“Amanaman Hene”​—Yɛn Mmoa Biako Pɛ

“Hena na ɔrensuro wo, amanaman hene, efisɛ wo na ɛfata wo. Na amanaman anyansafo nyinaa mu ne wɔn ahenni nyinaa mu, obiara nni hɔ a ɔte sɛ wo.”​—Yer. 10:7.

 1. Nteɛm ma mmoa a efi wiase nyinaa ba fi hefo hɔ, na dɛn ntia?

“YEHIA MMOA! YEHIA MMOA!” Eyi ne nteɛm a wɔte fi wiase afanan nyinaa. Wɔte fi nnipa a wohu ɔkwan a wiase no kɔ so fa so ne amanehunu kɛse a ɛde ɔsɛe ba a ɛrenkyɛ ɛbɛhyɛn mu no hɔ. Nea ebefi mu aba no yi wɔn ho hu kɛse na ɛma wodi awerɛhow pii. Nea ɛma wɔka ne sɛnea odiyifo Yeremia kae bere tiaa bi ansa na Yerusalem sɛe a ɔkaa ho asɛm siei no reba no: “Sɛ me ti yɛ nsu na m’aniwa yɛ nusu abura ɛ! Anka mesu me man [Israel], babea atɔfo no awia ne anadwo.​—Yer. 9:1.

 2. Nea wɔn a wɔwɔ mmɔborohunu hwɛ a ɛreba bɛn nti na wobesu nnɛ?

² Dɛn nti na ɛnsɛ sɛ obi a ɔyɛ mmoborohunufo no sũ nnɛ? Efisɛ mprempren yi nea ɛsensɛn adesamma so a ɛreba ne nea wofi teteete de amanehunu a ɛbaa ɔman a Yeremia kaa asɛm a ɛte sɛɛ kyerɛɛ wɔn no so no yɛɛ ho mfonini no: “Monkyerɛ mo mmabea osu na monkyerɛkyerɛ mo ho kwadwom. Na owu aforo afa yɛn mfɛnsere mu ahyɛn yɛn aban [afie] afɛfɛ mu, sɛ ebetwa mmotafowa afi mmorɔn so, ne mmerante afi mmɔnten so. . . . Nnipa afunu begugu hɔ sɛ mfuw so nwura dodow [sɛ nea wɔde yɛ asase yiye], sɛ awitwafo akyi afiafi, na ohia a remmoa ano.”​—Yer. 9:20-22.

 3. Wɔ ɔhaw a ɛwɔ wiase a ɛda adi pefee a wɔadi kan ahu no nti, dɛn anaasɛ hefo na nnipa kɔ wɔn hɔ kɔhwehwɛ akwankyerɛ?

³ Hena na ɔwɔ hɔ a onhu wiase nyinaa ɔhaw a ɛda yɛn anim a ɛreba no, nea enye koraa wɔ adesamma abakɔsɛm mu no? Ɛho nhia sɛ yenya tete Yeremia nkɔmhyɛ aniwa no bi ansa na yɛahu eyi. Enti, yɛn mu bi bɛyɛ dɛn afi nea wɔn a wohu nneɛma a ɛrekɔ so wɔ wiase no mu mprempren a honhom nkaa wɔn no ka ho asɛm sie no mpo mu? Wɔ nneɛma a ɛyɛ hu a wohu a ɛreba yi nti, ɛka nnipa a wonnim Nyankopɔn no mpo ma wofi wɔn pɛ mu frɛ biribi a ɛkorɔn, wɔde wɔn ani to biribi a ɛkorɔn kyɛn ɔdesani so na wɔde wɔn ho ato so de agye adesamma abusua no nkwa. Amammui mu akwankyerɛfo a wɔn a wofi Kristoman mu no ka ho no bisa ahonhomfrɛfo ne adebisafo ade wɔ anibere mu. Esiane sɛ wonnim nea wɔbɛyɛ ne nea ebefi biribi a ɛho hia a wɔbɛyɛ mu aba nti, wɔhwehwɛ nsoromma mu ahwɛfo bisa wɔn nkrabea na wɔkenkan ɔsoro sɛnkyerɛnne. Ebinom nso su frɛ wɔn anyame, wɔn ahoni a wɔde nnua ayɛ sa wɔde dwetɛ ne sika ne ntade a onipa apam ahyehyɛ wɔn no. So saa nneɛma a agye din a wɔde di dwuma no ne nneɛma a ɛsɛ sɛ yɛde yɛn ho to wɔn so ma mmoa mprempren wɔ bere a tebea a wiase no wɔ mu no yɛ nea eyi nnipa ho hu kɛse na afei ɛkyerɛ wiase nyinaa sɛe wɔ daakye a abɛn pɛɛ no mu no? Dabi!​—Yer. 10:1-5.

