“Ɔman” A Ɛde Aba Hyɛ Asase Ani Ma

“Nna a ɛbɛba no mu Yakob begye ntini, na Israel afefɛw agu nhwiren, na wɔde aba ahyɛ wiase ani mama.”​—YESAIA 27:6.

 1. Ɔsomafo Petro frɛɛ honhom fam Israel man no dɛn?

Ɛdefa Kristo asuafo asafo no awo sɛ “ɔman” wɔ 33 Y.B. mu ho no, ɔsomafo Petro kyerɛw saa nsɛm yi bere tiaa bi ansa na wɔresɛe Yerusalem wɔ afe 70 Y.B. mu: “Na mo de, moyɛ abusua a wɔapaw wɔn, ahene asɔfokuw, ɔman kronkron, ɔman a wafa wɔn ayɛ ne de, sɛ monka nea ɔfrɛɛ mo fii esum mu baa ne hann a ɛyɛ nwonwa mu no mmaninyɛ nkyerɛ, mo a kan no monyɛ ɔman, na afei moayɛ Onyankopɔn man, mo a munnyaa mmɔborohunu, na afei de moanya mmɔborohunu.” (1 Petro 2:9, 10) Hwɛ adom ara a ɛno yɛ wɔ Onyankopɔn fam!

 2, 3. Sɛ́ nnipa a Yehowa Nyankopɔn de wɔn ayɛ ne de no, asɛyɛde bɛn na ɛda honhom mu Israel so, na Yesu Kristo de wɔn totoo dɛn ho wɔ Yohane ti 15?

² Ɛnnɛ, bere a Petro kyerɛw saa asɛm no akyi mfeha 19 no, saa “ɔman” a wɔde honhom awo no no nkaefo bi da so ara wɔ asase so. Sɛnea afe afe Awurade Anwummeduan ho akontaabu kyerɛ no, wɔn dodow no so atew ma mprempren wonnu mpem du. Wɔyɛ ‘ɔman a [Yehowa] afa wɔn ayɛ ne de,’ ma enti ɛsɛ sɛ wɔka Yehowa Nyankopɔn a ɔfrɛɛ wɔn fii wiase ‘sum mu baa ne hann a ɛyɛ nwonwa mu’ no mmaninyɛ kyerɛ. Saa “hann” yi akɔ so ahyerɛn, ne titiriw no efi ‘amanaman mmere,’ anaasɛ “amanaman mmere a wɔahyɛ,” no awiei wɔ afe 1914 mu no.a (Luka 21:24, King James Version; NW) Sɛ́ nnipa a hann a ɛyɛ nwonwa no Mafo Kronkron no ‘afa wɔn ayɛ ne de’ no, wɔsom bo ma no. Wɔ ne fam no, wɔte sɛ honhom fam bobe turo.

³ Ɛha na yɛkae nea Yesu Kristo ka kyerɛɛ n’asomfo a na wogyina hɔ ma wɔn a wɔbɛba abɛyɛ n’akyidifo a wɔde honhom awo wɔn no: “Mene nokware bobe no, na m’agya ne okuafo no. Me ho baa biara a ɛnsow aba no, woyi; na ebiara a ɛsow aba no, woyiyi ho, na asow aba bebree. Nsɛm a manya aka makyerɛ mo no nti mo ho anya afi. Montra me mu na me nso mentra mo mu. Sɛnea baa ntumi mfi n’ankasa mu nsow aba gye sɛ ɛtra obobe no mu no, saa ara nso na muntumi gye sɛ motra me mu. Mene bobe no, mone abaa no. Nea ɔtra me mu na me nso metra ne mu no, ɔno na ɔsow aba pii; na mukwati me a montumi nyɛ hwee.”​—Yohane 15:1-5.

 4. (a) Yesu bɛ no kae yɛn asɛm bɛn a wɔaka wɔ Yesaia ti 27? (b) Bere bɛn na nkɔmhyɛ yi nya ne nnɛyi mmamu, na wɔ henanom so? (d) Su bɛn na Onyankopɔn nyi adi wɔ ne nkurɔfo ho bio?

