Kɔ So Hwehwɛ Sɛ Akorade A Ahintaw

NYANSA abohene a ɛwɔ Onyankopɔn Asɛm Bible no mu no som bo kɛse dɛn ara! Saa abohene yi da Onyankopɔn atirimpɔw adi na ɛde hokwan ahorow a ɛyɛ anigye sisi yɛn anim. Ɛma yenya awerɛkyekye na ɛkyerɛ yɛn sɛnea yebetumi asɔ Onyankopɔn ani. (Romafo 15:4) Saa hyerɛmmo yi nso boa yɛn ma yɛyɛ yɛn ade nyansa mu wɔ yɛne afoforo nsɛnnii mu. Nokwarem no, nyansa a efi Onyankopɔn hɔ no boa yɛn ma yɛde akomatɔyam ne anigye nantew “nkwa kwan no” so.​—Dwom 16:11; 119:105.

Esiane sɛ nyansa so mfaso horow dɔɔso nti, ɛsɛ sɛ ɛsom bo kɛse ma yɛn. Nyansa a ɛrekasa te sɛ onipa no se: “M’anom nsɛm nyinaa nam trenee mu, ade a akyim anaasɛ akyea nni mu; ne nyinaa mu da hɔ ma nhumufo, na ɛteɛ ma wɔn a wɔahu nimdeɛ. Momfa me nteɛso, na ɛnyɛ dwetɛ, na momfa nimdeɛ, na munnyaw sika a wɔayiyi mu. Na nyansa ye sen mmota, na afɛfɛde nyinaa, wɔmfa nto ho.”​—Mmebusɛm 8:8-11.

Dɛn Nti na Ɛsɛ sɛ Wokɔ so Hwehwɛ?

Mpɛn pii no, abohene, sika, anaa dwetɛ a ɛhyɛ asase mu a wɔbɔre hwehwɛ no yɛ ɔkwa. Ɛnsɛ sɛ eyi ba saa wɔ Onyankopɔn nyansa no hwehwɛ mu. Nanso ɔkwan bɛn so na yebetumi adi nkonim wɔ eyi a yɛhwehwɛ no mu? Wiɛ, nkonimdi gyina sɛnea yɛn kɔn a ɛdɔ saa akorade yi no mu yɛ den fa ne sɛnea yɛyɛ adwumaden de hwehwɛ no so. Sɛ yehu sɛnea ɛsom bo nokwarem no a, yɛn ani begye ho akyɛn nneɛma afoforo a ɛsom bo nyinaa. Anyɛ yiye koraa no, “nyansa nya ye sen sika dɛn ara, na nhumu nya sɛ sɛ wɔpaw sen dwetɛ.”​—Mmebusɛm 16:16.

Mmebusɛm 2:1-6 hyɛ yɛn sɛ: “Me ba, sɛ wutie me nsɛm, na wode me mmara nsɛm sie wo nkyɛn, sɛ wobɛyɛ asõ atie nyansa, na woakom wo koma ama ntease, yiw, sɛ wusu frɛ nhumu, na woma wo nne so frɛ ntease, sɛ wohwehwɛ n’akyi kwan sɛ dwetɛ, na wobɔre hwehwɛ no sɛ akorade a ahintaw a, ɛno na wubehu [Yehowa] suro, na woahu Onyankopɔn ho nimdeɛ. Na [Yehowa] na ɔma nyansa, n’anom na nimdeɛ ne ntease fi ba.”

Esiane sɛ akorade a wɔde ahyɛ fam ahintaw nti, ɛho hia sɛ wɔhwehwɛ. Sɛ ebinom retutu fam apɛ akorade a, wɔde ahomegye bere, aduan, ne nna bɔ afɔre. Nanso wobu mmɔdenbɔ a ɛte saa no sɛ ɛfata bere a wɔahu akorade no. Ɛho hia sɛ yɛbɔ afɔre ahorow a ɛtete saa de hwehwɛ Onyankopɔn nyansa. Sɛnea akorade a wɔde ahyɛ fam a wɔhwehwɛ no gye fam tutu a emu yɛ den no, saa ara nso na nyansa a wɔhwehwɛ gye animia. Ɛnnɔɔso sɛ wode w’ani bɛfofa Bible no ne Kristofo nhoma ahorow mu ara kwa. Bere, nhwehwɛmuyɛ, ne asɛm ho a wodwen kɔ akyiri ho hia na ama wɔanya honhom mu abohene. Nanso sɛ yenya Kyerɛwnsɛm no mu nhumu a, ɛyɛ anigye dɛn ara!​—Nehemia 8:13.

