Mfomso Bɛn na Ɛwɔ Sika ho Dɔ Mu?

NÁ PAUL ne Mary wɔ aguadidan a wɔtɔn nneɛma wom wɔ Afrika ahiafo atrae bi.a Adwumaden a wɔyɛe anadwo ne awia nti, wonyaa sika bebree. Bere bi akyi no, na Mary atumi asi ofie foforo kɛse bi a adan mu nneɛma a ɛyɛ fɛ na ne bo yɛ den wom. Paul de, otumi tɔɔ kar a ne bo yɛ den a ɔtra mu kyinkyin.

Da koro bi kuw bi a wɔsɔre tia aban no baa Paul nkyɛn. Wɔkae sɛ: “Yɛpɛ sɛ mo adwuma no yi ntoboa[$100] ɔsram biara de boa nea yɛyɛ no.” Esiane sɛ na Paul ne Mary mpɛ sɛ wɔkɔ obiara afã wɔ amammui ntawntawdi no mu nti, wɔde akokoduru pow. Esiane afã biara a wonni gyinabea no nti, kuw no susuwii sɛ aban no boa wɔn wɔ sika fam. Dapɛn bi awiei, bere a na Paulo ne Mary atu kwan no, wɔfow wɔn aguadidan no mu nneɛma, na wɔde ogya too wɔn kar ne wɔn fie fɛfɛ no mu.

Nokwarem no, ɛyɛ awerɛhosɛm, nanso so yebetumi asua biribi afi mu? Ebia asiane ntoo nnipa a wɔayɛ adwumaden ma wɔabɛyɛ adefo no mu pii a ama wɔahwete wɔn ahode, nanso daakye nso ɛ? Dɛn nti na Bible no ka sɛ “wɔn a wɔpɛ wɔn ho anya no hwe sɔhwɛ ne afiri ne nkwasea akɔnnɔ a enye mma nnipa na ɛtwe wɔn kogu ɔsɛe ne ɔyera mu mu”?​—1 Timoteo 6:9.

Sika ho Adwene a Ɛkari Pɛ

Sɛnea Bible no kyerɛ no, ɛsɛ sɛ nokware Kristoni de n’abusuafo a ɔhwɛ wɔn no honam fam ahiade ma wɔn. Ɛtɔ mmere bi a, nsɛm tebea horow te sɛ adwuma a wonnya nyɛ anaa nyarewa betumi ama eyi ayɛ den. Nea ɛne eyi bɔ abira no, Kristoni a ɔhyɛ da pow sɛ ɔbɛhwɛ n’abusua no ‘apa gyidi, na ɔyɛ onipa bɔne sen nea onnye nni.’​—1 Timoteo 5:8.

Wɔ nkuraa bi ase no, nnipa no de kuayɛ na ɛhwɛ wɔn ho denam wɔn ankasa nnuan a wodua ne mmoa a wɔyɛn wɔn no so. Ebinom mfa sika nni dwuma kɛse, na wonya wɔn asetrade denam nnɔbae ne ade a wɔsesa so. Nanso, ɔkwan a akɔnhamabɔfo taa fa so hwɛ wɔn mmusua ne sɛ wɔbɛyɛ adwuma bi ma wɔatua wɔn ka. Wɔde sika a wonya no tɔ nnuan ne nneama afoforo a ɛboa ma wɔn abusua no di yiye. Bio nso, sika a wɔkora so nyansam no betumi ama wɔanya ahobammɔ bi wɔ ahokyere anaa asiane mmere mu. Sɛ nhwɛso no, obi betumi de atua ayaresa ho ka anaa ɔde asiesie nneɛma a ɛho hia wɔ ne fie. Enti na Bible no ka nokwarem sɛ ‘sika yɛ ahobammɔ’ na ‘ɛyɛ nneɛma nyinaa.’​—Ɔsɛnkafo 7:12; 10:19.

