“Mɛma Ɔkra A Wabrɛ Ahome”

 1. Nneɛma pa a ɛbɛba wiase foforo no mu bɛn na worehwɛ kwan paa?

“WIASE foforo no.” Sɛ wote saa asɛm yi a, so w’adwene kɔ nneɛma papa a wɔahyɛ ho nkɔm sɛ ɛbɛba no bi so? Ebia w’adwene kɔ nipadua a ɛyɛ pɛ, aduan pa pii, mmoa a wɔnyɛ basabasa, anaa adan papa so. Ebia wubetumi akyerɛ kyerɛw nsɛm a ɛka nneɛma a wohwɛ kwan no ho nsɛm wɔ Bible mu. Nanso, mma wo werɛ mmfi asomdwoe ne abusuabɔ pa a wo ne Yehowa benya no. Sɛ eyinom nni hɔ a, ɛrenkyɛ na anigye a aka nyinaa asa.

2, 3. Nhyira soronko bɛn na nhoma ahorow a Yeremia kyerɛwee no boa yɛn ma yenya ho anidaso?

² Bere a Onyankopɔn rema Yeremia ahyɛ nkɔm sɛ Yudafo no bɛsan afi Babilon aba no, ɔtwee adwene sii sɛnea wɔbɛte nka no so. Ɔkae sɛ: “Wubekurakura wo mpintin, na woasaw sɛ wɔn a wɔresereserew.” (Monkenkan Yeremia 30:18, 19; 31:4, 12-14.) Onyankopɔn de asɛm bi kaa ho a ebetumi aka wo koma paa. Ɔkae sɛ: “Mɛma ɔkra a wabrɛ ahome, na mahyɛ ɔkra biara a watɔ piti mã.” NET Bible no ka ɛbɔ a Onyankopɔn hyɛe no ho asɛm sɛ: “Mɛma wɔn a wɔabrɛ anya nea wohia nyinaa, na mama wɔn a wɔabotow ho adwo wɔn koraa.”—Yer. 31:25.

³ Anidaso bɛn ara ni! Yehowa kae sɛ ɔbɛma nea wabrɛ ne nea n’abam abu ahome, anaa wanya nea ohia nyinaa. Nokwasɛm ne sɛ, sɛ Onyankopɔn hyɛ bɔ a, odi so. Nhoma ahorow a Yeremia kyerɛwee no ma yenya ahotoso sɛ yɛn nso yebenya nea yehia. Nea ɛsen saa no, ɛnnɛ mpo, saa nhoma ahorow no ma yehu sɛnea yebetumi anya nkuranhyɛ ne anidaso. Afei nso, ɛma yehu akwan pa a yebetumi afa so ahyɛ afoforo nkuran na yɛaboa wɔn ma wɔn akra a abrɛ no anya ɔhome.

 4. Dɛn nti na yebetumi ate nka te sɛ Yeremia?

⁴ Saa bɔhyɛ no na ɛkyekyee Yeremia werɛ, na ebetumi akyekye yɛn nso yɛn werɛ. Dɛn ntia? Kae asɛm bi a yɛkae wɔ nhoma yi Ti 1 no mu sɛ, na Yeremia te sɛ odiyifo Elia, na na ‘ɔyɛ onipa a ɔwɔ nkate te sɛ yɛn ara’ no. (Yak. 5:17) Wo de, susuw nneɛma kakraa bi a ɛtɔ mmere bi a na ɛma Yeremia abam tumi bu anaasɛ ɛma ɔyɛ basaa kakra no ho hwɛ. Bere a woreyɛ saa no, susuw sɛnea sɛ wokɔ tebea ahorow a ɛte saa mu a wobɛte nka ne nea enti a tebea ahorow a wowom betumi abu w’abam no ho hwɛ.—Rom. 15:4.

 5. Dɛn na na ebetumi abu Yeremia abam?

⁵ Ɛbɛyɛ sɛ nneɛma a ɛmaa Yeremia abam bui no mu bi fi ne kurom. Wɔtetee Yeremia wɔ Anatot. Ná ɛyɛ Lewifo kurow a ɛwɔ Yerusalem atifi fam apuei a efi Yerusalem rekɔ hɔ bɛyɛ kilomita kakra. Ɛbɛyɛ sɛ na odiyifo no wɔ amannifo ne ebia abusuafo wɔ Anatot. Yesu kae sɛ odiyifo nni nidi wɔ ne kurom, na saa na ɛtoo Yeremia. (Yoh. 4:44) Ɛnyɛ asɛm a na Yeremia reka no nko na ne kuromfo no antie anaa animtiaa kɛkɛ na wobuu no. Bere bi, Onyankopɔn kae sɛ na ‘Anatot mmarima rehwehwɛ Yeremia kra.’ Wɔde abufuw kae sɛ: “Nhyɛ nkɔm Yehowa din mu na woanwu yɛn nsam.” Wo de hwɛ, sɛ́ anka nnipa a wɔne no te mpɔtam ne ebia n’abusuafo begyina n’akyi no, wɔn mmom na wohunahunaa no!—Yer. 1:1; 11:21.

