Mmofra—Mo Afã Wɔ Abusua A Anigye Ne Biakoyɛ Wom Mu
“Mayɛ m’agya ba, abadomaa ne ɔba koro, me nã anim.”—MMEBUSƐM 4:3.
1, 2. Ɔhaw bɛn na ɛwɔ Kristofo binom afie mu?
HWƐ sɛnea ɛyɛ anigye sɛ wobɛka nneɛma a ɛhaw wo ho asɛm akyerɛ obi a odwen wo ho na ɔbɔ mmɔden sɛ ɔbɛte wo nkate ase, na ɔde afotu a efi ayamye mu ama! Na sɛ saa onii no yɛ ɔwofo a, ɛnde na ɛyɛ nhyira ma wo ampa. Nanso wobɛn w’awofo ankasa dɛn?
2 Mmofra baanu a wonnii mfe aduonu a wɔn awofo yɛ Kristofo kyerɛwee sɛ: “Yɛn haw titiriw ne nkitahodi. Ɛte sɛ nea yɛne yɛn awofonom ntumi nkasa. Yɛn baanu nyinaa dɔ yɛn awofonom paa, nanso yentumi nni nkitaho. Mabɔ ho mpae mpɛn pii nanso minnya ho mmuae biara.” Dɛn nti na ɛtɔ bere bi a wɔ Kristofo afi mu mpo no, wontumi nnya nkitahodi pa? So ɔkwan bi wɔ hɔ a wobetumi afa so afi ɔhaw a ɛte sɛɛ mu?
Nea Enti A Wontumi Nni Nkitaho
3, 4. Kyerɛ nea enti a awofo ne mma binom ntumi nni nkitaho no bi?
3 Ná mmofra a yɛaka wɔn ho asɛm wɔ atifi hɔ no ne wɔn awofonom adwene nhyia wɔ anigyede ne nnamfo a ɛsɛ sɛ wɔpaw ho. Adwene a enhyia, a te a wote nka sɛ wobu ani gu w’adwenkyerɛ so ka ho, betumi asiw nkitahodi kwan. Nanso dɛn nti na adwene a enhyia yi ba? Mmebusɛm 20:29 de nea enti a ɛba saa ho adwenkyerɛ biako ma, sɛ: “Mmerante anuonyam ne wɔn ahoɔden, na nkwakora ahoɔfɛ ne dwen.” Esiane sɛ mmerantebere mu “ahoɔden” yɛ nea mfe pii mu osuahu a ɛfa asetra mu nokwasɛm a emu yɛ den ho nka no nti, mmofra tumi bu wɔn ani gu asiane ahorow so a wɔte nka sɛ ‘biribi bɔne biara rentumi nsi.’ Nanso w’awofo a esiane onyin—anaa osuahu a ɛyɛ yaw a wɔn ankasa anya—nti wɔwɔ nyansa no hu nneɛma wɔ ɔkwan soronko so. Ɛwom sɛ wɔte wo nkate ahorow ase de, nanso ebia wonim asiane ahorow a ɛyɛ anifere kwan so de a wunhu.—Mmebusɛm 29:15.
4 Ebia ɛtɔ bere bi nso a muntumi nni nkitaho esiane sɛ ɛyɛ den ma wo sɛ wobɛka nkate ahorow bi a ɛyɛ yaw ho asɛm nti. Esiane wo ne afoforo ntam ntawntawdi anaa w’ankasa sintɔ ahorow nti, ebia wo koma bedi yaw. Ebia wobɛyɛ w’ade te sɛ Hiob a ɔtee nka nɛ ne nuanom, wɔn a wonim no yiye, yiw, n’ankasa fifo atwe wɔn ho afi ne ho no. (Hiob 19:13-19) Ɛtɔ bere bi nso a nkitahodi sɛe esiane sɛ ɔwofo bi ‘siw n’aso’ bere a abofra bɔ mmɔden sɛ ɔbɛda nkate a ɛho asɛm yɛ ka nã adi no.”(Mmebusɛm 21:13) Abeawa bi a onnii mfe aduonu kae sɛ: “Ɛyɛɛ me yaw pii, misui pii kosii sɛ m’agya kae sɛ, ‘Su a wusu no remma nneɛma nyɛ yiye,’ enti manka me nkate bio asɛm ankyerɛ obiara. Mansu bio bere a ɔwɔ hɔ, na me ne no anni nkitaho biara nso.”
