Hena na Ɔkyerɛ Wo Nea Ɛsɛ sɛ Woyɛ?

“ƐNYƐ obi na ɔkyerɛ me nea minnwen! Na ɛnyɛ obi na ɔkyerɛ me nea menyɛ!” Mpɛn pii no, saa a wobɛka asi so dua no kyerɛ sɛ wowɔ w’ankasa ho ne gyinae ahorow a wusisi mu ahotoso dodo. So saa na wote nka? Ntease wom sɛ ɛnsɛ sɛ obi na osi gyinae ma wo. Nanso so nyansa wom sɛ wobɛpo afotu bi a biribi pa betumi afi mu aba no ntɛm ara? So obiara nni hɔ a obetumi aboa wo ma woasisi gyinae a nyansa wom? Sɛnea ɛte no, wubetumi anya ahotoso ankasa sɛ ɛnyɛ obi na ɔrekyerɛ wo nea ɛsɛ sɛ woyɛ, bere a wunnim mpo?

Sɛ nhwɛso no, ansa na wiase ko a ɛto so abien reba no, Joseph Goebbels a na ɔyɛ soafo a ɔma nkurɔfo gye Hiltler tom no gyee Germany sini adwumakuw no dii so. Dɛn ntia? Efisɛ ohui sɛ eyi bɛma wanya adwinnade a ɛwɔ tumi kɛse a obetumi de “akɛntɛn nkurɔfo gyidi ne wɔn nneyɛe so.” (Propaganda and the German Cinema 1933-1945) Ebia wunim sɛnea otumi faa saa kwan yi ne akwan foforo so nyaa nnipa pii—wɔn a wɔn adwene mu da hɔ ne wɔn a wonim nyansa nyinaa—ma wodii Nasi nyansapɛ akyi a na wonnim.

Nokwasɛm no ne sɛ wɔn a wutie wɔn no nkate ne wɔn nsusuwii nya wo nsusuwii ne wo nneyɛe so nkɛntɛnso ɔkwan bi so bere nyinaa. Nokwarem no, mfomso bi nni eyi ho. Sɛ eyinom yɛ nnipa a wodwen wo yiyedi ho—te sɛ akyerɛkyerɛfo, nnamfo, anaa awofo—a, ɛnde wubenya wɔn afotu mu mfaso kɛse. Nanso sɛ wɔyɛ nnipa a wɔn ankasa yiyedi nkutoo ho na wodwen, na wɔn ankasa nsusuwii da adi sɛ wɔadaadaa wɔn anaasɛ wɔn nneyɛe aporɔw, “asowuifo,” sɛnea ɔsomafo Paulo kaa wɔn ho asɛm no a, ɛnde hwɛ yiye!—Tito 1:10; Deuteronomium 13:6-8.

Enti, ɛmma wo tirim nnyɛ wo dɛ na nsusuw sɛ obiara ntumi nnya wo so nkɛntɛnso da. (Fa toto 1 Korintofo 10:12 ho.) Akyinnye biara nni ho sɛ afoforo renya wo so nkɛntɛnso dedaw—ɛrekɔ so mpɛn pii sen sɛnea wubegye atom—a wunnim mpo. Fa aguade a sɛ worekodi gua a wopɛ sɛ wotɔ no sɛ nhwɛso ketewa bi. So ɛyɛ nea bere nyinaa efi w’ankasa wo gyinaesi ne wo nsusuwii mu? Anaasɛ nnipa foforo a mpɛn pii no, wunhu wɔn, a wɔyɛ anifere nanso wɔwɔ tumi no na wɔkyerɛ wo nea ɛsɛ sɛ wopaw? Sɛnkyerɛwfo nhwehwɛmufo Eric Clark susuw sɛ ɛyɛ wɔn na wɔkyerɛ wo nea ɛsɛ sɛ wopaw. Ɔka sɛ: “Dodow a yɛte aguade ho dawurubɔ no, dodow no ara na yenhu nkɛntɛnso a ɛwɔ, nanso ɛkame ayɛ sɛ, ɛda adi sɛ dodow no ara na enya yɛn so nkɛntɛnso.” Ɔsan bɔ amanneɛ sɛ sɛ wobisa nkurɔfo sɛnea wɔte nka wɔ aguade ho dawurubɔ ho nkɛntɛnso ho a, “wɔn mu dodow no ara gye tom sɛ ɛyɛ adwuma, nanso ɛnyɛ wɔn so.” Enti nkurɔfo taa susuw sɛ enya afoforo so nkɛntɛnso, na ɛnyɛ wɔn. “Wɔn fam de, ɛte sɛ nea entumi nnya wɔn so nkɛntɛnso.”—The Want Makers.

