Abusua Adesua a Ɛde Anigye Ba

Bible ka sɛ: “Wɔnam nimdeɛ so de ahode aboɔdenne afɛfɛde nyinaa hyɛ mpia mama.” (Mmebusɛm 24:4) Saa ahode aboɔdenne yi nyɛ honam fam akorade kɛkɛ, na mmom nokware dɔ, Nyankopɔn suro, ne gyidi a emu yɛ den ka ho. Nokwarem no, su a ɛtete saa no ma abusua asetra yɛ anigye paa. (Mmebusɛm 15:16, 17; 1 Petro 1:7) Nanso, nea ɛbɛyɛ na yɛn nsa aka no, ehia sɛ yɛde Onyankopɔn ho nimdeɛ ba yɛn afie mu.

ƐYƐ abusua ti no asɛyɛde sɛ ɔde saa nimdeɛ yi dua abusua no mufo mu. (Deuteronomium 6:6, 7; Efesofo 5:25, 26; 6:4) Akwan a ɛkyɛn so a wɔnam so yɛ eyi no biako ne abusua adesua a wɔyɛ no daa. Hwɛ sɛnea eyi betumi ama wɔn a wɔka ho no ani agye bere a wɔyɛ adesua no wɔ ɔkwan a ɛma nimdeɛ na ɛyɛ anika nso so no! Ɛnde momma yensusuw nneɛma bi a ɛho hia wɔ abusua adesua a etu mpɔn a wɔbɛyɛ mu no ho.a

Abusua adesua a etu mpɔn kɛse ne nea wɔntotom. Sɛ nhyehyɛe biara nna ho, anaasɛ bere biara a ebesi wɔn tirim na wɔyɛ a, sɛ wɔbɛyɛ koraa a, ebia ɛntaa nkɔ so. Enti ɛsɛ sɛ ‘motɔ bere’ ma adesua no. (Efesofo 5:15-17) Ɛnna fam sɛ mubenya bere a eye ma obiara ayɛ no daa. Abusua ti bi kae sɛ: “Ná ɛyɛ den ma yɛn sɛ yɛbɛyɛ yɛn abusua adesua no daa. Yɛsɔɔ mmere ahorow hwɛe araa kosii sɛ akyiri yi koraa yenyaa bere bi anwummere de hyɛe a na eye ma yɛn. Seesei yɛn abusua adesua no kɔ so daa.”

Sɛ munya bere pa bi de hyɛ a, monhwɛ na nneɛma bi ammɛsɛe adesua no. Mariab a wadi mfe 33 seesei no ka sɛ: “Sɛ ahɔho ba bere a yɛreyɛ adesua no a, Paapa ma wɔtra ase twɛn kosi sɛ yebewie adesua no. Na sɛ obi frɛ wɔ telefon so a, nea ɔka kyerɛ onii no ara ne sɛ ɔno nso bɛfrɛ akyiri yi.”

Nanso, eyi nkyerɛ sɛ muntumi nyɛ fakaa. Tebea a egye ntɛmpɛ anaa nneɛma a wɔnhwɛ kwan betumi asɔre, na bere ne bere mu no ɛho betumi abehia sɛ adesua no remma so anaa ɛsɛ sɛ mutu hyɛ da. (Ɔsɛnkafo 9:11) Nanso monhwɛ yiye na saa nneɛma yi biara ansɛe mo nhyehyɛe no.—Filipifo 3:16.

Bere tenten bɛn na ɛsɛ sɛ adesua no di? Robert a watumi atete ɔbabea ne ɔbabarima no ka sɛ: “Ná yɛn adesua no taa di dɔnhwerew biako. Bere a na mmofra no susua no, yɛbɔɔ mmɔden sɛ yɛbɛma wɔn anigye no atra hɔ wɔ dɔnhwerew biako no mu denam nneɛma a egu ahorow, te sɛ Ɔwɛn-Aban adesua asɛm no mu nkyekyem kakraa bi, Bible mu nsɛm bi a yɛpaw, ne nhoma afoforo mu nsɛm bi, a yesusuw ho no so.” Maria ka sɛ: “Bere a na me ne me nuabeanom baanu no susua koraa no, na yɛde bɛyɛ simma 20 na ɛyɛ yɛn adesua no mprenu anaa mprɛnsa dapɛn biara. Bere a na yɛrenyinyin no, yɛn dapɛn dapɛn abusua adesua no dii dɔnhwerew biako anaa nea ɛte saa.”

Dɛn na Yensua?

