a ɔde bɛma no mu. Bere a woakyerɛkyerɛ Onyankopɔn nsiesiei a ɛyɛ nwonwa a wɔnam so wo abofra mu awie no, wubetumi abisa no sɛ, “Wususuw sɛ yɛn Nyankopɔn a ɔwɔ dɔ no bɛyɛ mmara bi de asɛe yɛn anigye wɔ asetra mu? Anaasɛ wususuw sɛ ne mmara no wɔ hɔ ma yɛn anigye ne ahobammɔ?” (Dwom 119:1, 2; Yesaia 48:17) Hu wo ba no adwene wɔ asɛm yi ho. Afei wubetumi atwe adwene asi nhwɛso ahorow a ɛfa sɛnea nna mu ɔbrasɛe ama ebinom adi awerɛhow na ɛde wɔn akɔ ɔhaw mu so. (2 Samuel 13:1-33) Sɛ wo ne wo ba susuw nsɛm ho ma ɔte ase na ogye Onyankopɔn nsusuwii tom a, na woabɔ mmɔden pii wɔ Onyankopɔn adwene a wode bɛhyɛ no mu no ho. Nanso, biribi foforo wɔ hɔ a wubetumi ayɛ.

13. Dɛn na sɛ abofra bi te ase a ebetumi akanyan no yiye ma wayɛ osetie ama Yehowa?

¹³ Ɛyɛ papa sɛ worenkyerɛ wo ba no asiane ahorow a ebefi Yehowa mmara so a obebu mu aba nko, na mmom wobɛkyerɛkyerɛ sɛnea yɛn abrabɔ ka Yehowa ankasa nso mu akyerɛ no. Fa Bible no kyerɛ wo ba no ma onhu sɛ sɛ yɛanyɛ Yehowa apɛde a, yebetumi ama Yehowa adi yaw. (Dwom 78:41) Wubetumi abisa no sɛ, “Dɛn nti na wompɛ sɛ woma Yehowa di yaw?” na kyerɛkyerɛ mu sɛ: “Onyankopɔn tamfo Satan kyerɛ sɛ pɛsɛmenkominya nti na yɛsom Yehowa, na ɛnyɛ ɔdɔ a yɛdɔ no nti.” Afei ka sɛnea bere a Hiob kuraa ne mudi mu no ɔmaa Yehowa koma ani gyei, na ɔnam so maa Satan yɛɛ ɔtorofo wɔ sobo a ɔbɔe no ho ho asɛm kyerɛ no. (Hiob 1:9-11; 27:5) Ɛsɛ sɛ wo ba no te ase sɛ ɔnam n’abrabɔ so betumi ama Yehowa ani agye anaasɛ wama ne werɛ ahow. (Mmebusɛm 27:11) Wubetumi de Suasua Ɔkyerɛkyerɛfo Kɛse Noa nhoma no akyerɛkyerɛ mmofra eyi ne asuade afoforo a ɛho hia pii.

Anigyesɛm a Afi Mu Aba

14, 15. (a) Ɔkyerɛkyerɛfo nhoma no mu asuade ahorow bɛn na ahyɛ mmofra nkuran? (b) Nneɛma pa bɛn na afi Ɔkyerɛkyerɛfo nhoma no a wode adi dwuma no mu aba? (Hwɛ adaka a ɛwɔ kratafa 18-19 no nso.)

¹⁴ Nanabarima bi a ɔwɔ Croatia a ɔkenkan Ɔkyerɛkyerɛfo nhoma no kyerɛ ne banana a wadi mfirihyia ason kyerɛwee sɛ, abarimaa no kaa asɛm a edi so yi kyerɛɛ no: “Maame ka kyerɛɛ me sɛ menkɔyɛ biribi, nanso na mempɛ sɛ meyɛ. Afei mekaee ti a ɛka sɛ ‘Osetie Bɔ Wo Ho Ban’ no, enti mesan kɔka kyerɛɛ no sɛ mɛyɛ nea ɔkae no.” Awarefo bi a wɔwɔ Florida, U.S.A., kaa ti a n’asɛmti ne “Nea Enti a Ɛnsɛ sɛ Yedi Atoro” no ho asɛm sɛ: “Nsɛmmisa wom a ɛma mmofra no ka wɔn komam nsɛm, na wogye wɔn mfomso ahorow tom a sɛ ɛnyɛ nhoma no a wɔasua no a anka wɔrenyɛ saa.”

