Mmofra Bisa Sɛ . . .

Nnwom Ho Video—Mɛyɛ Dɛn Atumi Apaw Nea Eye?

“Sɛ mihu kuw bi a wonni din pa anaa dwom bi a enye din a, mesesa dwumadibea no.”—Casey.

NNWOM HO VIDEO—mmabun pii ani gye ho paa. Nanso sɛnea asɛm a edi eyi anim wɔ nsɛm yi mu kyerɛe no, nnwom ho video pii da nna mu ɔbrasɛe ne basabasayɛ a ɛyɛ ahodwiriw adi.a Nokwarem no, sɛ anigyede biara hyɛ ade a Onyankopɔn kasa tia ho nkuran a, ɛsɛ sɛ Kristoni gyae hwɛ. Nanso ɛnyɛ nnwom ho video nyinaa na ɛda ɔbrasɛe adi. Emu bi betumi afata kakra. Afoforo nso betumi ayɛ sɛ nea amumɔyɛsɛm biara nnim. Nanso, ebia video ahorow a ɛte saa no nam anifere kwan so betumi de nsɛm a ɛne Onyankopɔn Asɛm nhyia nso ama.

Sɛ w’awofo pene so sɛ wubetumi ahwɛ nnwom ho video a, ebehia sɛ woyɛ nyiyim na wode wo “nkatede” a wɔde Bible atete no no di dwuma na ama woatumi ayiyi nea ɛfata ne nea ɛmfata sɛ wohwɛ mu. (Hebrifo 5:14) Bible nnyinasosɛm ahorow bɛn na ebetumi aboa wo wɔ eyi mu? Nea edidi so yi yɛ Bible mu nsɛm ne emu nkyerɛkyerɛmu a ebetumi aboa wo.

Mmebusɛm 4:23: “Kora wo koma so sen nea wode sie nyinaa, na emu na nneyɛe nyinaa fi.” So wowɔ agodie ho nneɛma anaa nnwom ho nnwinnade a ɛsom bo ma wo? Akyinnye biara nni ho sɛ wobɔ mmɔden hwɛ so yiye na wode gu beae pa. Ɛda adi sɛ worennyaw ngu abɔnten bere tiaa bi mpo esiane sɛ wusuro sɛ ɛbɛsɛe anaasɛ obi bewia nti. Yiw, wobɛkora so. Saa ara nso na ɛsɛ sɛ wusi gyinae sɛ wobɛkora wo koma so denam anigyede a ɛmfata a woremma ɛnhyɛn mu bere tiaa bi mu mpo so.

Efesofo 2:1, 2: “Mo nso, anka moyɛ awufo, mfomso ne nnebɔne mu, na kan no monantewee sɛnea wi yi ase abrabɔ te ne sɛnea wim tumi no panyin te, honhom a nnansa yi ɔyɛ adwuma asoɔden mma mu no.” Wim no, ne wiase honhom no, ne nsusuwii ne ne su a ɛma wɔyɛ nneyɛe bɔne no. Saa honhom yi da adi wɔ nnwom ho video pii mu, na ɛko tia Onyankopɔn honhom a ɛsow su horow te sɛ anigye, asomdwoe ne ahosodi no koraa.—Galatifo 5:22, 23.

2 Timoteo 2:22: “Guan mmerante bere mu akɔnnɔ.” Ɔbea ne ɔbarima nna ho mfonini a wobɛhwɛ—bere tiaa mu mpo—no bɛkanyan w’akɔnnɔ. Mmofra pii ka sɛ ɛyɛ den sɛ wɔn werɛ befi biribi a ɛte saa a woyi kyerɛ wɔn no; na ebetumi aba mpo sɛ wobetwa ho mfonini wɔ wɔn adwene mu mpɛn pii. Aberantewaa bi a wɔfrɛ no Dave a ɔhwɛɛ video bi a ɛmfata no ka sɛ: “Ɛno akyi no, bere biara a mɛte saa dwom no mekae video yi.” Video a ɛtete saa a wobɛhwɛ no bɛma woanya nna mu ɔbrasɛe ho akɔnnɔ.—1 Korintofo 6:18; Kolosefo 3:5.

