Bible Nkɔmhyɛ Mu Ɔhene “Guanhwɛfo” No

 1. Ɔkwan bɛn so na wiase yi mu amammui mu “nguanhwɛfo” no afa ahwɛ nnipa no so, na ɔkwan bɛn na wɔbɛfa so asiesie eyi?

NNEƐMA nhyehyɛe yi mu amammui “nguanhwɛfo” no ma nnipa a wɔte sɛ nguanten no tra ase sɛ nnipa a wɔn mu apaapae. Nnipa ahorow wo ɔman kuw bi a atew ne ho mu. Kuw biako pɛ a ɛbɛka adesamma nhyehyɛe yi mu amammui nyinaa abom wɔ faako nni hɔ. Ahyehyɛde ma wiase asomdwoe ne dwoodwoo asetra, Amanaman Nkabom no, adi huammɔ wo saa amansan kuw biako a ɛbɛyɛ no mu, ɛwom sɛ mprempren yi amanaman a wɔka bom yɛ emufo no dodow yɛ 151.a Ɛrentumi nni nnipakuw biako a wɔwɔ kuw biako mu wo Ɔhwɛfo biako ase no ho dwuma. Ɔbɔadeɛ no a “ɔmaa nnipa aman nyinaa fi onipa biako mu traa asase so nyinaa” no na obetumi de Nniso Guanhwɛfo a wohia a obetumi aboaboa nnipa nyinaa ano ayɛ wɔn kuw biako no ama.​—Aso. 17:26.

 2, 3. (a) Dɛn nti na Yehowa hui sɛ eye sɛ otu nguanhwɛfo a wofi Ɔhene Dawid mu no agua so no? (b) Dɛn nti na Yeremia 23:1, 2 ka sɛ saa nguanhwɛfo no nnue no?

² Ɔbɔadeɛ no nam n’ankasa ne man Israel a wapaw wɔn no so daa no adi kyerɛɛ wiase mu no nyinaa sɛ, onipa biara a ɔnyɛ pɛ nni hɔ a obetumi aboaboa adesamma nyinaa ano sɛ kuw biako na wadi wɔn so sɛ wɔn hwɛfo biako wɔ mprempren nneɛma nhyehyɛe yi mu. Eyi bɛyɛɛ nokware wɔ Ɔhene Dawid, a odii Yerusalem so nkonim na ɔde hɔ yɛɛ ne kuropɔn wɔ afe 1070 A.Y.B. mu no asefo a wɔyɛ nhemfo a wɔtoatoaa so bae no ho. Sɛ́ Israel Nyankopɔn no asase so ananmusifo no, wɔtraa nea wɔfrɛ no “Awurade [Yehowa] agua” so. (1 Be. 29:23; 2 Be. 13:8) Esiane sɛ nniso nguanhwɛfo no kɔ so sɛe bere biara (gye wɔn mu kakraa pi pɛ) nti, Onyankopɔn hui sɛ ɛbɛyɛ papa sɛ otutu saa adehye abusua yi gu bere a wɔadi so mfirihyia 463 akyi.

³ “Nguanhwɛfo a wɔsɛe me nguankuw bɔ wɔn pete no nnue! Awurade [Yehowa] asɛm ni. Enti sɛ́ Awurade [Yehowa], Israel Nyankopɔn se wɔ ahwɛfo a wɔhwɛ me man no ho ni: Mo na moabɔ me nguankuw no apete, na moapansam wɔn, na moanhwɛ wɔn: hwɛ, merebetua mo mo nsennii bɔne no so ka, Awurade [Yehowa] asɛm ni.”​—Yer. 23:1, 2.

 4. Sɛ́ “nguanhwɛfo” no, dɛn na ɛtoo Salum (Yehoahas) ne Yehoiakim?

⁴ Bere a Ɔhene Yosia a ɔyɛ ɔhene pa no wui wɔ afe 628 A.Y.B. mu akyi no, ne mmabarima baasa ne ne nenabarima bɛyɛɛ bɔne wɔ wɔn akwan nyinaa mu. Eyi bɔɔ wɔn asefo no hwetee. Sɛ nhwɛso no, na Salum, anaasɛ Yehoahas, a odii kan dii Yosia ade wɔ “Awurade [Yehowa] agua” so no wɔ hɔ. Bere a wadi hene asram abiɛsa pɛ na wɔkyeree no kɔɔ nnommumfa mu wɔ Misraim. Ɛhɔ na ɔkowui. (Yer. 22:10-12) Wɔ ne nuabarima panyin, Yehoiakim fam de, sɛnea ne mfirihyia 11 nniso no mu ayɛ ma ne nhyɛso ne mogyahwiegu nti biribiara nni hɔ a eye a ɛfata no, gye sɛ wɔtow ne funu kyene Yerusalem aponkɛse akyi, a “afurumsie na wɔde besie no.”​—Yer. 22:13-19.

 5. Sɛ́ “nguanhwɛfo” no, dɛn na ɛtoo Konia (Yehoiakin) ne Sedekia?

⁵ Yehoiakim babarima kumaa Yehoiakin a wɔsan frɛ no Yekonia anaasɛ Konia na obedii n’ade. (Mat. 1:11, 12) Esiane sɛ ɔyɛ Ɔhene Dawid aseni na ɔtraa “Awurade [Yehowa] agua” so nti, ebia wobuu no sɛ ɔsom bo te sɛ Yehowa nifa so nsɔanokaa. Nanso esiane ne bɔne nti na ɔfata sɛ woyi no fi hɔ na wɔtow no kyene nnommumfa mu wɔ Babilon asase so. Bere a wadi hene bɛyɛ asram abiɛsa ne nnafua 10 pɛ na ɔtee nka sɛ ɛsɛ sɛ ɔde ne ho kɔhyɛ Babilon hene a ɔretwa Yerusalem ho ka no ase. Wɔfaa Yehoiakin ne Israelfo bɛboro 10,000 kɔɔ nnommumfa mu wɔ Babilon, na wɔakowuwu wɔ hɔ. Wannyaw ɔbarima bi wɔ n’akyi na watra ahengua no so, na mmom wɔyɛɛ ne wɔfa, Yosia ba Sedekia, sɛ ɔhene a ɔsom Ɔhempɔn Nebukadneser. (2 Ahe. 24:5-17; Yer. 22:24-30) Sedekia buu ntam a ɔkae wɔ Yehowa din mu no so. Enti, bere a ɔrehyia nea efii n’atuatew kwan no mu no, ɔkobisaa odiyifo Yeremia hɔ asɛm, na ɔsɛe ho mmuae nkutoo na Sedekia nsa kae.