 6. Sɛ wɔn a wo ne wɔn yɛ adwuma anaa afoforo sɔre tia wo a, ɛbɛyɛ dɛn na woatumi anya nea ɛkɔɔ so wɔ “Anatot mmarima” ne Yeremia ntam no so mfaso?

⁶ Sɛ nnipa a wo ne wɔn te mpɔtam, wɔn a wo ne wɔn kɔ sukuu, wɔn a wo ne wɔn yɛ adwuma, anaa w’abusuafo binom mpo hyɛ wo so a, ma sɛnea Yehowa ne Yeremia dii no nkyekye wo werɛ. Saa bere no, Onyankopɔn kae sɛ ɔbɛdan ‘n’ani aba’ Anatotfo a na wɔresɔre tia ne diyifo no so. (Monkenkan Yeremia 11:22, 23.) Yeremia kuromfo no maa n’abam bui, nanso akyinnye biara nni ho sɛ awerɛhyem a Onyankopɔn de maa no no ma otumi dii so. Ná Onyankopɔn bɛdan n’ani ‘de mmusu aba Anatot mmarima no so’ akyiri yi, na ɔde baa wɔn so ampa. Enti nya awerɛhyem sɛ Yehowa rehwɛ nea worefa mu no, anaa n’ani wɔ so. (Dw. 11:4; 66:7) Sɛ ‘wobata’ Bible nkyerɛkyerɛ ho na woyɛ nea ɛteɛ a, ebetumi aboa asɔretiafo binom ma mmusu a anka ɛbɛba wɔn so no apare wɔn.—1 Tim. 4:16.

7, 8. Ayayade bɛn na wɔde yɛɛ Yeremia, na ɛkaa no dɛn?

⁷ Ɛnyɛ nsɛm kɛkɛ na Yeremia kuromfo de hunahunaa no. Ná ɔhaw no biako fi ɔbarima bi a ɔyɛ onipa titiriw wɔ Yerusalem, ɔsɔfo bi a na ne din de Pasur no hɔ.a Bere a “Pasur” tee sɛ Yeremia reka Onyankopɔn nkɔmhyɛ nsɛm no, ‘ɔboroo odiyifo Yeremia, na ɔde no bɔɔ dua mu.’ (Yer. 20:1, 2) Ebinom ka sɛ Pasur ma wɔhwee Yeremia anaasɛ wɔbɔɔ no mmaa 40. (Deut. 25:3) Bere a na Yeremia rehu amane wɔ ne were mu no, ɛbɛyɛ sɛ nkurɔfo dii no ho fɛw, didii no atɛm, anaa wɔtetee ntasu mpo guu no so. Asɛm no anso hɔ ara. Pasur maa wɔde Yeremia bɔɔ “dua mu” maa ade kyee. Hebri asɛmfua a wɔde dii dwuma no kyerɛ sɛ ɛmaa ne mu koae. Nokwarem no, wɔne Yeremia dii no atirimɔden so ma ohuu amane saa anadwo no, na ɛbɛyɛ sɛ wɔde no hyɛɛ dua mu.

⁸ Nea wɔde yɛɛ Yeremia no kaa no dɛn? Ɔka kyerɛɛ Onyankopɔn sɛ: “Madan asereserede daa nyinaa.” (Yer. 20:3-7) Ɔyɛɛ n’adwene mpo sɛ ɔrenkasa Onyankopɔn din mu bio. Nanso, wunim sɛ na Yeremia rentumi nyɛ saa, na wanyɛ saa nso. Mmom no, Onyankopɔn asɛm a wɔde maa Yeremia sɛ ɔnka no ‘yɛɛ te sɛ ogya a ɛredɛw a wɔato mu wɔ Yeremia nnompe mu,’ na na ɛsɛ sɛ ɔkasa ma Yehowa.—Monkenkan Yeremia 20:8, 9.