Esiane sɛ sika yɛ nneɛma pii nti, asiane wom sɛ yebetumi anya ne tumi ho adwene a ɛnteɛ. Ehia sɛ Kristoni hu nneɛma a etumi yɛ, sɛ wɔde toto nneɛma afoforo a ɛho hia sen ɛno ho a. Sɛ nhwɛso no, Bible no de sika so mfaso toto Onyankopɔn nyansa ho sɛ: “Nyansa wɔ hɔ ma ahobammɔ sɛnea sika nso wɔ hɔ ma ahobammɔ no; nanso mfaso a ɛwɔ nimdeɛ so ne sɛ nyansa ankasa kora ne wuranom nkwa so.” (Ɔsɛnkafo 7:12, New World Translation) Ɔkwan bɛn so na Onyankopɔn nyansa so wɔ mfaso sen sika?

Tete Asuade Bi

Nsɛm a esisii wɔ Yerusalem wɔ afe 66 Y.B. mu no kyerɛkyerɛ mfaso a ɛwɔ Onyankopɔn nyansa so sen sika no mu. Bere a Yudafo no pam Romafo asraafo a wɔbɛtoaa wɔn no akyi no, ebia wɔn a wɔte Yerusalem no gye dii sɛ aguadi betumi akɔ so yiye saa bere no. Nokwarem no, wofii ase twaa wɔn ankasa sika de hyɛɛ ahofadi foforo a wɔanya no ho fã. Wɔde Hebri kasa kyerɛwee nsɛm te sɛ “De ma Sion ahofadi,” ne “Yerusalem Kronkron” guu sika no so. Afe foforo biara, wotwa sika foforo a nsɛm a ɛma wohu sɛ ɛyɛ “afe a ɛto so abien,” “afe a ɛto so abiɛsa,” ne “afe a ɛto so anan” wɔ so. Wɔn a wotutu fam de hwehwɛ tetefo nneɛma atutu sika soronko kakraa bi mpo a wɔakyerɛw so sɛ “afe a ɛto so anum” a ɛkyerɛ afe 70 Y.B afi fam. So Yudafo Kristofo no buu Yudafo sika foforo no sɛ ahofadi a ɛtra hɔ daa ho sɛnkyerɛnne a ɛfata?

Dabi. Efisɛ wɔmaa wɔn wura no nsɛm a nyansa wom no traa wɔn adwenem. Ná Yesu aka tow a Romafo bɛba abɛtow ahyɛ wɔn so a esii wɔ 66 Y.B. mu ho asɛm asie. Ná ɔde afotu ama n’akyidifo sɛ, sɛ ɛba saa a, ɛsɛ sɛ ‘wofi Yerusalem kɔ.’ (Luka 21:20-22) Abakɔsɛm di adanse sɛ Yudafo Kristofo no yɛɛ saa pɛpɛɛpɛ. Ɛda adi sɛ na wɔwɔ ɔpɛ sɛ wɔbɛhwere wɔn agyapade, ahonyade, ne aguadi mu hokwan ahorow esiane fi a wobefi Yerusalem akɔ no nti. Mfe anan akyi no, Romafo asraafo no san bae, na wɔkaa kurow no hyɛe.

Sɛnea obi a ɔde n’aniwa hui, abakɔsɛm kyerɛwfo Josephus, kyerɛ no, “ná sika kɔkɔɔ bebree wɔ kurow no mu.” Nanso, sika pii no antumi ansiw ɔkɔm a ɛbaa Yerusalem a ‘emu kɔɔ so yɛɛ den,’ “na ekunkum mmusua mufo nyinaa” no ano. Kurow no mufo binom memenee sika pa a ɛyɛ sika kɔkɔɔ, na wɔbɔɔ mmɔden sɛ wobeguan afi kurow no mu. Nanso wɔn atamfo kunkum wɔn, na wɔpaapaee wɔn yafunu mu sɛnea ɛbɛyɛ na wɔayiyi sika no. Josephus kyerɛkyerɛ mu sɛ: “Na asiane wom ma adefo no sɛ wɔbɛtra Kurow no mu anaa wobefi mu; efisɛ sika nti wokunkum nnipa pii kae sɛ na wɔreguan afi kurow no mu.”