 6. Dɛn nti na ‘due’ a wɔkae sɛ ɛbɛba saa “nguanhwɛfo” no so no nso bɛyɛɛ due maa wɔn asefo, na ɔkwan bɛn so na Yehowa yɛ nea ɔbɔɔ wɔn hwetee?

⁶ Nea ɛtoo saa Yuda ahenni no mu ahemfo “nguanhwɛfo” no ne ahwɛfo mmapɔmma no ne “due,” ankasa. Eyi kyerɛ bɔ a wɔbɛbɔ wɔn asefo a wɔte sɛ nguan no ahwete denam Misraim ne Babilon nnommumfa mu a wɔbɛkɔ so. Eyi maa Yuda asase no dan amamfo. Esiane wɔn nsɛmmɔnedi nti “nguanhwɛfo” no na wɔmaa “nguan” no hwetee. Wotumi ka sɛ Israel Nyankopɔn, Yehowa, na ɔbɔɔ wɔn hwetee wɔ asotwe a ɔmaa n’abrafo dɔm no de baa ne nkurɔfo a wɔyɛ asoɔden no so nti.​—Yer. 23:1, 2; 2 Be. 36:9-21.

NEA WƆBƐFRƐ NO ‘YEHOWA NE YƐN TRENEE’

 7, 8. (a) Hena nkutoo na obetumi de “oguanhwɛfo” a oye kyɛn saa Yerusalem nhemfo baanan no ama, na dɛn ntia? (b) Dɛn na Yehowa kae wɔ Yeremia 23:3-6 bere a ɔrehyɛ “oguanhwɛfo” a oye yi ho bɔ no?

⁷ Oguanhwɛfo pa no ne Bible mu Nyankopɔn, Yehowa. Obetumi de nniso guanhwɛfo a oye sen saa Yerusalem nhemfo baanan a wɔatwam kɔ a wɔn bɔne ma wɔbɔɔ wɔn asefo a wɔte sɛ nguan no hwetee no aba. Esiane huammɔ a adesamma sodifo a wɔnyɛ pɛ no gyaw wɔ wɔn akyi maa wɔn asefo nti, ɔsoro Guanhwɛfo, Yehowa, ahyɛ bɔ sɛ ɔde nniso guanhwɛfo a ɔkorɔn yi bɛba. Enti bere a wapae mu aka “due” akyerɛ Yuda ahenni no mu “nguanhwɛfo” a wɔadi afoforo huammɔ no, ɔde ne honhom kaa ne diyifo Yeremia ma ɔkae sɛ:

⁸ “Na me ara mɛboa me nguan nkae ano mafi nsase a mapam wɔn makɔ hɔ no nyinaa so. Na mede wɔn mɛsan maba wɔn adidibea bio, na wɔbɛwowo na wɔadɔ. Na mesisi wɔn so ahwɛfo na wɔahwɛ wɔn, na wɔrensuro bio, na wɔn koma rentu, na wɔn mu bi renka, Awurade [Yehowa] asɛm ni. Hwɛ, nna bi reba, Awurade [Yehowa] asɛm ni, sɛ mɛma trenee Dubaa [a ɛbɔ Dawid adehye abusua a wɔnteɛ no abira] bi so mama Dawid, na ɔhene bi abedi hene nimdeɛ so, na wabu atɛntrenee asase so. Ne bere so na wobegye Yuda nkwa, na Israel atra ase dwoodwoo, na eyi ne ne din a wɔde bɛfrɛ no: Awurade [Yehowa] yɛn trenee.”​—Yer. 23:3-6.

 9. Dɛn nti na nokware a ɛyɛ sɛ “oguanhwɛfo” a wɔahyɛ ne ho bɔ no bɛyɛ ‘Yehowa ne yɛ Trenee’ no nkyerɛ sɛ ɔno ne Yehowa ankasa?

⁹ “Wɔbɛfrɛ no: ‘Awurade ne yɛn Bembufo.’” Eyi ne sɛnea nkyerɛase a Jewish Publication Society of America no yɛe wɔ afe 1978 mu no kyerɛɛ Yeremia 23:6 ase, wɔ bere a Moffatt nkyerɛase no nso kyerɛɛ ase sɛ, “Yɛn Nkonimdifo.” Obiara nni asase so a wɔde din a ɛte saa too no ankasa. Nanso nkɔmhyɛ no baa mu wɔ Yesu Kristo so. Hokwan a onyae sɛ wɔde saa din no bɛfrɛ no no nkyerɛ sɛ Yesu yɛ Yehowa Nyankopɔn ankasa Israelni a wɔfrɛ no Yosadak, a ne din no ase ne “Wɔabu Yehowa Ɔtreneeni” anaasɛ “Yehowa Teɛ,” no nyɛ Yehowa ankasa. (1 Be. 6:14) Yeremia 33:16 ka kyerɛ yɛn sɛ wɔbɛfrɛ Yerusalem mpo sɛ “Awurade [Yehowa] Yɛn Trenee,” nanso so ɛno kyerɛ sɛ na Yerusalem yɛ Yehowa ankasa? Dabi! Wɔfrɛ Yerusalem hene a otwa to no sɛ Sedekia, na saa din no ase ne “Yah Trenee.” Ɔhene a wɔbɛfrɛ no “Yehowa Ne Yɛn Trenee” a ɔne Yesu Kristo no ne Ɔhene Sedekia bɔ abira koraa.

10, 11. (a) Bɔhyɛ a ɛwɔ Yeremia 23:5, 6 no baa mu wɔ mmpa bɛn so? (b) Ɛhefo so na wɔnam behuu edin ‘Yehowa ne Yɛn Trenee’ no yiye, na ɔkwan bɛn so?