 4. Dɛn nti na “ɔboafo yamyefo” bi a onhu ade, na onnim nyansa rentumi nyɛ yɛn boafo biako pɛ no, na nokware mmoa no wɔ he?

⁴ Ɛhefa na mmoa ankasa wɔ? Dɛn anaa hena ne yɛn boafo biako pɛ no? Ɛnyɛ “ɔboafo ɔyamyefo” bi a n’ani afura a onni nyansa. Ɛsɛ sɛ ɛyɛ onipa bi ankasa a ohu asiane ahorow a yɛwɔ mu no te sɛ nea yɛn amansɛmdifo anyansafo no yɛ no, yiw, nea ohu no yiye mpo kyɛn sɛnea saa nnipa a wonim nyansa yiye no hu no no. Ɛda adi pefee sɛ ade a enni nyansa rentumi mmoa nnipa a wɔwɔ nyansa te sɛ yɛn. Yɛn mmoa biako pɛ no ne Nea ɔwɔ nyansa a ɛdɔɔso a otumi de yɛɛ amansan nyinaa a yɛn a yɛwɔ nyansa no nso ka ho no. Ɔno na obetumi adi tebea no ho dwuma. Ɔno ne Nea odiyifo no frɛ no “amanaman Hene” no.

 5. Ɔkwan bɛn so na odiyifo no faa so kyerɛkyerɛɛ nea ɔyɛ yɛn boafo biako pɛ no mu wɔ Yeremia 10:6-8?

⁵ So yebisa nea saa Onii Ko no yɛ? Ɔno ne Nea wontumi mfa obi nto no ho anaasɛ obiara ne no nsɛ no, efisɛ Yeremia kae sɛ: “Obiara nni hɔ a ɔte sɛ wo, Awurade [Yehowa]; wo na woyɛ kɛse, na wo din nso so, mmaninyɛ mu. Hena na ɔrensuro wo, amanaman hene, efisɛ wo na [osuro a ɛte sɛɛ] fata wo. Na amanaman anyansafo nyinaa mu ne wɔn ahene nyinaa mu, obiara nni hɔ a ɔte sɛ wo. Na wɔn nyinaa [amanaman no ne wɔn ahemfo] yɛ mmoa ne nkwasea ahoni kasakyerɛ! Ɛyɛ dua! [dua a wɔde dwetɛ ne sika ne ntade ahyehyɛ no te sɛ onyame].”​—Yer. 10:6-8.

 6. Aman abien a wodi kan bɛn na wɔbɔɔ wɔn din wɔ Noa nna mu nsuyiri no akyi, na dɛn na Bible no kyerɛ wɔ sɛ́ Yehowa yɛ wɔn Hene anaasɛ ɛnte saa no ho?

