So Wopɛ Sɛ Wunya Ɔsom Adwuma Mu Kyɛfa Pii?

LAURA ka sɛ: “Na me bo afuw Yehowa. Mekɔɔ so bɔɔ mpae araa sɛ ɔmmoa yɛn ma yɛntoto yɛn sikasɛm yiye sɛnea ɛbɛyɛ a metumi akɔ so ayɛ akwampae adwuma—nanso ankosi hwee. Awiei koraa no, na ɛsɛ sɛ migyae akwampae adwuma no. Ɛsɛ sɛ migye tom nso sɛ, m’ani beree wɔn a wotumi traa mu no.”

Afei nso, susuw Michael a ɔyɛ Yehowa Adansefo asafo mu ɔsomfo no asɛm no ho hwɛ. Ná ɔpɛ ahwɛfo adwuma ayɛ. (1 Timoteo 3:1) Bere a mfe pii twaam a ne nsa anka nea na ɔhwehwɛ no, ne bo fuwii araa ma ogyaee akyiri di koraa. Ɔka sɛ: “Afei na mintumi nnyina huammɔdi no ano bio.”

Woanya osuahu a ɛte saa pɛn? So woagyae teokrase hokwan bi mu? Sɛ nhwɛso no, woagyae som a na wosom sɛ ɔkwampaefo, bere nyinaa Ahenni ɔsɛmpakafo? Anaasɛ wopɛ sɛ wunya asafo mu asɛyɛde horow bi a wɔde ahyɛ afoforo nsa no bi? Ebetumi aba sɛ wowɔ ɔpɛ a emu yɛ den sɛ wobɛsom wɔ Betel anaa sɛ́ ɔsɛmpatrɛwfo mpo, nanso wo nsɛm tebea mma ho kwan.

Mmebusɛm nhoma no gye tom sɛ: “Anidaso a ɛkyɛ muba ma koma yare.” (Mmebusɛm 13:12) Eyi betumi aba saa titiriw bere a afoforo nsa ka hokwan koro a w’ani da so no. So Onyankopɔn Asɛm de nhumu, awerɛkyekye, ne anidaso ma obiara a ohyia huammɔdi a ɛtete saa no? Yiw, ɛyɛ saa. Nokwarem no, Dwom a ɛto so 84 no da Yehowa somfo bi a ne nsa anka nea na ɔpɛ wɔ Yehowa som mu no nkate adi.

Lewini Bi Anisɔ

Kora mma na wɔyɛɛ Dwom a ɛto so 84 no, Lewifo a na wɔsom wɔ Yehowa asɔrefie, a wɔkyerɛɛ ɔsom hokwan ahorow a wonyae ho anisɔ kɛse no. Wɔn mu biako teɛɛm sɛ: “Wo trabea hɔnom yɛ fɛ dɛn ara, asafo Awurade [Yehowa, NW]. Me kra ani gyina, ɛtɔ piti po, Awurade [Yehowa, NW] adiwo no nti; me koma ne me honam di ahurusi ma Onyankopɔn teasefo.”—Dwom 84:1, 2.

Ná Lewini yi wɔ ɔpɛ a emu yɛ den sɛ ɔbɛsom Yehowa wɔ n’asɔrefie araa ma enti nneɛma a na ɛwɔ Yerusalem kwan ho mpo yɛɛ no fɛ. Ɔka sɛ: “Wotwam nusu bon no mu a, wɔdannan no nea mmasu wɔ.” (Dwom 84:6) Yiw, ná baabi a mpɛn pii no ɛhɔ yɛ pradadaa no te sɛ baabi a osu taa tɔ ma no.

Esiane sɛ na odwontofo no yɛ Lewini a ɔnyɛ ɔsɔfo nti no, na ɔsom dapɛn biako pɛ wɔ asɔrefie hɔ asram asia biara. (1 Beresosɛm 24:1-19; 2 Beresosɛm 23:8; Luka 1:5, 8, 9) Ɔde ne bere a aka no nyinaa traa fie wɔ Lewifo nkurow no biako mu. Enti ɔtoo dwom sɛ: “Nso akasanoma anya ɔdan, na asomfena anya buw a ɔbɛtow ne mma agu mu—ɛne w’afɔremuka no, asafo Awurade [Yehowa, NW], me hene ne me Nyankopɔn.” (Dwom 84:3) Sɛ na anka Lewini no wɔ hokwan te sɛ nnomaa a na bere nyinaa wɔte asɔrefie hɔ no a, hwɛ sɛnea anka n’ani begye!

Ná ɛrenyɛ den mma Lewini no sɛ ne bo befuw esiane sɛ na ontumi nsom wɔ asɔrefie hɔ bere nyinaa nti. Nanso, na n’ani gye sɛnea otumi som no ho, na akyinnye biara nni ho sɛ ohui sɛ ahofama a edi mũ a na ɔwɔ ma Yehowa no ara dɔɔso. Dɛn na ɛboaa saa Lewini nokwafo yi ma ɔkɔɔ so penee ne som hokwan ahorow no so?

Sua sɛ Wobɛpene Nea Wowɔ So

Lewini no ka sɛ: “Wo fi dakorodi ye sen nna apem. Mepɛ me Nyankopɔn fi anammɔnnampan mu tra mmom sen sɛ mɛtra abɔnefo ntamadan mu.” (Dwom 84:10) Ɔtee ase sɛ dakoro a obedi wɔ Yehowa fie no mpo yɛ hokwan a ɛso ni. Na na Lewini no wɔ nea ɛsen dakoro koraa a ɔde bɛsom wɔ asɔrefie hɔ. Hokwan horow a na ɔwɔ no ho anigye ma ɔde anigye too dwom.

Na yɛn nso ɛ? So yɛkae yɛn nhyira horow, anaasɛ yɛma yɛn werɛ fi nea yɛwɔ wɔ Yehowa som mu dedaw no? Esiane ahofama a Yehowa nkurɔfo wɔ nti, ɔde hokwan horow ne nnwuma pii ahyɛ wɔn nsa. Emu bi ne ɔhwɛ adwuma ho asɛyɛde horow a emu yɛ duru, nsrahwɛ, nkyerɛkyerɛ, ne bere nyinaa som adwuma no afã horow no. Nanso wɔde nneɛma foforo a ɛboa Yehowa som a ɛsom bo, nso ka ho.

Sɛ nhwɛso no, susuw Kristofo som adwuma no ho. Ɔsomafo Paulo de hokwan a yɛwɔ sɛ yɛka asɛmpa no toto ‘ademude a yɛwɔ wɔ anwenne mu’ ho. (2 Korintofo 4:7) So wubu ɔsom a ɛte saa sɛ ademude a ɛsom bo? Yesu Kristo a odii Ahenni asɛnka adwuma no anim no buu no saa, yɛɛ ho nhwɛso. (Mateo 4:17) Paulo kae sɛ: “Eyi nti, sɛ yɛwɔ saa ɔsom yi . . . , yɛmpa abaw.”—2 Korintofo 4:1.

Kristofo nhyiam ahorow nso yɛ nsiesie kronkron a ɛnsɛ sɛ yebu no adewa. Yenya akwankyerɛ a ehia ne fekubɔ a ɛfata wɔ nhyiam ahorow ase. Afei nso, yebetumi ada yɛn gyidi ne yɛn anidaso adi bere a yɛma mmuae daa na yenya dwumadi no mu kyɛfa wɔ akwan horow so wɔ nhyiam ahorow ase no. (Hebrifo 10:23-25) Nokwarem no, yɛn hyiam ahorow no yɛ nsiesiei a ɛsɛ sɛ yɛkyerɛ ho anigye!

Michael a yɛadi kan aka ne ho asɛm no, buu nhyira horow yi sɛ ɛsom bo na ɔkyerɛɛ ho anisɔ kɛse. Nanso wɔ bere tiaa bi mu no, n’abaw mu a ebui esiane sɛ wannya hokwan ansom sɛ asafo mu panyin no piaa anisɔ a na ɔwɔ no too nkyɛn. Bere a osusuwii ho bio no, otumi san gyinaa ne nan so, na ɔtɔɔ ne bo ase twɛnee Yehowa.

Sɛ́ anka yɛbɛma yɛn abaw mu abu esiane sɛ yennya hokwan ahorow bi nti no, ɛbɛyɛ papa sɛ yɛbɛhwehwɛ nhyira horow a yɛanya afi Yehowa nkyɛn no mu, sɛnea odwontofo no yɛe no.a Sɛ yɛantumi anhu pii a, ehia sɛ yɛhwɛ bio, na yɛsrɛ Yehowa sɛ ommue yɛn ani mma yenhu hokwan ahorow a yɛwɔ, ne akwan a ɔnam so rehyira yɛn na ɔde yɛn redi n’ayeyi ho dwuma no.—Mmebusɛm 10:22.

Ɛho hia nso sɛ yehu sɛ hokwan atitiriw te sɛ ɔhwɛfo adwuma no hia ahwehwɛde horow pɔtee bi na ama obi afata. (1 Timoteo 3:1-7; Tito 1:5-9) Enti ehia sɛ yɛhwehwɛ yɛn ho mu hwɛ, hwehwɛ baabi a ehia sɛ yetu mpɔn na yɛbɔ mmɔden sɛ yebenya nkɔanim.—1 Timoteo 4:12-15.

Mma W’abaw mu Mmmu

Sɛ yɛn nsa anka ɔsom hokwan bi a, ɛnsɛ sɛ yɛka sɛ Yehowa dɔ wɔn a wonya no sen yɛn, anaasɛ ɔde adepa bi rekame yɛn. Akyinnye biara nni ho sɛ ɛnsɛ sɛ yɛde anibere susuw sɛ saafo yi nam nnipa animhwɛ so na enyaa hokwan a ɛnsɛ wɔn no, na ɛnyɛ teokrase nhyehyɛe so. Nsusuwii a ɛte saa a yebenya no betumi ama yɛatwe ninkunu, asi akan, na ama yɛapa abaw koraa mpo.—1 Korintofo 3:3; Yakobo 3:14-16.

Laura, a yɛkaa ne ho asɛm mfiase no ampa abaw. Awiei koraa no, odii n’abufuw ne ne ninkuntwe no so. Laura kɔɔ so bɔɔ Onyankopɔn mpae na ama wanya mmoa a ɔde bedi adwene a ɛnteɛ a na ɔwɔ wɔ akwampae adwuma a ontumi nyɛ no ho no so. Afei nso ɔhwehwɛɛ mmoa fii mmarima a wɔfata wɔ asafo no mu hɔ, na onyaa Onyankopɔn dɔ mu ahotoso. Ɔkae sɛ: “Yehowa maa me asomdwoe. Bere a me ne me kunu ntumi nyɛ akwampae adwuma seesei no, yɛn ani sɔ bere a yetumi yɛɛ bi no, na yenya ahoɔden fi osuahu ahorow a yenyae no mu. Yɛboa yɛn ba barima a wanyin no wɔ n’akwampae adwuma mu.” Nea ɔwɔ a ɔpenee so no ama seesei, Laura ne ‘anigyefo ani gye’ wɔ wɔn akwampae adwuma no mu.—Romafo 12:15.

Fa Botae Horow a Wubetumi Adu Ho Sisi W’anim

Ɔsom hokwan a yɛwɔ seesei a yɛbɛma yɛn ani asɔ no nkyerɛ sɛ ɛsɛ sɛ yegyae sɛ yɛde teokrase botae horow besisi yɛn anim. Bere a ɔreka owusɔre a ɛkɔ ɔsoro no ho asɛm no, Paulo kaa ‘ade a ɛwɔ anim a yɛbɛtwe yɛn mu apɛ’ no ho asɛm. Afei nso ɔkae sɛ: “Nanso nea yɛaso dedaw no, momma yɛnkɔ so saa ara.” (Filipifo 3:13-16) Teokrase botae horow betumi aboa yɛn ma yɛatwe yɛn mu akɔ anim. Nanso asɛm no ne sɛ yɛbɛma ayɛ nea ɛfata.

Botae horow a ɛfata yɛ nea ntease wom, na yetumi du ho. (Filipifo 4:5) Eyi nkyerɛ sɛ botae a egye mfe pii ne adwumaden no mfata. Yebetumi adu botae a egye bere tenten saa no ho denam botae horow a yɛde besisi yɛn anim nkakrankakra ne nhyehyɛe horow so. Eyi betumi akyerɛ sɛ yɛrenya honhom fam nkɔso. Botae no mu fã biara a yebetumi adu ho no ma yɛn abotɔyam sen sɛ yɛn abaw mu bebu.

Adwene a Ɛkari Pɛ

Nanso ehia sɛ yɛhyɛ no nsow sɛ esiane yɛn tebea ne yɛn sintɔ ahorow nti, ebia yentumi nnya hokwan ahorow bi. Si a yɛde besi yɛn anim sɛ botae no de huammɔdi ne abasamtu nko na ɛba. Seesei de, anyɛ yiye koraa no, ɛsɛ sɛ yɛde botae horow a ɛtete saa no to nkyɛn ansa. Sɛ yɛbɔ mpae srɛ Onyankopɔn sɛ ɔmma yɛpene nea yɛwɔ no so na yɛma Yehowa apɛdeyɛ yɛ yɛn ade titiriw a, eyi yɛ renyɛ den. Sɛ yɛhwehwɛ botae bi ho adu a, Yehowa anuonyam—ɛnyɛ yɛn mmɔdenbɔ a afoforo behu—na ehia. (Dwom 16:5, 6; Mateo 6:33) Bible kasa kyerɛ yɛn ma ɛfata sɛ: “Fa wo nnwuma hyɛ Awurade [Yehowa, NW] nsa, na w’adwene betim.”—Mmebusɛm 16:3.

Bere a yɛresusuw Dwom a ɛto so 84 ho no, yebetumi ahu sɛ odwontofo no daa su a ɛte saa adi wɔ ɔsom hokwan horow ho, na Yehowa hyiraa no pii. Bio nso, dwom yi kɔ so boa Yehowa nkurɔfo de besi nnɛ.

Bere a wufi mpaebɔ mu de wo ho to Yehowa so no, wubetumi ama ɔsom adwuma mu kyɛfa pii a wohwehwɛ no ne pene a wopene tebea a wowom seesei so no akari pɛ. Mma ɔpɛ a wowɔ sɛ wobɛyɛ pii no mmma wo nnhwere anisɔ a wowɔ ma nea wowɔ seesei ne Yehowa a wobɛsom no daa ho anigye no da. Nya Yehowa mu ahotoso, efisɛ eyi de anigye ba, sɛnea ɛda adi wɔ Lewini no nsɛm mu no: “Asafo Awurade [Yehowa, NW], nhyira ne onipa a ɔde ne ho to wo so.”—Dwom 84:12.

[Ase hɔ asɛm]

[Kratafa 11 adaka]

Botae Horow a Yebetumi De Asisi Yɛn Anim

Bible a yɛbɛkenkan no daa.​—Yosua 1:8; Mateo 4:4

Yɛn adwene tumi a yɛnam Kyerɛwnsɛm so bɛtete no ma atu mpɔn.​—Hebrifo 5:14

Onyankopɔn a yɛne no benya abusuabɔ pa.​—Dwom 73:28

Honhom aba no mu biara a yɛbɛsow.​—Galatifo 5:​22, 23

Yɛn mpaebɔ a yɛbɛma atu mpɔn.​—Filipifo 4:​6, 7

Yɛn asɛnka ne nkyerɛkyerɛ a yɛbɛma atu mpɔn.​—1 Timoteo 4:​15, 16

Ɔwɛn-Aban ne Nyan! nsɛmma nhoma a ɛba no mu biara a yɛbɛkenkan na yɛasusuw ho.​—Dwom 49:3

[Kratafa 9 mfonini ahorow]

Sɛ wode botae horow resisi w’anim a, ma Onyankopɔn apɛdeyɛ nni kan