Mmebusɛm 13:20: “Nea ɔne nkwasea bɔ no hu amane.” Bisa wo ho sɛ, ‘So mɛto nsa afrɛ obi a ɔde ne ho hyɛ basabasayɛ, ahonhonsɛmdi, asabow anaa ɔbrasɛe mu aba me fie?’ Nnipa a wɔte saa a wonam television so ne wɔn bɛbɔ no te sɛ nea woreto nsa afrɛ wɔn aba wo fie ara pɛ. So saayɛ betumi ama ‘woahu amane’? Kimberly ka sɛ: “Mahu wɔ tebea horow bi mu sɛ mmabaa a wɔkɔ apontow ase suasua ntadehyɛ anaa asaw bɔne bi a wɔhwɛɛ wɔ video so nkyɛe no.” Ebia woahu biribi a ɛte saa pɛn. Sɛ ɛba sɛ mmabun yi suasua wɔn a wonni obu mma Onyankopɔn gyinapɛn ahorow no a, na wɔkyerɛ sɛ wɔafi ase ‘rehu amane’ dedaw. Enti kwati ‘fekubɔne’ biara ɔkwan biara so.—1 Korintofo 15:33.

Dwom 11:5: “[Yehowa, NW] sɔ ɔtreneeni hwɛ, na ɔbɔnefo ne nea ɔpɛ amim [nea n’ani gye basabasayɛ ho, NW] de, ne kra tan no.” Sɛ yɛhwɛ video horow a ɛhyɛ basabasayɛ a nyansa nnim ho nkuran a, so ɛnkyerɛ sɛ yɛyɛ nnipa a ‘yɛn ani gye basabasayɛ’ ho?

Nyiyim a Wobɛyɛ Ho Asɛnnennen

Esiane sɛ “wiase nyinaa da ɔbɔne no mu” nti, den ara na ɛrekɔ so yɛ den sɛ yebenya anigyede a wiase no adwene ne ne nneyɛe nnim. (1 Yohane 5:19) Nnwom ho video dwumadibea bi betumi ayi nneɛma a enye pii. Sɛ mpo ɛba sɛ dwumadi no mfa ɔbrasɛe anaa basabasayɛ ho kɛse a, mpɛn pii no ɛhyɛ wiase honhom ho nkuran. Odwontofo bi kae sɛ nnwom ho video dwumadibea biako a wɔhwɛ paa no “asesa dwom dwumadibea no ayɛ no dwumadibea a ɛhyɛ ‘asetra kwan’ ho nkuran.”

Ɛte sɛ nea ano aduru nyɛ den no: Sɛ video bi nye a, sesa dwumadibea no. Asɛm no ne sɛ, ɛho behia sɛ woyɛ anifere bere a worehwɛ TV so dwumadibea foforo no. Dwumadibea no pii yi dwumadi a basabasayɛ anaa ahuhusɛm wom anaa nnipa a wɔn bra asɛe kyerɛ. Nokwarem no, ebetumi ahyɛ abufuw—na mpo ahaw adwene—sɛ worepɛ biribi agyigye w’ani na bere koro no ara ɛsɛ sɛ woyɛ krado sɛ wobɛsesa dwumadibea a efi ba no. Na ɛtɔ da bi a, ansa na wobɛsesa nea worehwɛ no, na nea ebesi anya asi. Woanya de ɔbrasɛe ho mfonini no adua w’adwene mu. Nanso wubetumi anya ahotoso sɛ Yehowa Nyankopɔn behyira mmɔden biara a worebɔ sɛ wobɛkora wo koma so no so.—2 Samuel 22:21.