Sɛ mususuw saa asɛmmisa yi ho bere a mo nyinaa abehyiam a morebɛyɛ adesua no a, ebetumi de abasamtu aba, na ama adesua bere a ɛsom bo no asɛe kwa. Sɛ tebea no te saa a, mmofra nni biribi pɔtee biara a wɔbɛhwɛ kwan, na ɛrenkyɛ na anigye a wɔwɔ wom no ayera. Enti munni kan mpaw Asafo ti no nhoma biako a mubesua.

“Akoa nokwafo ne ɔbadwemma” no ama yɛn nhoma bebree a yebetumi ayi mu bi. (Mateo 24:45-47) Mubetumi asua nhoma bi a abusua no nnya nsuae. Na sɛ Insight on the Scriptures no wɔ kasa a moka mu a, hwɛ sɛnea ɛyɛ anigye sɛ mobɛpaw eyi mu nsɛm bi asua! Sɛ́ nhwɛso no, mubetumi abɔ asɛm a ɛfa Awurade Anwummeduan ho no ho nkɔmmɔ adapɛn kakra ansa na Nkaedi no adu so. Mmusua pii ani gye ho sɛ wobesiesie wɔn ho ama dapɛn no Ɔwɛn-Aban Adesua no. Nanso Ɔwɛn-Aban mu nsɛm a ɛkeka ho no nso kura nsɛm a etu mpɔn a mubetumi asua. Abusua ti no a onim abusua no honhom fam ahiade no paa na obetumi akyerɛ nhoma a ɛsɛ sɛ wosua.

Maria ka sɛ: “Bere nyinaa na yesua nhoma bi a yɛadi kan apaw. Nanso sɛ asɛmmisa anaa tebea bi sɔre wɔ sukuu mu a, yɛdan kɔ nsɛm a ɛfa ho so.” Ahiasɛm soronko te sɛ nsɛnnennen a mmofra hyia wɔ sukuu, nhyehyɛe a mmerante ne mmabaa yɛ de pue, sukuu akyi dwumadi, ne nneɛma a ɛtete saa tumi sɔre. Sɛ ɛba saa a, monnan nkɔ nsɛm anaa nhoma horow a ɛfa asɛm a asɔre no ho so. Sɛ wuhu asɛm bi wɔ Ɔwɛn-Aban anaa Nyan! a aba foforo mu a wopɛ sɛ wo ne abusua no susuw ho ɛhɔ ara a, ntwentwɛn wo nan ase sɛ wobɛyɛ ho nhyehyɛe. Nokwarem no, ɛsɛ sɛ wudi kan ka nsakrae no ho asɛm kyerɛ abusuafo no ansa na bere aso. Nanso sɛ munya di ahiade no ho dwuma wie a, hwɛ hu sɛ mobɛsan akɔ mo adesua dedaw no so.

Ma Tebea no Nyɛ Nea Asomdwoe Wɔ Mu

Sɛ asomdwoe wɔ hɔ a na adesua kɔ so yiye. (Yakobo 3:18) Enti ma tebea no nyɛ nea akomatu nnim nanso obu wom. Abusua ti bi a ɔwɔ United States ka sɛ: “Sɛ́ yesua ade wɔ asa so anaa ntwirinoo mu no, yɛbɔ mmɔden sɛ yɛbɛtra abobɔ ho sen sɛ yɛbɛtetew yɛn ntam wɔ dan kɛse mu. Eyi ma yɛte ɔdɔ nka wɔ yɛn mu.” Na Maria de anigye kɛse ka sɛ: “Ná wɔma me ne me nuabeanom kwan sɛ yɛnkyerɛ baabi wɔ fie hɔ a yɛpɛ sɛ yɛyɛ dapɛn dapɛn adesua no. Eyi maa yenyaa abotɔyam.” Ma ɛntra w’adwene mu sɛ kanea pa, atrae nhyehyɛe a ɛfata, ne beae a ɛhɔ yɛ anigye a nneɛma nneda basabasa no nyinaa boa ma tebea no yɛ nea asomdwoe wɔ mu. Nnɔkɔnnɔkɔwade a abusua no benya wɔ adesua no akyi nso boa ma anwummere no yɛ anigye.

Mmusua bi mpo paw sɛ wɔde mmusua foforo bɛka wɔn adesua no ho wɔ bere ne bere mu, na ama ayɛ anigye kɛse ma wɔanya nsɛm pii. Sɛ wɔto nsa frɛ wɔn a wɔaba nokware no mu foforo ma wobenya saa nhyehyɛe yi mu kyɛfa a, wobetumi anya mfaso afi hu a wobehu sɛnea abusua ti a ne ho akokwaw bi reyɛ abusua adesua no mu.