 9. Dɛn nti na mfaso wɔ so sɛ yesusuw nea ɛtoo Yeremia no ho?

⁹ Sɛ nnipa a yenim wɔn, sɛ́ wɔyɛ yɛn abusuafo, nnipa a wɔte yɛn mpɔtam, wɔn a yɛne wɔn yɛ adwuma, anaa wɔn a yɛne wɔn kɔ sukuu di yɛn ho fɛw yayaayaw a, saa asɛm yi betumi aboa yɛn. Sɛ ɛtɔ mmere bi na ɔsɔretia a ɛte saa ma yɛn abam bu kakra a, ɛnsɛ sɛ ɛyɛ yɛn nwonwa. Sɛ wɔhwe yɛn esiane sɛ yɛde yɛn ho ahyɛ nokware som mu nti a, yɛn nso yɛn abam betumi abu kakra. Esiane sɛ na Yeremia yɛ onipa a ɔtɔ sin nti, nneɛma a ɛte saa a wɔde yɛɛ no no haw no, na yɛn nso so yɛnyɛ nnipa a yɛwɔ nkate te sɛ ɔno anaa? Nanso, ɛnsɛ sɛ yɛma yɛn werɛ fi sɛ, Onyankopɔn boaa Yeremia ma ɔsan nyaa anigye ne ahotoso bio. Wamma n’abam ammu bere nyinaa, na ɛnsɛ sɛ yɛn nso yɛma yɛn abam bu bere nyinaa.—2 Kor. 4:16-18.

10. Yeremia su ho asɛm bɛn na Bible ma yehu?

¹⁰ Ɛtɔ mmere bi a na Yeremia su tumi sesa koraa. So wo nso wo su taa sesa—sɛ́ ebia ɛtɔ mmere bi a wowɔ anigye ne anidaso nanso ɛnkyɛ na woabotow ama wo werɛ ahow? Hyɛ asɛm a ɛfa anidaso ho no nsow wɔ Yeremia 20:12, 13. (Monkenkan.) Nea Pasur de yɛɛ Yeremia nyinaa akyi no, Yeremia ani gyei sɛ ɔte sɛ ahiafo a wɔagye wɔn “afi abɔnefo nsam” no mu biako. Ebia ɛtɔ mmere bi a wote nka sɛ di ahurusi na to dwom ma Yehowa, sɛ́ ebia ɛyɛ bere bi a wogyee wo fii ɔhaw bi mu anaasɛ ɛyɛ anigyesɛm bi a ɛtoo wo wɔ w’asetena mu anaa Kristofo som adwuma mu no. Hwɛ sɛnea eye sɛ wobɛte nka saa!—Aso. 16:25, 26.

11. Sɛ yɛn su taa sesa a, Yeremia ho asɛm bɛn na ɛsɛ sɛ yɛkae?

¹¹ Nanso, esiane sɛ yɛtɔ sin nti, yɛn su betumi asesa te sɛ nea Yeremia su sesae no. Bere a ɔkae sɛ “monto dwom mma Yehowa” wiei no, n’abam bui kɛse, na ɛbɛyɛ sɛ ɔtew nusu mpo. (Monkenkan Yeremia 20:14-16.) Ne werɛ howee paa ma n’adwene yɛɛ no sɛ mfaso nni so sɛ wɔwoo no! Bere a na ɔredi awerɛhow no, ɔkae sɛ nnome nka ɔbarima a ɔbɔɔ amanneɛ sɛ wɔawo no no te sɛ nea nnome kaa Sodom ne Gomora no. Nanso, asɛntitiriw bi ni: So Yeremia maa n’abam kɔɔ so bui? So ɔpaa abaw ma n’adwene yɛɛ no sɛ n’abam bɛkɔ so abu bere nyinaa? Dabi. Mmom no, ɛbɛyɛ sɛ ɔbɔɔ mmɔden sɛ obedi n’abasamtu no so, na otumi dii so nso. Wo de, susuw asɛm a edi hɔ a Yeremia nhoma no ka ho asɛm no ho hwɛ. Ɔhene Sedekia somaa Pasur a na ɔyɛ ɔpanyin no kɔɔ Yeremia nkyɛn kobisaa no Yerusalem kurow no a na Babilonfo no retwa ho ahyia no ho asɛm. Yeremia de akokoduru kaa Yehowa atemmusɛm ne nea na ɛbɛba no ho asɛm kyerɛɛ no. (Yer. 21:1-7) Ɛda adi sɛ, Yeremia kɔɔ so yɛɛ n’adwuma sɛ odiyifo!