Wofii nkahyem no ase no, asram asia annu na wɔsɛee Yerusalem, na ɔkɔm, ɔyaredɔm ne afoa kunkum kurow no mufo ɔpepem biako ne akyi. Sika ho dɔ furaa nnipa pii ani, na ɛde wɔn kɔɔ ɔsɛe mu, bere a nsɛm a nyansa wom a Yudafo Kristofo no de dii dwuma no ma wotumi guan no.

Ɛnyɛ eyi nkutoo ne abakɔsɛm mu asɛm a sika dii nnipa huammɔ wom wɔ ɔhaw bere mu. Hwɛ sɛnea sika ho dɔ betumi ayɛ owura tirimɔdenfo! (Mateo 6:24) Afei nso, ebetumi ama woahwere anigye a wowɔ mpremprem no nso.

Anigyede Ahorow a Sika Ntumi Ntɔ

Ɔdefo a obi pɛ sɛ ɔyɛ ho adwennwen ntumi mma onhu anigyede ahorow pii a enhia sika pii no. Sɛ nhwɛso no, susuw abusua ntam abusuabɔ a anigye wom, nokware nnamfo, abɔde a ɛyɛ nwonwa, owiapue a ɛyɛ fɛ, ahum a ɛkanyan anigye, ɔsoro a nsoromma ayɛ hɔ ma, mmoa a wɔn ho yɛ anika, anaa kwae a wɔnsɛee no mu nhwiren ne nnua no ho.

Nokwarem no, adefo binom wɔ mmere pii a wɔde benya atifi hɔ anigyede ahorow no mu anigye, nanso wɔn mu fã kɛse no ara rebɔ mmɔden sɛ wɔbɛkora wɔn ahode so anaa wɔbɛma adɔɔso a wonni adagyew koraa. Ɛte sɛ nea ebia ɛyɛ nwonwa de, nanso wɔn a wɔwɔ bere mpo no ntaa nnya anigye. Eyi yɛ nnɛyi nhwehwɛmufo nwonwa. Thomas Wiseman bisa wɔ ne nhoma The Money Motive​—A Study of an Obsession no mu sɛ: “Yɛbɛkyerɛkyerɛ nokwasɛm a ɛyɛ sɛ sɛ wonya biribi a nnipa pii pɛ kɛse, na wogye di sɛ ɛyɛ biribiara ano aduru no bi a, nea efi mu ba no gu ahorow, fi awerɛhosɛm kosi huammɔdi so mu dɛn?”

Ade biako a entumi mma ɔdefo nnya anigye ne yɛ a ɛyɛ den ma no sɛ obehu wɔn a wɔyɛ ne nnamfo ankasa no. Ɔdefo Ɔhene Salomo hui sɛ “nnepa redɔɔso no, na adifo nso redɔɔso.” (Ɔsɛnkafo 5:11) Adefo pii haw nso bere a wɔrebɔ mmɔden sɛ wobɛkora wɔn ahode so anaa wɔbɛma bo a ɛsom no akɔ soro no. Eyi ntaa mma wɔn nna nyɛ wɔn dɛ. Bible no kyerɛkyerɛ mu sɛ: “Odwumayɛfo didi kakraa oo, pii oo, ne nna yɛ no dɛ, na ɔmee a ɔdefo mmee no mma onnya adaye.”​—Ɔsɛnkafo 5:12.