⁴ Saa ntotoho, anaasɛ bɛ a Yesu Kristo bui no kae yɛn Yehowa asɛm a ɛwɔ Yesaia 27:2-4. NW no, faako yɛkenkan sɛ:

“Ɛda no, montow bobeturo a ne bobesa ani ahuru no ho dwom: Me, Yehowa, na mehwɛ, migu no so nsu bere nyinaa mu. Mehwɛ no anadwo ne awia, na hwee ammɛyɛ no. Abohuru bi nni me mu.”

Yebetumi de “bobeturo a ne bobesa ani ahuru” a ɛwɔ asase so nnɛ no atoto abaa a ɛwɔ saa sɛnkyerɛnne kwan so “obobe” a Kristofo a wɔde honhom awo wɔn a wɔyɛ “ɔman kronkron” no ne emufo a wɔsow aba no nkaefo no ho. Enti, asɛyɛde no da wɔn so sɛ wɔbɛsow aba pii. (Yohane 15:5) Sɛnea Yesaia nkɔmhyɛ no kyerɛ no, ɛyɛ bere a wɔsan de Yehowa nkurɔfo ba ne dom ase no na wɔbɛtow dwom a ɛfa “bobeturo a ne bobesa ani ahuru” ho no. (Fa toto Yesaia 27:13 ho.) Eyi bɛma yɛahu sɛ nkɔmhyɛ a emu yɛ hyew no nnɛyi mmamu no fii ase wɔ ɔko no akyi afe a ɛyɛ 1919 mu, na abakɔsɛm mu nokwasɛm ahorow di ne mmamu ho adanse de besi mprempren. Ɛnnɛ Yehowa nni “abohuru” biara wɔ ne mu tia ne nkurɔfo, na saa ara na onni bi a etia ne ‘man kronkron’ no nkaefo, ‘ɔman a ɔde wɔn ayɛ ne de’ no, na saa saa ara na ɛte wɔ Kristofo anokwafo a wɔhwɛ kwan sɛ wobenya daa nkwa wɔ asase so no ho. Ofi mmɔborohunu mu adan ne dom aba wɔn so na ɛno nti na wodi yiye wɔ honhom mu na wɔsow aba pii no.

 5. Dɛn na efi sɛnkyerɛnne kwan so bobeturo yi mu a ama nkurɔfo anya anigye, na dɛn na wobetumi akaakae wɔ ho?

⁵ Saa honhom mu “ɔman” a ne mfɛfo a wɔyɛ adwumaden no ka ho no ayɛ te sɛ bobeturo a ɛsow aba a ama wɔanya ‘bobesa a epuw ahuru’ pii. Ɛyɛ honhom fam bobesa a ɛma Yehowa ne onipa koma ani agye. (Atemmufo 9:13) Esiane ntease titiriw yi nti, nnipa a honhom mu nsa yi a wɔanom ama wɔn ani agye no betumi de ahosɛpɛw ato dwom na wobetumi akaakae nea “bobeturo” no Soro Okuafo no ayɛ ama sɛnkyerɛnne kwan so “bobeturo” yi no nyinaa. Sɛ yɛbɛka no wɔ sɛnkyerɛnne kwan so a, ‘wɔagugu’ “bobeturo” yi so ‘nsu’ ampa sɛnea ɛbɛyɛ a ebenya ahoɔden bere nyinaa na asow aba a nsu a ɛyɛ dɛ wom a ɛde anigye ba.