12, 13. Sɛ yɛn su taa sesa a, dɛn na yebetumi ayɛ de agyina ano?

¹² Onyankopɔn asomfo binom a wɔwɔ hɔ nnɛ su taa sesa. Saa ɔhaw yi betumi afi biribi a ɛnkɔ yiye wɔ nipadua no mu—ebetumi aba sɛ nsakrae aba ahoɔdennuru a ɛwɔ nkwammoaa mu no mu anaa nkwammoaa a ɛwɔ nipadua no mu no nyɛ adwuma yiye—ma enti oduruyɛfo a onim adwuma yiye betumi ama nyansahyɛ ahorow bi a ɛbɛboa ma ɔhaw a ɛte saa no ano abrɛ ase. (Luka 5:31) Nanso, wɔ yɛn mu dodow no ara fam de, ɛtɔ mmere bi a anigye kɛse a yenya anaa awerɛhow a yedi no nyɛ biribi a ɛboro so anaasɛ ɛhaw adwene. Ɛda adi sɛ, yɛn werɛ a ɛtaa how no fã kɛse no ara fi yɛn sintɔ. Nea ɛde ba no betumi ayɛ ɔbrɛ anaa yɛn dɔfo bi a wawu. Sɛ yɛkɔ tebea ahorow a ɛte saa mu a, yebetumi akae sɛ na Yeremia su taa sesa, nanso ɔkɔɔ so nyaa Onyankopɔn anim dom. Sɛ yebetumi agyina ano a, ebia ɛho behia sɛ yɛyɛ nsakrae wɔ nneɛma a yɛyɛ no daa no mu na ama yɛatumi agye yɛn ahome pii. Anaasɛ ebia ɛho behia sɛ yɛma yɛn ho bere de kyekye yɛn ho werɛ bere a yɛahwere yɛn dɔfo bi yayaayaw no. Nanso, ɛho hia paa sɛ yɛkɔ Kristofo nhyiam daa, na yɛde yɛn ho hyɛ Onyankopɔn som adwuma mu bere nyinaa. Eyinom ne nneɛma titiriw a ɛbɛma yɛakɔ so ayɛ yɛn ade wɔ ɔkwan a ɛfata so, na yɛanya anigye wɔ Onyankopɔn som mu.—Mat. 5:3; Rom. 12:10-12.

¹³ Sɛ́ ebia w’abam abu pɛnkoro pɛ, anaa ɛwom wom a na w’abam abu, anaasɛ w’abam taa bu no, Yeremia asɛm no betumi akyekye wo werɛ. Sɛnea yɛadi kan aka ho asɛm no, ɛtɔ mmere bi a na Yeremia abam bu. Nanso, wamma abasamtu no antwe no amfi Onyankopɔn a na ɔdɔ no no ho, na ɔkɔɔ so de nokwaredi som no. Bere a wɔn a wɔsɔre tia no no de bɔne tuaa papa a na ɔyɛ so ka no, ɔhwehwɛɛ Yehowa, na ɔde ne ho too no so. (Yer. 18:19, 20, 23) Si wo bo sɛ wubesuasua Yeremia.—Kwa. 3:55-57.

14. Ɔkwan titiriw bɛn so na Yeremia nyaa nkuranhyɛ?

¹⁴ Ɛyɛ papa sɛ yebesusuw sɛnea wɔhyɛɛ Yeremia nkuran, ne sɛnea ɔno nso hyɛɛ ‘akra a wɔabrɛ’ nkuran no ho. (Yer. 31:25) Odiyifo no nyaa nkuranhyɛ fii Yehowa hɔ titiriw. Wo de, susuw sɛnea anka ɛbɛhyɛ wo den sɛ wobɛte sɛ Yehowa reka akyerɛ wo sɛ: “Me de, ɛnnɛ mayɛ wo kurow a wɔabɔ ho ban . . . Wɔne wo bɛko, nanso wɔrentumi wo, efisɛ ‘midi w’akyi, na megye wo,’ Yehowa asɛm ni.” (Yer. 1:18, 19) Ntease wom paa sɛ Yeremia frɛɛ Yehowa sɛ “m’ahoɔden ne m’abankɛse, ahohia bere mu guankɔbea.”—Yer. 16:19.

15, 16. Dɛn na yebetumi afa afi sɛnea Yehowa hyɛɛ Yeremia nkuran no mu de ahyɛ afoforo nkuran?