5. Dɛn ne ade a edi kan wɔ nkitahodi pa a wɔbɛma anya nkɔso mu?
5 Nanso ɛmfa ho sɛnea w’awofo yɛ wɔn ade no, pii wɔ hɔ a wubetumi ayɛ na ama mo nkitahodi anya nkɔso! Fi ase denam nokwaredi mu a wubefi ahwehwɛ wo ne w’awofo ntam abusuabɔ mu no so. Sɛ nhwɛso no, Israel man no yɛɛ wɔn ho sɛ wɔbɛn wɔn soro Agya no, na wɔkae sɛ: “M’agya, me mmabaabere mu adamfo ne wo.” Nanso wɔ nokwarem no, esiane wɔn atuatew no nti na wɔne no nni abusuabɔ pa. (Yeremia 3:4, 5) So w’awofo yɛ wo ‘nnamfo’ ankasa? So woyɛ biribi a sɛ woanhyɛ da mpo a, ebetumi asɛe mo nkitahodi? So wubetumi aka nea Salomo kae no, sɛ: “Mayɛ m’agya [ne me na] ba ankasa”? (Mmebusɛm 4:3, NW) Dɛn na wubetumi ayɛ na ama woabɛn wɔn kɛse?
“Adɔe Ne Nokware”
6. (a) Sɛnea Mmebusɛm 3:3 kyerɛ no, su horow bɛn na ɛbɛboa abofra ma wanya ‘Onyankopɔn ne nnipa anim dom’? (b) Ɔkwan bɛn so na obi betumi de ‘eyi akyekye ne kɔn?’
6 Ɔhene Salomo onyansafo no susuw nea ehia na ama abofra anya “ɔdom ne nimdeɛ pa, Onyankopɔn ne nnipa [a n’awofo ka ho] anim” no ho. Dɛn na ohui? “Me ba . . . mma adɔe ne nokware nnnyaw wo; fa kyekye wo kɔn, kyerɛw wo koma pon so.” (Mmebusɛm 3:1-4) Adɔe ne nokware bɛtwe wo abɛn w’awofo kɛse. Nanso ɛsɛ sɛ su horow yi ba bɛyɛ wo nipasu fã titiriw, ‘wode kyekye wo kɔn na wokyerɛw gu wo koma pon so.’ Wɔ Bible mmere mu no, na wɔtaa de hama sa nsɔanokaa so de to wɔn kɔn mu. (Genesis 38:18) Ná kawa yi som bo efisɛ sɛ wɔamfa anni dwuma a, nhyehyɛe biara nni hɔ a ebedi mũ. Nea ɔhyɛ kawa yi were mfi da na ɛkae no bo kɛse a ɛsom no bere nyinaa. Enti ɛsɛ sɛ adɔe ne nokware tra w’adwene mu a wo werɛ mfi bo a ɛsom no. Nanso ɔkwan bɛn na wubetumi afa so ada su horow yi adi?
7. Ɔkwan bɛn so na wobetumi ayi adɔe adi na ama nkitahodi anya nkɔso?
7 Sɛnea tete Hebrifo asɛmfua ma “adɔe” ntease kyerɛ no, ɛkyerɛ “nokware dɔ” na ɛfa obi ho a ɔde ma koraa wɔ abusuabɔ bi mu ho. Enti so wudi w’awofo nokware na woka wo nkate ho asɛm kyerɛ wɔn? Wɔde adɔe bata mmɔborohunu ne ayamhyehye ho wɔ Sakaria 7:9, 10. So wowɔ ayamhyehye wɔ nsɛnnennen ahorow a w’awofo hyia no ho? Nnipa binom adɔe “te sɛ anɔpa mununkum, na ɛte sɛ obosu a ɛpɛ ntɛm akɔ.” (Hosea 6:4) So w’adɔe sa wɔ akyinnyegye a emu yɛ den mu anaasɛ bere a wunnya nea wopɛ? Sɛ wo bo fuw a, so woma ‘adɔe kyerɛ tra wo tɛkrɛma so’? Nokwaredi ne ayamhyehye ho hia wɔ nkitahodi mu.—Mmebusɛm 31:26.