Abirabɔ​—“Asase so Bobe”

 6. Nanso, sɛnea Adiyisɛm ti 14 kyerɛ no, dɛn na ɛbɛba “asase so bobe” no so?

⁶ Ɛnte saa wɔ nea Bible mu nhoma a etwa to no frɛ no “asase so bobe” no ho. Ɛrenkyɛ wɔde ɔsoro ahyɛde no bɛma ɔsoro abrafo dɔm no sɛ: “Tow wo kantankrankyi nnamnnam no twitwa asase so bobe akasiaw, efisɛ n’aba no abere.” Afei sɛnea Adiyisɛm no mu nkɔmhyɛ kɔ so kyerɛ no, “ɔbɔfo no de ne kantankrankyi no tow asase so, na otwitwaa asase so bobe aba, na ɔde koguu Onyankopɔn abufuw nsa-kyi-amoa kɛse no mu. Na wotiatiaa nsa-kyi-amoa no so kurow no akyi, na mogya fii nsa-kyi-amoa no mu koduu pɔnkɔ nnareka ho teɛe nkwansimma apem ahansia.” (Adiyisɛm 14:18-20) Enti saa na ɛbɛba nniso ahorow a ɛyɛ Satan ahyehyɛde a aniwa hu a ɛwɔ asase so no fã no so; ɛyɛ biribi a ɔno ne ne kuafo, na ɛsɔre tia “nokware bobe” a Yehowa Nyankopɔn ne ne Kuafo no. Wɔrensan mfa “asase so bobe” no nsi hɔ bio koraa!

7-9. Mmamu ahorow abien bɛn na Yesaia 27:7-13 wɔ, na ɛyɛ mmere ahorow bɛn mu?

⁷ Nanso, nkɔmhyɛ a ɛwɔ Yesaia ti 27 yi yɛ nkɔmhyɛ ankasa a ɛfa ɔsesɛw ho, a nea na edi kan no fa honam fam Israel man no ho ne afei nea ɛfa honhom mu Israel ho wɔ yɛn afeha a ɛto so 20 yi mu. Eyi da adi wɔ nea nkɔmhyɛ no ka wɔ nkyekyem 7 kosi nkyekyem 13 a ɛno na ɛde ti no ba awiei no mu. Saa nkyekyem no kenkan sɛ:

⁸ “So wahwe no sɛ ɔhwee ne hwefo, anaasɛ wɔakum no sɛ wokum ne kumfo no? Ne bɔne na wususuw so ne no dii, sɛ wokaa no kɔeɛ ɔde mframa a ano yɛ den huw no, apuei mframa da no. Enti, eyi na wɔde bɛkata Yakob amumɔyɛ so, na oyi a wɔreyi ne bɔne akɔ no so aba nyinaa ni: sɛ ɔbɛma afɔremuka abo no nyinaa ayɛ sɛ akado atɔw a afurofurow, na Asera nnua ne owia adum nsisi hɔ bio. Na kurow a ɛyɛ den no ada ntuw ayɛ trabea a wɔato no sraha na wɔagya no sɛ sare so; ɛhɔ na anantwi mma didi, na ɛhɔ na wobututuw wie n’abãa no we. Sɛ ne mmobaa no guan a, wobubu, mmea bɛpɛ kɔsɔ: na wɔyɛ ɔman a wonni nhumu, enti wɔn Yɛfo no yam nhyehye no mma wɔn, na Nea ɔnwenee wɔn no nhu wɔn mmɔbɔ.

⁹ “Ɛda no, [Yehowa] bɛporow n’aba afi asu no hweam ano akosi Misraim subon no ano, na wɔatase mo, Israel mma, mmiako mmiako. Na da no wɔbɛhyɛn torobɛnto kɛse, na wɔn a wɔyerae Asiria asase so ne wɔn a wosum wɔn kɔɔ Misraim asase so no aba, na wɔabɛsɔre [Yehowa], bepɔw kronkron no so, Yerusalem.”

10. Wiase tumi bɛn na edi akoten wɔ Yesaia nkɔmhyɛ bere no mu, na dɛn na ɛbaa ne so bere a ɛbɛtow hyɛɛ Yuda ahenni so ahenkurow so no?