Ma Bible no Nkasa

Ma adesua bere no nyɛ anika mma mmofra no, na ɛbɛma wɔde anigye ahwɛ kwan. Wubetumi ayɛ saa denam mmofra nketewa a wobɛhyɛ wɔn nkuran ma wɔayeyɛ Bible mu nneɛma ho mfonini wɔ krataa so no so. Bere a ɛfata no, ma mmofra no nyɛ Bible mu nsɛm ne tebea horow ho ɔyɛkyerɛ. Wɔ mmofra nketewa fam no, ɛho nhia sɛ kyinkyin ara a, wɔyɛ no nsɛmmisa ne mmuae sɛnea ɛtaa ba no. Bible mu nsɛm a wobɛkenkan anaa emu asɛm a wobɛka akyerɛ wɔn no yɛ ɔkwan a ɛyɛ anigye a wubetumi afa so de nnyinasosɛm pa adua wɔn mu. Robert a yɛaka ne ho asɛm dedaw no ka sɛ: “Ɛtɔ mmere bi a yɛkenkan Bible mu nsɛm, na yɛde hyɛ obiara nsa ma ɔkenkan emu nnipa no biako ‘nsɛm.’” Wubetumi ama mmofra no apaw obi a wɔpɛ sɛ wɔfa ne su wɔ akenkan no mu.

Asase ho mfonini ahorow ne nsɛm a wɔahyehyɛ a wɔde bedi dwuma no bɛboa mmofra a wɔanyinyin kakra ma wɔayɛ mmeae ne nneɛma a ɛwɔ nsase a nsɛm a wɔrekenkan ho asɛm no sii so no ho mfonini wɔ wɔn adwene mu. Ɛda adi pefee sɛ sɛ wobɔ wo tirim yɛ ade kakraa bi a, wubetumi ama abusua adesua no ayɛ anika na nsakrae aba mu. Na mmofra no benya Onyankopɔn Asɛm ho akɔnnɔ.—1 Petro 2:2, 3.

Boa Obiara Ma Onnya mu Kyɛfa

Sɛ mmofra ani begye adesua no ho a, ɛsɛ sɛ wɔte nka sɛ wɔn nso ka ho. Nanso, mmofra a wɔn mfe gu ahorow a wobɛma wɔanya mu kyɛfa no betumi ayɛ den. Nanso Bible nnyinasosɛm bi ka sɛ: “Nea odi anim no, ɔmma n’ani nkũ ho yiye.” (Romafo 12:8, NW) Anigye a wobɛda no adi no boa, efisɛ anigye san afoforo.

Ronald ma ne babea Dina a wadi mfe anum no nya adesua no mu kyɛfa denam nsɛmti nketewa a ɔma no kenkan ne mfonini ahorow no a ɔma no ka ho asɛm no so. Bere a afe a etwaam no Kristo wu ho Nkaedi no rebɛn no, ɔtwee adwene sii Onipa a Ɔsen Biara a Watra Ase Pɛnc nhoma no mu mfonini ahorow a ɛfa ho no so. Ɔka sɛ: “Eyi boaa no maa ɔtee adwene a ɛwɔ adeyɛ no akyi ase.”

Ronald de biribi kakra ka ne babea Misha a wadi mfe du no ho. Ronald ka sɛ: “Misha anya nkɔanim akodu baabi a ɛnyɛ sɛ otumi hu mfonini ahorow no ani so kɛkɛ, na mmom otumi hu nea ɛreka ho asɛm nso. Enti bere a yɛresua Adiyisɛm—N’awiei Koraa Abɛn!d nhoma no, yɛde yɛn adwene sii nea mfonini ahorow no kyerɛ so, na eyi aboa no.”

Bere a mmofra du mpanyin mfe so no, ma wɔnkyerɛ dwuma a wobetumi de nea moresua no adi. Sɛ nsɛmmisa bi sɔre wɔ adesua no mu a, fa ɛho nhwehwɛmu bi hyɛ wɔn nsa. Robert yɛɛ saa bere a ne ba Paul a wadi mfe 12 no bisaa biribi faa sukuu kuw bi a wɔatew no foforo a wɔde wɔn ho hyɛ Dungeons and Dragons agodie mu ho no. Paul ne abusua no mufo foforo de Watchtower Publications Index no hwehwɛɛ ho nsɛm, na wosusuw ho wɔ wɔn abusua adesua ase. Robert ka sɛ: “Ɛno maa Paul tee ase ntɛm sɛ agodie no mfata Kristofo.”