So Satan Rekyerɛ Wo Nea Ɛsɛ sɛ Woyɛ?

Sɛ́ ebia da biara da aguade ho dawurubɔ renya wo so nkɛntɛnso no nyɛ biribi a ɛyɛ hu. Nanso, nkɛntɛnso foforo bi wɔ hɔ a ɛyɛ hu yiye. Bible da no adi pefee sɛ Satan ne nea ɔde nkurɔfo refa akwammɔne so. (Adiyisɛm 12:9) Ne nyansapɛ te sɛ aguade ho dawurubɔfo bi a ɔkae sɛ akwan abien na ɛwɔ hɔ a wɔfa so nya adetɔfo so nkɛntɛnso no—“sɛ́ wɔbɛdaadaa wɔn anaasɛ wɔbɛyɛ ma wɔadi tebea a ɛrekɔ so akyi.” Sɛ wɔn a wɔsesa nkurɔfo adwene ne aguade ho dawurubɔfo betumi afa anifere akwan a ɛte saa so adi wo nsusuwii so a, ɛnde hwɛ ahokokwaw kɛse a Satan wɔ sɛ ɔde akwan a ɛte saa ara betumi adi dwuma!—Yohane 8:44.

Ná ɔsomafo Paulo nim eyi. Osuroe sɛ ebia ne mfɛfo Kristofo no bi begyae wɔn ho mu ama Satan adaadaa wɔn. Ɔkyerɛwee sɛ: “Misuro sɛ ebia, sɛnea ɔwɔ no de n’anitew bɛdaadaa Hawa no, saa ara nso na wɔbɛsɛe mo adwene afi Kristo fam kronnyɛ no ho.” (2 Korintofo 11:3) Fa saa kɔkɔbɔ no aniberesɛm. Anyɛ saa a wubetumi ayɛ sɛ wɔn a wogye di sɛ nnaadaasɛm ne adwene a wɔtwe si biribi so no yɛ adwuma—“nanso ɛnyɛ wɔn so” no. Nokwasɛm a ɛyɛ sɛ Satan nnaadaasɛm yɛ adwuma no da adi wɔ atirimɔdensɛm, ahohwibra, ne nyaatwom a atwa yɛn ho ahyia wɔ saa awo ntoatoaso yi mu no mu.

Enti, Paulo paa ne mfɛfo Kristofo kyɛw sɛ ‘wɔnnyɛ wɔn ho sɛ wiase yi.’ (Romafo 12:2) Bible nkyerɛasefo bi de n’ankasa nsɛm kaa Paulo nsɛm no ho asɛm wɔ saa kwan yi so sɛ: “Mommma wiase a mote mu no nnhyɛ mo so.” (Romafo 12:2, Phillips) Satan bɛbɔ mmɔden biara sɛ ɔbɛhyɛ wo ma woayɛ nea ɔpɛ, te sɛ nea tete nwemfo miamia dɔte so hyɛ adaka mu ma agyiraehyɛde ba ho na ɛyɛ sɛ nea ɔpɛ no. Satan asiesie wiase amammui, aguadi, nyamesom, ne anigyede sɛ ɛnyɛ saa. Ne nkɛntɛnso atrɛw dɛn? Atrɛw kɛse sɛnea na atrɛw wɔ ɔsomafo Yohane bere so no. Yohane kae sɛ: “Wiase nyinaa da ɔbɔne no mu.” (1 Yohane 5:19; hwɛ 2 Korintofo 4:4 nso.) Sɛ w’adwenem yɛ wo nnaa wɔ sɛnea Satan tumi daadaa nkurɔfo sɛe wɔn nsusuwii no ho a, kae sɛnea otumi de saa yɛɛ Israel man no nyinaa a na wɔahyira wɔn ho so ama Onyankopɔn no. (1 Korintofo 10:6-12) So ade koro no ara betumi ato wo? Sɛ wubue w’adwenem ma Satan nnaadaasɛm no a, ebetumi aba saa.