¹⁰ Nkɔmhyɛ a ɛwɔ Yeremia 23:5, 6 no amma mu wɔ Yesu nna mu wɔ honam fam Yuda ne Israel ne Yerusalem so. Saa Yudafo no ne wɔn nhyehyɛe no pow Yesu sɛ Mesia. Enti Romafo no sɛee wɔn na wɔbɔɔ wɔn hwetee wɔ afe 70 Y.B. mu. Mmom nkɔmhyɛ no bam ankasa wɔ honhom mu Israel so, Kristo asuafo a wɔasra wɔn no.

¹¹ Wiase Nyinaa Ko I a ɛbae 1914-1918 mu na Kristoman mu asɔfo ne amanaman a wɔde wɔn ho ahyɛ ɔko no mu no bɔɔ honhom mu Israel nkaefo no hwetee. Nanso efi afe 1919 mu reba na Yehowa de Yesu Kristo a wɔahyɛ no anuonyam no dii dwuma de boaboaa nkaefo a wɔabɔ wɔn ahwete no ano yɛɛ wɔn biako wɔ honhom mu wɔ wiase nyinaa. Wɔtew saa honhom mu Israel nkaefo a wɔasakra wɔn adwene a wɔasan de wɔn aba bio no ho ma wɔfatae sɛ wɔbɛka “ahenni no ho asɛmpa” no wɔ amanaman nyinaa mu wɔ “asase a wɔte so no nyinaa so.” (Mat. 24:9-14, NW) Yehowa adom a ɛnam Kristo so no so na wɔfa buu wɔn atreneefo anaa wobuu wɔn bem. Yehowa bɛyɛɛ wɔn Kyigyinafo, wɔn “nkonimdifo,” na wɔbɛyɛɛ ne Kristofo adansefo. (Yes. 43:10) Na esiane sɛ saa ɔdom yi bɛfa Ɔhene Guanhwɛfo, Yesu Kristo a wɔde no atra agua so no so aba nti, edin ‘Yehowa Ne Yɛn Trenee’ no fata sɛ wɔde frɛ no.

12. Nkaefo no a ogyaa wɔn fii Babilon na wɔsan hyehyɛɛ wɔn bio wɔ Yuda asase so no bɔɔ ɔkwan maa awo bɛn a ɛho hia?

¹² Sɛnea ɛbɛyɛ na obedi kan ayɛ eyi ho mfonini no, Yehowa de Israel nkaefo a wɔasakra wɔn adwene no fi “benkum fam” (wɔ kusuu fam) bae na ɔhyehyɛɛ wɔn wɔ wɔn asase so bio wɔ afe 537 A.Y.B. mu. (Yer. 23:7, 8) Enti kusuu fam a ɔde wɔn fi bae wɔ Babilon na ɔsan hyehyɛɛ wɔn wɔ Yuda asase a ɛde bere tenten adan amamfo no so bio no bɔɔ ɔkwan maa awo kɛse a ɛbɛba asase so saa bere no, wɔ Betlehem-Yuda. Ɛyɛ Yesu Kristo, sɛ́ Ɔhene Dawid aseni no awo.​—Luka 2:1-38; 3:23-31.

13. (a) Dɛn na na ɛwɔ Dawid ahemmusua no ho a ne nyinaa akyi no Yehowa maa “trenee dubaa” bi so maa Dawid? (b) Yehowa ne nkaefo no dii wɔ ɔkwan bɛn so na ɛne dubaa no din ‘Yehowa ne Yɛn Trenee’ no ahyia?

¹³ Enti Yehowa maa “trenee Dubaa” bi so maa Dawid, wɔ Ne nkɔmhyɛ a ɛyɛ amanehunu a ɔde tiaa Ɔhene Konia (anaasɛ Yekonia; anaasɛ, Yehoiakin)b no nyinaa akyi. (Yer. 22:24 de kosi 23:2; Mat. 1:11-16; 2 Ahe. 25:27-30) Saa “Trenee Dubaa” yi, Yesu Kristo, de ne desani nkwa a ɛyɛ pɛ no too hɔ sɛ afɔrebɔde de maa nnipa a daakye wɔbɛyɛ n’asefo no. Ɔnam saa yɛ so de nhyɛase too hɔ maa n’akyidifo 144,000 a wɔahyira wɔn ho so no, na ‘wɔabu wɔn atreneefo’ sɛnea ɛbɛyɛ na wɔabɛyɛ ne yɔnko adedifo wɔ ne soro ahenni no mu. (Rom. 8:14-17; 1 Kor. 1:30, 31) Efi 1919 Y.B. reba yi, wɔ anototo a Kristoman mu asɔfo de aba nkaefo a wɔyɛ Ahenni no adedifo 144,000 no so no nyinaa akyi no, Yehowa asan ahyehyɛ saa nkaefo yi de aba ne dom ne ne som mu bio. Enti Yehowa yɛ wɔn nkonimdifo, wabu wɔn bem anaasɛ ɔnam Kristo so ‘abu wɔn atreneefo.’​—Rom. 8:31-33; Yer. 23:6.

14. Nkoa bɛn na Yehowa ama wɔn so afi saa nkaefo a wɔasra wɔn yi mu efi Ahenni no awo wɔ 1914 reba yi?

¹⁴ Yehowa ayi mpanyimfo anaasɛ ahwɛfo anokwafo afi saa honhom mu Israel nkaefo a Yehowa asan ahyehyɛ wɔn yi mu. Esiane sɛ wɔwoo Mesia ahenni no wɔ ɔsoro wɔ Amanaman Mmere no awiei wɔ 1914 nti, saa ahwɛfo yi som sɛ nguanhwɛfo mmapɔmma wɔ asase so de akosi sɛ nkaefo no nyinaa bewie wɔn asase so adwuma na wɔakɔka Ɔhene “Guanhwɛfo” no ho wɔ ɔsoro ahenni no mu.​—Yer. 23:3, 4; Yes. 32:1, 2.

