‘Dan W’adesoa To Yehowa So’​—Ɔkwan Bɛn So?

DAWID, tete Israel mmusuakuw 12 ahemman no so hene a wonim no yiye no de saa nkuranhyɛ yi maa yɛn: “Dan w’adesoa to [Yehowa] so, na obeso wo mu, ɔremma ɔtreneeni ntwiw n’anan mu da.”​—Dwom 55:22.

Dɛn nti na afotu a ɛte saa a efi Ɔhene Dawid nkyɛn no fata titiriw? Na wobɛyɛ dɛn adi akyi?

Dawid nyaa kyɛfa kɛse wɔ Yehowa Nyankopɔn som mu. Sɛ aberante no okum gyata, osisi ne Goliat ɔbran no. Dawid gyee din wɔ akodi mu, trɛw tete Israel ahye mu koduu faako a na Onyankopɔn ahyɛ. Bio nso na obiara ne no nsɛ wɔ nnwom kyerɛw ne ne hyehyɛ mu. Nanso ɛnyɛ nkɔso ne yiyedi mu anigye nko na Dawid nyae, na mmom ohyiaa awerɛhow ne ɔhaw ahorow nso.​—1 Samuel 16:18; 17:34-36; 18:7.

Nea Enti a David ‘Dan N’adesoa Too Yehowa So’

Bere a Dawid kae sɛ “dan w’adesoa to [Yehowa] so” no, nea edi kan no na ɔreka ɔno ankasa ho asɛm. Dɛn nti na yebetumi aka saa? Efisɛ wɔ nsɛm a ɛkeka ho no mu no ɛda adi sɛ Dawid hyehyɛɛ saa dwom yi bere a na ne tumidi hokwan ahorow no akɔ fam yiye. Eyi yɛ bere a ɛkaa kakraa ma ne ba oniberefo Absalom gyee ahengua no fii n’agya nsam no.

Ahohiahia a na Dawid wɔ mu no da adi wɔ nsɛm a Dwom 55 de fi ase no mu: “Onyankopɔn, yɛ aso tie me mpaebɔ, na nhintaw wo ho mfi me nkotɔsrɛ ho. Wɛn w’aso ma me, na gye me so. M’adwene nwam me nkɔmmɔ mu, na misi apini.” Nkyekyem bɛboro asia a edi hɔ no ɔkɔ so keka nsɛm a ɛtete saa ara.

Dɛn nti na Dawid baa saa tebea yi mu? Esiane n’atamfo nti. Afei ɔbɔ mpae sɛ Onyankopɔn ne n’atamfo nni, na ɔhyɛ da bɔ n’adamfo bi a na wabɛdan ne yimafo no din. Akyinnye biara nni ho sɛ na oyi yɛ Ahitofel, a na otumi ka wɔ ne ho sɛ: “Na ɛnyɛ ɔtamfo a ɔbɔ me ahohora, . . . Na wo. . .me yɔnko ne me manni, wo a me ne wo di atirimsɛm dɛdɛ, na yɛnam yuu kɔ Onyankopɔn fi.”​—Nkyekyem 12-14.

Bere a waka n’amanehunu ne nea enti a aba saa ho asɛm akyi no, Dawid ka ahotoso a ɔwɔ wɔ Yehowa mu ho asɛm sɛ: “Me de, mesu mafrɛ Onyankopɔn, na [Yehowa] begye me.” (Nkyekyem 16) Afei bere a watu n’ankasa ho fo sɛ “Dan w’adesoa to [Yehowa] so” akyi no, Dawid de Ɔsorosoroni no mu ahotoso a ɔwɔ no ho nsɛm wie dwom no, sɛ: “Na wo, Nyankopɔn, wode wɔn bɛko ɔsɛe amoam, . . . na me de, mede me ho meto wo so.”​—Nkyekyem 22, 28.

