Mpaebɔ Mu Kura Wɔ N’akatua

“Eyinom nyinaa de koma koro kura mpaebɔ mu ara.”​—Aso. 1:14.

 1. Sɛ́ obi kura biribi mu ara anaa omia n’ani wɔ biribi mu no kyerɛ dɛn?

“SƐ́ WUBEKURA BIRIBI MU ARA” anaasɛ “wobɛkɔ so ayɛ biribi” no kyerɛ sɛ wubedi ɔkwan bi akyi tee bere nyinaa de akosi sɛ wo nsa bɛka wo botae no. Nea ɛka saa adeyɛ asɛm yi ho ne adwene a obi wɔ sɛ obedi nsɛm a emu yɛ den ne ɔsɔretia so ansa na nkonimdi aba koraa.

 2. Atirimpɔw ahorow bɛn nti na ɛfata sɛ Yesu asuafo no “kura mpaebɔ mu ara”?

² Enti na ɛfata sɛ Asomafo no Nnwuma 1:14 no kaa asɛm faa Yesu nokware akyidifo kuw ketewaa no ho sɛ “eyinom nyinaa de koma koro kura mpaebɔ mu ara.” Na wonim sɛ Yesu asɔre afi awufo mu na woadi sɛnea ɔforo kɔɔ soro no ho adanse, nanso nneɛma pii wɔ hɔ a na wɔnte ase. Honhom kronkron a wɔahyɛ ho bɔ a ɛwɔ tumi no nnya mmaa wɔn so ɛ. (Aso. 1:8) Na wɔnte nea enti a Onyankopɔn maa kwan na wɔde wɔn dɔfo Kwankyerɛfo no bɔɔ saa asɛndua no ho no ase. Nnipa a wɔyɛɛ eyi no da so di tumi na nsɛnkyerɛnne biara nni su a wokura no mu sɛ wɔbɛsakra. Wɔkɔ so kura wɔn ɔsɔretia no mu a wonnyaa mu. Enti esiane sɛ Yesu akyidifo no nim nea ehia wɔn no nti, wɔkɔɔ so kuraa mpaebɔ mu bɔɔ Nea wɔwɔ ne mu gyidi no mpae.

 3. (a) Bere bɛn na wɔmaa wɔn mpaebɔ ahorow no ho mmuae, na ɔkwan bɛn so na eyi nyaa nneɛma a ehia wɔn titiriw no so nkɛntɛnso? (b) Wodii adanse pii koduu hefa wɔ saa tete nna no mu?

³ Efi Pentekoste da no so rekɔ na wɔmaa wɔn gyidi mpaebɔ ahorow no ho mmuae kyɛn sɛnea wɔbɛhwɛ kwan. Wofii ase tee Yesu awiei nsɛm a ɔka kyerɛɛ wɔn ansa na ɔreforo akɔ soro no ase. Sɛ́ nea ehia wɔn no bɛyɛ nea ɛfa bere bi ho, Sɛnea ɛda adi wɔ asɛm a wobisae no mu sɛ, “Awurade, bere yi mu na wobɛsan de ahenni no ama Israel anaa?” no, afei de nea agye wɔn adwene ne adwuma a wɔde ahyɛ wɔn nsa sɛ “na moayɛ m’adansefo Yerusalem ne Yudea nyinaa ne Samaria de akɔpem asase ano nohɔ.” (Aso. 1:6-8) Akokoduru so adanse bɛn na Petro dii wɔ Pentekoste da no so sɛɛ, a nea ɔpaee mu kae yi nso ka ho sɛ, “Yesu yi ara na Onyankopɔn anyan no; ɛho adansefo na yɛn nyinaa yɛ”!​—Aso. 2:32; hwɛ Asomafo no Nnwuma 2:40; 3:15; 4:33; 5:32 nso.

 4. Ɔkwan bɛn so na Yesu akyidifo a wɔwɔ hɔ nnɛ no hu sɛnea ehia sɛ wɔkɔ so kura mpaebɔ mu ara?