SƐNEA KRISTOMAN MU ASƆFO ADI HUAMMƆ

15. Nea ɛne tebea a nkaefo a wɔasra wɔn no wom bɔ abira no, tebea bɛn mu na Kristoman hu ne wɔ mu mprempren?

¹⁵ Honhom mu Israel nkaefo a wɔasan ahyehyɛ wɔn a wɔte honhom mu paradise no wɔ ɔsoro Hene, nea wɔfrɛ no ‘Yehowa Ne Yɛn Trenee’ no ase. (Yer. 23:3-6) Honhom mu paradise a asomdwoe ne dwoodwoo asetra a ɛte sɛɛ wom nni Kristoman mu nnɛ. Nea ohu ne ho wom mmom ne tebea a emu ayɛ fi a awaresɛe ne honhom mu kɔm ayɛ mu ma mu. Tebea a ɔwom no bubu koma na eyi yɛ nneɛma a ɛsɛe koma a ɛrebɛba no ho sɛnkyerɛnne. Ɛbɛma obi atɔ ntintan mpo sɛ ɔsabofo.​—Yer. 23:9, 10; Mat. 24:21, 22.

16, 17. Sɛnea Yeremia 23:11-14 kyerɛ no, hefo na tebea a Kristoman wom nnɛ no fi wɔn?

¹⁶ Wɔn a eyi fi wɔn ne Kristoman mu asɔfo no. Wɔadi wɔn asɔre mma no huammɔ. Ɛte sɛ nea Yehowa ka faa atoro adiyifo no ne asɔrefi asɔfo a na wɔwɔ Yeremia nna no mu no ho ara pɛpɛɛpɛ:

¹⁷ “Na odiyifo ne ɔsɔfo nyinaa yɛ nkɔnkɔnsafo, me fi [asɔrefi] na mahu wɔn bɔne, Awurade [Yehowa] asɛm ni. Ɛno nti wɔn kwan bɛyɛ wɔn sɛ sum kabii mu kwan torotoro, wobesunsum wɔn, na wɔahwehwe ɛso ase, . . . Na Yerusalem adiyifo no mu nso, mahu ahodwiriwde, awaresɛe ne atoro mu nantew, na wɔhyɛ nnebɔneyɛfo nsa den, nea ɛbɛyɛ na obiara ansan amfi ne bɔne mu; wɔn nyinaa adan me sɛ Sodom, na emufo [Yerusalem] ayɛ sɛ Gomora.”​—Yer. 23:11-14.

18. Efi bere bɛn na ɔkwan bɛn so na Kristoman mu asɔfo no adi honhom mu aguamammɔ anaa awaresɛe ho fɔ?

¹⁸ Efi bere a wɔhyehyɛɛ Kristoman sii hɔ wɔ Konstantino Ɔkɛseɛ Pontifeks Maksimo anaasɛ Roma Ahemman no mu ɔsɔfo Panyin no nna no mu na Katolek asɔfo ne akyiri no Protestant asɔfo adi fɔ wɔ honhom mu awaresɛe mu. Wɔ ɔkwan bɛn so? Esiane sɛ wɔbɛyɛɛ wiase yi nnamfo na wɔde wɔn ho hyɛɛ amansɛm ne akodi ho nneɛma mu nti.​—Yak. 4:4.

19. Ɔkwan bɛn so na wohu ahohwibɔ ankasa wɔ asɔfo no ne asɔre mma no mu?

¹⁹ Asɔfo no ma awaresɛefo ankasa ne mmarima a wɔne wɔn ho da ankasa tra wɔn mu na wɔde adwuma hyɛ wɔn nsa wɔ wɔn asɔre horow no mu. Ɛnde na ɛnyɛ nwonwa sɛ asɔfo no bɛma kwan ma ahohwibɔfo a wɔte sɛɛ ayɛ wɔn ankasa asɔre no mufo. Abrabɔ bɔne a ɛwɔ Kristoman mu nnɛ no yɛ nea agye din, “ɛyɛ hu,” na ɛso koraa kyɛn sɛnea na ɛte wɔ Sodom ne Gomora no. Enti nea ɛtoo saa tete nkurow a wɔammu ɔbra pa no bɛto Kristoman wɔ ɔkwan a ɛfata so.

20. Dɛn nti na asɔfo no bɛnom awuduru a ekum nipa no?

²⁰ Sɛ́ wɔn a wokyi wɔn koraa sen biara wɔ Kristoman mufo mu no, asɔfo no ne anyamesom akwankyerɛfo no nom awuduru no: “Efisɛ Yerusalem adiyifo [a wɔyɛɛ Kristoman ho mfonini no] mu nkɔnkɔnsasɛm fi kɔ asase no nyinaa so.”​—Yer. 23:15.

21. Ɔkwan bɛn so na Yeremia kuw no twee wiase no adwene baa wae a asɔfo no awae afi nokware gyidi no ho no so wɔ afe 1925 mu?

²¹ Nnɛ bere mu Yeremia kuw no de ntɛmpɛ ne akokoduru twee wiase no adwene baa wae a asɔfo no awae afi nokware gyidi no ho no so. Wotumi hyɛ afe 1925 agyirae wɔ eyi fam. Wɔ nhyiam a Amanaman Ntam Bible Asuafo Kuw no yɛe wɔ Indianapolis, wɔ Indiana, wɔ August 24-31 no mu no, nhyiam no ase ade titiriw a wɔyɛe ne sɛ wɔpenee tirimbɔ a ɛne “Anidaso Ho Nkra Asɛm” no so. Kuw no titrani no daa tirimbɔ no adi wɔ ne kasa a ɛne “Ɔfrɛ Ma Adwumayɛ” no mu no akyi, na ɛno na ɔkɔɔ so kenkanee. Nsɛm a ɛdaa no adi no mu binom ni:

. . . Katolek ne Protestant anyamesomfo no ahomaso, bu a wobu wɔn ho anyansafo, wɔn ho a ɛntew ne Onyankopɔn a wonnim no no ada adi pefee. Enti ɛda adi pefee sɛ nnuru horow a wɔn a yɛadi kan abobɔ wɔn din yi anaa wɔn nyinaa de bɛma no yɛ ɔkwa, tumi biara nnim, na mfaso nni so, na ɛremfa nea onipa hwehwɛ no mma no.