Adesoa Anaa Asɛyɛde Ahorow

Ansa na yebesusuw ɔkwan a yebetumi afa so adi Dawid afotu a efi honhom mu sɛ yɛnnan yɛn adesoa nto Yehowa so no so ho no, ɛda adi sɛ ɛfata sɛ yehu sɛ asɛyɛde ahorow bi wɔ hɔ a ɛsɛ sɛ yɛn ankasa di ho dwuma. Kristoni somafo Paulo kyerɛwee sɛ: “Na obiara bɛsoa n’ankasa n’adesoa.” (Galatifo 6:5) ‘Nnesoa’ a ɛtete saa yɛ asɛyɛde ahorow a ɛsɛ sɛ yɛn ankasa di ho dwuma esiane sɛ yɛyɛ okununom, ɔyerenom, awofo, mmofra, adwumayɛfo, Yehowa Adansefo, anaa, sɛ nhwɛso no, Kristofo asafo no mu mpanyimfo a wɔapaw wɔn nti. Yɛrentumi nnan asɛyɛde a ɛte saa nyinaa nto Yehowa so afa kwa, na mmom ɛsɛ sɛ yefi yɛn pɛ mu di ho dwuma. Saa nso na ɛte, sɛ ɛba no gyinaesi ahorow fam a. Onyankopɔn Asɛm de mmara horow ne nnyinasosɛm ahorow ma, nanso ɛsɛ sɛ yɛde di nsɛm a emu yɛ den a yehyia no ho dwuma. Ampa, yebetumi na ɛsɛ sɛ yɛsrɛ Onyankopɔn sɛ ɔmma yɛn nyansa, ahoɔden ne ne honhom kronkron mma enni yɛn anim wɔ asɛyɛde ahorow yi ho dwumadi mu, na mmom ɛnsɛ sɛ yɛbɔ mmɔden sɛ yebekwati.

Na dɛn ne adesoa ahorow a yebetumi adan ato Yehowa so no? Ɛyɛ ahohiahia, dadwen ne haw, huammɔdi ahorow ne ehu a ɛfa daakye ho, te sɛ nea Dawid hyiae no. Na yɛn mmerɛwyɛ ne sintɔ ahorow ho nnesoa ka eyinom ho. Eyinom ne nnesoa a yebetumi adan ato Yehowa so no, efisɛ ɔsomafo Petro se: “Momfa mo dadwen ne haw nyinaa nto no so.” Dɛn ntia? “Efisɛ odwen mo ho.”​—1 Petro 5:6, 7.

Yesu Kristo de afotu a ɛte saa ara mae wɔ ne Bepɔw so Asɛnka no mu. Ebia wubebisa sɛ, ‘Ɔkwan bɛn so?’ Wiɛ ɛnyɛ ka ara nko na ɔka kyerɛɛ yɛn sɛ mma yennwinnwen nea yebedi, nea yɛbɛnom ne nea yebefura ho mfa nhaw yɛn ho, na mmom ɔkaa nea enti a ɛnsɛ sɛ yɛyɛ saa no kyerɛɛ yɛn. Yesu sii so dua sɛ: “Sɛ Onyankopɔn fura wuram ahaban . . . ntama saa a, ɔrenyɛ nea ɛkyɛn eyi mma mo, mo a mo gyidi sua? . . . Mo soro agya nim sɛ eyi nyinaa hia mo.”​—Mateo 6:25-32.

Denam Mpaebɔ So

Nanso, ɔkwan bɛn na yebetumi afa so ‘adan yɛn adesoa ato Yehowa so’ ankasa? Ɔkwan biako ne sɛ yɛbɛkɔ n’anim daa wɔ mpaebɔ mu. So ɛnyɛ nokware sɛ nnesoa a ɛsɛ sɛ yɛsoa daa no mu biako ne Onyankopɔn trenee ahwehwɛde ahorow a yentumi nnu ho no ho dadwen anaa? Yiw, nanso ɛdenam Onyankopɔn anim a yɛnam mpaebɔ so kɔ no so no, yebetumi anya ahotɔ wɔ saa adesoa yi ho. Yesu yɛɛ eyi ho mfatoho wɔ towgyefo no asɛm no mu, a esiane sɛ ɔde ahobrɛase a ɔde bɔɔ mpae nokwaredi mu srɛɛ Onyankopɔn sɛ onhu no mmɔbɔ nti, ɛda adi sɛ ɔyɛ ɔtreneeni sen Farisini nyaatwomni no.” Kyerɛ sɛ, towgyeni no nam eyi so nyaa ne bɔne adesoa no ho ahotɔ. Nanso kɔkɔbɔsɛm bi ni: Sɛnea yɛn honhom mu tebea te, sɛnea yɛn bɔne no te ne sɛnea yɛn afodi no te no, ebia ɛho behia sɛ yɛhwehwɛ afoforo mmoa, te sɛ asafo mu mpanyimfo mmoa, na yɛn ho atɔ yɛn wɔ yɛn adesoa no ho.​—Luka 18:9-14; Galatifo 6:2; Yakobo 5:14,16.