Sika ho dɔ betumi asɛe abusuafo ne nnamfo ntam abusuabɔ, efisɛ ebetumi asɔ obi ahwɛ ma wadi amim ne nsɛmmɔne. Wɔn a wɔdɔ sika no taa tow kyakya. Awerɛhosɛm ne sɛ pɛ a wɔpɛ sɛ wɔto kyakya biako pɛ na wogyae no ama nnipa pii de ka. Adwene ho ɔbenfo bi a ofi South Africa kae sɛ: “Ebedu bere a [nnipa a wɔpɛ kyakyatow] no bɛba me nkyɛn no, na wɔatow adu baabi a wontumi nnyae, ma wɔn nnwuma, wɔn aguadi, wɔn afie, ne wɔn mmusua afi wɔn nsa mpɛn pii.” Hwɛ sɛnea Bible kɔkɔbɔ no yɛ nokware: “Onipa nokwafo nhyira bɛdɔɔso, na nea ɔpɛ ntɛm anya ne ho renyɛ tɔtorɔtɔɔ.”​—Mmebusɛm 28:20.

‘Efuw Ntaban Tu’

Ade foforo nti a asiane kɛse wɔ sika ho dɔ mu ne sɛ nnipa nniso horow ntumi nyɛ biako nkosi ase anaasɛ wontumi nhwɛ mma sika bo nnyina faako wɔ aman horow so; na wontumi nsiw aguadi a ɛkɔ fam, ne sikasɛm a ɛyɛ basaa ano nso. Amimdi, korɔnbɔ ne nneɛma bo a ɛkɔ soro nso si nsɛm a wɔnam honhom so kyerɛwee yi mu nokwasɛm no so dua: “Mmiri wo mogya ani mpɛ ahonyade, gyae wo nhumu yi akyidi. So wobɛma w’ani adi nea enni hɔ akyi? Na ahonyade fuw ntaban tu sɛ ɔkɔre a otu kɔ ɔsoro.”​—Mmebusɛm 23:4, 5.

Nneɛma bo kɔ soro bere a bo a sika som kɔ fam. Nokwarem no, saa ɔhaw no nni aman a ahia wɔn no nkutoo mu. Afeha yi mfiase no, nneɛma bo kɔɔ soro ntɛmntɛm wɔ Europa mfinimfini mfiridwuma aman no mu. Sɛ nhwɛso no, ansa na Wiase Ko I reba no, na Germanfo sika mark ne Britaniafo siren, Fransefo franc ne Italiafo lira bo yɛ pɛ. Mfe du akyi no, na siren, franc ne lira no yɛ mark 1,000,000,000,000. Tumi bɛn na nneɛma bo a ɛkɔ soro no nya wɔ aman a wɔwɔ sika no mufo so? Adam Fergusson ka wɔ ne nhoma When Money Dies no mu sɛ: “Sɛ nea ɛtoo German ne Austria-Hungaria Ahemman a edii nkogu no wɔ 1920 mfe no mfiase no mu no yɛ nea yebegyina so aka biribi de a, ɛnde [sikasɛm a ɛsɛe] de adifudepɛ, basabasayɛ, awerɛhow, nitan, a emu fã kɛse no ara fi ehu ba, kyerɛ sɛ ɛbɛsɛe ɔman biara na asakra no.”

Nsakrae a Germany yɛe wɔ ne sikasɛm mu san maa bo a ɛsom no kɔɔ soro wɔ 1923 mu, na kan mark 1,000,000,000,000 bɛyɛɛ mark foforo no biako mpofirim. Adeyɛ yi maa nneɛma bo a ɛkɔɔ soro no gyaee, nanso ɛde ɔhaw afoforo bae. Fergusson kyerɛkyerɛ mu sɛ: “Sika a wɔsan ma ɛsom bo, a ɛmaa nnipa mpempem pii bɔɔ ka, ɛmaa ɔpepem pii nnwuma fii wɔn nsa, na ɛsɛee nnipa afoforo Ɔpepem pii anidaso no de amanehunu kɛse baa wiase no so wɔ ɔkwan a ɛnyɛ tee so.” Ɛte sɛnea “amanehunu kɛse” a na ɛwɔ nhoma kyerɛwfo no adwenem ne Nasi nniso a ɛbae ne Wiase Ko II.