Akorade Hwehwɛ a Edi Yiye

Yiw, anigye fi Onyankopɔn Asɛm no mu a wɔhwehwɛ yiye na wonya nyansa abohene no mu ba. (Mmebusɛm 3:13-18) Ne saa nti, sɛ yɛhyehyɛ yɛn ankasa anaa abusua nhomakorabea a, na yɛyɛ anyansafo. Nanso dɛn na ɛsɛ sɛ yɛde tom? Wɔ nsɛm asekyerɛ nhoma a eye akyi no, Yehowa Adansefo hu sɛ mfaso wɔ so sɛ wobenya Kyerɛwnsɛm no nkyerɛase ahorow, ne Kristofo Bible nhoma ahorow a afe biara Ɔwɛn-Aban ne ne hokafo Nyan! ahorow no ka ho. Nokwarem no, sɛ nhomakorabea no bɛboa yɛn ma yɛayɛ akorade hwehwɛfo pa a, ɛsɛ sɛ yɛde di dwuma yiye.

Bere a yɛhwehwɛ nyansa no, yebetumi ahwehwɛ asɛmti ne Kyerɛwsɛm afã ahorow a ɛwɔ Watch Tower Publications Index anaa index ahorow a ɛwɔ Ɔwɛn Aban Asafo no nhoma ne nsɛmma nhoma ahorow a wɔaka abom no akyi no mu. Eyinom yɛ nnwinade atitiriw a wɔde hwehwɛ Onyankopɔn nyansa. Nokwarem no, ɛte sɛ asase mfonini a ebetumi de yɛn akɔ Onyankopɔn nyansa mu “akorade a ahintaw” no ho. (Mmebusɛm 2:4) Sɛ yenni nhoma ahorow a yɛde bɛyɛ nhwehwɛmu no mu bi a, ebia yɛn nsa bɛka bi wɔ Yehowa Adansefo Ahenni Asa so.

Afei, ma yɛnyɛ akorade hwehwɛ a edi yiye no ho nhwɛso. Wɔ yɛn Bible akenkan mu no, ebia yebesusuw ɔkwan a Yuda Iskariot faa so wui bere a oyii Yesu mae no akyi no ho. Mateo 27:5 kyerɛ sɛ Yuda ‘kɔsɛn ne mene.’ Nanso Asomafo no Nnwuma 1:18 se: “Na ɔhyɛɛ akɔmfo no, ne mu paee, na n’ayamde nyinaa tu gui.” Enti ɔkwan bɛn so na Yuda wui? Wubetumi anya mmuae denam saa kyerɛw nsɛm ahorow yi a wɔahyehyɛ wɔ “Scripture Index” mu wɔ Insight on the Scriptures nhoma no mu a wobɛhwehwɛ mu no so. Ɛka kyerɛ yɛn sɛ: “Ɛte sɛ nea Mateo ka ɔkwan a ɔnam so bɔɔ mmɔden sɛ obekum ne ho no ho asɛm, bere a Asomafo no Nnwuma no kyerɛkyerɛ nea efii mu bae no mu. Sɛ wɔde nsɛm abien no bom a, ɛte sɛ nea Yuda bɔɔ mmɔden sɛ ɔbɛsɛn ne mene wɔ ɔbotan bi so, nanso hama no mu tewee anaasɛ dubaa no bui ma enti ɔtew bɛhwee fam na ne mu paee wɔ abo a ɛwɔ fam hɔ no so. Asase tebea a atwa Yerusalem ho ahyia no ma wotumi susuw ade a ɛte saa a ebetumi asi no ho.” (Po 2, kratafa 130) Ɛdefa Insight on the Scriptures ho no, yɛsrɛ wo hwɛ nsɛmma nhoma yi kratafa 10.

Concordance a yɛde di dwuma no boa yɛn ma yehu Bible mu kyerɛw nsɛm ahorow. Nokwarem no, sɛ yɛresusuw kyerɛwsɛm bi ho a, ɛsɛ sɛ yɛhyɛ nsɛm afoforo a ɛka ho no nsow. Sɛ yɛbɛyɛ eyi ho nhwɛso a, ma yensusuw Dwom 144:12-14 ho. Saa kyerɛw nsɛm ahorow yi kyerɛ sɛnea ebinom ka sɛ: ‘Yɛn mmabanin ayɛ te sɛ tɛ nnua, yɛn mmabea ayɛ sɛ twea so adum a wɔasen no sɛ ahemfi de, yɛn asan ayɛ ma, yɛn nguan awo mpem ayɛ mpem dudu, yɛn anantwi ho atua wɔn ho a ɔsɛe ne ɔyera mma wɔn mu.’ Ebia yebesusuw sɛ saa nsɛm yi fa Onyankopɔn nkurɔfo ho, nanso emu nsɛm no kyerɛ sɛ ɛnte saa. Wɔ nkyekyem 11 no, odwontofo Dawid srɛ sɛ wonnye no mfi wɔn a wɔka atosɛm nsam. Wɔhoahoaa wɔn ho wɔ wɔn mmabanin, wɔn mmabea, wɔn nguan ne wɔn anantwi ho. Sɛnea nkyekyem 15 kyerɛ no, abɔnefo a wɔte saa no kae sɛ: “Nhyira ne ɔman a wɔte sɛɛ.” Nanso nea ɛne no bɔ abira no, Dawid teɛɛm sɛ: “Nhyira ne ɔman a [Yehowa] ne wɔn Nyankopɔn.”