⁶ Ɔkwan bɛn so na Yehowa Nyankopɔn yɛ “amanaman hene” wɔ Yeremia nna no mu? So amanaman a wɔnyɛ Yudafo anaa Amanaman Mufo no penee no so sɛ wɔn Hene? So ɔno na ɔhyehyɛɛ wɔn ahenni horow anaasɛ osisii nhemfo ne wɔn adehye no? So ɔno na ɔhyehyɛɛ nniso no maa wɔn na ɔmaa wɔn mmara anaasɛ ɔne wɔn hyɛn apam mu sɛnea ɛbɛyɛ na wɔne no aba abusuabɔ a ɛkyekyere wɔn mu? Wiɛ, amanaman a wodi kan a Bible no bɔɔ wɔn din wɔ Noa nna mu nsuyiri no akyi ne Babilon (Babel) ne Asiria. So ɛsɛ sɛ yɛte ase sɛ Yehowa ne wɔn Hene? Ɛbɛyɛ dɛn na eyi aba saa? Efisɛ Genesis 10:8-12 (NW) ka kyerɛ yɛn sɛ:

“Na Kus [Noa banana] woo Nimrod. Ɔno na ofii ase yɛɛ ɔhoɔdenfo asase so. Oyii ne ho adi sɛ ɔbɔmmɔfo hoɔdenfo a ɔde tia Yehowa. Ɛno nti na wɔka sɛ: Te sɛ Nimrod, ɔbɔmmɔfo hoɔdenfo a ɔsɔre tia Yehowa.’ Na n’ahenni mfiase bɛyɛɛ Babel [Babilon] ne Erek ne Akad ne Kalne a ɛwɔ Sinear asase so. Saa asase no so na ofi kɔɔ Asiria na ofii ase kyekyee Niniwe ne Rehobot-Ir ne Kala ne Resen a ɛda Niniwe ne Kala ntam no: eyi ne kurow kɛse no.”​—Hyɛ Genesis 2:14; 1 Be. 1:10 nsow.

 7. Tete asɛm bɛn na esii a ɛbɛkyerɛ sɛ́ Yehowa yɛ Babilon Ahemman foforo no a na ɛwɔ Yeremia nna mu no so Hene?

⁷ Bere a Babilon (Babel) adansifo no gu so si wɔn ‘Babel abantenten’ anaasɛ ziggurat no ama ɔsom no, dɛn na ɛbae a esiw wɔn kwan a amma wɔanwie adwuma no? Yehowa fii ase yɛɛ nea ɔkae yi: “Yɛnkɔyɛ wɔn kasa basabasa, na wɔn mu biara ante ne yɔnko kasa [ase] bio.” Dɛn na efii mu bae? Amanaman a wɔka kasa horow; efisɛ yɛkenkan sɛ: “Na efi hɔnom [Babel] na Awurade [Yehowa] bɔɔ wɔn hwetee asase nyinaa ani, na wogyaee kurow no kyekye. Enti na wɔfrɛ hɔ Babel [ase ne, Basabasa], efisɛ ɛhɔ na Awurade [Yehowa] yɛɛ asase nyinaa kasa basabasa.” (Gen. 11:7-9) Ɛda adi sɛ ɛnde na Yehowa nyɛ Ɔhene wɔ saa Babilonia Ahemman a edi kan no mu, na saa ara na ɔnyɛ Babilonia Ahemman foforo a na ɛwɔ Yeremia nna mu no so Hene. Saa Babilonia Ahemman foforo no nyame ne Bel anaasɛ Merodak (Marduk) , a Ɔhempɔn Nebukadnesar som no no. (Yer. 50:1, 2) Yehowa nyɛ Babilonfo nyame.

 8, 9. (a) Ɛhefo na Amanaman mufo a aka no som wɔn sɛ wɔn sodifo a wakorɔn kyɛn nnipa? (b) Ɔkwan bɛn so na Satan daa no adi kyerɛɛ Yesu sɛ ɔno ne nea Yesu frɛɛ no sɛ “Wi yi ase sodifo” no?

