ADESUA 05
Bible No Yɛ Onyankopɔn Asɛm a Ɔde Ama Yɛn
Yehowa ama yɛn akyɛde kɛse bi. Ɛno ne Bible. Ɛyɛ nhoma nketewa 66 a wɔaka abom. Nanso ebia wubebisa sɛ: ‘Ɛyɛɛ dɛn na nnipa nsa kaa Bible no? Hena nsɛm na ɛwom?’ Ma yɛnhwɛ nea ɛyɛe a yɛn nsa kaa Bible no, na ɛbɛma yɛanya saa nsɛmmisa no ho mmuae.
1. Sɛ nnipa na ɛkyerɛw Bible no a, adɛn nti na yɛka sɛ efi Onyankopɔn hɔ?
Nnipa bɛyɛ 40 na ɛkyerɛw Bible no. Wofii ase wɔ afe 1513 A.Y.B., na wowiei wɔ bɛyɛ afe 98 Y.B. Wei kyerɛ sɛ efi bere a wofii ase kyerɛwee kosi bere a wowiei no, edii mfe bɛyɛ 1,600. Nnipa ahorow-ahorow na ɛkyerɛw Bible no. Ná ebi yɛ nguanhwɛfo, akuafo, mpataayifo, ne ahemfo. Nanso Bible mu nsɛm nyinaa hyia. Ɛyɛɛ dɛn na etumi yɛɛ yiye? Efisɛ Bible no yɛ Onyankopɔn asɛm. (Kenkan 1 Tesalonikafo 2:13.) Nnipa a ɛkyerɛw Bible no, ɛnyɛ wɔn ankasa tirim asɛm na wɔkyerɛwee. Mmom, ‘Onyankopɔn honhom kronkron na ɛma wɔkasae.’a (2 Petro 1:21) Wei kyerɛ sɛ, Onyankopɔn na ɔde honhom kronkron kanyan nnipa ma wɔkyerɛw ne nsɛm.—2 Timoteo 3:16.
2. Adɛn nti na ɛnyɛ den sɛ obi benya Bible no bi akenkan anaa ɔbɛte mu asɛm?
Asɛmpa a ɛwɔ Bible mu no betumi aboa “aman ne mmusuakuw ne kasa ne nkurɔfo nyinaa.” (Kenkan Adiyisɛm 14:6.) Onyankopɔn ama yɛn nsa aka Bible no wɔ kasa bebree mu. Nhoma biara nni hɔ a wɔakyerɛ ase kɔ kasa pii mu te sɛ Bible. Ɛkame ayɛ sɛ, ɛmfa ho baabi a obi te, anaa kasa a ɔka no, obetumi anya bi akan anaa obetumi anya obi ma waka mu asɛm akyerɛ no.
3. Dɛn na Yehowa ayɛ de akora Bible no so?
Tete no, na wɔkyerɛw Bible mu nsɛm gu nneɛma bi te sɛ aboa nhoma so. Nanso ɛreyɛ ara ni na asɛe. Ɛno nti, nnipa bi a wɔn ani gye Bible no ho hwɛɛ nea na ɛwɔ hɔ saa bere no so kyerɛw bi. Wɔtɔɔ wɔn bo ase kyerɛw no pɛpɛɛpɛ. Ɛwom, nnipa bi a wɔwɔ tumi yɛɛ nea wobetumi biara sɛ wɔremma obiara nnya Bible no bi nkan, nanso ebinom de wɔn nkwa too asiane mu bɔɔ Bible no ho ban. Yehowa pɛ sɛ ɔne yɛn di nkitaho. Ɛno nti, wahwɛ sɛ ɔremma obi anaa biribiara nsiw no kwan. Bible ka sɛ: “Yɛn Nyankopɔn asɛm de, etim hɔ daa.”—Yesaia 40:8.
SUA PII KA HO
Sɛnea Onyankopɔn de ne honhom kanyan nnipa ma wɔkyerɛw Bible no, sua pii fa ho. Afei nso, sɛnea wabɔ Bible no ho ban, ne sɛnea wama obiara nsa aka bi no, wubetumi asua ho ade pii.
4. Bible no ankasa ma yehu baabi a emu nsɛm no fi
Hwɛ VIDEO yi. Muwie a monkenkan 2 Timoteo 3:16, na munsusuw nsɛmmisa yi ho.
Sɛ nnipa na ɛkyerɛw Bible no a, adɛn nti na wɔfrɛ no Onyankopɔn Asɛm?
Wohwɛ a, ntease wom sɛ yɛbɛka sɛ Onyankopɔn betumi de ne nsɛm ama nnipa sɛ wɔnkyerɛw?