¹⁰ Wɔ Yesaia nkɔmhyɛ bere yi mu no, na Asiria abɛyɛ wiase tumi a ɛyɛ den wɔ asase so, na ɛno na etuu wiase tumi ason a ɛtoatoa so no mu nea edi kan no gui, ɛwom sɛ na Misraim da so ara wɔ hɔ sɛ tumi a ano nyɛ den pii de. Ná Israel mmusua du ahenni no atew ne ho afi Ɔhene Dawid adehye fi, Yuda abusua no nniso ho. Ɛyɛ Yerusalem kurow no ho na Asiria hene kae sɛ, sɛ ɛmpɛ sɛ wɔsɛe no a, ɛnde ɛmfa ne ho mma koraa no. Nanso, Yehowa ko maa Yuda ahenni no na ɔmaa Ɔhene Saneherib ɔhantanfo no san kɔɔ fie wɔ animguase nkogudi mu.​—Yesaia, atiri 36 ne 37.

11. Wiase tumi bɛn ɔhempɔn so na wɔnam tuu Yuda ahenni no gui, na ɔkwan bɛn so na Yesaia 27 ka eyi ho asɛm?

¹¹ Enti wɔmaa Babilonia Wiase Tumi a edii hɔ bae no hempɔn kwan sɛ ɔnsɛe Yerusalem kurow kronkron no ne n’asɔrefi no. Sɛnea Bible kyerɛwtohɔ kyerɛ no, eyi sii afe 607 A.Y.B. mu denam ɔhempɔn Nebukadnesar nsa so. Ɔno na ɔde nnipa pii kɔɔ Babilonia asase so ma wokodii mfirihyia 70 wɔ nnommumfa mu no. Ɛyɛ Yerusalem sɛe a na ɛrebɛn ne wɔn a wɔde wɔn bɛkɔ Babilonia nnommumfa mu mfirihyia 70 no nti na wobisaa nsɛm no ma ɛfatae no:

“So wahwe [Israel man] no sɛ ɔhwee ne hwefo?” (Yesaia 27:7)

Te sɛ nea ebi mmae da wɔ ɔman no abakɔsɛm mu fi 1513 A.Y.B. no, wɔbɔɔ Onyankopɔn man no bɔtorɔ wɔ 607 A.Y.B. mu, bɔtorɔ a ɛkaa kakraa anka ɛsɛee no pasaa. Nnipa a wowuwui wɔ Yerusalem kurow no nkahyem no mu dɔɔso pii. Yiw, Yehowa hui sɛ adeyɛ a emu yɛ den yi ho hia, na ɛsɛ sɛ wɔma ɛba. Ohuu hia a ɛho hia kɛse sɛ ɔne wɔn a anka ɛsɛ sɛ wɔkɔ so yɛ ne nnamfo, wɔn a ɔno ankasa de wɔn ayɛ ne nnamfo a ɔne wɔn ayɛ Mmara apam denam ntamgyinafo Mose so no di no.

12. Enti na asɛm bɛn na Yehowa betumi akanyan odiyifo Yesaia ma wabisa a ɛfa nea ɛbaa Israel so no ho, na enti eyi kaa Israel abusuabɔ a ɔne Yehowa wɔ no dɛn?

¹² Enti na Yehowa betumi akɔ so abisa sɛ:

“Anaasɛ wɔakum no [Israel man, anaasɛ Yakob] sɛ wokum ne kumfɔ no?” (Yesaia 27:7)

Aa, yiw, afei de na abɛyɛ nea ɛho hia sɛ Yehowa ne ne nkurɔfo a na wɔwɔ ne dom no di, nteɛm a ɛyɛ hu a efi Babilonia Wiase Tumi, nea ɛto so abiɛsa wɔ Bible abakɔsɛm mu, no asraafo dɔm hɔ no. Ɛno nti na wɔkaa asɛm a efi soro yi no:

“Ne bɔne na wususuw so ne no dii, sɛ wokaa no kɔe; ɔde mframa a ano yɛ den huw no, apuei mframa [nea wɔde kyerɛ beae a ɔko nteɛm a ɛyɛ hu no befi aba] da no.” (Yesaia 27:8)