⁸ Amanaman mu nnipa ahorow wɔ wɔn aman no anyame a wobu wɔn sɛ sodifo na wɔyeyɛ wɔn ahoni som wɔn. Sɛ nhwɛso no, Amonfo som atoro nyame bi a wɔfrɛ no Molek, din a ase ne “Nea Odi Hene,” anaasɛ “Ɔhene.” (Lev. 18:21; 20:2-5; 1 Ahe. 11:7; Aso. 7:43) Saa amanaman yi som ahonhommɔne. (1 Kor. 10:20) Nea ɔhwɛ saa adaemone a wonhu wɔn yi nyinaa so ne Satan Ɔbonsam. Wɔfrɛ no wɔ 2 Korintofo 4:4 sɛ “wi yi ase nyame.”

⁹ Bere a ɔrekyerɛ sɛ ɔno na ɔyɛ ɔhene wɔ wiase amanaman nyinaa so no, Satan Ɔbonsam bɔɔ mmɔden sɛ ɔbɛdaadaa Yesu Kristo denam nsɛm yi so: “Wo na mede tumi yi nyinaa ne emu anuonyam [asase a nnipa te so no mu ahenni horow nyinaa] mɛma wo; na wɔde ahyɛ me nsa, na obiara a mepɛ no, mede mema no; enti sɛ wokotow sɔre me a, ne nyinaa bɛyɛ wo dea.” (Luka 4:5-7) Nanso Yesu powee sɛ ɔbɛyɛ ɔdesani hene wɔ Onyankopɔn tamfo kɛse no ase. Enti, bere a aka kakraa bi na wawu no, Yesu kaa Satan Ɔbonsam ho asɛm sɛ “wi yi ase sodifo.” (Yoh. 12:31; 14:30; 16:11) Bible mu nhoma a etwa to, a wɔkyerɛw wɔ Yeremia nna no akyi mfirihyia ahanson no ka sɛ, na “wiasefo nyinaa” resom Satan Ɔbonsam ne n’amammui ahyehyɛde a wɔyɛɛ ho mfonini sɛ aboa a ɔwɔ ti ason no.​—Adi. 13:3, 4.

10. (a) Dɛn so na wogyina ka sɛ Yehowa ne Israel man no Hene biako pɛ de kosii sɛ wɔpow Mesia no? (b) Ɛwom sɛ “wiase ahenni” bɛyɛɛ Yehowa ne ne Kristo no de wɔ 1914 mu de, nanso dɛn na amanaman no pow sɛ wɔbɛyɛ?

¹⁰ Israelfo no penee Yehowa Nyankopɔn so wɔ tete hɔ sɛ wɔn Awurade ne Ɔhene. Nea ɛne eyi hyia no odwontofo a honhom ka no no kɔɔ so kae sɛ: “Oyi n’asɛm kyerɛ Yakob, ɔde n’ahyɛde ne n’atemmude kyerɛ Israel. Ɔnyɛɛ ɔman biara saa ɛ, na n’atemmu no wonnim. Munyi Awurade [Yehowa] ayɛ [anaasɛ Haleluya]!” (Dw. 147:5, 19, 20; 145:1, 12, 13) Enti na wiase Amanaman no nyɛ Yehowa Nyankopɔn ahenni horow. Teokrase nniso a ɔhyehyɛe wɔ tete Israel so wɔ odiyifo Mose nna mu no ne Onyankopɔn asase so ahenni biako pɛ de kosii sɛ Israel man no pow Onyankopɔn Ba Yesu Kristo, sɛ Mesia a ofi Nyankopɔn hɔ. (Ex. 15:18-21; Deut. 33:2-5; 1 Be. 29:11, 12, 23; Mat. 21:43) Nea edi kan no, efi bere a Amanaman Mmere no baa awiei wɔ 1914 Y.B. mu yi ansa na “wiase ahenni ayɛ yɛn Awurade ne Kristo no de”; nanso wiase amanaman no da so ara pow sɛ wɔbɛma Yehowa ayɛ wɔn Hene.​—Adi. 11:15-18.

“AMANAMAN HENE” WƆ ƆKWAN BƐN SO?