Katolek som fa nea ɛyɛ Onyankopɔn nkutoo de no ma n’ankasa ho. Nnɛ bere mu nnipa a wose wɔn ani abue no se Onyankopɔn bi nni hɔ, wɔpow n’Asɛm no ne Ne nhyehyɛe ma ogye no, na wɔde tumi a ani afurac ma sɛ nea ebetumi asiesie nea onipa asɛe no no. Bere a wɔn a wɔfa Bible mu asɛm no sɛ saa ara na ɛte no ka sɛ wogye Bible no di no, wɔnam wɔn adeyɛ so pow sɛ saa na wɔte. Wɔkyerɛkyerɛ atoro nkyerɛkyerɛ ne nea ɛbɔ Onyankopɔn ahohora, na wɔne Katolekfo ne nnɛ bere mufo a wose wɔn ani abue no nyinaa de wɔn ho abɔ amammui ne aguadi mu tumi horow a ɛwɔ wiase no ho wɔ abususɛm mu de ka sɛ wɔn na wobetumi ahyehyɛ Onyankopɔn ahenni no wɔ asase so. Eyinom nyinaa ne Satan a ɔyɛ wɔn wura a ɔso sen biara no ayɛ biako na wɔapia Onyankopɔn ato nkyɛn ahura ne din no ho. . . .

. . . Esiane sɛ Ɔbonsam nim eyi, sɛ ne bere ayɛ tiaa nti, ɔrebɔ mmɔden sɛ ɔde atoro ne nnaadaa nkyerɛkyerɛ bebunkam nnipa no so na wadan wɔn adwene afi Yehowa so koraa. Bere adu sɛ Onyankopɔn bɛyɛ din ama n’ankasa ho wɔ asase so na ama nnipa no ahu nokware a ɛfa ɔsoro nhyehyɛe a ɛno so nkutoo na wɔbɛfa de nkwagye abrɛ wiase no.​—Nkyekyem 5, 6, 9. Hwɛ Engiresi Ɔwɛn-Aban a ɛyɛ October 15, 1925 de no mu wɔ nkratafa 310, 311. Afei nso hyɛ Adiyisɛm 8:12; 16:8, 9 nsow.

22. (a) Ɛhefo na wɔsom wɔ Onyankopɔn atirimpɔw no ho sɛnea ɛbɛyɛ na wayɛ din ama n’ankasa ho? (b) Ɔkwan bɛn so na asɔfo no afa akyerɛ sɛ wommu Onyankopɔn din no wɔ ɔkwan a wɔfa so hyɛ nkɔm no nti?

²² Asɛnka “Ɔfrɛ ma Adwumayɛ” a wɔde daa tirimbɔ a yɛaka ho asɛm wɔ atifi hɔ no adi no kae wɔ nkyekyem 28 no sɛ: “Bere adu sɛ Yehowa bɛyɛ din ama n’ankasa ho wɔ asase so. Asɔre no wɔ kyɛfa wɔ eyi mu sɛ ɛbɛyɛ adansefo ama Awurade.” (Kratafa 326 wɔ Engiresi Ɔwɛn-Aban November 1, 1925 de mu) Enti, efi afe (1926) mfiase mu rekɔ, wɔ tirimbɔ no ne ne kyekyɛ wɔ nsaano nkrataa mu no akyi no, Yeremia kuw no bɔɔ mmɔden kɛse sɛ wɔbɛma adesamma nyinaa ahu Yehowa din no. Nanso Kristoman mu asɔfo no daa wɔn ho adi sɛ wommu Onyankopɔn din no. Esiane sɛ woyi Onyankopɔn din no fi n’atirimpɔw a waka ho asɛm sɛ ɔde amanehunu bi a ɛte sɛ ahum kɛse bɛba Kristoman so no ho nti, asɔfo no kɔ so ka “kyerɛ wɔn a wɔpa me [Onyankopɔn] no sɛ: “Awurade [Yehowa] asomdwoe bɛba ama mo. Na obiara nantew ne koma denyɛ mu a, wose: Bɔne bi remma mo so.”​—Yer. 23:17-20.d

23. (a) So ɛyɛ Yehowa na ɔsomaa saa asɔfo no, anaasɛ hena na ɔsomaa wɔn? (b) Sɛnea Yeremia 23:21, 22 kyerɛ no, sɛ asɔfo no gyinaa Yehowa agyina mu a, anka dɛn na ɛbɛba?

²³ Nanso, ɛhena na ɔsomaa saa asɔfo no a wokura asomdwoe ho bɔhyɛ horow no? ‘Wonnyinaa Yehowa agyina mu ɛ’ sɛnea ɛbɛyɛ na wɔasua ne nkra asɛm no wɔ nokware mu. Yehowa nsomaa wɔn wɔ ne din mu ɛ. Ɔnkasa nkyerɛɛ wɔn ɛ na wɔakɔhyɛ ‘nea afi Yehowa anom aba ho nkɔm.’ Kristoman mu anyamesom ahorow no na wofi wɔn anyamekyerɛ ho sukuu ahorow no mu somaa wɔn. Sɛ anka asɔfo no gyinaa “Yehowa agyina mu” anaasɛ wɔde wɔn ho fam nneɛma a oyi no adi no ho a, anka dɛn na ɛbɛba? Yehowa se: “Na sɛ wogyinaa m’agyina mu a, anka wɔmaa me man tiee me nsɛm, na wɔasan wɔn afi wɔn kwammɔne so ne wɔn nneyɛe bɔne no ho.”​—Yer. 23:21, 22.

24. Sɛ asɔfo no gyinaa Yehowa agyina mu a, anka dɛn na ɛrenyɛ nokware wɔ Kristoman asɔre mma no ne nsɛm a wɔde wɔn ho hyɛ mu no ho?

²⁴ Sɛ ɛbaa saa a anka Bible no ho nimdeɛ a wonni koraa a ɛyɛ hu a ɛwɔ asɔrekɔfo mu mprempren no amma saa. Sɛ anka asɔfo no ankasa dii kan de wɔn ho fam Onyankopɔn Asɛm a wɔayi no adi no ho na wɔkyerɛkyerɛɛ wɔn asɔre mma ɔpepem bebree no ma wɔyɛɛ saa a, anka wɔanko wiase nyinaa ako ahorow abien no, akodi a wofii ase wɔ Kristoman mfinimfini ankasa no! Asɔfo a eyi fi wɔn no nhintae mfii Yehowa anim ɛ. Ɔnyɛɛ “Onyankopɔn a ɔwɔ mmɛnee mu” a onhu ade a ɛwɔ akyirikyiri.​—Yer. 23:23, 24.