Adeyɛ a edi kan a ɛte sɛɛ so na ɔnam bɛma ɔman a anni nokware a na bere bi ɛte sɛ ɔyere ankasa ma no a ɛyɛ n’ahyehyɛde a aniwa hu a ɛwɔ asase so no akɔ. Afei de na ɔrepam no afi n’asase a Onyankopɔn de ama no no so na wama wakɔ denam Babilonia atamfo no nsa so, akɔ akyirikyiri asase bi so, te sɛ nea wagyaa no aware bere tiaa bi.​—Fa toto Yesaia 50:1 ho.

13. Sɛnea Yesaia nkɔmhyɛ no kyerɛ no na ɔkwan bɛn so na Israel man no rebɛpata wɔ Yehowa apam a ebuu so no ho?

¹³ Afei de na bere adu sɛ Israel man, anaasɛ Yakob, bɛpata wɔ ‘n’amumɔyɛ’ no ho denam ɔkwan a emu yɛ den kɛse sen mmoa afɔre ahorow a wɔbɔe wɔ Yerusalem asɔrefi afɔremuka so no so. Eyi ne nea Yehowa kae wɔ n’ahyehyɛde a ɛte sɛ ɔyere no ho:

“Enti, eyi na wɔde bɛkata Yakob amumɔyɛ so, na oyi a wɔreyi ne bɔne akɔ no so aba nyinaa ni: sɛ ɔbɛma afɔremuka abo no nyinaa ayɛ sɛ akado tɔw a afurofurow, na Asera nnua ne owia dum nsisi hɔ bio.” (Yesaia 27:9)

Ɔsoro abufuw anaasɛ “abohuru” a wɔda no adi bɛn ara na nkɔmhyɛ yi mmamu bɛyɛ, na ɛfata saa nso! Asera abosonsom nnua ne aduhuam dum biara renyɛ nea esisi hɔ bio wɔ ne man a watwe n’aso no mu.

14. Amamfoyɛ bɛn na na wɔbɛma aba Israel asase no so, na ɔkwan bɛn so na wobedi yɛ a ɛbɛyɛɛ sɛnkyerɛnne kwan so dua no ho dwuma?

¹⁴ Ɔrekyerɛ amamfoyɛ a ɛbɛba Israel man a na ɛte sɛ ɔyere ankasa no so no, Yehowa de ka ho sɛ:

“Na kurow a ɛyɛ den no ada ntuw ayɛ trabea a wɔato no sraha na wɔagyaw no sɛ sare so.” Asase a na nnipa ahyɛ so ma no bɛyɛ nea ɛda hɔ kwa na ɛbɛyɛ mmoa adidibea ara kwa wɔ saa bere no mu.

“Ɛhɔ na anantwi mma didi, na ɛhɔ na wobutubutuw [na Yehowa nam n’adwumayɛfo so] wie n’abãa no we. Sɛ ne mmobaa no guan a, wobubu, mmea bɛpɛ kɔsɔ.” (Yesaia 27:10, 11)

Wɔbɛbrɛ Yehowa man a na ɛte sɛ ɔyere ankasa no ase ma wayɛ sɛ ogya a wɔsɔ a ɛrenyɛ den mma mmea sɛ wɔde nea aka no bɛyɛ nea ehia wɔn. Tebea a ɛyɛ awerɛhow bɛn ara na brɛ a wɔbɛbrɛ Israel ahyehyɛde a ɛte sɛ ɔyere ankasa no ase no bɛyɛ sɛɛ yi! Nanso dɛn nti na Yehowa Nyankopɔn a ɔte sɛ okunu no bɛyɛ ade a emu yɛ den sɛɛ? Tie:

15. Esiane sɛ Yehowa hyɛɛ da de wɔn yɛɛ ne de nti, nnipa bɛn na anka ɛsɛ sɛ Israelfo no da wɔn ho adi sɛ wɔyɛ, nanso dɛn nti na wɔbɛyɛɛ sɛ aman a wɔsom abosom no?