11. Adwene bɛn na Yeremia gyinaa so de frɛɛ Yehowa sɛ “amanaman Hene” no?

¹¹ Adwene bɛn na ɛnde Yeremia betumi agyina so afrɛ Yehowa sɛ “amanaman Hene”? Adwene a ogyinaa so yɛɛ saa no fi sɛ wɔ wɔn a na wɔyɛ ahene wɔ amanaman no nyinaa mu anaasɛ wɔ wɔn a wɔayɛ wɔn ahemfo pɛn mu no, Ɔno nkutoo ne nea ɔyɛ Ɔhene soronko wɔ wɔn mu. Ɔno na odii so sɛ ahene mu Hene, Ɔhene a Ɔkorɔn Kyɛn Obiara, Nea odi ahemfo a aka nyinaa so. Mose ka kyerɛɛ Israel wɔ tete hɔ, wɔ afe 1473 A.Y.B. mu sɛ: “Na Yehowa mo Nyankopɔn yɛ anyame mu Nyankopɔn ne awurade mu Awurade, Onyankopɔn kɛse, otumfoɔ a ne ho yɛ hu.” (Deut. 10:17, NW) Akyiri no odwontofo a honhom ka no no ka kyerɛɛ Yehowa nkurɔfo sɛ: “Monna anyame mu Nyankopɔn ase, na n’adɔe wɔ hɔ daa. Monna awuranom mu Owura no ase: . . . nea ɔbobɔw ahemfo akɛse: . . . na okunkum ahene anuonyamfo: . . . Amorifo hene Sihon: . . . ne Basan hene Og mpo: na ɔde wɔn asase mae sɛ agyapade ɔde yɛɛ n’akoa Israel agyapade.” (Dw. 136:2, 3, 17-22, NW) Ɔnam ɔkwan a ɛte sɛɛ so bedi “amanaman nyinaa” so, a ɛmfa ho sɛ wɔwɔ wɔn ankasa adaemone ne nnipa nniso.​—Yer. 9:25, 26.

12. Ɔkwan bɛn so na Yehowa yɛɛ mfatoho de kyerɛkyerɛɛ mu kyerɛɛ Yeremia sɛ Ɔno ne “amanaman Hene” no?

¹² Enti Yehowa betumi aka akyerɛ Yeremia. sɛ: “Hwɛ, ɛnnɛ da yi, mede wo masi amanaman so ne ahenni horow so.” (Yer. 1:10) Sɛ́ Yeremia frɛɛ no wɔ ɔkwan a ɛfata so sɛ “amanaman Hene” no, Yehowa yɛɛ eyi ho mfatoho maa no. Yehowa hyɛɛ no sɛ ɔnkɔ ɔnwemfo fi. Bere a ade a ɔreyɛ no sɛee sɛ ɔnwemfo nsam dɔte, na ɔsan de yɛɛ ade foforo, sɛnea ɛteɛ ɔnwemfo no ani so sɛ ɔbɛyɛ no, Yehowa ka kyerɛɛ no sɛ:

“So merentumi nyɛ mo, Israel fi, sɛ ɔnwemfo yi? . . . Hwɛ, sɛ́ dɔte te ɔnwemfo nsam no, saa ara na mo, Israel fi, mo nso mote me nsam. Mpofirim na mekasa ɔman anaa ahenni bi ho, sɛ metu na madwerɛw na masɛe no. Na sɛ ɔman no san fi ne bɔne a mekaa ho asɛm no mu a, ɛnde minu me ho adebɔne a misusuwii sɛ mɛyɛ wɔn no ho. Na mpofirim nso na mekasa ɔman anaa ahenni bi ho sɛ mede mesi hɔ na matɛw. Na sɛ wɔyɛ m’ani so bɔne ntie me a, ɛnde minu me ho yiye a mekae sɛ mɛyɛ wɔn no ho.”​—Yer. 18:1-10; afei nso hwɛ Yeremia 1:10.

13. Ɔkwan bɛn so na Yehowa Ɔnwemfo Kɛse no dii saa adeyɛ mmara no ara akyi wɔ tete Misraim ne Israel ho?