25. Sɛnea Yeremia 23:25-28 kyerɛ no, dɛn na ɛsɛ sɛ obiara a ɔwɔ biribi a ɔde bɛma mprempren no yɛ wɔ ɔmanfo a wotie asɛm no ho?

²⁵ Bere adu sɛ nnipa no besi gyinae afa sɛ wɔbɛkɔ so atie Kristoman mu asɔfo no “adaeso” no anaasɛ wobetie Yehowa Asɛm a Yeremia kuw no pae mu ka no. Bere adu nso sɛ wɔn a wɔka sɛ wɔyɛ Onyankopɔn asomfo no bedi dwuma afa ɔsɛmpɔw a ɛwɔ Yeremia 23:25-28 no ho: “Odiyifo a ɔso dae no, ma ɔnka adaeso, na nea m’asɛm wɔ ne hɔ no, ma ɔnka m’asɛm nokware so.”

26. Esiane sɛ ɛsɛ sɛ mpaapaemu ba adaeso ahorow no ne Onyankopɔn Asɛm no mu nti, dɛn na Yeremia kuw no ne “nnipakuw kɛse” no asi gyinae sɛ wɔbɛyɛ?

²⁶ Dɛn na Yehowa Asɛm no ne “adae” a wɔso a ɛnyɛ nokware ne nnipa komam anisoadehu ahorow no wɔ yɛ? Ɛne wɔn nni hwee yɛ! Ɛsɛ sɛ mpaapaemu ba nneɛma abien no ntam, te sɛ nea woyiyi awi fi wura mu. Yeremia kuw no a wokura Onyankopɔn Asɛm no asi gyinae sɛ wɔde nokwaredi bɛka akyerɛ bere nyinaa. Wɔ obu a wɔwɔ ma Yehowa nti, “nnipakuw kɛse” a wɔyɛ atiefo bi asi gyinae sɛ wɔbɛyɛ saa ara.

27. Bere bɛn, na ɔkwan bɛn so na Onyankopɔn Asɛm no te sɛ ogya ne asae?

²⁷ Bɛyɛ sɛ mfirihyia 60 ni a Yeremia kuw no de nokwaredi aka Yehowa Asɛm no akyerɛ. Asɛm no ankasa nhyew Kristoman mu ahyehyɛde ahorow a ebetumi adɛw no; na saa ara nso na emmubuu nneɛma nhyehyɛe a ɛte sɛ bepɔw no dukuduku ɛ. Nanso Onyankopɔn Asɛm a Yeremia kuw no pae mu ka no nnii huammɔ ɛ. Sɛ Yehowa ankasa bere du, wɔ “ahohiahia kɛse” no mu, na sɛ odi asɛm a waka no ho dwuma a, ɔbɛma n’ankasa n’asemmisa: “Awurade [Yehowa] asɛm ni: So m’asɛm nte sɛ ogya? Awurade [Yehowa] asɛm ni, na ɛnte sɛ asae a ɛbobɔ ɔbotan anaa?” no ho mmuae sɛ, yiw, saa na ɛte. (Yer. 23:29) Enti momma yenkura gyidi a yɛwɔ wɔ saa Asɛm no mu no mu.

28. Ɔkwan bɛn so na asɔfo no ‘wia Onyankopɔn nsɛm, wɔn yɔnkonom nkyɛn,’ enti hena na wasɔre atia wɔn?

²⁸ Yehowa na asoma Yeremia kuw no, a wɔnte sɛ asɔfo kuw no, sɛ wɔnkɔka ne din no nkyerɛ. Nanso, asɔfo adiyifo no nso ka sɛ wɔkasa wɔ ne din mu, enti wɔka Bible mu nokware Kristoman mu anyamesom akwankyerɛfo no ‘wia’ tumi a ɛwɔ amanehunu asɛm a Yeremia kuw no ka no ne nea ebefi mu aba ankasa no wɔ ɔkwan a ɛte sɛɛ so. Ɛyɛ nokware sɛ Yeremia kuw no fa nsɛm yi, “sɛnea Yehowa se ni,” de gyina wɔn asɛm no akyi. Nanso asɔfo no bɔ mmɔden sɛ wɔde biribi a ɛte sɛ nea ɛyɛ nokware bɛhyɛ nea wɔka no mu den denam nsɛm yi a wɔde ka ho no so, “n’Asɛm ni!” te sɛ nea nsɛm a wɔka no fi Nyankopɔn. Enti ebia wɔde Bible mu asɛm bi bedi dwuma aka asɛm afa amansɛm anaasɛ ɔko mu nnaadaa ho. Nanso Yehowa asɔre atia saa asɔfo adiyifo a omfii n’agyina mu nsomaa wɔn na ‘wowia’ ne nsɛm fi Bible mu sɛnea ɛbɛyɛ na wɔde bedi dwuma wɔ ɔkwammɔne so no.​—Yer. 23:30, 31.

29. Ɔkwan bɛn na Yehowa bɛfa so akyerɛ sɛ saa asɔfo adiyifo yi yɛ atorofo?

²⁹ Ɔkwan bɛn na Yehowa bɛfa so akyerɛ sɛ saa asɔfo adiyifo yi yɛ atorofo? Denam nea wɔpae mu ka sɛ “n’asɛm ni!” anaasɛ nea wɔka sɛ wɔka wɔ ne din mu a ɔremma ɛmma mu no so. Onnyina wɔn atosɛm no akyi. “Hwɛ, me ne adiyifo a wɔsoso atoro adae no anya, Awurade [Yehowa] asɛm ni; wɔn de, wɔkeka adae no, na wɔde wɔn atosɛm ne wɔn adwenharesɛm daadaa me man no [ma wɔfom kwan] nanso mensomaa wɔn ɛ, na menhyɛɛ wɔn ɛ, na wɔn ho renyɛ ɔman yi mfaso biara, Awurade [Yehowa] asɛm ni.” (Yer. 23:32) Eyi nye mma nnipa no koraa!