8. Ɔkwan bɛn so na abofra betumi adi nokware?
8 ‘Nokwaredi’ de ayɔnkofa ba, efisɛ ahotoso ho hia wɔ abusuabɔ a emu yɛ den biara mu. Ɛnyɛ wo ho te sɛ “nnipa huhuw” a wɔde nnipa ko ankasa a wɔyɛ sumae no. (Dwom 26:4) Ebia eyi bɛma woanya asetra gyinapɛn ahorow abien—biako yɛ bere a wowɔ w’awofo a wɔyɛ Kristofo nkyɛn na biako nso yɛ bere a wunni wɔn nkyɛn. Eyi betumi de asiane aba, ne titiriw no, bere a wuhyia asɛnnennen bi a ɛnyɛ nea woasiesie wo ho yiye a ɛbɛma w’ankasa atumi adi ho dwuma no. Susuw wo mu ahotoso a wɔrennya bere a atoro bi a woadi ada adi no nso ho. Kristoni kumaa bi kae sɛ: “M’awofo nim pii sen sɛnea misusuw no. Sɛ mebɔ mmɔden sɛ mede biribi besuma wɔn a na meredaadaa me ho ne Yehowa.” Yiw, bɔ mmɔden sɛ wubenya nokwaredi su wɔ wo mu. Nanso so nokware a wubedi no fa ano ne nneyɛe ‘kɔntɔnkye’ a wubeyi afi wo ho nkutoo ho?—Mmebusɛm 4:20, 24; 10:9.
‘Kasa Tẽẽ Fi Wo Koma Mu’
9. Ɔhaw bɛn na mmofra baanu bi dii so, na dɛn na efii mu bae?
9 Mmofra binom nka nokware wɔ sɛnea wɔte nka wɔ wɔn awofonom ho no mu. Sɛ nhwɛso no, mmofra a yɛkaa wɔn ho asɛm wɔ nkyekyem 2 no mu biako gye toom sɛ: “Sɛ́ nea ɛde asomdwoe bɛba no, yefii ase kaa nea na yenim sɛ yɛn awofo pɛ sɛ wɔte, nanso yɛanka yɛn nkate ankasa ho asɛm.” Saa mmofra yi hwehwɛɛ mmoa. Ɔpanyin bi ka kyerɛɛ wɔn sɛ wɔnkɔ wɔn awofonom nkyɛn na wonsuasua aberante Elihu a ɔno na ɔkaa eyi no: “Mekasa tẽẽ fi me koma mu.” (Hiob 33:3, Beck) Bere a wɔabɔ mpae kɛse akyi no, wɔde wɔn koma maa wɔn awofo na wɔkaa nea ɛhaw wɔn no ho asɛm (Fa toto Mmebusɛm 12:18 ho.) Ɛwom sɛ agya no ho dwiriw no sɛ ohui sɛ ne mma no te nka saa de, nanso ogye toom wɔ wɔn anim sɛ wayɛ ade ama atra so. N’ani gyei sɛ wɔne no kasae. Ne babea no de baa awiei sɛ: “Nkakrankakra yɛn abusua no reyɛ yiye. Bere a yɛne wɔn fii ase dii nkitaho no, afei yɛahu nea enti a wɔhyɛɛ mmara ahorow no. Wɔnkasa nkyerɛ yɛn te sɛ nkokoaa bio. Yefii ase tee yɛn ho yɛn ho ase yiye.”
10, 11. (a) Sɛnea Mmebusɛm 27:19 kyerɛ no, dɛn na ebetumi ama Kristofo abusua mu ayɛ anigye kɛse? (b) Ɔkwan bɛn so na mmofra betumi de kyerɛwsɛm yi adi dwuma?