¹³ Mfehaha pii ansa na ɔreka asɛm a ɛte sɛɛ no na Yehowa adom Misraim asase no wɔ Yosef a ɔyɛ Yakob babarima a wɔayɛ no aduan sohwɛfo no nna no mu. Nanso, wɔ Yosef wu akyi bere bi, bere a Misraim Faraonom fii ase sɛ wɔbɛhyɛ Yosef nkurɔfo, Yakob (anaasɛ Israel) asefo no so, na wɔbɔɔ mmɔden mpo sɛ wɔbɛtɔre wɔn ase afi asetra mu no, Yehowa de ne ho hyɛɛ mu. Ɔde ɔhaw baa Misraim asase no so na ɔsɛee Farao ne n’asraafo dɔm no na ogyee Ne nkurɔfo a wapaw wɔn, Israel nkwa. (Dw. 136:10-16; Rom. 9:17, 18, 21-24) Wɔ saa adeyɛ mmara no ara so no, bere a Yuda ahenni no tew atua tiaa Onyankopɔn a ɔne no wɔ apam mu na ɔkɔɔ so ara wɔ ne kwammɔne no mu no, Yehowa a ɔyɛ Ɔnwemfo Kɛse no bɔɔ ne tirim sɛ obebutuw Israel ahenni no. (Yer. 18:11-17) Saa atuatewfo no mpo de bɔne tuaa Yehowa diyifo Yeremia a ɔhwehwɛ sɛ ɔyɛ wɔn papa no so ka. Hwɛ, wɔyɛɛ nhyehyɛe mpo sɛ wobekum Yeremia. (Yer. 18:18-20, 23) Enti awiei no, ɛbɛyɛɛ nea Yeremia penee so sɛ Yehowa de afɔbu atemmu bɛba saa atuatewfo no so.​—Yer. 18:21, 22.

14. Dɛn nti na ɛsɛ sɛ yɛn a yɛte ase nnɛ, sɛ́ nnipa nkorɛnkorɛ no, yɛde saa abakɔsɛm mu nhwɛso horow a ɛfa ɔkwan a Ɔnwemfo Kɛse no fa so di dwuma no sie yɛn komam?

¹⁴ Saa abakɔsɛm mu nhwɛso horow yi yɛ biribi ma amanaman nyinaa, titiriw wɔn a wɔwɔ Kristoman mu no, na wɔde asie wɔn komam nnɛ. Anyɛ yiye koraa no ɛsɛ sɛ yɛn nnipa nkorɛnkorɛ no yɛ saa. Yehowa, Ɔnwemfo Kɛse no da so ara yɛ opumpuni, na ɔreba abɛda ne ho adi akyerɛ adesamma nyinaa sɛ ɔda so ara yɛ “Amanaman Hene.” Ɛnnɛ, ne bere a ɛsen bere nyinaa a Yeremia nsɛm a edidi so yi abam nokware:

“Na [nea ɛne atoro anyame a wodii kan kyerɛkyerɛɛ mu ansa na eyi reba no bɔ abira no] Awurade [Yehowa] ne nokware Nyankopɔn no, ɔne Onyankopɔn teasefo ne daa hene; n’abufuw nti asase wosow, na amanaman ntumi n’abufuhyew. Nea monka nkyerɛ wɔn [amanaman no] ni: Anyame a ɛnyɛ wɔn na wɔyɛɛ ɔsoro ne asase no bɛyera afi asase so ne ɔsoro ase.a Ɔno na ɔde ne tumi yɛɛ asase, na ɔde ne nyansa maa wiase tim hɔ, na ɔde ne nhumu trɛw ɔsoro mu.”​—Yer. 10:1-12.