¹⁵ Mfonini ahorow bɛyɛ 230 na ɛwɔ Ɔkyerɛkyerɛfo nhoma no mu, na wɔakyerɛw asɛm bi afa mfonini biara anaa mfonini ahorow bi ho, anaasɛ wɔde ho nkyerɛkyerɛmu bi ama. Ɛna bi a wakyerɛ anisɔ ka sɛ: “Ɛtɔ bere bi a me babarima no hwɛ mfonini bi dinn a ɔmpɛ sɛ obue baabi foforo. Ɛnyɛ sɛ mfonini no yɛ fɛ kɛkɛ na mmom asuade wom ankasa, anyɛ yiye koraa no ɛma mmofra bisa nsɛm. Wɔ mfonini bi a abofra bi rehwɛ television wɔ ɔdan bi a esum wom mu ho no, me babarima no de nne a ɛkyerɛ sɛ ohu sɛ biribi a ɛnyɛ papa rekɔ so bisae sɛ, ‘Maame, dɛn na abarimaa no reyɛ no?’” Asɛm a wɔakyerɛw afa mfonini no ho kenkan sɛ: “Hena na obetumi ahu biribiara a yɛyɛ?”

Nkyerɛkyerɛ a Ɛho Hia Nnɛ

16. Dɛn na ɛho hia sɛ wɔkyerɛkyerɛ mmofra nnɛ, na dɛn ntia?

¹⁶ Ɛsɛ sɛ mmofra hu nneɛma a ɛfata sɛ wɔde wɔn awode yɛ ne nea ɛmfata sɛ wɔde yɛ. Nanso, eyi ho asɛm a wɔbɛka no nyɛ mmerɛw bere nyinaa. Obi a ɔkyerɛw nsɛm kɔ atesɛm krataa bi mu kae sɛ onyinii wɔ bere bi mu a na wobu awode din a wɔbɛbɔ de aka asɛm sɛ ɛyɛ ade a ɛmfata. Ɔkyerɛw faa ne mma a na ɔbɛkyerɛkyerɛ wɔn no ho sɛ: “Ɛsɛ sɛ midi me fɛre no so.” Nokwarem no, sɛ fɛre nti awofo ankyerɛkyerɛ wɔn ba ɔbarima ne ɔbea nna ho asɛm a, wɔrennya ahobammɔ. Wɔn a wɔto mmofra mmonnaa no gyina nim a abofra no nnim ho hwee no so na ɛyɛ wɔn basabasa. Suasua Ɔkyerɛkyerɛfo Kɛse No nhoma no ka eyi ho asɛm wɔ ɔkwan a ɛho tew na nidi wom so. Ɔbarima ne ɔbea nna ho asɛm a yɛbɛka akyerɛ mmofra no remma wɔnsɛe, na mmom ebetumi abɔ wɔn ho ban.

17. Ɔkwan bɛn so na Ɔkyerɛkyerɛfo nhoma no boa awofo ma wɔkyerɛkyerɛ wɔn mma nna ho nsɛm?

¹⁷ Bere a nhoma no reka abɔfo bɔne a wɔbaa asase so bɛwoo mma ho asɛm wɔ ti 10 no, ebisa abofra no sɛ: “Dɛn na wunim fa nna mu nkitahodi ho?” Nhoma no de ho mmuae a emu da hɔ na nidi wom ma. Akyiri yi, ti 32 kyerɛkyerɛ sɛnea wobetumi abɔ mmofra ho ban afi wɔn a wɔto mmofra mmonnaa ho mu. Nkrataa pii na wɔakyerɛw de akyerɛ sɛ nkyerɛkyerɛ a ɛte saa ho hia. Biako kae sɛ: “Dapɛn a etwaam no, me babarima Javan kohuu ne duruyɛfo, na oduruyɛfo no bisae sɛ yɛne yɛn ba no asusuw nneɛma a ɛfata sɛ ɔde n’awode yɛ ho anaa. N’ani gyei yiye sɛ na yɛde yɛn nhoma foforo yi ayɛ saa.”