Robert maa wɔyɛɛ nhwehwɛmu mmere foforo nso. Ne yere Nancy ka sɛ: “Bere a yɛreyɛ Yesu asomafo no ho nhwehwɛmu no, wɔmaa yɛn mu biara ɔsomafo biako ho nhwehwɛmu dapɛn biara. Hwɛ sɛnea na ɛyɛ anigye sɛ yebehu sɛ mmofra no de wɔn nhwehwɛmu no to gua wɔ abusua adesua no ase anigye so!” Nhwehwɛmu a mmofra ankasa yɛ na wɔka mu nsɛm no kyerɛ abusua no boa wɔn ma ‘wonyin Yehowa anim.’—1 Samuel 2:20, 21.

Nsɛm a wobisa—nsɛmmisa a ɛma obi kyerɛ n’adwene ne nea wɔde twe adwene si biribi so—nso yɛ ɔkwampa a wɔfa so ma mmofra nya mu kyɛfa. Yesu, Ɔkyerɛkyerɛfo Kɛse no, bisaa nsɛm a ɛma obi kyerɛ n’adwene te sɛ, “Wudwen ho dɛn?” (Mateo 17:25) Maria ka sɛ: “Sɛ yɛn mu biara bisa asɛm a, na yɛn awofo nyi ano tẽẽ. Bere nyinaa na wobisa nsɛm de twe adwene no si biribi so de boa yɛn ma yesusuw asɛm no ho.”

Monkyerɛ Mo Adwene—Mo bo mmfuw!

Anigye a wonya wɔ abusua adesua mu no yɛ kɛse bere a obiara a ɔte mu bi no tumi kyerɛ n’adwene na ɔda ne nkate adi a onsuro sɛ obi bɛserew no. Nanso agya bi ka sɛ: “Gye sɛ obiara tumi kyerɛ n’adwene wɔ mmere foforo ansa na obiara atumi akyerɛ n’adwene yiye wɔ abusua adesua ase. Muntumi ntwɛn na bere a moreyɛ adesua ansa na moahyɛ da ayɛ saa.” Ɔkwan biara so no, kwati nsɛm a wɔka a wonsusuw ho yiye na epira te sɛ, ‘Wunni asɛm foforo biara ka ɛno ho? Ná mekae sɛ worebɛka asɛm pa bi’; ‘Nkwaseasɛm na woreka no’; ‘Asɛm pa bɛn ara na wubetumi aka? Woyɛ abofra nti ɛnyɛ nwonwa.’ (Mmebusɛm 12:18) Nya mmɔborohunu ne tema ma wo mma. (Dwom 103:13; Malaki 3:17) Nya wɔn mu anigye, na taa wɔn akyi bere a wɔbɔ mmɔden sɛ wɔde nea wɔresua no bedi dwuma no.

Ɛsɛ sɛ wɔyɛ abusua adesua no wɔ ɔkwan a ɛbɛma abofra no adwene atumi akyere afotu so. Ɔwofo bi a watumi atete mma baanan kyerɛkyerɛ mu sɛ: “Sɛ wufi ase teɛ mmofra so a, ɛhyɛ wɔn abufuw ɔkwan bi so.” Wɔ tebea a ɛte saa mu no, ebia nsɛm no renkɔ wɔn koma mu. Enti kwati sɛ wode adesua bere no bɛyɛ nteɛso ne asotwe bere. Sɛ wohia biribi a ɛte saa a, akyiri yi fa ma wɔn mmiako mmiako.

Mmɔdenbɔ no Renyɛ Ɔkwa

Abusua a ɛyɛ den wɔ honhom mu kyekyere gye bere ne mmɔdenbɔ. Nanso odwontofo no ka sɛ: “Hwɛ, [Yehowa, NW] agyapade ne mmabanin, na yafunu mu aba yɛ akatua.” (Dwom 127:3) Na wɔama awofo asɛyɛde sɛ ‘wɔnyɛn mmofra Yehowa kasakyerɛ ne nyansakyerɛ mu.’ (Efesofo 6:4) Enti nya ahokokwaw a wode bɛyɛ abusua adesua a etu mpɔn na ɛyɛ anigye. Yɛ nea wubetumi biara fa “asɛm no nufusu kronkron” ma, na ama wo mma atumi ‘anyin wɔ mu akɔ nkwagye mu.’—1 Petro 2:2; Yohane 17:3.

[Ase hɔ nsɛm]