22. Daakye bɛn na Yehowa hyɛɛ ho nkɔm maa (a) wɔn a wonu wɔn ho? (b) abɔnefo?

²² Bere a Yehowa de wɔn a wɔsakra wɔn adwene wɔ wɔn akwammɔne ho daakye retoto wɔn a wɔnsakra wɔn adwene de ho no, ɔkae sɛ: ‘Merebɔ anofafa so aba. Asomdwoe, asomdwoe nka nea ɔwɔ akyirikyiri ne nea ɔbɛn, na mɛsa no yare. Na abɔnefo te sɛ ɛpo a ehuru kutukutu; na entumi nyɛ komm, na emu nsu puw dontori ne dɔte gu. Asomdwoe nni hɔ mma abɔnefo.’—Yesaia 57:18b-21.

24. (a) Henanom na wobehu Onyankopɔn asomdwoe, na dɛn na efi mu ba? (b) Henanom na wonhu asomdwoe, na dɛn na ɛbɛba wɔn so?

²⁴ Hwɛ anofafa so aba a ɛyɛ anigye a ɛsɛ sɛ Yudafo bɔ bere a wɔasan aba wɔn kurom na wɔreto Yehowa ayeyi nnwom no! Ɛbɛyɛ wɔn anigye sɛ wɔahu Onyankopɔn asomdwoe, sɛ́ ‘wɔwɔ akyirikyiri’—a wɔmmɛn Yuda koraa, na wogu so retwɛn sɛ wɔbɛsan aba—anaasɛ ‘wɔbɛbɛn’—bere a wɔadu wɔn kurom dedaw no. Nea ɛne no bɔ abira koraa no, hwɛ sɛnea nneɛma yɛ soronko ma abɔnefo! Obiara a ɔnyɛ Yehowa nteɛso ho biribi, abɔnefo, ɛmfa ho nnipa ko a wɔyɛ ne baabiara a wɔwɔ no, nni asomdwoe koraa. Bere a wɔrehuru te sɛ ɛpo a entumi nyɛ komm no, wɔnsow anofafa so aba, na mmom “dontori ne dɔte,” biribiara a ɛho ntew.