⁴ Saa ara nso na nnɛ, ɛsɛ sɛ Yesu nokware akyidifo no kɔ so kura wɔn mpaebɔ mu ma “nea otumi yɛ ma ɛtra ade nyinaa ma ɛboro so kyɛn nea yɛsrɛ anaasɛ yesusuw” no. (Efe. 3:20) Ɛwom sɛ wɔatumi ate Yehowa atirimpɔw ne ne dwumadi ahorow no ase kɛse de, nanso nneɛma pii wɔ hɔ a wonnim ne nyinaa mu nkyerɛkyerɛmu, nneɛma a ɛfa bere a daakye nsɛm besisi no ho ne sɛnea kyerɛwnsɛm ahorow pii a ɛfa Satan nneɛma nhyehyɛe yi awiei koraa no ho no bɛbam afa no ho. Nea ɛka eyinom ho ne nkɔmhyɛ ahorow a ɛfa Yehowa nkurɔfo ho, te sɛ biako a yehu wɔ Yesaia 26:20 no: “Me man, kɔ . . . fa wo ho hintaw kakraa bi kosi sɛ abufuw no betwam akɔ.”

 5. (a) Nneɛma ahorow abien a ehia bɛn na wɔhwehwɛ wɔ Yehowa Adansefo hɔ? (b) Dɛn na Onyankopɔn ahenni no ho asɛm no de aba wiase no mu, na ɔkwan bɛn so na wɔkaa eyi ho asɛm siei?

⁵ Nea ehia titiriw mprempren no, Yehowa asomfo hu sɛ adwuma kɛse wɔ hɔ a ɛsɛ sɛ wɔyɛ ne afei gyinabea a ɛsɛ sɛ wokura mu, sɛnea wohu wɔ din a Onyankopɔn de ama wɔn, Yehowa Adansefo mu no. (Yes. 43:10-12) Saa adwuma yi ne wɔn gyinabea no hwehwɛ sɛ wɔkɔ so kura nea wɔyɛ no mu anaasɛ womia wɔn ani wɔ mu. Nea ɛwɔ Onyankopɔn ahenni no ho asɛm a wɔka no mu ne wiase amanaman ne ahenni horow no sɛe. (Yer. 25:15-30) Onyankopɔn ahenni no “ebebubu ahenni horow no nyinaa ama asa.” Mprempren wiase sodifo a woyi amansɛm honhom adi no mpɛ saa asɛm yi. Wɔn ho a wɔka bom de sɔre tia no reda adi pefee bere nyinaa Wɔbom “tu agyina hyɛ Awurade [Yehowa] ne nea wasra no [Ɔhene Kristo Yesu] no.”​—Dw. 2:2-6; Dan. 2:44.

 6. (a) Su horow bɛn na wɔhwehwɛ nnɛ? (b) Ɛsɛ sɛ wɔhwɛ tebea biara dɛn, na ɔkwan bɛn so na wɔde nea ehia yɛn a ɛfa eyi ho no ama yɛn?

⁶ Egye akokoduru pii ansa na Onyankopɔn nkoa a wɔwɔ hɔ nnɛ aka te sɛ nea asomafo no kae wɔ afeha a edi kan no mu no sɛ: “Ɛsɛ sɛ yetie Onyankopɔn mmom sen nnipa.” (Aso. 5:29) Saa akokoduru ne nnamyɛ yi nnyina yɛn ankasa mmɔdenbɔ ne suban a yɛn mu pii nni bi a yebetumi agyina so de ahoahoa yɛn ho no so. Saa su horow a wɔde bedi dwuma yi hwehwɛ Onyankopɔn atirimpɔw no ho ntease ne nhumu a emu da hɔ pefee, ne afei nso trenee gyinapɛn ne nnyinasosɛm ahorow a wɔde asisi hɔ wɔ Onyankopɔn Asɛm no mu no. Bere bi mmae wɔ adesamma mu pɛn a nnipa de wɔn ho ama pɛsɛmenkominya, awudi, ɔporɔw ne nneɛma a ɛyɛ fĩ ahorow nyinaa a ɛte sɛɛ da. (2 Tim. 3:1-5) Nhyɛso horow pii wɔ hɔ a ɛsɛ sɛ wogyina ano na wodi aperepere wɔ mu wɔ saa “nna a edi akyiri” yi mu. Eyi kyerɛ sɛ ɛsɛ sɛ yegyina sɛnea Onyankopɔn hwɛ asɛm no so susuw tebea ne ɔhaw biara ho. Yɛn ani a yɛde bɛto no so denam n’Asɛm no ne mmoa a ne honhom ne n’ahyehyɛde no dema no so na yɛbɛfa anya ntease ne nhumu a emu da hɔ pefee. (Dw. 36:9) Enti, na ɛho hia sɛ yɛkɔ so kura mpaebɔ mu, na ɛho hia nso sɛ yɛkɔ so nya nokware gyidi a emu yɛ den, gyidi a edi nkonim. Esiane sɛ onim nea ehia yɛn nti Yehowa nam n’Asɛm no so de nkuranhyɛ, afotu ne kɔkɔbɔ a ɛho hia wɔ saa nsɛm yi ho ama yɛn wɔ ayamye mu. Na nea edi kan no, asɛm a ɛfa nea ɛsɛ sɛ ɔbɔ mpae ne afei tebea horow a ɛsɛ sɛ ɔbɔ mpae wɔ mu no ho asɛm wɔ hɔ.

