Nsɛmmisa a Efi Akenkanfo Hɔ

Esiane sɛ Yehowa Adansefo bɔ mmɔden di nokware na wɔwɔ wɔn ho wɔn ho mu ahotoso nti, dɛn nti na wɔte nka sɛ ɛho hia sɛ wɔyɛ krataa bere a wɔne wɔn ho yɛ adwuma nhyehyɛe no?

Saa a wɔbɛyɛ no ne Kyerɛwnsɛm hyia, mfaso wɔ so, na ɛkyerɛ ɔdɔ. Ɔkwan bɛn so? Wo de, ma yensusuw saa nsɛm a ɛfa adwumayɛ ho nhyehyɛe ho no ho.

Ɔkwan a Onyankopɔn faa so ne ne nkurɔfo Israelfo a na ɔne wɔn ayɛ apam no dii nsɛm ho kyerɛwtohɔ wɔ Bible mu. Nnwuma nhyehyɛe a nokware asomfo yɛe nso ka ho. Biako wɔ Genesis ti 23 a yebetumi asusuw ho. Bere a Abraham dɔfo Sara wui no, ɔpɛe sɛ onya asase a obesie no wɔ so. Ofii ase ne Kanaanfo a na wɔte bɛn Hebron no yɛɛ nhyehyɛe. Nkyekyem 7-9 kyerɛ sɛ ɔkaa bo ankasa a ɔbɛma wɔ asase a na ɔhwehwɛ no ho. Nkyekyem 10 da no adi sɛ ɔkaa bo yi wɔ baguam maa afoforo tee wɔ kurow no pon ano. Nkyekyem 13 kyerɛ sɛ asasewura no pɛe sɛ ɔde asase no ma Abraham, nanso ɔkae sɛ sɛ ɔbɛfa asase no a, gye sɛ ɔtɔ tua ka. Na nkyekyem 17, 18, ne 20 kyerɛkyerɛ mu sɛ saa pɛpɛɛpɛ na ɛbae, na wɔka ma esii “wɔ Het mma anim, wɔn a wɔhyɛn ne kurow pon mu no nyinaa anim.”

Na sɛ nnipa baanu a wɔreka sikasɛm no nyinaa yɛ nokware asomfo a, tebea no bɛyɛ soronko anaa? Yeremia ti 32 de mmuae no ma. Efi nkyekyem 6 reba no, yehu sɛ na Yeremia rebɛtɔ asase bi afi ne papa nua ba bi hɔ. Nkyekyem 9 kyerɛ sɛ wɔpenee ɛbo a ɛfata bi so. Afei kenkan nkyekyem 10-12: “Na [me Yeremia] mekyerɛw mehyɛɛ nhoma mu, na mesɔw ano, na mefrɛɛ adansefo, na mede nsenia mekarii dwetɛ no. Na mede ɔtɔ nhoma a wɔasɔw ano no, nea wɔadi ano na wɔahyehyɛ no, ne nea ano da hɔ no, na mede ɔtɔ nhoma no memaa Maaseia ba Neria ba Baruk, m’agya ne nua Hanamel ne adansefo a wɔde wɔn nsa hyɛɛ ɔtɔ nhoma no ase no ne Yudafo a wɔtete awɛmfo abangua mu hɔ no nyinaa anim.”

Yiw, ɛwom sɛ na Yeremia ne ne yɔnko somfo, ne busuani mpo, na ɛredi de, nanso ɔfaa mmara kwan so yɛɛ ade nyansam. Ɔyɛɛ kyerɛwtohɔ abien—biako a wɔansɔw ano na wobetumi ahwɛ mu bere biara, ne nea ɛto so abien a wɔsɔw ano a sɛ ɛba sɛ obi gye nea wotumi hwɛ mu bere biara no ho kyim a, wɔde bedi adanse. Wɔyɛɛ eyi nyinaa wɔ “wɔn anim,” sɛnea nkyekyem 13 ka no. Enti na ɛyɛ adetɔ ho nhyehyɛe a wɔfaa mmara kwan so yɛe wɔ baguam na adansefo wɔ ho. Ɛnde, ɛda adi pefee sɛ nokware asomfo wɔ Kyerɛwnsɛm mu sɛnnahɔ a wogyina so di nsɛm ho dwuma wɔ ɔkwan a edi mũ so saa ara, na wɔyɛ so krataa.