¹⁵ “Wɔyɛ ɔman a wonni nhumu, enti wɔn Yɛfo no yam nhyehye no mma wɔn, na Nea ɔnwenee wɔn no nhu wɔn mmɔbɔ.” (Yesaia 27:11)

Esiane nsiesiei ahorow a na Yehowa ayɛ a ɛbɛma n’ahyehyɛde a ɛyɛ nwonwa a ɔde asi hɔ no anya ntetee ne ntease nti, na anka ɛsɛ sɛ Israelfo no da no adi sɛ wɔyɛ nnipa a wɔwɔ adwene kɛse. Anka ɛsɛ sɛ wɔyɛ ntɛm nya nhumu a ɛbɛma wɔahu ahuhude a ahonisom yɛ no, yiw, nhumu a ɛbɛma wɔahu nyansa a enni ahoni a aman a wonnim hwee a wɔne nokware Nyankopɔn ne ɔteasefo koro Yehowa nni apam abusuabɔ mu som no mu no. Nanso esiane sɛ wonhu wɔn Yɛfo ne Nea ɔnwenee wɔn a ɔwɔ soro no nti, wɔannya ne mu gyidi na wɔdan kɔɔ anyame a nnipa ayɛ a wohu no so, na ɛno na ɛde wɔn asehwe bae. Ɛno nti na woyii ɔdom ne ɔsoro mmoborohunu a ɛwɔ hɔ biara no fii asoɔdenfo a wɔte sɛɛ so no.

Ogye Fi Nnommumfa Mu

16. Esiane ne nkurɔfo a na ɔbɛsan agye wɔn asi hɔ no nti, na dɛn na ɛsɛ sɛ Yehowa de n’adwene si so?

¹⁶ Enti afei sɛ ɔbɛsan de wɔn aba ne som mu wɔ wɔn asase so a, ɛbɛyɛ nea ɛho hia sɛ Yehowa de n’adwene si Babilonia asase a na “asu” kɛse Eufrate nam mu no so. Ɔde n’adwene besi kesee fam, ɛrekɔ Misraim asase no so, efisɛ mmeae ahorow yi na ne nkurɔfo akɔ nnommumfa mu a ɔde retwe wɔn aso no. Esiane eyi nti na ɛsɛ sɛ Yehowa ma n’atirimpɔw no fã a aka no bam:

“Ɛda no [Yehowa] bɛporow n’aba afi asu [Eufrate] no hweam ano akosi Misraim subon no ano [asase kesee a ɛda Bɔhyɛ Asase no kesee fam atɔe], na wɔatase mo, Israel mma, mmiako mmiako.”​—Yesaia 27:12; fa toto Numeri 34:2, 5 ho.

17. Ɔkwan bɛn so na Yehowa nam maa ne nkurɔfo dee wɔn ho fii nnommumfa mu?

¹⁷ Sɛnea ɛbɛyɛ a Yehowa bɛma ne nkurɔfo asan aba wɔn asase a ɛyɛ Yuda so no, na ɛsɛ sɛ oyiyi ne nkurɔfo a wɔwɔ nnommumfa mu no te sɛ aduaba na ɔnam saa yɛ so ama wɔade wɔn ho. Ɔyɛɛ eyi denam Babilonia wiase tumi no a ɔdan butui na ɔde Medo-Persia Ahemman a ɛyɛ wiase tumi a ɛto so anan wɔ Bible abakɔsɛm mu no bae no so. Ahyɛde a Persia Hempɔn, Kores Ɔkɛse no de mae wɔ n’ahenni mfiase no yɛ nea ɔde mae na ama Yehowa nkurɔfo a wɔwɔ nnommumfa mu no ade wɔn ho na wɔasan akɔ faako a na tete Yerusalem wɔ no asan akosi Yehowa asɔrefi no. Wɔsan bae wɔ mfirihyia 70 a Yudafo de kɔɔ nnommumfa mu no awiei wɔ 537 A.Y.B. mu.​—Yesaia 45:1-7.