YEHOWA​—“MPAEBƆ TIEFO NO”

 7. (a) Hena ne “mpaebɔ Tiefo” no, na dɛn nti na mpɛn pii no ɛyɛ a na ahia Dawid wɔ eyi fam‘? (b) Akwankyerɛ pa bɛn na wɔde ato hɔ ama wɔn a wɔte nka sɛ wɔmfata no? (Dw. 103:8-14)

⁷ Yehowa de ne honhom kaa n’akoa Dawid ma ɔkyerɛwee sɛ: “Mpaebɔ tiefo, wo nkyɛn na honam nyinaa ba.” (Dw. 65:2) Dawid ankasa buu sɛnea ehia sɛ okura mpaebɔ mu ara no, sɛnea ɛdaa adi wɔ ne nnwom ahorow a ɔkyerɛwee no mu no. Ɛtɔ bere bi a na ehia yiye esiane nhyɛso a n’atamfo de ba no so bere nyinaa nti, sɛnea wakyerɛ wɔ Dwom 70:1-5 no. Wɔ bere bi nso no, na ehia esiane n’ankasa ne mmerɛwyɛ ne mfomso ahorow a ɛyɛ a na ɛyɛ aniberesɛm no nti. Sɛ wote nka sɛ womfata sɛ wobɛn Onyankopɔn wɔ mpaebɔ mu wɔ eyi nti, a wususuw sɛ ɔrentie wo a, yɛkamfo kyerɛ wo sɛ kenkan na san tĩ Dwom 51:1-12 mu kenkan. Nsɛm a wɔakyerɛw ato hɔ wɔ nkyekyem 9 kosi 11 betumi ayɛ nea wubegyina so de abɔ w’ankasa wo mpae.

“Yi w’ani fi me bɔne ho hintaw, na popa m’amumɔyɛ nyinaa, Onyankopɔn, bɔ koma a ɛmu tew ma me, na yɛ honhom foforo a ase tim wɔ me mu. Ntow me mfi w’anim nkyene, na nyi wo honhom kronkron mfi me so.”

 8. Hena na ɔwɔ ho kwan sɛ ɔpaw obi wɔ bɛn a yɛbɛn Yehowa no mu, wɔ tebea horow bɛn ase?

⁸ So asɛm a ɛfa “honam nyinaa” a wɔbɛba “mpaebɔ Tiefo” no nkyɛn no kyerɛ sɛ obiara wɔ ho kwan sɛ ɔyɛ saa wɔ bere a ɔbɛpaw mu anaa? Dabi. Nea ɛne eyi bɔ abira mmom na ɛte saa. Sɛnea wɔkae akyiri wɔ saa dwom no ara mu no: “Nhyira ne nea [Yehowa] wuyi no na woma ɔbɛn wo sɛ ɔntra w’abangua so.” (Dw. 65:4) Ɛwom sɛ ɔto nsa frɛ nnipa nyinaa de, nanso ɛsɛ sɛ wɔbɛn no wɔ nokwaredi nyinaa mu. Ɛwom sɛ mfiase no wo gyidi mu renyɛ den de, nanso ɛsɛ sɛ ɛyɛ nokware. “Awurade [Yehowa] bɛn . . . wɔn a wɔfrɛ no nokware mu nyinaa.”​—Dw. 145:18.