Mfaso wɔ so nso. Yenim sɛnea asɛm a wɔka sɛ “bere ne akwanhyia to wɔn nyinaa” no yɛ nokware. (Ɔsɛnkafo 9:11, NW) Ɛno fa Kristofo a wɔwɔ ahofama na wodi nokware nso ho. Yakobo 4:13, 14 ka no saa kwan yi so sɛ: “Afei mo ɛ! Mo a moka sɛ: Ɛnnɛ ne kyena yɛbɛkɔ sɛɛ ne sɛɛ kurow yi mu akodi hɔ afe, na yɛatɔ atɔn na yɛanya mfaso. Nanso munnim nea ɛbɛba ɔkyena.” Enti ebia yebefi adwuma bi ase, te sɛ adetɔ, adwuma bi a yɛne obi ahyehyɛ ho a yɛreyɛ, anaa nneɛma bi a yɛreyɛ ama obi. Nanso dɛn na ɔkyena—anaasɛ ɔsram anaa afe a ɛreba no—de bɛba? Na ɛba sɛ yɛn anaa nea yɛne no ayɛ nhyehyɛe no hyia akwanhyia ɛ? Ɛno betumi ama ayɛ te sɛ nea nhyehyɛe no ntumi mma so. Na sɛ yɛrentumi nyɛ adwuma no, anaasɛ ebia ɛyɛ den ma nea yɛne no ayɛ nhyehyɛe no sɛ obetua yɛn ka anaa obedi n’afã wɔ nhyehyɛe no mu ho dwuma ɛ? Sɛ krataa biara nni nhyehyɛe no ho a, ebetumi de nsɛnnennen ankasa aba, biribi a sɛ kyerɛwtohɔ ketewaa bi mpo wɔ ho a, anka wobetumi adi ho dwuma anaa wobetumi akwati.

Afei nso ɛnsɛ sɛ yɛn werɛ fi sɛ asetram tebea pii a etumi sakra no betumi ahwehwɛ sɛ obi foforo begyina yɛn (anaa nea yɛne no ayɛ nhyehyɛe no) ananmu ahwɛ ama sikasɛm no akɔ so. Yakobo de kaa ho wɔ nkyekyem 14 sɛ: “Moyɛ huruhurow a eyi ne ho kakra, na afei ɛyera.” Nokwasɛm ne sɛ, yebetumi awu mpofirim. Nhyehyɛe a wɔayɛ so krataa, anaa apam, betumi ama afoforo anya hokwan atoa dwumadi bi so sɛ ɛba sɛ biribi a yɛnhwɛ kwan to yɛn anaa nea yɛne no ayɛ nhyehyɛe no a.

Ɔkwan bi so no, eyi de yɛn kɔ ɔfã a ɛto so abiɛsa no so—nhyehyɛe a wɔyɛ ho nkrataa da ɔdɔ adi. Nokwarem no, sɛ ɛba sɛ nnipa baanu no mu biako wu anaa onya akwanhyia ma ɔka dan mu, na sɛ wayɛ ɛka a ɔde ne mfaso a ɔrehwɛ kwan ho kyerɛwtohɔ a, ɛbɛkyerɛ ɔdɔ a ɔwɔ sɛ Kristoni. Na sɛ́ anka kyerɛwtohɔ a ɛkyerɛ nea ɛsɛ sɛ onua a yɛne no ayɛ nhyehyɛe no yɛ anaa nea ɛsɛ sɛ onya pefee no bɛkyerɛ sɛ yennye no nni no, ɛkyerɛ sɛ yɛdɔ no. Saa adeyɛ a ɔdɔ wom yi betumi ama yɛasiw wontwiwontwi anaa menasepɔw a ebetumi aba bere a nnipa a wɔnyɛ pɛ a wɔayɛ nhyehyɛe yi mu bi werɛ afi biribi anaa wɔn asɛyɛde bi no ano. Na yɛn mu hena na ɔyɛ pɛ, ne werɛ mfi ade, anaasɛ otumi te biribiara anaa nhyehyɛe biara ase?—Mateo 16:15.

Akwan foforo wɔ hɔ a adwuma nhyehyɛe ho kyerɛwtohɔ a yɛbɛyɛ no da ɔdɔ a yɛwɔ ma yɛn nua, yɛn abusua, ne asafo mũ no nyinaa adi. Nanso ɛda adi sɛ ɔdɔ a ɛkyerɛ akyi no, kyerɛwtohɔ a ɛte saa a ɛkyerɛkyerɛ nsɛm mu kɔ akyiri no so wɔ mfaso, na ɛne Kyerɛwnsɛm no hyia.