Honhom mu Abohene Abu So!

Ɛda adi yiye sɛ nyansa hwehwɛ a edi yiye no de anigye ba. Na nea ɛka honhom mu abohene a wobetumi anya denam nhwehwɛmuyɛ so no ho ne Bible mu nsemmisa ahorow ho mmuae a ɛma akomatɔyam. Sɛ yɛkɔ so hwehwɛ a yenya mmuae horow dɛn ara! Sɛ nhwɛso no, ɛhe na Kain nyaa ne yere no?

Watchtower (October 1, 1981) no kae sɛ: “Bible no ka kyerɛ yɛn sɛ Adam ne Hawa woo mma pii, ɛnyɛ baanu [Kain ne Habel] pɛ. ‘Nna a Adam woo Set [ne babanin foforo] no akyi no odii si mfirihyia ahanwɔtwe, na ɔwoo mmabarima ne mmabea.’ (Gen. 5:4) Esiane saa asɛm no nti, wobɛka sɛ ɛhe na Kain nyaa ne yere no? Yiw, ɛbɛyɛ sɛ ɔwaree ne nuabeanom mu biako. Ɛnnɛ ɛbɛyɛ nea asiane wɔ eyi mu ma mma biara a awofo a wɔbɛn so saa no bɛwo wɔn. Nanso esiane sɛ na ɛbɛn adesamma abakɔsɛm mfiase bere a na adesamma bɛn pɛyɛ ho kɛse no nti, na eyi nyɛ asɛnnennen.”

Fa no sɛ yɛrekenkan Bible mu nhoma a ɛne Mmebusɛm no. Bere a yehu nea wɔaka wɔ Mmebusɛm 1:7 no, ebia yebedwen sɛ: ‘Dɛn ne “[Yehowa] suro”?’ Ebia nhwehwɛmu de yɛn bɛkɔ May 15, 1987 Watchtower a ɛkaa eyi no mu: “Ɛne fɛre, nidi a emu dɔ kɛse, ne osuro pa a yɛwɔ a ɛremma yɛnnyɛ nea ɛnsɔ n’ani efisɛ yɛn ani sɔ n’ayamye ne ne papayɛ. ‘Yehowa suro’ kyerɛ gye a yebegye no atom sɛ Ɔtemmufo Pumpuni ne Ade Nyinaa so Tumfoɔ a ɔwɔ hokwan ne tumi sɛ ɔde asotwe anaa owu ba wɔn a wontie no no so. Ɛkyerɛ sɛ yɛbɛsom Onyankopɔn nokwaredi mu, yɛde yɛn ho bɛto no so koraa, na yɛakyi nea ɛyɛ bɔne wɔ n’ani so.”

Kɔ so Hwehwɛ!

Wotintim Ɔwɛn-Aban sɛnea ɛbɛyɛ a ɛbɛboa wɔn a wɔde nokwaredi hwehwɛ nyansa no ma wɔanya honhom mu abohene a ɛsom bo kɛse. Yɛn nyinaa hia nyansa ne ntease a ɛwɔ Onyankopɔn Asɛm mu. Mmebusɛm 4:7, 8 se: “Nyansa ne ade titiriw: Enti nya nyansa, na fa w’adenya nyinaa nya nhumu. Bu no, na ɛbɛma wo so; sɛ woyɛ no atuu a, ɛbɛhyɛ wo anuonyam.”

Ɛdenam Kyerɛwnsɛm no mu nhumu a yebenya na yɛde nyansa adi dwuma ɔkwan pa so nkutoo so na yebetumi anya nokware anigye. Yiw, na ɛdenam Onyankopɔn nyansa a yɛde bedi dwuma so nkutoo na yebetumi asɔ Yehowa ani. Enti mma biribiara nsiw wo kwan wɔ nyansa a wobɛhwehwɛ no sɛ akorade a ahintaw no mu.

[Mfonini wɔ kratafa 4, 5]

Akorade a wɔde asie fam a wɔhwehwɛ no gye fam tutu a emu yɛ den. So ɛnsɛ sɛ yemia yɛn ani wɔ Onyankopɔn nyansa a yɛhwehwɛ no mu anaa?