30. Dɛn na yebebu no sɛ ɛyɛ aniberesɛm anaa asɛm a emu yɛ duru​—bɔhyɛ horow a asɔfo no de ma anaasɛ Yehowa Asɛm no?

³⁰ Wɔ saa bere yi a asomdwoe biara nni Kristoman ne Onyankopɔn ntam no, mommma honhom mu nkotɔ nnaadaa yɛn anaasɛ yɛada denam asomdwoe ho bɔ a asɔfo hyɛ atoro so no so. Momma yemmu adesoa anaasɛ nsɛm a emu yɛ duru a efi Onyankopɔn Asɛm no mu no aniberesɛm.​—Yer. 23:33.

‘YEHOWA ATEMMUSƐM ANAA ADESOA’

31. Sɛ wɔn a wɔwɔ Kristoman mu no bisa yɛn sɛ yɛnka nea ɛyɛ asɛm a emu yɛ duru anaa ɛyɛ aniberesɛm nnɛ no nkyerɛ wɔn a, dɛn na ɛba bɛda yɛn so sɛ yɛka kyerɛ wɔn?

³¹ Ɛnnɛ, ɔsɛe a ɛkyerɛ amanehunu kɛse na ayɛ Yehowa asɛm ma saa amammui, anyamesom ne aguadi nneɛma nhyehyɛe yi mu ma. Enti ɛyɛ asɛyɛde a emu yɛ duru a ɛda yɛn so sɛ yɛpae mu ka Yehowa asɛm ma “awiei bere” yi. Enti sɛ yɛma nsɛm a nnipa no bisa a ɛfa nea ɛbɛto nneɛma nhyehyɛe yi ho no mmuae a, momma yɛmpae mu nka nea ɛyɛ nokware a ɛfa Yehowa “atemmusɛm” anaasɛ adesoa no ho ankasa nkyerɛ wɔn. Sɛ Kristoman mu nnipa no anaasɛ adiyifo anaasɛ asɔfo no bisa yɛn sɛ yɛnka nokware mfa nsɛm a Yehowa Asɛm no yɛ duru wɔ so anaasɛ esi so dua no nkyerɛ wɔn pefee a, ɛnde asɛyɛde bɛda yɛn so sɛ yɛka kyerɛ wɔn sɛ Kristoman mu nnipa no ankasa yɛ ‘adesoa’ ma no, yiw, ‘Oo adesoa bɛn mpo ni!’ Enti n’ankasa beyi ‘adesoa’ yi afi no so, denam Kristoman a obegyaw no ama n’amanehunu no so.

32. Ɔkwan bɛn na nnipa a wɔwɔ Kristoman mu no fa so sɔre tia nea Yeremia kuw no pae mu ka sɛ ɛyɛ ‘Yehowa atemmusɛm’ anaa adesoa no, enti dɛn na wɔasakra no?

³² Nnipa a wonni obu biara mma Yehowa no mpɛ sɛ wɔpene nea Yeremia kuw no pae mu ka sɛ ɛyɛ ‘Yehowa atemmusɛm anaa adesoa’ no so. Enti wɔmpɛ sɛ wɔkae sɛ biribi a ɛyɛ aniberesɛm ankasa. Denam biribi foforo a wɔhyɛ ho nyansa de bɔ eyi abira so no, wodi wɔn adiyifo ne wɔn asɔfo akyi wɔ nea wɔde ma a wosi so dua sɛ ɛno ne Onyankopɔn Asɛm mu ‘adesoa anaasɛ atemmusɛm’ ankasa. Nanso nea wɔhyɛ ho nyansa de bɔ eyi abira no nyɛ nea egyina Kyerɛw Kronkron no so. Efi kokoam nkyerɛase bi mu, enti ‘obiara asɛm bɛdan n’ankasa asɛm.’ Yeremia kuw no ka kyerɛ saa anyamesomfo a wobu wɔn ankasa ho anyansafo no sɛ: “Moadannan Onyankopɔn teasefo, asafo Awurade [Yehowa] yɛn Nyankopɔn nsɛm ani.” (Yer. 23:33-36) Nanso so wobetumi adan amanehunu a “Yehowa atemmusɛm” no bɔ yɛn kɔkɔ wɔ ho no ani? Aa, Dabi!

33, 34. Hena na ɔwɔ hɔ a ɛno nti ɛsɛ sɛ Yeremia kuw no twe anyamesomfo a wɔfrɛ wɔn asɛm no sɛ ‘Yehowa atemmusɛm’ anaa adesoa no adwene ba no so?

³³ Wɔn a wɔkasa ma Kristoman no nam wɔn atosɛm a wɔde daadaa no so bɔ nea Yeremia kuw no apae mu aka fi ɔko akyi afe 1919 mu reba no abira. Sɛnea ɛbɛyɛ na wɔama, wɔn asɛm no adan sɛ biribi a emu yɛ duru anaa ɛho hia ama afoforo no, wɔtwe nkurɔfo adwene kɔ nea wɔka sɛ “Yehowa atemmusɛm” anaasɛ Yehowa adesoa no so. Yehowa akɔ so asoma Yeremia kuw no akɔ saa anyamesomfo yi nkyɛn na wɔakɔka akyerɛ wɔn sɛ ɛnsɛ sɛ wɔto wɔn nsɛm a wɔka ne wɔn nkɔmhyɛ no din sɛ “Yehowa atemmusɛm” anaasɛ adesoa. Enti dɛn na ɛsɛ sɛ Yeremia kuw no ka kyerɛ saa anyamesomfo yi? Eyi:

³⁴ “Enti nea Yehowa aka ni: ‘Esiane sɛ moka sɛ, “Asɛm yi yɛ Yehowa adesoa [atemmusɛm] ankasa,” bere a mekɔɔ so somaa mo nkyɛn [denam Yeremia kuw no so] sɛ: “Ɛnsɛ sɛ moka sɛ: ‘Yehowa adesoa [atemmusɛm] no!’” enti hwɛ!’”​—Yer. 23:38, 39, NW.