18. Ɔkyerɛkyerɛfo nhoma no kyerɛkyerɛ ɔsom a wɔde ma ɔman agyiraehyɛde ahorow no mu dɛn?

¹⁸ Eti foforo ka Bible mu asɛm bi a ɛfa Hebrifo mmerante baasa, Sadrak, Mesak, ne Abed-Nego a wɔankotow ohoni a na egyina hɔ ma Babilon Man no ho asɛm. (Daniel 3:1-30) Ebia ebinom renhu abusuabɔ a ahonisom ne frankaakyia wɔ sɛnea Ɔkyerɛkyerɛfo nhoma no kyerɛ no. Nanso, hyɛ nea nhoma kyerɛwfo Edward Gaffney kae wɔ nsɛm bi a U.S. Catholic (nsɛmma nhoma no) bisabisaa no no mu nsow. Gaffney kae sɛ bere a ne babea ka kyerɛɛ no sɛ wasua “mpaebɔ foforo wɔ sukuu mu” wɔ ne sukuu da a edi kan no, ɔkae sɛ ne babea no ntĩ mpaebɔ no mu nkyerɛ no. Gaffney kae sɛ: “Ɔde ne nsa too ne koko de anigye fii ase sɛ, ‘Mehyɛ bɔ sɛ medi nokware ama me man frankaa . . . ’” Gaffney toaa so sɛ: “Ntɛm ara na mekaee biribi. Nea Yehowa Adansefo ka no yɛ nokware. Wɔrekyerɛkyerɛ yɛn mma nkumaa koraa no ɔman som wɔ yɛn sukuu ahorow mu—nokware a ɛso bi nni a wobedi ama ɔman no.”

Mmɔdenbɔ no Fata Paa

19. Akatua bɛn na ɛwɔ mmofra ntetee so?

¹⁹ Nokwarem no, mfaso paa wɔ wo mma a wobɛkyerɛkyerɛ wɔn no so. Bere a ɛna bi nyaa krataa fii ne babarima a ɔwɔ Kansas, U.S.A. nkyɛn no, osui. Ne babarima no kyerɛwee sɛ: “Mete nka sɛ minyaa no yiye paa sɛ minyaa ntetee a aboa ma misi pi wɔ nkate fam na mekari pɛ sɛnea ɛfata. Wo ne Paapa fata nkamfo paa.” (Mmebusɛm 31:28) Suasua Ɔkyerɛkyerɛfo Kɛse No betumi aboa awofo afoforo pii ma wɔakyerɛkyerɛ wɔn mma, na wɔnam saayɛ so abɔ wɔn agyapade a ɛsom bo yi ho ban.

20. Dɛn na ɛsɛ sɛ awofo kae bere nyinaa, na nkɛntɛnso bɛn na ɛsɛ sɛ ɛno nya wɔ wɔn so?

²⁰ Ɛfata sɛ yenya bere pii ma yɛn mma, yɛma yɛn ani kũ wɔn ho, na yɛbɔ mmɔden biara a yebetumi boa wɔn. Ɛnkyɛ na wɔanyinyin. Fa hokwan biara a wubenya ne wɔn atra no di dwuma yiye na boa wɔn. Worennu wo ho sɛ wobɔɔ mmɔden boaa wɔn da. Ɛbɛma wɔadɔ wo. Na kae bere nyinaa sɛ wo mma yɛ akyɛde a Onyankopɔn de ama wo. Hwɛ sɛnea wɔyɛ agyapade a wɔsom bo! (Dwom 127:3-5) Enti hwɛ wɔn so sɛ ade a ɛsom bo na hu sɛ wubebu wɔn ho akontaa akyerɛ Onyankopɔn wɔ ɔkwan a wofa so tete wɔn no ho, efisɛ ɛyɛ w’asɛyɛde.

[Ase hɔ asɛm]