Akwan foforo a mfaso wɔ so wɔ hɔ a ebia ɛbɛboa wo. Casey, a yɛadi kan aka ne ho asɛm no kyerɛkyerɛɛ nea ɛboaa no no mu sɛ: “Mpɛn pii no, wɔde kuw no ne dwom no din di kan ba video no so. Nnwontofo akuw agye din, enti bere nyinaa wuhu akuw ne nnwom a ebia ɛrenyɛ papa no. Ɛno nti sɛ mihu kuw bi a wonni din pa anaa dwom bi a enye din a, mesesa dwumadibea no. Memma mframa mfa so koraa.”

‘Wo Komam Nokware a Wobɛka’

Sɛ wunim Bible nnyinasosɛm ahorow mpo a, wubetumi afi ase ahwɛ nneɛma a enye. Ɔkwan bɛn so? Denam wo ho bem a wubebu so. (Yakobo 1:22) Bible ka kyerɛ yɛn sɛ, obi a “ɔka ne komam nokware” na Yehowa fa no adamfo. (Dwom 15:2) Enti di wo ho nokware. Nnaadaa wo ho. Sɛ wuhu sɛ worebu wo ho bem wɔ biribi a ɛmfata a worehwɛ ho a, bisa wo ho sɛ, ‘So Yehowa bɛpene nea merehwɛ yi so ankasa?’ Kae sɛ, mpɛn pii no, ɛnyɛ hu a wubehu nea eye ne nea enye no ne asɛm no, na mmom gyinae a wubesi sɛ wobɛyɛ nea ɛteɛ no! Ɛsɛ sɛ wubu wo ne Yehowa ntam abusuabɔ no sɛ ade a ɛsom bo sen anigyede.—2 Korintofo 6:17, 18.

Mpɛn pii no, ɛnnɔɔso sɛ wode amemenemfe bɛyɛ nyiyim. Sɛ woansi gyinae pintinn a, nyiyim no betumi asɛe ntɛm ara. Bible ka sɛnea Onyankopɔn nipa Hiob sii ne bo sɛ obedi ne yere nokware no ho asɛm kyerɛ yɛn. Ɔkae sɛ: “Apam na me ne m’aniwa apam, na adɛn na memfa m’ani menkari ababaa?” (Hiob 31:1) Susuw ho hwɛ! Hiob ne ne ho yɛɛ apam sɛ ɔbɛto nea ɔde n’ani bɛhwɛ no ano hye. Wo nso wubetumi ayɛ saa ara. Si wo bo pintinn—na hyɛ wo ho bɔ—sɛ worenhwɛ nneɛma a enye. Fa anohyeto pɔtee bi sisi w’anim. Na bɔ asɛm no ho mpae. Afei di wo bɔhyɛ no so, na sɛ ɛbɛyɛ yiye mpo a, kyerɛw to hɔ. Sɛ wuhia mmoa kakra a, adɛn nti na wo ne ɔpanyin bi a wowɔ ne mu ahotoso—sɛ nhwɛso no, w’awofo—nsusuw ho?

Esiane asiane horow yi nti, Kristofo mmabun bi asi gyinae sɛ wɔrenhwɛ nnwom ho video koraa. Sɛnea wo gyinaesi te wɔ asɛm yi ho biara no, fa atɛmpa di dwuma. Kura ahonim pa mu. Sɛ wokɔ so hwɛ anigyede a ɛho tew na ahomeka wom a, wubetumi akwati asiane pii na woakɔ so ne Yehowa ayɛ nnamfo.

[Ase hɔ asɛm]

[Mfonini wɔ kratafa 21]

Video horow bi a ɔbrasɛe nhyɛ da nna adi wom no mpo hyɛ nsusuwii a epira ho nkuran

[Mfonini wɔ kratafa 22]

Si wo bo sɛ worenhwɛ nneɛma a Onyankopɔn mpɛ