10 W’awofo a wo ne wɔn bɛkasa de nkitahodi a efi koma mu ba. Sɛ wotɔ wo bo ase de obu kasa a, w’awofo betumi ahu nea ɛwɔ wo koma mu. (Mmebusɛm 29:11) Wo nso wubehu su horow bi wɔ wɔn koma mu. Nkɔmmɔbɔ a osuro nnim na ɛyɛ nea tema wom yi boa wo ma wuhu w’ankasa koma yiye. Mmebusɛm 27:19 se: “Sɛ nsu mu anim kyerɛ anim no, saa ara na onipa koma kyerɛ onipa koma.”a Sɛnea wuhu w’anim wɔ nsu a ɛtaa hɔ dinn mu no, saa ara na ɛdenam nkitahodi a efi komam a wo ne w’awofo benya so no, wubetumi ahu sɛ wɔn nkate ahorow nyɛ soronko ahe biara wɔ wo de ho. Adwenkyerɛ yi de ntease ankasa ba na ɛma mususuw mo ho mo ho ho, na eyi ho hia wɔ abusua a anigye wom mu.
11 Enti nya ɔpɛ sɛ wobɛka nsɛm a ɛyɛ wo yaw mpo ho asɛm akyerɛ w’awofo. Ka nea wusuro ne wo nkogudi, ne afei w’anigye ne wo yiyedi ho asɛm kyerɛ wɔn. Ka wo botae wɔ asetra mu ne nea wobɔ ho mpae ho asɛm. Mmɔ mmɔden sɛ ‘wobɛtew wo ho.’ (Mmebusɛm 18:1) Bɔ mmɔden bere nyinaa sɛ wubenya bere bi ama w’awofo no mu biako sɛnea ɛbɛyɛ a mubenya ayɔnkofa a ɛte sɛɛ. Mmofra binom ahu sɛ wobetumi ayɛ eyi bere a wɔne wɔn awofo fi ofie biako mu rekɔ foforo mu wɔ asɛnka mu, bere a wɔretu mpase, anaasɛ bere a busua no regye wɔn ani no.
12. Nokwasɛm ahorow bɛn na ɛsɛ sɛ mmofra gya tom?
12 Ɛwom sɛ nneɛma pa befi mmɔden a mobɔ sɛ mubenya nkitahodi pa no mu aba mpɛn pii de, nanso wo anaa w’awofo nyɛ pɛ. Ebia ɛtɔ bere bi a awofo bɛyɛ ade wɔ ɔkwan a ɛnteɛ so, wɔremfa ntease nni dwuma wɔ afoforo nkate ho, anaasɛ ebia wɔrenyɛ nhwɛso pa. Ebia na wɔnnyɛ gyidifo a wɔne wo bedi sɛnea Bible nnyinasosɛm kyerɛ bere nyinaa. Ebia mo mu binom ne ɔwofo biako pɛ na ɛte anaasɛ moyɛ mmanoma, a emu biara wɔ ne haw. Ɛmfa ho sɛnea wobɛn w’awofo no, ɛtɔ bere bi a wobɛte nka wɔ w’adwene mu sɛ woyɛ ankonam. Ɔkwan bɛn so na wubetumi agyina eyi ano wɔ nokwaredi mu?
Sua Sɛ ‘Wobɛsoa Kɔndua Mmerantebere Mu’
13. Dɛn nti na ɛte sɛ nea Yeremia asɛm a ɛwɔ Kwadwom 3:27 no yɛ nwonwa?
13 Bere a Yehowa de adwuma hyɛɛ odiyifo Yeremia nsa no, ɔkae sɛ: “Minnim kasa, na meyɛ abofra”! Nanso Yehowa maa no awerɛhyem na ɔhyɛɛ no den nso. Esiane amanehunu, ehu ne abasamtu nka a ɔtee ni, na ɛtɔ bere bi a ɛyɛ no sɛ onnyae, na ɛma ɔkae bere bi sɛ: “Nnome ne da a wɔwoo me wɔ mu no.” (Yeremia 1:6, 19; 20:7-9, 11, 14) Akyiri yi, ɔkyerɛwee sɛ: “Eye ma ɔbarima sɛ ɔsoa ne kɔndua ne mmerantebere mu.” (Kwadwom 3:27) Nanso ɔkwan bɛn so na wobetumi abu amanehunu kɔndua a wɔsoa sɛ ɛho wɔ mfaso? Yosef nhwɛso no si eyi so dua yiye.