18. Ebetumi aba sɛ nnommumfa mufo no yɛɛ wɔn ade dɛn wɔ ahyɛde a ɛfa wɔn ho a wɔbɛde ho no ho?

¹⁸ Ná Israelfo a wɔreteɛ wɔn so a wɔwɔ Babilonia, ne afei Asiria ne Misraim no yɛ Yehowa agyapade, na na ɔwɔ hokwan sɛ ɔtetew wɔn sɛ sɛnkyerɛnne kwan so aduaba fi nnommumfa ne bɔ a wɔabɔ apete no mu na ɔnam saa yɛ so ayi mmɔborohunu, ɔdom a ɛnsɛ, adi akyerɛ wɔn. Oo, hwɛ sɛnea ebia tete Israelfo no ani gyee wɔ Kores ahyɛde no ho, ne sɛnea ebia wɔde nnamyɛ dii dwuma wɔ hokwan kɛse a na wɔde ama no ho! Afei na dɛn na ɛwɔ hɔ a wɔbɛka wɔ ɔdom “da” no ho?

19. (a) Hena na wɔka siei sɛ Israelfo a na wɔabɔ apete wɔ Asiria ne Misraim no bɛsɔre no? (b) Dɛn na na eyi bɛkyerɛ wɔ Yehowa som wɔ beae a na asɔrefi a edi kan no si no ho, na eyi fa nnɛyi honhom mu ɔman bɛn nso ho?

¹⁹ “Na da no wɔbɛhyɛn torobɛnto kɛse, na wɔn a wɔyerae Asiria asase so ne wɔn a wosum wɔn kɔɔ Misraim asase so no aba, na wɔabɛsɔre [Yehowa], bepɔw kronkron no so, Yerusalem.” (Yesaia 27:13)

Dɛn bio na na ɛno kyerɛ sen bɔhyɛ asase no a wɔbɛsan ahyɛ so ma ne asɔrefi no a wɔbɛsan asi wɔ Yerusalem na wɔasan de Israel man a wɔasan ama so no Yɛfo ne Nea ɔnwenee no no som asi hɔ? Na ɛsɛ sɛ eyi ba sɛnea odiyifo Yesaia asɛm a odii kan kae a ɛwɔ nkyekyem 6 no kyerɛ no. Ná ɛsɛ sɛ ne nkurɔfo a wɔasan aba asase no yɛ nea nnipa ayɛ so ma a wɔde biakoyɛ resom no wɔ n’asɔrefi, ɛwom sɛ na ɔsombea a wɔasan asi yi anuonyam nnu asɔrefi kɛse a Ɔhene Salomo sii no de. Saa kwan yi so no, ɛbɛyɛɛ ne nnɛyi honhom mu mmamu a ɛfa “Onyankopɔn Israel” ho no ho mfonini na ɛde aba a ɛma nkwa ahyɛ ‘asase a ɛsow aba’ no nyinaa ma.​—Galatifo 6:16; Yesaia 27:6.

[Ase hɔ asɛm]

Wubua Dɛn?

◻ Bere bɛn ne ɔkwan bɛn so na ‘wɔhwee’ honam fam Israel sɛnea wɔaka ato hɔ wɔ Yesaia 27:7 no?

◻ Ɔkwan bɛn so na Israel ‘gyee ntini’ (Yesaia 27:2, 6) ?

◻ Henanom na nkɔmhyɛ a ɛwɔ Yesaia ti 27 no mmamu no fa wɔn ho wɔ nnɛ bere yi mu?

◻ Ɔkwan bɛn so na eyinom abɛyɛ sɛ bobeturo a ɛsow aba a ɛma wonya ‘bobesa a epuw ahuro’?

[Kratafa 24 mfoni]

Ɛdenam Babilonia so no, Yehowa bɔɔ wɔn bɔtorɔ wɔ 607 A.Y.B. mu