Sɛ obi ka asɛm bi ma obi kyerɛw a, nea ɔkyerɛwee no rentumi nka sɛ asɛm no yɛ ne dea. Bible nso, nnipa na ɛkyerɛwee nanso emu nsɛm no fi Onyankopɔn hɔ
5. Obiara antumi ansɛe Bible no
Sɛ Bible no fi Onyankopɔn hɔ a, ɛnde yegye di sɛ ɔbɛhwɛ abɔ ho ban. Efi teteete nyinaa, nnipa bi a wɔwɔ tumi ayɛ nea wobetumi biara sɛ wɔbɛsɛe Bible no. Asɔfo nso bɔɔ mmɔden sɛ wɔremma nkurɔfo nnya bi nkan. Nanso, ebinom de wɔn nkwa too asiane mu bɔɔ ho ban. Ná wonim sɛ sɛ wɔkyere wɔn a wobetumi akum wɔn, nanso wɔampa abaw. Wopɛ sɛ wuhu wɔn a wɔbɔɔ Bible no ho ban no mu baako a, hwɛ VIDEO yi. Muwie a munsusuw nsɛmmisa yi ho.
Wohwɛ ateetee a nkurɔfo faa mu de bɔɔ Bible no ho ban a, ɛmma w’ani nnye ho sɛ wobɛkenkan? Adɛn nti na woreka saa?
Monkenkan Dwom 119:97. Muwie a munsusuw asɛmmisa yi ho:
Dɛn na ɛmaa nnipa pii de wɔn nkwa too asiane mu kyerɛɛ Bible no ase na wɔmaa nkurɔfo nsa kaa bi?
6. Nhoma a obiara nsa betumi aka bi
Nhoma biara nni hɔ a wɔakyerɛ ase kɔ kasa pii mu te sɛ Bible. Ɛno nso ne nhoma a nnipa wɔ bi sen nhoma biara. Monkenkan Asomafo Nnwuma 10:34, 35. Muwie a munsusuw nsɛmmisa yi ho:
Adɛn nti na Onyankopɔn pɛ sɛ wɔkyerɛ n’Asɛm no ase kɔ kasa pii mu ma nnipa pii nya bi?
Dɛn na w’ani gye ho wɔ Bible ho?
Ɛkame ayɛ sɛ
wiase mu
nnipa nyinaa
betumi anya Bible no bi wɔ kasa a wɔte ase mu
Kasa ahorow a wubenya Bible no nyinaa
anaa ne fã bi wom no
boro
3,000
Wobu akontaa sɛ wɔatintim bɛyɛ
5,000,000,000
ɛdɔɔso sen nhoma biara
EBINOM KA SƐ: “Bible de, nnipa na ɛkyerɛwee. Emu nsɛm atwam.”
Wo nso, wuhu no sɛn?
Adanse bɛn na ɛwɔ hɔ a ɛkyerɛ sɛ Bible yɛ Onyankopɔn Asɛm?
NEA YƐASUA
Bible no yɛ Onyankopɔn Asɛm, enti wahwɛ ama abu so wɔ baabiara sɛnea ɛbɛyɛ a obiara nsa betumi aka bi.
Ntimu
Sɛ yɛka sɛ Onyankopɔn de ne honhom na ɛkanyan nnipa ma wɔkyerɛw Bible no a, ɛkyerɛ sɛn?
Wohwɛ sɛnea obiara antumi ansɛe Bible no, ne sɛnea wɔakyerɛ ase kɔ kasa pii mu sɛnea ɛbɛyɛ a obiara nsa betumi aka bi no a, ɛma wote nka sɛn?
Onyankopɔn pɛ sɛ ɔne yɛn di nkitaho anaa ɔne yɛn kasa, enti wahwɛ abɔ Bible no ho ban. Wei ma wote nka sɛn?
YƐ NHWEHWƐMU
Kenkan Bible no ho abakɔsɛm, na wubehu sɛnea na ɛte tete no, ne nea ɛyɛe a ɛnnɛ yɛanya no sɛɛ.
“Nea Ɛyɛe a Bible Awɔ Hɔ Abesi Yɛn Bere Yi So” (Nyan!, November 2007)
Bible no hyiaa ɔhaw akɛse mmiɛnsa bi. Kenkan ho asɛm, na wubehu sɛnea emu biara antumi ansɛe Bible no.
“Bible—Nhoma a Biribiara Antumi Ansɛe No” (Ɔwɛn-Aban No. 4 2016)
Hwɛ sɛnea ebinom de wɔn nkwa too asiane mu kyerɛɛ Bible no ase.
Bible a na ɛwɔ hɔ tete no, nnipa pii hwɛɛ so kyerɛw bi na wɔakyerɛ ase kɔ kasa pii mu. Ɛnde, yɛyɛ dɛn hu sɛ Bible no mu nsɛm nsesae?
a Adesua a ɛto so 7 no bɛma yɛahu sɛ honhom kronkron yɛ tumi a Onyankopɔn de yɛ ade.