15. Dɛn nti na Yehowa wɔ nea obegyina so ahwie n’abufuhyew agu amanaman no so no, na obedi ho dwuma dɛn?

¹⁵ So atirimpɔw bi wɔ hɔ a ɛno nti ɛsɛ sɛ Yehowa Nyankopɔn, Ɔbɔadeɛ no yi n’abufuhyew adi nnɛ? Wiɛ, momma yensusuw sɛnea obu a wonni mma ne mmara horow no atrɛw wɔ wiase nyinaa animtiaa a wobu ne din, nsɛmmɔnedi, anigyede a wɔdɔ sen sɛ wobenya ɔdɔ ama Onyankopɔn, ahohwibɔ, ɔsom mu nyaatwomyɛ, wɔn a wɔyɛ nnɛ bere mu Yeremia kuw no a wɔtaa wɔn, pow a amanaman no pow sɛ wɔbɛbrɛ wɔn ho ase ama Yehowa ahenni a ɛwɔ Kristo nsam a atrɛw no ho. Ɛda adi pefee sɛ wɔ saa nneɛma yi nyinaa nti na atirimpɔw a eye wɔ hɔ a ɛno nti ɛsɛ sɛ Yehowa Nyankopɔn, Ɔnwemfo Kɛse no yi n’abufuhyew adi. Ɛrenkyɛ na obeyi no adi sɛnea ɔyɛe wɔ Yeremia nna mu de sɛee Yerusalem ne Yuda ahenni no.

16. Dɛn nti na amanaman a wɔyɛ nsɛmmɔnedifo no “ntumi” nnyina Yehowa abufuhyew a ohwie gu wɔn so no ano no?

¹⁶ Yehowa akasa atia nsɛmmɔnedi nyinaa wɔ n’Asɛm a, wɔakyerɛw a ɛne Bible no mu. Ɛrenkyɛ na ɔbɛsɛe nneɛma a wakasa atia yi. Sɛ n’abufuhyew no ba a “amanaman ntumi.” Wɔn “anyame” no nneɛma a wɔsom wɔn sɛ ahoni no bɛyɛ nea enni tumi biara na wɔbɛyera. Wɔn asɔrefo no ne wɔn bɛyera.

17. Ɛhefo na wɔteɛm frɛ mmoa fi yɛn Boafo biako no hɔ, na dɛn ntia?

¹⁷ Enti na ɛyɛ nea ntease wom sɛ yɛbɛka sɛ yɛn boafo biako ne nokware Nyankopɔn teasefo no, “amanaman Hene” no. Nteɛm ma mmoa fi baabiara kɔ ne kyɛn, efi wɔn a wɔte sɛ Yeremia a wokyi anaa wɔtan tebea horow a Onyankopɔn suro nnim a ɛwɔ hɔ no hɔ, ne afei nso afoforo nyinaa a “wosisi apini di akyide a wɔyɛ wɔ mu no” hɔ, titiriw nneɛma a wɔyɛ wɔ Kristoman a ɔyɛ nyaatwom mu no. (Hes. 9:4) Wɔn koma abubu efisɛ “mmubui” anaasɛ apirakuru a ɛte sɛ nea Yeremia kyerɛkyerɛɛ mu no da amanaman nyinaa so esiane nokware a ɛyɛ sɛ wɔn sodifo no anhwehwɛ Yehowa akyi kwan sɛ wɔn boafo biako pɛ no nti. (Yer. 10:19-22) Wɔn Amanaman Nkabom ahyehyɛde no bedi huammɔ sɛ́ ade a wɔbɛfa so de wiase asomdwoe ne dwoodwoo asetra aba. Adesamma nhyehyɛe nyinaa a wɔde bɛkyerɛ abakɔsɛm kwan na wɔde asiw ɔsɛe a ebefi Ɔnwemfo Kɛse no nsam aba no kwan no bɛyɛ ɔkwa.

18, 19. Ɔkwan bɛn na amammui tumidifo no fa so dannan anaa wɔkyerɛ wɔn ankasa kwan, na ɔkwan bɛn so na wɔbɛfa akyerɛ wɔn sɛ enni wɔn nsam sɛ wɔbɛyɛ saa?