35, 36. Sɛnea Yeremia 23:39, 40 kyerɛ no, gyinae bɛn a Yehowa sii na ɛsɛ sɛ Yeremia kuw no pae mu ka kyerɛ wɔn a wɔka anaa wotie atoro “adesoa” anaa “atemmusɛm” no?

³⁵ Saa na ɛte! Yehowa wɔ ha sɛ Kristoman mu adiyifo no Temmufo. Gyinae bɛn na osi wɔ “adiyifo” a wɔka wɔn asɛm no ho asɛm sɛ ɛyɛ ‘Yehowa atemmusɛm anaa adesoa’ no ho, ne afei nso nea ɔka fa wɔn a wotie atoro ‘adesoa anaa atemmusɛm’ no ho? Ɔtemmufo no ka kyerɛ yɛn:

³⁶ “Me werɛ befi mo koraa, na matow mo ne kurow a mede memaa mo ne mo agyanom no afi m’anim agu. Na mede daa ahohora ne daa nsopa a werɛ remfi da mato mo so.”​—Yer. 23:39, 40.

37. (a) Ɔkwan bɛn so na Yehowa fa dii n’atemmusɛm no ho dwuma wɔ Yeremia nna mu, na dɛn na efii mu bae? (b) Dɛn na ɛtoo Yeremia, na ɔkwan bɛn so na eyi bɛyɛ nokware wɔ Yeremia kuw no ho?

³⁷ Wodii gyinae a Otemmufo Yehowa sii no ho dwuma wɔ Yeremia nna mu, bere a Babilonfo no sɛee Yerusalem na wohuraa n’asɔrefi no ho wɔ afe 607 A.Y.B. mu no. Saa ahohorabɔ ne animguase a Israelfo a wonni nokware na wɔyɛ ahantan no hui no daa no adi sɛ Yehowa, a wommu no no apow wɔn afei. Wagyaw wɔn koraa ama nea ebefi wɔn bɔne a wɔyɛ no mu aba wɔn so no. Ɛkaa atoro nkɔmhyɛfo a wɔma wɔn ho so no ano toom. Yeremia kɔɔ so de n’ano hyɛɛ nkɔm. Yehowa annyaw no. Saa ara na ɛyɛ nokware wɔ wɔn a wɔde no yɛɛ wɔn ho mfonini no ho sɛ, Yehowa rennyaw Yeremia kuw no wɔ bere a ɛrenkyɛ obebu atɛn a ɛyɛ aniberesɛm anaa emu yɛ duru atia Kristoman asɔfo ne n’asafo ahorow no.​—Yer. 39:11-40:4; Kwa. 1:1-22.

‘WOGYIGYEE NO ANAA WƆDAADAA NO’​—NA AYƐ MFASO AMA NO

38. Ɔkwan bɛn so na Yehowa afa agyigye anaa wadaadaa Yeremia, na dɛn na efii mu bae?

³⁸ Enti Yeremia de mfirihyia 40 wiee nea Yehowa ahyɛ no sɛ ɔnka no nyinaa ka. Ohui sɛ Yehowa adi no so. Yehowa ada ne ho adi sɛ ne ho yɛ den kyɛn no. N’Asɛm no adi dwuma sɛ nkɛntɛnso kɛse wɔ Yeremia so. (Rotherham) Esiane saa nokwasɛm yi nti, ama Yeremia atumi atɔ ne bo ase wɔ Onyankopɔn som mu de akodu awiei. Eyi nti na ɛte sɛ nea Yehowa ‘agyigye anaa wadaadaa no’ no. Wada ne ho adi sɛ ahoɔdenfo akyɛn Yeremia mmerɛwyɛ no. Enti Yeremia ampira denam gyigye a wogyigyee no anaa wɔdaadaa no no so.

39, 40. Yeremia nsɛm bɛn na eyi ma yɛkae wɔ bere a Pashur ayi no afi dua mu no?

³⁹ Yɛrekae nsɛm a Yeremia kae bere a Pashur, asɔrefi so otitiriw no yii no fii dua mu no:

⁴⁰ “Woagyigye [woadaadaa] me, Awurade [Yehowa], na mapene nnyigye [nnaadaa] no so; woatintim me so [atia nea misusuw], na woatumi. Madan aserede daa adesae; wɔn nyinaa di me ho fɛw. Na daa merekasa a, ɛma meteɛm, akakabensɛm ne ɔsɛe na ɛma misu mefrɛ, na Awurade [Yehowa] asɛm adan me ahohora ne nsopa daa adesae. Na sɛ mise: Merenkae no, na meremmɔ ne din menkasa bio a, na ɛyɛ me koma mu sɛ ogya a ɛredɛw a wɔato mu me nnompe mu; miso mu a mebrɛ ho, na mintumi . . . Na Awurade [Yehowa] gyina m’akyi sɛ dɔmmarima a ne ho yɛ hu, ɛno nti m’atiwfo bɛhwehwe ase, na wɔrentumi. Wɔn ani bewuwu, efisɛ ansi wɔn yiye, ɛyɛ daa nsopa a werɛ remfi.”​—Yer. 20:7-11.

41. Enti ɔkwan bɛn so na wɔbɛfa aboa yɛn na yɛakɔ so aka Ɔhene Guanhwɛfo a wɔfrɛ no ‘Yehowa ne Yɛn Trenee’ no ho asɛm?

⁴¹ Yehowa bɛhyɛ yɛn den te sɛ “dɔmmarima a ne ho yɛ hu” wo yɛn mmerɛwyɛ no mu. Ne tumi mu na yɛbɛkɔ so aka ne Hene Guanhwɛfo, nea wɔfrɛ no ‘Yehowa no Yɛn Trenee’ no ho asɛm akyerɛ.

[Ase hɔ nsɛm]

Hwɛ The Galveston Daily News a ɛyɛ September 26, 1977 de no kratafa 3-A, wɔ asɛmti ‘Paapa Paul Rehwɛ ne Wu a Ɛrebɛn no Kwan’ no ase.

Efi September 1,1979 Engiresi Ɔwɛn-Aban Mu.