 9. Dɛn nti na mpae a yɛbɔ Yehowa no nyinaa yɛ nea ɛsɛ sɛ yɛyɛ no wɔ Yesu din mu?

⁹ Nea ɛka ho bio no, ɛsɛ sɛ mpae a yɛbɔ Yehowa no yɛ nea yɛyɛ saa wɔ Kristo Yesu din mu bere nyinaa, nea ɔne ɔkwan biako pɛ a Onyankopɔn ayi ato hɔ no. (Yoh. 14:13, 14) Yɛde anisɔ hu Kristo ogye adwuma a wayɛ wɔ adesamma nyinaa ho no, ne afei nso sɛ nea mprempren yi ɔsom sɛ Onyankopɔn sɔfopanyin, nea yebetumi afa no so de nnam aba “ɔdom ahengua no anim, na yɛanya mmɔborohunu, na yɛahu ɔdom, na ɛbere a ɛsɛ mu aboa yɛn.”​—1 Tim. 2:4-6; Heb. 2:9; 4:14-16.

10. Ɔkwan bɛn so na Dwom 15 de akwankyerɛ a ɛboa bio ma wɔ eyi mu?

¹⁰ Sɛnea ɛbɛyɛ na yɛahu nnipa ko a Onyankopɔn paw wɔn no ho asɛm bio no, yɛhyɛ nyansa sɛ kenkan Dwom 15, na nya asemmisa: “Awurade [Yehowa] hena na ɔbɛsoɛ wo ntamadan mu atra mu? Hena na ɔbɛtra wo bepɔw kronkron no so?” no ho mmuae a efi honhom mu. Ɛsɛ sɛ yɛpene nnyinasosɛm a wɔde asisi hɔ wɔ hɔ no so sɛ wɔteɛ ma yɛn na ɛsɛ sɛ yɛhwehwɛ eyinom di akyi, ɛwom sɛ ɛtɔ bere bi a na yɛbɛtɔ sin wɔ wɔn ho adwuma a yɛyɛ no mu de.

11. (a) Wɔkyerɛw Kyerɛw Kronkron no na ayɛ mfaso ama hefo titiriw? (b) Nkuranhyɛ bɛn na yebetumi ahu wɔ Salomo mpaebɔ a ɛwɔ 1 Ahene 8:41-43 no mu?

¹¹ Ebia wobɛka wɔ ɔkwan a ɛteɛ so sɛ, Kyerɛw Kronkron no, a nea wɔadi kan abobɔ din no ka ho no fa Onyankopɔn nkurɔfo ho, titiriw Kristofo asafo a wɔka bom yɛ honhom mu Israel, “Onyankopɔn Israel” no. (Rom. 15:4; 1 Kor. 10:11; Gal. 6:16) Sɛ wode wo ho to wɔn ho a, ebia wubebu wo ho sɛ obi a ofi akyi, anaasɛ, sɛ yɛbɛka no saa a, ɔhɔho, esiane wo kan abrabɔ ne anigye a na wunni wɔ ɔsom ho koraa no nti. Bebree na wɔwɔ tebea a ɛte sɛɛ mu nnɛ. Mma eyi mmmu w’abaw mu ntɛmntɛm. Ma ɛntra w’adwene mu sɛ, nea ɛka nkotɔsrɛ pii a Salomo de too Yehowa anim bere a ɔrehyira asɔrefi no so no ho ne mpae a ɔbɔ maa “ɔhɔho a omfi wo man Israel mu na wo din nti ofi akyirikyiri asase bi so aba” no. Ɔbɔɔ mpae sɛ, “wo [Yehowa] ara tie ɔsoro, wo trabea hɔ, na yɛ sɛ ɔhɔho no su frɛ wo no nyinaa, nea ɛbɛyɛ na asase so aman nyinaa ahu wo din na wɔasuro wo, sɛ wo man Israel.”​—1 Ahe. 8:41-43.