Sɛ yɛn mpaebɔ bɛboa yɛn ma yɛde yɛn adesoa ato Yehowa so a, ɛsɛ sɛ nea yebisa no yɛ yɛn ahiasɛm ne nea nokwaredi wom ankasa. Ɛno nti na wɔhyɛ yɛn sɛ: “Monnna nnnwen biribiara nnhaw mo ho, na mmom ade nyinaa mu momfa mpaebɔ ne ɔsrɛ, ɛne aseda mma mo adesrɛ nnu Nyankopɔn asom.” Eyi bɛboa ma yɛn adesoa ayɛ hare, efisɛ ɛno na ‘Onyankopɔn asomdwoe a ɛtra adwene nyinaa so no bɛhwɛ yɛn koma ne yɛn adwene so.​—Filipifo 4:6, 7.

Yɛsrɛ wo, hyɛ no nsow sɛ Paulo ka ɔsrɛ ne mpaebɔ ho asɛm. Dɛn ne ɔsrɛ anaasɛ nkotɔsrɛ? Ɛyɛ mpaebɔ a emu yɛ den. Sɛ̃ mpaebɔ mu bɛyɛ den no kyerɛ dɛn? Sɛ ɛbɛyɛ nea anibere wom, emu yɛ hyew na nkate wom. Saa na ɛsɛ sɛ yɛn mpaebɔ yɛ, sɛ yɛnam so betumi ‘adan yɛn adesoa ato Yehowa ankasa so a.’

Sɛ yɛn mpaebɔ yɛ nea anibere wom a, yɛbɛbɔ mpae daa nso. Bere a ɔkyerɛɛ hia a ɛho hia sɛ yɛbɔ mpae daa akyi no, yɛn Awurade Yesu Kristo hyɛe sɛ: “Mise mo sɛ, Monkɔ so mmisa, na wɔbɛma mo; monkɔ so nhwehwɛ, na mubehu; monkɔ so mpem, na wobehiɛ mo. Na obiara a obisa no, onya, na nea ɔhwehwɛ no ohu; na nea ɔpem no, wobehiɛ, no.” (Luka 11:2-10, New World Translation) Yiw kɔ so bisa, hwehwɛ, pem, na yɛn soro A‘gya. no beso adesoa a ɛfata a wodan to no so no mu.

Gyidi Ne Nnwuma

Wɔ yɛn mpaebɔ ho, sɛnea ɛte wɔ yɛn Kristofo asetra ne yɛn som no fã biara ho no, saa nnyinasosɛm yi fa ho: “Sɛnea mo gyidi te no, ɛnyɛ saa mma mo.” (Mateo 9:29) Ɛsɛ sɛ yenya gyidi a ɛsɔ Onyankopɔn ani. Ɛnyɛ gye nko na ɛsɛ sɛ yegye di sɛ ɔwɔ hɔ, na mmom ɛsɛ sɛ yenya awerɛhyem nso sɛ ɔma wɔn a wɔde nokwaredi hwehwɛ n’akyi kwan no akatua. (Hebrifo 11:6) Ɛsɛ sɛ yenya gyidi sɛ Onyankopɔn betie yɛn.

Sɛnea ɛbɛyɛ na yɛanya gyidi a emu yɛ den saa no, ɛho hia sɛ yesua Onyankopɔn Asɛm. Ɛsɛ sɛ yɛbɔ mmɔden sɛ yɛbɛkenkan ɛno ne ɛho Kristofo nhoma horow daa. Ɛyɛ mmerɛw sɛ yɛn werɛ befi Bible mu afotu ne emu bɔhyɛ ahorow a ɛso nni no. Nneɛma pii a ɛyɛ ɔhonam fam de hyɛ yɛn so! Nanso Onyankopɔn Asɛm no a yebesua no daa no bɛma yɛabehu Yehowa, ne su ahorow a ɛyɛ nwonwa no ne akwan horow a ɔnam so ne ne nkoa a wɔwɔ asase so di no yiye. Hwɛ sɛnea Yehowa Asɛm no si ayamhyehye a ɔwɔ ma ne nkurɔfo so dua! Mpɛn pii no yɛkenkan sɛnea obuaa ne nkoa mpaebɔ ahorow. (Genesis 20:17; Asomafo no Nnwuma 12: 5, 17) Na mma wo werɛ mfi da sɛ Yehowa da so ara yɛ “mpaebɔ Tiefo” a yebetumi de yɛn ho ato no so daa.​—Dwom 65:2.