14, 15. (a) Sɛ́ abofra no, osuahu bɛn na Yosef nyae? (b Ɔkwan bɛn so na ‘[Yehowa] asɛm sɔɔ no hwɛe?
14 Bere a na Yosef adi mfe 17 no, otwaa ɔsoro bɔhyɛ bi wɔ ɔdae mu a ɛkyerɛ sɛ obenya dibea kɛse. Nanso, hwɛ, ne nuanom a wɔtan no tɔn no kɔɔ nkoafi mu! Wɔde no kɔɔ Misraim na akyiri yi esiane atoro a wodi too no so sɛ ɔpɛ sɛ ɔto obi mmonnaa nti woguu no mpokyerɛ wɔ afiase. (Genesis 37:2, 4-11, 28; 39:20) Wɔde abofra a ɔyɛ nhwɛso pa na ɔyɛ anuonyam bɔhyɛ ɔdedifo yi kɔtoo afiase tokuru a ɛyɛ awerɛhow mu. Sɛ́ ɔhɔho wɔ ananafo asase so no, na onni adamfo a obehu no mmɔbɔ anaasɛ ɔbɛka bi ama no.
15 “Wɔde mpokyerɛ miaa [Yosef] nan, de no too dade nkɔnsɔnkɔnsɔn mu, kosii bere a n’asɛm baa mu, [Yehowa] asɛm sɔɔ no hwɛe.” (Dwom 105:17-19) Wɔ mfe 13 mu no, Yosef huu amane sɛ akoa ne ɔdeduani kosii sɛ Yehowa bɔhyɛ no baa mu. Wɔnam eyi so sɔɔ no hwɛe. Ɛwom sɛ ɛnyɛ Yehowa na ɔmaa ɔhaw ahorow no bae de, nanso ɔmaa ho kwan esiane atirimpɔw bi nti. So Yosef bɛkɔ so anya anidaso wɔ “[Yehowa] asɛm” mu a tebea a emu yɛ den a ɔwom no mfa ho? So ɔbɛma ne su pa ahorow no ayɛ nea edi mũ na wanya boasetɔ, ahobrɛase, honhom mu ahoɔden, ne akokoduru a ehia a ɔde bedi nsɛnnennen ho dwuma? Wiɛ, Yosef bɛyɛɛ te sɛ sika a wɔasɔn so wɔ ɔnanfo gya mu—ne ho tewee a ɔsom bo kɛse ma Onyankopɔn, na ɔde no dii dwuma wɔ ɔkwan a ɛyɛ nwonwa so akyiri yi.—Genesis 41:14, 38-41, 46; 42:6, 9.
16. Ɛsɛ sɛ abofra bu amanehunu dɛn?
16 Yosef ne Yeremia nyinaa huu amane a emfi wɔn. Ná wɔanya su pa ahorow dedaw. Nanso wɔmaa wɔn ho tewee kɛse bere a wogyinaa amanehunu ahorow ano no. Hwɛ hia ara a ntewho a ɛte sɛɛ ho hia mmofra a wɔayɛ mfomso! Nteɛso a ebia ɛyɛ den sɛ wobegye atom yɛ nea sɛ wɔde tete wo a, ebetumi de trenee aba. (Hebrifo 12:5-7, 11) Ntetee yi betumi ama woayɛ den te sɛ dade a wɔasɔ ahwɛ wɔ ogya mu. Sɛnea “[Yehowa] dii Yosef akyi, na ɔdom no” no, saa ara na ɔbɛma wo ahoɔden a ɛboro so na watua wo boasetɔ no so ka kɛse.—Genesis 39:21; 2 Korintofo 4:7.