12, 13. (a) Ɔkwan bɛn so na wɔde honhom kaa Yesaia ma ɔkyerɛw faa “ananafo” ho? (b) Wobetumi de saa nsɛm yi adi dwuma na ayɛ mfaso ama hefo ne afei wɔ ɔkwan bɛn so?

¹² Wohu nkuranhyɛ a wɔde ma saa “ananafo” yi mu bio wɔ nea wɔde ama wɔ Yesaia 56:6-8 no mu:

“Na ananafo a wɔabɛbata Awurade [Yehowa] ho sɛ wɔresom no na wɔadɔ Awurade [Yehowa] din na wɔadannan ne nkoa no, obiara a odi homeda a ongu ho fi ne wɔn a wokura m’apam mu no, mede wɔn mɛba me bepɔw kronkron no so, na mama wɔn ani agye me mpaebɔ fi, wɔn hyew afɔre ne wɔn kum afɔre bɛsɔ m’ani m’afɔremuka so; na me fi no, wɔbɛfrɛ no mpaebɔ fi ama aman nyinaa.”

¹³ Nkyerɛkyerɛmu bɛn na wɔde ama a ɛyɛ dɛ sɛɛ yi! Wɔnhyɛ saa “ananafo” yi so mmoaboa wɔn ano, na mmom wofi ɔdɔ mu de wɔn ho bɔ Yehowa ho wɔ anigye mu wɔ ne din ne nea egyina hɔ ma nyinaa nti. Wɔn asetra nyinaa (ɛnyɛ da biako wɔ nna ason mu) bɛyɛ nea wɔde ‘di homeda,’ nea wɔahyira so ama Yehowa; enti wɔhyɛn Ne home mu, sɛnea Paulo kyerɛkyerɛɛ mu wɔ Hebrifo 4:1-10 no. Ɔsomafo Paulo nso kyerɛ sɛnea ‘ɔhyew ayɛyɛde ne afɔrebɔ ahorow’ nso fa Kristofo a wɔahyira wɔn ho so no ho bere a ɔkyerɛwee sɛ:

“Enti momma yɛmfa no so mmɔ Onyankopɔn ayeyi afɔre daa, ɛne anofafa a ɛbɔ no abodin no aba. Na yiyeyɛ ne adekyɛ na mommma mo ani mmpa so, efisɛ saa afɔrebɔ no sɔ Onyankopɔn ani.”​—Heb. 13:15, 16.

14. Dɛn na na ɛyɛ “mpaebɔ fi” wɔ Yesaia nna no mu, na egyina hɔ ma dɛn?

¹⁴ Wɔ Yesaia nna no mu no, na Yehowa “mpaebɔ fi” no yɛ asɔrefi a Salomo sii no. Saa asɔrefi yi bɛyɛɛ Onyankopɔn honhom mu asɔrefi kɛse no ho sɛnkyerɛnne. Na Onyankopɔn wɔ ɔsoro ankasa a ɛyɛ honhom mu asɔrefi no Kronkron mu Kronkron no. Na saa asɔrefi yi mu Kronkronbea no na Yesu Kristo akyidifo a wɔde honhom awo wɔn a wɔda so wɔ asase so no hu wɔn ho wɔ mu no. Wɔyɛ wɔn ho mfonini nso sɛ wɔwɔ asase so adiwo a wɔahyɛ da ayi ato hɔ ama asɔfo a wɔwɔ saa honhom mu asɔrefi yi mu no.

15. (a) ɔkwan bɛn so na wɔahyɛ “nnipakuw kɛse” no agyirae wɔ Adiyisɛm 7:9-17? (b) Ɔkwan bɛn so na eyi fa Yehowa Adansefo ho nnɛ?