Bible mu nsɛm a obi sua gu ne tirim nso boa wɔ akwan horow pii so, titiriw nea esi ɔdɔ mu a Onyankopɔn fi hwɛ yɛn so so dua ma yɛn no. Nea ɛka eyinom ho ne nea wɔde aba wɔ atifi ha no, ne nnwom ahorow bi te sɛ Dwom 23 ne 103. Ɔkwan pa bɛn na yebetumi afa so de nneɛma pa ahyɛ yɛn adwene mu na yɛayi nneɛma a ɛhaw adwene afi hɔ sen sɛ yebesua Onyankopɔn Asɛm no afa horow bi agu yɛn tirim na yɛaka. Sɛ yɛasua Bible mu nsɛm ahorow bi agu yɛn tirim a, yebetumi akɔ so asusuw n’Asɛm no ho bere a ebia hokwan nni hɔ sɛ yɛbɛkenkan afi Bible no ankasa mu no. Sɛ nhwɛso no, yebetumi asusuw Kyerɛwnsɛm no ho, sɛ yentumi nna anadwo a. (Fa toto Dwom 63:6 ho.) Nokwarem no, eyinom nyinaa boa ma ‘yɛdan yɛn adesoa to Yehowa so.’

Bio nso, ‘yɛn adesoa a yɛdan to Yehowa so’ no gye yɛn fam de a yɛbɛyɛ. Kae sɛ “gyidi a nnwuma nni mu awu.” (Yakobo 2:26) Yesu daa biribi a ɛte saa ara adi wɔ ne Bepɔw so Asɛnka no mu, efisɛ bere a otuu yɛn fo sɛ mma yennwinnwen biribiara nhaw yɛn ho na mmom yennya Onyankopɔn mu gyidi sɛ ɔbɛhwɛ yɛn akyi no, ɔhyɛe sɛ: “Na monhwehwɛ Onyankopɔn ahenni ne ne trenee kan; na wɔde eyinom nyinaa bɛka mo ho.” Ampa, saa afotu no akyi a yebedi no bɛboa yɛn na yɛakwati dadwen ne haw.​—Mateo 6:33.

Ade a ɛbɛboa nso ne sɛ yebesua sɛ yɛbɛteɛ yɛn adwene so. Ebia na aka yɛn hɔ sɛ bere nyinaa yesusuw sɛ nneɛma renkɔ yiye. Bere a yɛde yɛn abisade ato Yehowa anim na yɛadan yɛn dadwen ne haw ato no so no, ɛsɛ sɛ yegyaw ma no a yɛnnko so nnhaw yɛn ho wɔ ho. Ɛsɛ sɛ yɛteɛ yɛn ho so nso wɔ nsɛm a yɛkeka ne nneɛma a yɛyɛ ho. Ɛsɛ sɛ yenya nkɔso, na ɛnsɛ sɛ yɛkɔ so yɛ mfomso koro no ara bere nyinaa, ‘twa yɛn ho wɔ yɛn anan mu ho ara,’ sɛnea yɛbɛka no no. Mmom no, momma yɛnyɛ te sɛ ɔsomafo Paulo na ‘yɛnhyɛ yɛn nipadua ahometew, nni no nya.’ Ɛsɛ sɛ yetie Yesu afotu no nso sɛ ‘yɛnwɛn na yɛmmɔ mpae daa,’ efisɛ “honhom pɛ . . . na ɔhonam [yɛ] mmerɛw.”​—1 Korintofo 9:27; Mateo 26:41.

Enti, ɔkwan bɛn so na wubetumi ‘adan w’adesoa ato Yehowa so’? Denam mpae a wobɛbɔ no anibere so daa, ɛdenam Onyankopɔn Asɛm a wubesua no daa, ɛdenam Onyankopɔn Ahenni a wobɛhwehwɛ no kan ne wo ho so a wobɛteɛ so. Afei, sɛnea Yehowa ahyɛ bɔ no, ɔbɛhyɛ wo den na ɔremma wuntwiw w’anan mu da.

[Kratafa 23 mfoni]

(Wopɛ nsɛm a wɔahyehyɛ no nyinaa a, hwɛ nhoma no mu)