¹⁵ Ɛfata sɛ yɛhyɛ no nsow sɛ, Yehowa ka kyerɛɛ Yeremia sɛ: “Midi w’akyi.” So eyi ma wuhu nea wubetumi ayɛ bere a wuhu sɛ obi a wunim no hia nkuranhyɛ no? Ɛsono sɛ wubehu sɛ onua anaa onuawa Kristoni bi anaa ebia wo busuani bi hia biribi; ɛnna ɛsono sɛ wubedi nea ohia no ho dwuma yiye ama no. Mpɛn pii no, nea eye sen biara a wubetumi ayɛ ama no ne nea Onyankopɔn yɛ maa Yeremia no, ɛne sɛ, wobɛkɔ nea ɔrehu amane no nkyɛn. Afei, edu baabi a, ka nkuranhyɛ nsɛm bi kyerɛ no, nanso ɛnworo nsɛm pii ngu no so. Nsɛm kakraa bi a ebetumi akyekye ne werɛ na ahyɛ no den betumi aboa no paa. Ɛho nhia sɛ nea woka no bɛyɛ asɛm a woahyɛ da anwene. Ka nsɛm a asete nyɛ den a ɛma obi hu sɛ w’ani kũ ne ho, wudwen ne ho, na ɛda Kristofo dɔ adi. Nsɛm a ɛte saa betumi aboa no pii.—Monkenkan Mmebusɛm 25:11.

¹⁶ Yeremia kae sɛ: “O Yehowa, kae me, na dan w’ani kyerɛ me.” Dɛn na odiyifo no san kae? Ɔkae sɛ: “Minyaa wo nsɛm, na midii; w’asɛm bɛyɛɛ ahurusi ne anigye wɔ me koma mu.” (Yer. 15:15, 16) Ebia onipa a wopɛ sɛ wohyɛ no nkuran no ani begye ho sɛ wubenya bere ama no saa ara. Ɛwom, nsɛm a wobɛka no renyɛ nea etu mpɔn te sɛ Yehowa de no. Nanso, wubetumi afa nsɛm a Onyankopɔn kae no bi ahyehyɛ nea wobɛka no mu. Nsɛm a egyina Bible so a ɛte saa a wode koma pa bɛka no betumi ama nea n’abam abu no koma ani agye.—Monkenkan Yeremia 17:7, 8.

17. Asuade titiriw bɛn na yebetumi anya afi sɛnea Yeremia ne Sedekia ne Yohanan dii no mu?

¹⁷ Hyɛ no nsow sɛ bere a Onyankopɔn hyɛɛ Yeremia nkuran akyi no, ɔno nso hyɛɛ afoforo nkuran. Ɔkwan bɛn so? Bere bi, Ɔhene Sedekia kaa sɛnea na osuro Yudafo a na wɔde wɔn ho akɔbɔ Babilonfo no ho asɛm kyerɛɛ Yeremia. Odiyifo no kaa nkuranhyɛ nsɛm kyerɛɛ ɔhene no, na ɔka kyerɛɛ ɔhene no sɛ ontie Yehowa asɛm, na ebesi no yiye. (Yer. 38:19, 20) Bere a wɔsɛee Yerusalem na ɛkaa Yudafo kakraa bi wɔ asase no so no, Yudafo no sahene Yohanan yɛɛ n’adwene sɛ ɔde nkurɔfo no bɛkɔ Egypt. Nanso, nea edi kan no, okohuu Yeremia. Odiyifo no tiee asɛm a Yohanan kae no, na ɛno akyi no, ɔbɔɔ Yehowa mpae. Akyiri yi, ɔkɔkaa asɛm a ɛhyɛ nkuran a Yehowa kae no kyerɛɛ Yohanan sɛ sɛ wotie Onyankopɔn asɛm na wɔkɔ so tena asase no so a, ebesi wɔn yiye. (Yer. 42:1-12) Wɔ nsɛm abien no nyinaa mu no, Yeremia yɛɛ aso tiei—otiee wɔn ansa na ɔrekasa. Sɛ yebetumi ahyɛ afoforo nkuran a, ɛho hia paa sɛ yetie wɔn. Ma nea ɔrehu amane no nka nea ɛhaw no. Tie ne haw ne ne dadwen no. Sɛ ɛbɛyɛ yiye a, ka nsɛm a ɛhyɛ nkuran kyerɛ no. Ɛwom sɛ Onyankopɔn renkasa nkyerɛ wo tẽẽ mma wonka nkyerɛ nea ohia nkuranhyɛ no de, nanso wubetumi de nsɛm a ɛhyɛ nkuran a ɛwɔ Onyankopɔn Asɛm no mu a ɛfa nneɛma a ɛbɛba daakye ho no aka nsɛm a wode bɛkyekye ne werɛ no ho.—Yer. 31:7-14.