Ɛsɛ sɛ huammɔ a sika akɛse a wɔde to sikakorabea dii nnipa pii wɔ bere a atwam no mu no yɛ kɔkɔbɔ a anibere wom wɔ wiase nyinaa a wonhu sɛnea sikasɛm bɛyɛ wɔ mu no mmere yi mu. Onyankopɔn Ba no ankasa bɔɔ kɔkɔ sɛ sika bedi nkurɔfo huammɔ, na ɛda adi sɛ ayɛ saa mpɛn pii. (Luka 16:9)

Nanso huammɔ a sika bedi nnipa asen biara ne wɔ mmeae pii a ɛsen biara no bɛba bere a Yehowa Nyankopɔn de atemmu ba saa wiase bɔne yi so no. “Adedodow nye mma hwee abufuw da, na trenee gye onipa fi owu mu.”​—Mmebusɛm 11:4.

Enti, hwɛ sɛnea ehia sɛ yɛn mu biara bɔ mmɔden sɛ obekura trenee gyinabea mu wɔ yɛn nokware Nnamfo, Yehowa Nyankopɔn ne Yesu Kristo, anim!

Anigye a Ɛtra Hɔ Daa Fibea

Ná Paul ne Mary a wɔkaa wɔn ho asɛm mfiase no yɛ Yehowa Adansefo. Wode mfe pii yɛɛ bere nyinaa asɛnka adwuma no bi. Nanso, wɔn ho a na wɔpɛ sɛ wonya no ma wogyaee Kristofo asafo nhyiamkɔ ne wɔn gyidi ho asɛm a na wɔka wɔ baguam ɔsom adwuma no mu no. Nanso, wonyan wɔ honhom fam. Bere a wowiaa ne nneɛma na wɔsɛee ne fie akyi no, Mary kae sɛ: “Afei matumi ahu sɛnea nyansa nnim sɛ mede me bere ne m’ahoɔden nyinaa bɛyɛ biribi a ebetumi atu ayera wɔ simma kakraa bi mu.” Anigyesɛm ne sɛ awarefo yi suaa biribi ansa na aka akyi dodo. Yiw, ɔhaw a ɛsen biara a sika ho dɔ betumi ama obi ahyia ne sɛ ɛbɛma wahwere ɔne Yehowa Nyankopɔn ne Yesu Kristo ntam abusuabɔ pa. Sɛ yenni saa Nnamfo yi a, anidaso bɛn na yebetumi anya sɛ yebetwa wiase bɔne yi awiei akɔ wiase foforo a trenee te mu a wɔahyɛ ho bɔ no mu?​—Mateo 6:19-21, 31-34; 2 Petro 3:13.

Enti sɛ ebia wubu wo ho sɛ woyɛ ɔdefo anaa ohiani, hwɛ yiye na woannya sika ho dɔ. Yere wo ho sɛ wubenya ademude a ɛsen biara na woakora so​—Yehowa Nyankopɔn anim dom. Wubetumi ayɛ eyi denam nsato a egye ntɛmpɛ yi a wubedwen ho bere nyinaa no so: “Na honhom no ne ayeforo no se: Bra! Na nea otie no nka sɛ: Bra! Na nea osukɔm de no mmra, na nea ɔpɛ no mmegye nkwa nsu no kwa.”​—Adiyisɛm 22:17.

[Ase hɔ asɛm]

[Mfonini wɔ kratafa 8, 9]

Sika a wotwae wɔ Yudafo atuatew no mu a wɔakyerɛw “afe a ɛto so abien” wɔ so afã abien nyinaa

[Mfonini Fibea]

Pictorial Archive (Near Eastern History) Est.