¹⁸ Bere a yɛapɛɛpɛɛ kɔkɔbɔ nhwɛso horow a ɛwɔ abakɔsɛm mu no mu no, ɛsɛ sɛ yɛne Yeremia yɛ adwene bere a ɔka sɛ: “Awurade [Yehowa] mahu sɛ onipa kwan nni ne nsam, enni ɔbarima nsam, sɛnea ɔnam a obetutu n’anammɔn.”​—Yer. 10:23.

¹⁹ Esiane sɛ onipa tumi nantew nti, obesusuw sɛ ɛnde obetumi anantew wɔ ɔkwan biara a ɔpɛ so na wadu faako a ɔrekɔ. Ɔbɛte nka sɛ eyi mfa Yehowa Nyankopɔn ho hwee. Enti amammui mu sodifo no bɔ mmɔden sɛ wobedi wɔn aman mu nsɛm ho dwuma bere a wobu wɔn ani gu Bible abakɔsɛm mu asuade ahorow so. Wodi nnɛ bere mu Yeremia kuw no ho fɛw esiane sɛ wɔka wiase amanehunu a ɛbɛba wɔ “ahohiahia kɛse” no mu no ho asɛm nti. (Mat. 24:3, 21, 22) Wɔmmfa Bible nkɔmhyɛ nyɛ biribiara na wosusuw sɛ wobetumi ahu nea ebefi nsɛm mu aba na wɔbɛdannan wɔn anammɔn akɔ daa asomdwoe ne yiyedi mu. Ɛwom sɛ wɔda so ara di amansɛm, sikasɛm ne ɔsom ho dwuma sɛnea wɔpɛ de, nanso Yehowa, sɛ́ “amanaman Hene” no bɛma wɔahwe ase akɔ ɔsɛe a wɔkaa ho asɛm siei no mu wɔ “ahohiahia kɛse” a wɔrentumi nkwati da no mu.

20. Yɛbɔ Yehowa mpae sɛ ɔnteɛ yɛn so te sɛ nea Yeremia yɛe no nkosi hefa, na dɛn ntia?

²⁰ Nteɛso a efi Onyankopɔn hɔ ne nea yɛn nyinaa hia. Enti yɛbɛpɛ sɛ yɛbɔ mpae sɛnea Yeremia yɛe no na yɛde akwati dwerɛw a wɔbɛdwerɛw yɛne adesamma a aka no: “Awurade [Yehowa] teɛ me so, nso yɛ no sɛnea ɛfata [anaa nea ehia me] nko; ɛnyɛ w’abufuw so [wɔ ahohiahia kɛse no mu], na wɔannwerɛw me. Ma w’abufuhyew ngu amanaman a wonnim wo [anaasɛ wɔn a wɔanhu wo] ne mmusua a wɔmmɔ wo din no so, efisɛ [Babilonfo ne wɔn ahokafo] wɔatetew Yakob, wɔatetew no amene no, na wɔayɛ ne trabea no amamfo.”​—Yer. 10:24, 25; Dw. 79:6, 7.

21. Ɛhena na yebegyaw atɛntrenee ho dwuma a wobedi atia wɔn a wɔbɔ mmɔden sɛ wɔbɛtɔre yɛn ase wɔ yɛn adeyɛ kwan no nti no ahyɛ ne nsam?

²¹ “Amanaman Hene’” no na wɔbɔɔ no saa mpae yi. Ɔno na yebegyaw ne trenee atemmu a ɔde bɛba wɔn a wobu wɔn ani gu no so na wɔde nitan bɔ mmɔden sɛ wɔbɛtɔre wɔn a wɔpene no so na wɔde nokwaredi gyina n’amansan tumidi no akyi no ase no ho asɛm ahyɛ ne nsam. Yɛma yɛn nne so teɛm frɛ mmoa fi nea ne nkutoo yɛ yɛn boafo no hɔ.

[Ase hɔ asɛm]

June Da Biara Da Asɛm

(Wopɛ nsɛm a wɔahyehyɛ no nyinaa a, hwɛ nhoma no mu)