Hu Nea Ɛrekɔ So

Sɛnea ɛte no, sɛ woma ho kwan nkutoo a na saa nnaadaa tumi no betumi adi wo nsusuwii so. Wɔ ne nhoma The Hidden Persuaders mu no, Vance Packard kaa saa asɛm yi: “Yɛda so ara wɔ ahobammɔ a emu yɛ den a etia saa nnaadaafo a [wɔahintaw] no: Sɛ yɛpɛ a yɛremma wɔnnaadaa yɛn. Sɛ yenim nea ɛrekɔ so a, ɛkame ayɛ sɛ wɔ tebea biara mu no, yɛda so ara wɔ nea yebetumi apaw, na wontumi nnaadaa yɛn nkɔ akyiri.” Saa ara na wontumi nnan yɛn adwene nsisi yɛn.

Nokwarem no, sɛ ‘wubehu nea ɛrekɔ so’ a, ɛsɛ sɛ woma w’adwenem da hɔ, na wode nneɛma pa hyɛ mu. Te sɛ nipadua a ɛte apɔw no, sɛ adwene bɛyɛ adwuma yiye a, ɛsɛ sɛ wɔde nneɛma pa hyɛ mu. (Mmebusɛm 5:1, 2) Sɛ wɔamfa hwee anhyɛ mu a ebetumi adi awu te sɛ nea wɔde atosɛm ahyɛ mu ara pɛ. Enti bere a ɛyɛ nokware sɛ ehia sɛ wobɔ w’adwene ho ban fi nnaadaasɛm ne nyansapɛ ahorow ho no, bɔ mmɔden sɛ wunnya afotu anaa asɛm biara a wɔde ma wo no ho abufuw anaa adwene a ɛmfata.—1 Yohane 4:1.

Nsɛm a wofi nokwaredi mu ka ma obi sesa n’adwene nte sɛ nnaadaa nsɛm a wonhu akyi. Nokwarem no, ɔsomafo Paulo bɔɔ aberantewa Timoteo kɔkɔ sɛ ɔnhwɛ ne ho yiye efisɛ “nnipa bɔne asisifo bɛkɔ wɔn anim wɔ bɔne mu, wɔdaadaa, na wɔdaadaa wɔn.” Nanso Paulo de kaa ho sɛ: “Na wo de, tra nea woasua na woahu mu nokware no mu. Wunim onii ko a wusuae ne nkyɛn no.” (2 Timoteo 3:13, 14) Esiane sɛ biribiara a ɛkɔ w’adwene mu benya wo so nkɛntɛnso ɔkwan bi so nti, nea ɛsɛ sɛ woyɛ ne sɛ ‘wubehu nnipa a wusua nneɛma fi wɔn nkyɛn no,’ na woahwɛ ahu sɛ wɔyɛ nkurɔfo a wodwen wo yiyedi ho, ɛnyɛ wɔn ankasa de ho.

Wo na ɛsɛ sɛ wopaw nea wopɛ. Wubetumi apaw sɛ ‘wubedi wiase yi akyi’ denam wiase yi nyansapɛ ahorow ne nneɛma a wosusuw sɛ ɛsom bo a wobɛma adi wo nsusuwii so no so. (Romafo 12:2) Nanso saa wiase yi nnwen wo yiyedi ho. Enti, ɔsomafo Paulo bɔ kɔkɔ sɛ: “Monhwɛ yiye na obi amfa nyansapɛ ne nnaadaa hunu a ɛnam nnipa atetesɛm . . . so ammɛfa mo nnommum.” (Kolosefo 2:8) Ɛnyɛ den sɛ wobɛba Satan nkɛntɛnso ase wɔ saa kwan yi so, anaasɛ ‘ɔbɛfa wo nnommum.’ Ɛte sɛ sigaret wusiw a ɛkɔ obi a ogyina ne baabi mu. Ebetumi ahaw wo bere a wohome mframa a asɛe kɛkɛ no.