17. Tumi bɛn na amanehunu nyae wɔ abeawa bi so? Dɛn na wusua fi eyi mu?
17 Sɛ nhwɛso no, abeawa bi a na ɛte sɛ nea ne na kunu yɛ katee wɔ no so na onhu sɛnea ɔte nka wɔ n’agya a ɔdɔ no wu ho no pɛe sɛ oguan fi fie. Bere a ohui sɛ eyi de ɔhaw ahorow pii bɛba no, ɔtraa hɔ—na ogyinaa mu. Afei, wɔ bɛyɛ mfe 13 akyi no, ose: “Me na kunu nteɛso ma mebɛyɛɛ onipa pa. Bere a na me ne me na nkutoo te no, mebɛyɛɛ obi a wasɛe ne otuatewfo. Ná mepɛ sɛ meyɛ nea mepɛ bere nyinaa. Masua sɛ mesusuw afoforo ho. Yehowa tiee mpae pii a mebɔe sɛ ɔnhyɛ me den na minnyina m’agya wu no ano na mintumi mmɛn me na kunu no nso.” Yiw, sua a wubesua sɛ wubegyina nsɛnnennen ano no bɛtwe wo abɛn Yehowa kɛse. Ɛno bɛma wayɛ w’Adamfo, ‘nea wufi wo mmofraase de wo ho too no so.’—Dwom 71:5.
18. (a) Dɛn na ɛkyerɛ sɛnea abofra bi asetra bɛyɛ? (b) Dɛn nti na ɛsɛ sɛ mmofra bu wɔn awofonom sɛ wɔsom bo?
18 Mma wo werɛ mfi sɛ wo fie tebea nkutoo remma wunhu bo a wosom anaasɛ sɛnea w’asetra bɛyɛ. Mmom no, “abofra po, wɔde ne nneyɛe na ehu no, sɛ n’adeyɛ bɛyɛ yiye na ateɛ.” (Mmebusɛm 20:11) Nneɛma a ɛteɛ a wobɛyɛ no bɛma Onyankopɔn ani agye wo ho na ama w’asetra ayɛ nea atirimpɔw wom a ɛsom bo. Abusua biara nni hɔ a ɛyɛ pɛ, nanso hwɛ su pa ahorow a wuhu wɔ fie no. Susuw mmɔden ahorow a w’awofo abɔ de ama wo aduan, ntama, dabere, ayaresa, ne nea ɛtete saa no ho. Sɛ́ wode bonniayɛ betua wɔn so ka no, “di w’agya ne wo na ni” mmom. Ma ɛnyɛ nea wɔsom bo kɛse ma wo.—Efesofo 6:1-3; Mmebusɛm 16:20; 17:13.
19. Mfaso ahorow bɛn na efi obi koma mu a ofi tie n’awofo no mu ba?
19 Nkitahodi a ntease wom a wo ne w’awofo benya bɛma ɔdɔ a wowɔ ma wɔn no ayɛ kɛse. Ɛno bɛma woafi koma mu ayɛ osetie. “Me ba, mma wo werɛ mmfi me mmara, na ma wo koma nni me mmara nsɛm so,” saa na agya onyansafo no ka, na afei ɔkyerɛ emu mfaso ahorow sɛ, “efisɛ onyinkyɛ ne nkwa mfe ne asomdwoe na ɛde bɛka wo ho.”—Mmebusɛm 3:1, 2.
[Ase hɔ asɛm]
a Ɔkyerɛwfo A. Cohen ka wɔ nkyekyem yi ho sɛ: “Wɔ yɛn adamfo koma mu na ehu sɛ yɛn ankasa suban da adi. Ɛyɛ adamfofa mu nkitahodi a obiara tumi ka n’adwene a tema nso wom mu na yehu yɛn ho yɛn ho yiye ankasa, na ɛma yehu nea ɛwɔ yɛn mu.” (Proverbs, The Soncino Press) W. F. Beck ka wɔ fã bi sɛ: “Enti wutumi hu wo ho wɔ ɔbarima foforo koma mu.”
So Wokae?
◻ Dɛn na ebetumi ama ayɛ nea awofo ne mma ntimu nni nkitaho?
◻ Ɔkwan bɛn so na abofra betumi ayi adɔe adi?
◻ Akwan horow bɛn so na nokwaredi betumi ama abusua mu nkitahodi anya nkɔso?
◻ Dɛn na amanehunu a abofra begyina mu no betumi ayɛ ama no?
[Mfonini wɔ kratafa 18]
Sɛnɛa amanehunu a Yosef faa mu no sɔɔ ne nipasu hwɛe no, saa ara na amanehunu ano a abofra begyina no bɛyɛ ama no