¹⁵ Nea ɛne nea edidi so yi hyia fɛfɛɛfɛ ne afei wɔ bere a yɛakenkan Adiyisɛm 7:1-8 a ɛfa Kristofo asafo no a wɔyɛ honhom mu Israelfo a wɔn dodow yɛ 144,000 no ho akyi no, afei yɛkenkan “nnipakuw kɛse” a wɔn nso wonya Onyankopɔn anim dom no ho asɛm; na nea edi wɔn ho so a wɔahyira ama no no ho adanse ne som a “wɔsom no awia ne anadwo n’asɔredan mu” no. (Adi. 7:15) Saa anisoadehu fɛfɛɛfɛ yi yɛ “nnipakuw kɛse” a wofi amanaman mu no ho mfonini sɛ wɔsom Yehowa wɔ n’asɔrefi, a ɛkyerɛ sɛ, wɔ asase so adiwo a wɔayi ato hɔ ama wɔn a wɔnyɛ honhom mu Israelfo no, sɛ yɛbɛka a wɔ “Amanaman Mufo no adiwo.” Ɛnnɛ, Yehowa Adansefo mu wɔn a wɔdɔɔso na wɔda wɔn ho adi sɛ “nnipakuw kɛse” no mufo a wɔwɔ daa nkwa ho anidaso wɔ Onyankopɔn ahenni no ase wɔ paradise asase so. Yesu kaa wɔn a wɔbaa akyiri yi ho asɛm sɛ “nguan foforo, a womfi saa ban yi mu.” Sɛnea Yesu kɔɔ so no, wɔn a wɔyɛ ne nokware nguan nnɛ no nyinaa yɛ “kuw biako . . . [wɔ] ɔhwɛfo biako [ase].”​—Luka 12:32; Yoh. 10:16, NW.a

16. Akwanhwɛ a akatua pa wom bɛn na wɔde asi wɔn a wɔde nokwaredi hwehwɛ Yehowa akyi kwan no anim?

¹⁶ Yɛto nsa frɛ wo sɛ bra na bɛka Yehowa nokware asɔrefo kuw a wɔaka abom ayɛ biako yi fekuwbɔ no ho. Wubehu sɛ eyi bɛyɛ osuahu a anigye wom sen biara. Ɛbɛyɛ mmoa ankasa ama wo ne nkuranhyɛ kɛse ama wo wɔ kɔ a wobɛkɔ so akura mpaebɔ mu ara wɔ nokware gyidi mu no mu. Eyi de mfaso horow ba, efisɛ Yehowa bɛyɛ “wɔn a wɔhwehwɛ n’akyi kwan no katuafo.” (Heb. 11:6) Saa asɛm a ɛfa kɔ a wɔbɛkɔ so akura mpaebɔ mu ara, a gyidi ka ho no yɛ nea wɔasi so dua yiye wɔ ɔkwan a ɛyɛ anigye so wɔ Luka Asɛmpa no mu.

17. Ɔkwan bɛn so na osuahu a Yakob ne ɔbɔfo no nyae no de animia ne biribi mu a wɔkɔ so kura a wonnyaa mu ho nhwɛso pa ma?

¹⁷ Yɛbɛpɛ sɛ yɛkae wo wɔ kɔ a wɔkɔ so kura ade mu no ho nhwɛso bi a ɛyɛ soronko ne sɛnea wotuaa ɛso ka kɛse no ho. Nea yɛrekae wo ɛho asɛm ne bere a Yakob ne ɔbɔfo bi a ɔdan ne ho onipa tentamee anadwo mu nyinaa no. Ɛwom sɛ ɔbɔfo no kaa n’asen so tokuru mu maa Yakob dwonku huanee de, nanso Yakob annyaa no mu amma wankɔ de kosii sɛ ɔkae sɛ: “Gye sɛ wudi kan hyira me.” Ɛno na afei ɔbɔfo no kaa biribi a ɛbɛtra hɔ daa: “Wɔremfrɛ wo din Yakob bio, na wɔbɛfrɛ wo Israel, efisɛ wo ne Nyankopɔn ne nnipa ako, na woatumi.” Awiei no, ohyiraa Yakob. Ɛyɛ nokware sɛ Yakob kɔɔ akyiri de tiw ɔkwan bi a Ɔde asi n’anim bere nyinaa. Ɔhyɛɛ da dii eyi ho aperepere de kuraa mu bere a ne dwonku ahuan de kosii sɛ ne nsa kaa nea ɔhwehwɛ no. Na wohyiraa no kɛse wɔ eyi nti, sɛnea ɔkae no: “Mahu Nyankopɔn anim ne anim nanso wɔagye me kra nkwa.” Mpaebɔ mu kura ara ho nhwɛso pa bɛn ni!​—Gen. 32:24-30.

[Ase hɔ asɛm]