Nanso, wubetumi akwati saa “mframa” no a wobɛhome no. (Efesofo 2:2) Tie Paulo afotu yi: “Momfa adwenem foforoyɛ nsakra mo ho, na moasɔ nea Onyankopɔn pɛ a eye, na ɛsɔ ani, na ɛyɛ pɛ no ahwɛ.” (Romafo 12:2) Eyi gye mmɔdenbɔ. (Mmebusɛm 2:1-5) Kae sɛ, Yehowa nhyɛ nkurɔfo so. Ɔda nsɛm a nnipa hia nyinaa adi, nanso sɛ wubenya mu mfaso a, ɛsɛ sɛ wutie na enya wo nsusuwii so nkɛntɛnso. (Yesaia 30:20, 21; 1 Tesalonikafo 2:13) Ɛsɛ sɛ wunya ɔpɛ sɛ wode nokware a ɛwɔ “nkyerɛwee kronkron,” Onyankopɔn Asɛm a efi honhom mu, Bible, mu no bɛhyɛ w’adwene mu.—2 Timoteo 3:15-17.

Ma Yehowa Nnwene Wo

Sɛ wubenya Yehowa adenwene so mfaso a, ɛho hia sɛ wufi ɔpɛ ne osetie mu pene so, sɛnea wɔakyerɛkyerɛ mu yiye bere a Yehowa ka kyerɛɛ odiyifo Yeremia sɛ ɔnkɔsra ɔnwemfo bi adwumayɛbea no. Yeremia hui sɛ ɔnwemfo no asesa n’adwene wɔ nea ɔde anwenne biako bɛyɛ no ho bere a ade a ɔreyɛ no ‘sɛee wɔ ɔnwemfo no nsam’ no. Afei Yehowa kae sɛ: “So merentumi nyɛ mo, Israel fi, sɛ ɔnwemfo yi? . . . Hwɛ, sɛ dɔte te ɔnwemfo nsam no, saa ara na mo, Israel fi, nso mote me nsam.” (Yeremia 18:1-6) So na ɛno kyerɛ sɛ Israelfo te sɛ dɔte tɔw a nkwa nnim wɔ Yehowa nsam a ɔde bɛyɛ anwenne biako anaa foforo sɛnea ɔpɛ?

Yehowa mfa ade nyinaa so tumi a ɔwɔ no nhyɛ nnipa mma wɔnyɛ nneɛma a wɔmpɛ; saa ara na ɛnyɛ ɔno na ɔma nneɛma sɛe, sɛnea ɛte wɔ onipa nwemfo ho no. (Deuteronomium 32:4) Nneɛma sɛe bere a wɔn a Yehowa bɔ mmɔden sɛ ɔbɛnwene wɔn ɔkwan pa so po n’akwankyerɛ no. Ɛno yɛ nsonsonoe kɛse bi a ɛda wo ne dɔte tɔw a nkwa nnim no ntam. Woyɛ obi a wutumi paw nea wopɛ. Bere a wutumi fi wo pɛ mu paw biribi no, wubetumi apaw sɛ wobɛma Yehowa anwene wo anaa wobɛboapa apo.

Asuade a anibere wom bɛn ara ni! Hwɛ ye a eye sɛ wubetie Yehowa nne mmom sen sɛ́ wubefi ahantan mu aka sɛ, “Ɛnyɛ obi na ɔkyerɛ me nea menyɛ”! Yɛn nyinaa hia Yehowa akwankyerɛ. (Yohane 17:3) Yɛ sɛ odwontofo Dawid a ɔbɔɔ saa mpae yi no: “[Yehowa, NW], kyerɛ me w’akwan, na fa me fa w’atempɔn so.” (Dwom 25:4) Kae nea Ɔhene Salomo kae no: “Onyansafo ntie, na n’adenim nnɔɔso.” (Mmebusɛm 1:5) So wubetie? Sɛ wutie a, ɛnde “adwempa bɛhwɛ wo so, na ntease abɔ wo ho ban.”—Mmebusɛm 2:11.