Wɔapa Kristoman Ho Ntama Sɛ Nea Ɔma Atoro Som Nya Nkɔso

“Eyi ne ɔman a wontie [Yehowa] wɔn Nyankopɔn na wonnye nteɛso no.”​—YEREMIA 7:28

 1, 2. Yeremia yɛɛ n’ade dɛn wɔ ahyɛde a Onyankopɔn de maa no no ho?

“NOKWARE gyidi gya dɛwee wɔ no mu, na tumi bi hyɛɛ no sɛ ɔnka nokware no, sɛ ɔmfa nkaanim ne denhyɛ nso mma.” Saa nsɛm no na Hebrifo nhomanimfo baanu de kaa Yeremia dwumadi ho asɛm. Ɛwom sɛ na n’ahyɛde a efi Onyankopɔn hɔ no yɛ hu de, nanso na onim sɛ ɛsɛ sɛ odi asɛyɛde a ɔwɔ wɔ Yuda man no ho no ho dwuma. Saa na n’ankasa kaa ho asɛm: “Na [Yehowa] asɛm adan me ahohora ne nsopa daa adesae. Na sɛ mise: Merenkae no na meremmɔ ne din menkasa bio.” Yiw, ɛkame ayɛ sɛ nhyɛso ne ɔtaa no ano bɛyɛɛ den dodo maa no. Nanso so ɔpaa abaw?​—Yeremia 20:8, 9a.

² Yeremia toaa so sɛ: “Na ɛyɛ me koma mu sɛ ogya a ɛredɛw a wɔato mu me nnompe mu; miso mu a mebrɛ ho, na mintumi.” (Yeremia 20:9b) Yeremia ammu n’ahyɛde a ɛne sɛ ɔmmɔ Onyankopɔn atemmu ahorow ho dawuru nkyerɛ Yuda no so.​—Yeremia 6:10, 11.

Nnɛ Bere Yi Mu Yeremia

 3. Su bɛn na Yesu ne n’asuafo no daa no adi wɔ wɔn adwuma a wɔde hyɛɛ wɔn nsa no ho?

³ Te sɛ Yeremia no, Kristo Yesu ne Kristofo asuafo a wodi kan no de akokoduru kaa Onyankopɔn Ahenni ho asɛmpa a wɔmpɛ no kyerɛɛ Yudafo ne amanaman no. Ɛwom sɛ na wɔadi kan de Petro ne asomafo afoforo no ato afiase wɔ wɔn asɛnka no ho de, nanso wɔde akokoduru buaa wɔn nyamesom mu anototofo no sɛ: “Ɛsɛ sɛ yetie Onyankopɔn mmom sen nnipa.” Ɛdenam nyamesom mu akannifo ahyɛde so no, wɔhwee wɔn wɔ wɔn akokoduru no ho. Asomafo no yɛɛ wɔn ade dɛn? “Na wɔannyae Yesu Kristo ho asɛmpa no ka ne kyerɛkyerɛ asɔrefi ne afi mu da biara.”​—Asomafo no Nnwuma 5:29, 40-42; Mateo 23:13-33.

 4. Henanom na wɔadi Yeremia nhwɛso no akyi wɔ afeha 20 yi mu, na wɔayɛ eyi wɔ ɔkwan bɛn so?

⁴ Ɛdenam saayɛ so no, Kristofo a wodi kan a wɔasra wɔn no yɛɛ wɔn ade te sɛ Yeremia. Ɛwom sɛ wohyiaa tebea a emu yɛ den kɛse ne nyamesom mu atamfo a wɔyɛ mpi de, nanso wɔbɔɔ Onyankopɔn atemmu ahorow ho dawuru. Mprempren, afeha 20 yi mu nnipa bɛn na wɔadi nhwɛso a ɛte saa no akyi? Henanom na wɔaka Onyankopɔn atemmu ahorow a ɛfa nneɛma nhyehyɛe yi, ne titiriw no Yerusalem nsusuwso a ɛne Kristoman ho no ho asɛm wɔ baguam ne afie ne afie? Wɔaboaboa abakɔsɛm mu adanse ano bɛboro mfe 68 de akyerɛ sɛ nnɛ bere yi mu Yeremia kuw no ne Yehowa adansefo a wɔasra wɔn kuw ketewa a wɔwɔ akokoduru no. Wɔde “nnipakuw kɛse” ɔpepem pii a wɔwɔ ɔpɛ a wɔredɔɔso a wonim wɔn nso sɛ Yehowa Adansefo no abɛka wɔn ho na wɔaboa wɔn nso. Ɛdenam biakoyɛ so no, wɔayɛ Yeremia adwuma a wɔde ama wɔn no denam atoro som a wɔkasa tia sɛ ɛyɛ afiri ne nnaadaa no so.​—Adiyisɛm 7:9, 10; 14:1-5.

Kristoman​—Dɛn Nti na Ɛyɛ Yerusalem Nnɛyi Nsusuwso?

 5. Akwan horow bɛn so na Kristoman te sɛ tete Yerusalem?

⁵ Ebia obi bebisa sɛ, ‘Nanso ɛhe na yehu nsɛdi a ɛfa tete Yerusalem ne Kristoman ho no?’ Esiane su ne tebea horow a ɛwɔ ahantan Kristoman mu nnɛ no nti. Wɔde wɔn ho to wɔn ‘nkurow kronkron’ ne abosonnan so, te sɛ Rome, Jerusalem, Canterbury, Fatima, Guadalupe, ne Zaragoza so, sɛ yɛbɛbobɔ kakraa bi din a. Wɔn ani gye ho sɛ wɔbɛkamfo wɔn asɔfo atrae ne wɔn asɔredan akɛse na wɔde kyɛ a akyɛ ne n’adwinni hoahoa wɔn ho te sɛ nea eyinom ma wonya gyinabea titiriw bi wɔ Onyankopɔn anim. Wɔka mpo sɛ wosii wɔn asɔredan akɛse no sɛnea ɛbɛyɛ a ‘ɛbