“Wɔakyerɛw Sɛ”

1-3. Asɛm a ɛho hia bɛn na na Yesu pɛ sɛ Nasaretfo no gye tom, na adanse bɛn na ɔde maa wɔn?

NÁ ƐYƐ Yesu som adwuma no mfiase. Ná Kristo asan kɔ ne kurom Nasaret. Ná ɔpɛ sɛ ɔboa nkurɔfo no ma wɔgye asɛm a ɛho hia paa yi tom. Ɛne sɛ: Ɔno ne Mesia a wɔfi bere tenten ahyɛ ne ho nkɔm no! Adanse bɛn na ɔde mae?

² Akyinnye biara nni ho sɛ na nnipa pii rehwɛ kwan sɛ ɔbɛyɛ anwanwade. Ná wɔate anwanwade a Yesu ayɛ no ho asɛm. Nanso, Yesu anyɛ anwanwade biara ankyerɛ wɔn. Mmom no, ɔkɔɔ wɔn hyiadan mu sɛnea ɔtaa yɛ no. Ɔsɔre gyinaa hɔ sɛ ɔrebɛkenkan ade, na wɔde Yesaia nhoma mmobɔwee no maa no. Ná ɛyɛ nhoma mmobɔwee tenteenten bi a wɔabobɔw afa nnua mmienu ho. Yesu too ne bo ase buee mu, na ohuu baabi a ɔrehwehwɛ no. Afei, ɔkenkan asɛm a nnɛ yehu wɔ Yesaia 61:1-3 no den.—Luka 4:16-19.

³ Ná atiefo no nim saa asɛm no yiye. Ɛyɛ nkɔmhyɛ a ɛfa Mesia no ho. Wɔn a na wɔwɔ hyiadan no mu nyinaa hwɛɛ Yesu, na ɛhɔ yɛɛ dinn. Afei, Yesu fii ase kyerɛkyerɛɛ asɛm no mu. Ebia ɔyɛɛ saa kɔɔ akyiri mpo. Ɔkaa sɛ: “Ɛnnɛ na kyerɛwsɛm yi a motee no seesei ara no aba mu.” Ne nsɛm a ɛka koma no maa n’atiefo no ho dwiriw wɔn, nanso na wɔn mu pii da so ara rehwɛ kwan sɛ ɔbɛyɛ anwanwade bi. Enti Yesu de akokoduru kaa nhwɛso bi a ɛwɔ Kyerɛwnsɛm no mu, na ɔde kyerɛɛ wɔn sɛ wɔnni gyidi. Amonom hɔ ara, Nasaretfo no bɔɔ mmɔden sɛ wɔbekum no!—Luka 4:20-30.

 4. Nhwɛso bɛn na Yesu yɛe wɔ ne som adwuma no mu, na dɛn na yebesusuw ho wɔ ti yi mu?

⁴ Nea Yesu yɛɛ wɔ hyiadan no mu no, na ɛyɛ ade pa, na ne som adwuma no mu nyinaa wannyae yɛ. Nsɛm a ɔkae nyinaa, na egyina Onyankopɔn Asɛm so. Ɛwom, na anwanwade a Yesu yɛ no ho hia na ama nkurɔfo ahu sɛ ɔde Onyankopɔn honhom na ɛreyɛ adwuma. Nanso, ade a na ɛho hia no kɛse ne sɛ ɔde Kyerɛw Kronkron no bedi dwuma. Momma yensusuw nhwɛso a ɔyɛe no ho. Yɛbɛhwɛ sɛnea yɛn Wura no faa nsɛm fii Onyankopɔn Asɛm mu kae, sɛnea ɔkyerɛe sɛ Onyankopɔn Asɛm yɛ nokware, ne sɛnea ɔkyerɛkyerɛɛ Onyankopɔn Asɛm mu no.

 5. Dɛn na na Yesu pɛ sɛ n’atiefo hu, na dɛn na ɔyɛ de kyerɛe sɛ ne nsɛm no yɛ nokware?

⁵ Ná Yesu pɛ sɛ nkurɔfo hu baabi a nsɛm a ɔka no fi. Ɔkaa sɛ: “Nea mekyerɛkyerɛ no nyɛ me dea, na mmom ɛyɛ nea ɔsomaa me no dea.” (Yohane 7:16) Bere foforo nso, ɔkaa sɛ: “Memmɔ me tirim nyɛ biribiara; na nea Agya no akyerɛkyerɛ me no, ɛno ara na meka.” (Yohane 8:28) Bio nso, ɔkaa sɛ: “Nsɛm a meka kyerɛ mo no, ɛnyɛ me ara m’adwene na mede ka. Mmom Agya a ɔwɔ me mu no na ɔreyɛ ne nnwuma.” (Yohane 14:10) Ɔkwan baako a Yesu faa so maa nkurɔfo hui sɛ ne nsɛm no yɛ nokware ne sɛ, ɔfaa nsɛm fii Onyankopɔn Asɛm mu kae mpɛn pii.

6, 7. (a) Mpɛn ahe na Yesu faa Hebri Kyerɛwnsɛm no mu nsɛm kae, na adɛn nti na wei yɛ nwanwa? (b) Sɛn na na Yesu nkyerɛkyerɛ yɛ soronko fi akyerɛwfo no de ho?

⁶ Sɛ yɛto yɛn bo ase hwɛ nsɛm a Yesu kae a wɔayɛ ho kyerɛwtohɔ no a, yebehu sɛ nhoma a ɛwɔ Hebri Kyerɛwnsɛm no mu no, ɔfaa bɛboro fã mu nsɛm kaa no tẽẽ, anaasɛ ɔtwee adwene sii so wɔ ne nkyerɛkyerɛ mu. Sɛ wote asɛm yi a, ebia ɛrenyɛ wo nwanwa. Ebia wobɛka sɛ, sɛ Yesu de mfe mmiɛnsa ne fã na ɛyɛɛ ɔkyerɛkyerɛ ne asɛnka adwuma no a, ɛnde anka ɛsɛ sɛ otumi fa nhoma a ɛwɔ Hebri Kyerɛwnsɛm no mu nyinaa mu nsɛm ka. Nea ɛwom ne sɛ, ebetumi aba sɛ Yesu yɛɛ saa. Kae sɛ, nsɛm a Yesu kae ne nneɛma a ɔyɛe no mu kakraa bi pɛ na wɔkyerɛw too hɔ. (Yohane 21:25) Afei nso, nsɛm a Yesu kae a wɔakyerɛw ato hɔ no, sɛ wose worekan a, wubetumi de nnɔnhwerew kakraa bi akan awie. Enti wo de hwɛ oo: Fa no sɛ wode nnɔnhwerew kakraa bi pɛ reka Onyankopɔn ne n’Ahenni no ho asɛm, ɛnna wutumi faa nhoma a ɛwɔ Hebri Kyerɛwnsɛm no mu bɛboro fã mu nsɛm kae! Anka ɛnyɛ nwanwa? Bio nso, ɛnyɛ bere nyinaa na na Yesu wɔ nhoma mmobɔwee no bi. Bepɔw So Asɛnka a agye din no mu no, ɔfaa Hebri Kyerɛwnsɛm no mu nsɛm kae anaa ɔtwee adwene sii so mpɛn pii. Anwanwasɛm ne sɛ, ne nyinaa ɔka fii ne tirim!

⁷ Sɛnea Yesu faa Kyerɛwnsɛm mu asɛm kae no ma yehu sɛ na ɔwɔ obu kɛse ma Onyankopɔn Asɛm. “Ɔkwan a ɔfaa so kyerɛkyerɛe no yɛɛ [n’atiefo no] nwonwa, efisɛ ɔkyerɛkyerɛɛ wɔn sɛ obi a ɔwɔ tumi, na ɛnyɛ sɛ akyerɛwfo no.” (Marko 1:22) Ná akyerɛwfo no bu tete rabifo binom anom nsɛm sɛ mmara, enti sɛ wɔrekyerɛkyerɛ a, ɛno na na wɔtaa fa ka. Nanso, Yesu amfa saa mmara no anaa rabifo nsɛm no bi anka da. Mmom, na ogye di sɛ, Onyankopɔn Asɛm kasa a, na ɛno ara no no. Enti mpɛn pii no, na ɔka sɛ: “Wɔakyerɛw sɛ.” Sɛ ɔrekyerɛkyerɛ n’akyidifo anaasɛ ɔretene nkurɔfo adwene wɔ nsɛm ho a, na ɔtaa ka “wɔakyerɛw sɛ” anaa nsɛm a ɛtete saa.

8, 9. (a) Bere a Yesu tew asɔrefie no ho no, dɛn na ɔyɛe a ɛkyerɛ sɛ Onyankopɔn Asɛm na na ɔde reyɛ adwuma, na ɛnyɛ sɛ ɔreyɛ nea ɔno ara pɛ? (b) Ɔkwan bɛn so na nyamesom akannifo a wɔwɔ asɔrefie hɔ no kyerɛe sɛ wɔnni obu ketekete sɛɛ mpo ma Onyankopɔn Asɛm no?

⁸ Bere a Yesu tew Yerusalem asɔrefie no ho no, ɔkaa sɛ: “Wɔakyerɛw sɛ, ‘Wɔbɛfrɛ me fi mpaebɔ fi,’ nanso mo de, mode ayɛ baabi a akorɔmfo-werɛmfo tetɛw.” (Mateo 21:12, 13; Yesaia 56:7; Yeremia 7:11) Ade rebɛkye ama Yesu akɔtew asɔrefie no ho no, ɔkɔɔ hɔ kɔyɛɛ anwanwade pii. Mmarimaa a wɔhuu nea Yesu yɛe no fii ase yii no ayɛ. Nanso, nyamesom akannifo no de abufuw bisaa Yesu sɛ, nea mmofra no kae no, ɔtee anaa. Yesu buae sɛ: “Yiw. Monkenkanee da sɛ, ‘Mmofra ne nkokoaa anom na woama ayeyi afi aba’?” (Mateo 21:16; Dwom 8:2) Ná Yesu pɛ sɛ nyamesom akannifo no hu sɛ, Onyankopɔn Asɛm foa nea na mmofra no reyɛ no so.

⁹ Akyiri yi, saa nyamesom mpanyimfo no boaboaa wɔn ho ano baa Yesu nkyɛn bebisaa no sɛ: “Tumi bɛn na wode yɛ eyinom?” (Mateo 21:23) Ná Yesu aka baabi a onya ne tumi fi no mpɛn pii. Ná ɛnyɛ biribi foforo bi na ɔrekyerɛkyerɛ. Mmom n’Agya Asɛm a ɔnam ne honhom so ma wɔkyerɛwee no, ɛno na na ɔde reyɛ adwuma. Enti bere a saa asɔfo ne akyerɛwfo no bisaa saa asɛm no, na wɔrekyerɛ sɛ wɔnni obu ketekete sɛɛ mpo mma Yehowa ne n’Asɛm no. Edi sɛ Yesu twiw wɔn anim maa obiara huu adwemmɔne a wɔkura no.—Mateo 21:23-46.

10. Sɛnea Yesu de Onyankopɔn Asɛm dii dwuma no, yɛbɛyɛ dɛn asuasua, na nneɛma bɛn na yɛwɔ a na Yesu nni bi?

¹⁰ Ɛnnɛ, sɛ nokware Kristofo reyɛ asɛnka adwuma no a, wɔde wɔn ho to Onyankopɔn Asɛm so sɛnea Yesu yɛe no. Wokɔ wiase baabiara a, nkurɔfo nim Yehowa Adansefo sɛ nnipa a wɔde anigye ka Bible mu asɛm kyerɛ afoforo. Yɛfa Bible mu nsɛm ka anaa yɛtwe adwene si so mpɛn pii wɔ yɛn nhoma ahorow mu. Sɛ yɛwɔ asɛnka mu nso a, yɛde Kyerɛwnsɛm no di dwuma bere biara a yɛkasa kyerɛ nkurɔfo. (2 Timoteo 3:16) Sɛ obi ma kwan ma yɛkenkan Bible no kyerɛ no na yɛboa no ma ɔte ase, na yɛma ohu mfaso a ɛwɔ Onyankopɔn Asɛm so a, ɛma yɛn ani gye yiye! Yentumi nkae nsɛm te sɛ Yesu, nanso yɛwɔ nneɛma pii a na Yesu nni. Yɛwɔ Bible mũ no nyinaa a wɔaprente wɔ kasa ahorow pii mu, ne Bible ho nhoma ahorow pii a ɛboa ma yɛhwehwɛ kyerɛwnsɛm ahorow. Bere biara a yebenya hokwan akyerɛkyerɛ nkurɔfo no, momma yensi yɛn bo sɛ yɛbɛfa Bible mu nsɛm aka na yɛakenkan akyerɛ wɔn!

11. Adɛn nti na na ɛsɛ sɛ Yesu ka mpɛn pii sɛ Onyankopɔn Asɛm yɛ nokware?

¹¹ Yesu hui sɛ, na nkurɔfo taa kyinkyim Onyankopɔn Asɛm no, nanso wei anyɛ no nwanwa. Yesu ka kyerɛɛ n’Agya wɔ mpaebɔ mu sɛ: “W’asɛm yɛ nokware.” (Yohane 17:17) Ná Yesu nim paa sɛ Satan a “odi wiase so no” yɛ “ɔtorofo ne atoro agya.” (Yohane 8:44; 14:30) Yesu faa Kyerɛwnsɛm no mu asɛm kae mprɛnsa bere a ɔreko atia Satan sɔhwɛ ahorow no. Satan faa kyerɛwsɛm baako fii Nnwom nhoma no mu kae, na ɔboapa kyinkyim no, nanso Yesu gyinaa Onyankopɔn Asɛm so kyerɛe sɛ nea Satan kae no nyɛ nokware.—Mateo 4:6, 7.

12-14. (a) Dɛn na nyamesom akannifo no yɛe a ɛkyerɛ sɛ wɔbu Mose Mmara no animtiaa? (b) Dɛn na Yesu yɛ de kyerɛe sɛ Onyankopɔn Asɛm yɛ nokware?

¹² Yesu ampene so amma nkurɔfo amfa Kyerɛw Kronkron no anni dwuma wɔ ɔkwan a ɛmfata so, wɔannan ani, anaa wɔakyinkyim no. Ɔsom mu akannifo a na wɔwɔ ne bere so no kyinkyim Onyankopɔn Asɛm no. Mose Mmara no mu nsɛm nketenkete a nkurɔfo bedi so no na na wɔtwe adwene si so kɛse, nanso nnyinasosɛm a ɛwɔ Mmara no mu de, na enhia wɔn. Nea wɔyɛe nti, ɛmaa nkurɔfo no som Yehowa ani-so-ani-so. Wɔmaa nkurɔfo nyaa adwene sɛ, nea wɔyɛ a ɛbɛsɔ nnipa ani na ehia, na Mmara no mu nneɛma a ehia paa te sɛ atɛntrenee, mmɔborɔhunu ne nokwaredi no de, wɔbuu wɔn ani guu so. (Mateo 23:23) Ɔkwan bɛn so na Yesu kyerɛe sɛ Onyankopɔn Mmara tene?

¹³ Wɔ Yesu Bepɔw So Asɛnka no mu no, bere biara a ɔbɛtwe adwene asi Mose Mmara no so no, na ɔtaa ka asɛm a ɛne “motee sɛ wɔkae sɛ.” Ná ɔde asɛm “nanso mereka akyerɛ mo sɛ” toa so, afei ná wakyerɛkyerɛ nnyinasosɛm a wɔgyinaa so hyɛɛ saa Mmara no mu. Wei kyerɛ sɛ na ɔrekasa atia Mmara no anaa? Daabi, ɛnte saa koraa. Sɛ nhwɛso no, na nkurɔfo no nim mmara a ɛka sɛ “Nni awu” no yiye. Nanso Yesu ka kyerɛɛ wɔn sɛ, sɛ obi tan ne yɔnko nipa a, na ɔrebu nea saa mmara no kyerɛ ankasa no so. Saa ara nso na sɛ obi nya obi a ɔnyɛ ne yere anaa ne kunu ho akɔnnɔ a, na ɛkyerɛ sɛ, nnyinasosɛm a Onyankopɔn gyinaa so hyɛɛ mmara a ɛbara awaresɛe no, onii no abu n’ani agu so.—Mateo 5:17, 18, 21, 22, 27-39.

¹⁴ Yesu ka kaa ho sɛ: “Motee sɛ wɔkae sɛ: ‘Dɔ wo yɔnko na tan wo tamfo.’ Nanso, mereka akyerɛ mo sɛ: Monkɔ so nnɔ mo atamfo, na mommɔ mpae mma wɔn a wɔtan mo ani.” (Mateo 5:43, 44) Ahyɛde a ɛne sɛ, “tan wo tamfo” no, na efi Onyankopɔn Asɛm mu anaa? Daabi. Nyamesom akannifo no ankasa na wɔhyehyɛɛ saa mmara no. Wɔde nnipa nsusuwii sɛee Onyankopɔn Mmara a ewie pɛyɛ no. Yesu de akokoduru kyerɛe sɛ Onyankopɔn Asɛm yɛ nokware, na wamma nkurɔfo amfa nnipa atetesɛm ansɛe no.—Marko 7:9-13.

15. Ɔkwan bɛn so na Yesu kyerɛe sɛ Onyankopɔn Mmara no nyɛ den, na ɛnyɛ katee nso?

¹⁵ Nyamesom akannifo no sɛee Onyankopɔn Mmara, efisɛ wɔmaa ɛsodi yɛɛ den dodo. Bere a Yesu asuafo no nam afuw bi mu a wɔtetew hwiit mmɛtem no, Farisifo binom kaa sɛ asuafo no resɛe Homeda no. Nanso Yesu de nhwɛso a ɛwɔ Onyankopɔn Asɛm mu bɔɔ wɔn adwemmɔne no gui. Ɛne sɛ, paanoo a wɔde kyerɛ wɔ asɔrefie hɔ no, na ɛnsɛ sɛ wɔde fi kronkronbea hɔ. Nanso pɛnkoro bi de, Kyerɛwnsɛm no ka sɛ wɔde fii hɔ kɔmaa Dawid ne ne mmarima a na ɛkɔm de wɔn no ma wɔdii. Yesu de saa asɛm no kyerɛɛ Farisifo no sɛ, Yehowa mmɔborɔhunu ne n’ayamhyehye no, ɛnyɛ ade a wɔte ase.—Marko 2:23-27.

16. Mose mmara a ɛfa awaregyae ho no, dɛn na na nyamesom akannifo no ayɛ no, na dɛn na Yesu kaa wɔ ho?

¹⁶ Nyamesom akannifo no ankasa hyehyɛɛ mmara ahorow bi sɛnea ɛbɛyɛ a wɔrenni Onyankopɔn Mmara no bi so. Sɛ nhwɛso no, na Mmara no ma kwan sɛ, sɛ ɔbarima bi hu sɛ ne yere ayɛ “aniwude bi,” kyerɛ sɛ, biribi a ɛyɛ aniberesɛm a ebetumi agu abusua no anim ase a, obetumi agyaa no aware. (Deuteronomium 24:1) Nanso, ebeduu Yesu bere so no, na saa mmara no nti, nyamesom akannifo no ma kwan ma ɔbarima tumi gyina biribiara kɛkɛ so gyaa ne yere. Sɛ ɔbea noa ne kunu aduan na ase ahyew mpo a, na wɔtumi gyina so gyaa no!a Yesu ma wɔhui sɛ na wɔakyinkyim asɛm a Onyankopɔn nam Mose so kae no koraa. Enti sɛnea Yehowa hyehyɛɛ aware no, Yesu san tĩĩ mu. Ɛne sɛ, ɔbarima baako ne ɔbea baako na wɔka bom yɛ awarefo, na aguamammɔ nko ara na obi betumi agyina so agyaa aware.—Mateo 19:3-12.

17. Sɛnea Yesu kyerɛɛ sɛ Onyankopɔn Asɛm yɛ nokware no, sɛn na Kristofo a wɔwɔ hɔ nnɛ betumi asuasua?

¹⁷ Ɛnnɛ nso, saa ara na Kristo akyidifo te nka. Wɔhu sɛ, ɛsɛ sɛ wɔma nkurɔfo hu sɛ Kyerɛw Kronkron no yɛ nokware, sɛnea ɛbɛyɛ a nkurɔfo renkyinkyim no. Sɛ nyamesom akannifo ka sɛ abrabɔ ho akwankyerɛ a ɛwɔ Onyankopɔn Asɛm mu no atwam a, na wɔrekyinkyim Bible no. Sɛ asɔre ahorow no kyerɛkyerɛ atosɛm na wɔka sɛ egyina Bible so a, ɛno nso, na wɔrekyinkyim Bible no. Yɛanya hokwan sɛ yɛbɛkyerɛ sɛ Onyankopɔn Asɛm yɛ nokware turodoo. Sɛ nhwɛso no, yɛma nkurɔfo hu sɛ Onyankopɔn nyɛ nyame Baasakoro. (Deuteronomium 4:39) Nanso yɛde odwo ne obu a emu dɔ na ɛyɛ saa.—1 Petro 3:15.

18, 19. Nhwɛso ahorow bɛn na ɛma yehu sɛ na Yesu tumi kyerɛkyerɛ Onyankopɔn Asɛm mu ma ɛyɛ nwanwa?

¹⁸ Bere a wɔrekyerɛw Hebri Kyerɛwnsɛm no, na Yesu wɔ soro. Enti ɛbɛyɛ sɛ n’ani gyei sɛ onyaa hokwan baa asaase so bɛkyerɛkyerɛɛ Onyankopɔn Asɛm no mu! Nea ɛkɔɔ so wɔ Emaus kwan so, bere a wɔnyanee Yesu na n’adekyee no ohyiaa n’asuafo mmienu no, wo de susuw ho hwɛ. Saa bere no, na asuafo no nhuu onipa kõ a ɔyɛ. Enti wɔkaa sɛnea na wɔn Wura a wɔdɔ no no wu ama wɔn werɛ ahow na wɔn adwene atu afra no kyerɛɛ no. Asɛm bɛn na Yesu ka kyerɛɛ wɔn? “Ne ho nsɛm a ɛwɔ Kyerɛwnsɛm no mu no nyinaa, ɔkyerɛɛ mu kyerɛɛ wɔn; ɔhyɛɛ ase fii nea Mose ne Adiyifo no nyinaa kyerɛwee so.” Yesu nsɛm no kaa wɔn sɛn? Akyiri yi, wɔkeka kyerɛɛ wɔn ho wɔn ho sɛ: “Bere a ɔne yɛn rekasa wɔ ɔkwan so, na ɔrekyerɛ Kyerɛwnsɛm no mu yiye akyerɛ yɛn no, anka yɛn koma anaa?”—Luka 24:15-32.

¹⁹ Saa da no ara, Yesu ne n’asomafo ne nnipa afoforo bi hyiaam. Hyɛ nea ɔyɛ maa wɔn no nsow: “Obuee wɔn adwene mu yiye ma wɔtee Kyerɛwnsɛm no ase.” (Luka 24:45) Akyinnye biara nni ho sɛ, sɛnea wɔn ani gyei saa da no ma wɔkaee sɛnea na Yesu taa kyerɛkyerɛ Kyerɛwnsɛm mu kyerɛ wɔne afoforo a na wɔtie no no. Mpɛn pii no, na ɔfa kyerɛwnsɛm a wɔnim no yiye, na na ɔkyerɛkyerɛ mu wɔ ɔkwan bi so ma ɛyɛ n’atiefo nwanwa. Ná ne nkyerɛkyerɛmu no ma wɔsua biribi foforo fi Onyankopɔn Asɛm mu, na wɔte ase yiye.

20, 21. Asɛm a Yehowa fi nwura a ɛredɛw no mu ka kyerɛɛ Mose no, sɛn na Yesu kyerɛkyerɛɛ mu?

²⁰ Bere bi, na Yesu ne Sadukifo bi rekasa. Ná Sadukifo no yɛ nyamesom kuw bi a wɔatew wɔn ho afi Yudasom ho, na na wɔn mu binom yɛ asɔfo. Ná wɔnnye owusɔre nni. Yesu ka kyerɛɛ wɔn sɛ: “Ɛdefa owusɔre ho no, monkenkan nea Onyankopɔn ka kyerɛɛ mo no? Ɔkae sɛ: ‘Mene Abraham Nyankopɔn ne Isak Nyankopɔn ne Yakob Nyankopɔn.’ Ɔnyɛ awufo Nyankopɔn, na mmom ateasefo de.” (Mateo 22:31, 32) Ná Sadukifo no nim saa kyerɛwsɛm no yiye, na Mose a ɔkyerɛw saa asɛm no nso, na wɔbu no yiye. Sɛ wohwɛ nea Yesu kae no a, wutumi hu sɛ emu dɔ paa. Adɛn ntia?

²¹ Bɛyɛ afe 1514 A.Y.B. na Yehowa fi nwura a ɛredɛw mu ne Mose kasae. (Exodus 3:2, 6) Saa bere no, na Abraham awu mfe 329, na Isak awu mfe 224, na na Yakob nso awu mfe 197. Nanso Yehowa kaa sɛ: “Mene” wɔn Nyankopɔn. Ná saa Sadukifo no nim sɛ Yehowa nte sɛ abosonsomfo nyame bi a odi awufo so wɔ baabi a ebinom susuw sɛ nnipa wu a wɔkɔ. Mmom sɛnea Yesu kae no, Yehowa yɛ “ateasefo” Nyankopɔn. Ná ɛno kyerɛ sɛn? Asɛm a Yesu ka de wiei yi ma yehu nea na ɛkyerɛ: “N’ani so de, wɔn nyinaa te ase.” (Luka 20:38) Yehowa da so ara kae n’asomfo anokwafo a wɔawuwu no, na ne werɛ remfi wɔn da. Yehowa benyan wɔn ɔkwan biara so ma enti, wɔbetumi aka wɔn ho asɛm sɛ wɔte ase. (Romafo 4:16, 17) Sɛ wohwɛ sɛnea Yesu kyerɛkyerɛɛ Onyankopɔn Asɛm mu no a, ɛnyɛ nwanwa? Edi sɛ Yesu nkyerɛkyerɛ no ‘yɛɛ nnipakuw no nwonwa’ saa no!—Mateo 22:33.

22, 23. (a) Yɛbɛyɛ dɛn asuasua sɛnea Yesu kyerɛkyerɛɛ Onyankopɔn Asɛm mu no? (b) Dɛn na yebesusuw ho wɔ ti a edi hɔ no mu?

²² Kristofo a wɔwɔ hɔ nnɛ anya hokwan sɛ wɔbɛkyerɛkyerɛ Onyankopɔn Asɛm mu sɛnea Yesu yɛe no. Nokwarem no, yɛn adwene nni mũ. Nanso mpɛn pii no, yetumi kyerɛkyerɛ kyerɛwsɛm a nkurɔfo nim no yiye no mu kyerɛ wɔn wɔ ɔkwan bi so a wɔnsusuw ho saa da. Sɛ nhwɛso no, Awurade mpaebɔ no mu nsɛm a ɛka sɛ, “Wo din ho ntew,” ne “W’ahenni mmra” no, ebia wɔtaa ka no mpɛn pii, nanso wɔnnim Onyankopɔn din anaa nea n’Ahenni no kyerɛ. (Mateo 6:9, 10) Sɛ obi ma kwan ma yɛkyerɛkyerɛ no Bible mu nokwasɛm a ɛte saa mu ma ɔte ase a, ɛyɛ hokwan kɛse paa na yɛanya no!

²³ Sɛ yɛfa nsɛm fi Onyankopɔn Asɛm mu ka, yɛkyerɛ sɛ ɛyɛ nokware, na yɛkyerɛkyerɛ mu a, ɛma yesuasua ɔkwan a Yesu faa so kyerɛkyerɛɛ nokware no mu no. Akwan a etu mpɔn a Yesu faa so kyerɛkyerɛɛ nokwasɛm a ɛwɔ Bible mu ma ɛkaa n’atiefo koma no, momma yensusuw ho wɔ ti a edi hɔ no mu.