18, 19. Afoforo a yɛbɛhyɛ wɔn nkuran ho nhwɛso bɛn na ɛda adi wɔ Rekabfo ne Ebed-Melek ho nsɛm no mu?

¹⁸ Sedekia ne Yohanan mu biara antie afotu a ɛhyɛ nkuran a Yeremia de maa wɔn no, na saa ara na ɛnnɛ nso ebetumi aba sɛ ebinom rentie afotu a wode bɛma wɔn no. Sɛ ɛba saa a, mma w’abam mmu. Afoforo tiee nsɛm a ɛhyɛ nkuran a Yeremia de maa wɔn no, na ebia nnipa pii betie nea wo nso wode bɛma wɔn no. Susuw Rekabfo a wɔyɛ Kenifo bi a wɔne Yudafo no tenae mfe pii no ho hwɛ. Ahyɛde ahorow a wɔn agya Yehonadab de maa wɔn no mu biako ne sɛ esiane sɛ wɔyɛ ahɔho nti, ɛnsɛ sɛ wɔnom nsã. Bere a Babilonfo bɛtow hyɛɛ Yudafo no so no, Yeremia de Rekabfo no kɔɔ adidibea bi a ɛwɔ asɔrefie hɔ. Onyankopɔn maa Yeremia de nsã sisii wɔn anim. Esiane sɛ na Rekabfo bu wɔn agya no, na wɔn aso nyɛ den te sɛ Israelfo no nti, wɔyɛɛ osetie, na wɔannom nsã no. (Yer. 35:3-10) Yehowa maa Yeremia kamfoo wɔn, na ɔkaa daakye ho bɔ a na Yehowa ahyɛ wɔn no ho asɛm kyerɛɛ wɔn. (Monkenkan Yeremia 35:14, 17-19.) Sɛ worehyɛ afoforo nkuran a, wubetumi afa saa kwan yi so: Sɛ ɛbɛyɛ yiye a, fi wo komam kamfo afoforo.

¹⁹ Yeremia nso kamfoo Etiopiani Ebed-Melek a ɛda adi sɛ na ɔyɛ adwuma wɔ Ɔhene Sedekia ahemfie no. Ná Yudafo mpanyimfo ama wɔde Yeremia ato abura bi a dontori wom mu bere a ɔnyɛɛ bɔne biara, na wogyaw no wɔ hɔ sɛ onwu. Ebed-Melek kɔsrɛɛ Ɔhene Sedekia ma ɔmaa no kwan sɛ onkoyi odiyifo no. Saa ɔnanani yi yɛɛ saa bere a na nkurɔfo betumi asɔre atia no denneennen. (Yer. 38:7-13) Esiane sɛ adwuma a Ebed-Melek kɔyɛe yi ma ɔtwee ne ho fii saa Yudafo mpanyimfo no ho nti, ebetumi aba sɛ na odwen nea ɛbɛto no daakye ho. Yeremia anka n’ano antom anhwɛ kɛkɛ sɛ bere rekɔ so no, Ebed-Melek ankasa bedi nea ɛrehaw no no so. Ɔkasae, na ɔkaa nsɛm a ɛhyɛ nkuran a ɛfa Onyankopɔn nhyira a Ebed-Melek benya daakye no ho asɛm kyerɛɛ no.—Yer. 39:15-18.

20. Dɛn na ɛsɛ sɛ yɛyɛ ma yɛn nuanom, sɛ́ wɔyɛ mmofra anaa mpanyin no?

²⁰ Nokwarem no, sɛ yɛkenkan Yeremia nhoma no a, yenya nea yɛn ankasa betumi ayɛ ho nhwɛso pa wɔ nea ɔsomafo Paulo hyɛɛ yɛn nuanom a wɔwɔ Tesalonika nkuran sɛ wɔnyɛ no mu. Paulo ka kyerɛɛ wɔn sɛ: “Monkɔ so nkyekye mo ho mo ho werɛ na monhyehyɛ mo ho den . . . Yɛn Awurade Yesu Kristo adom nka mo.”—1 Tes. 5:11, 28.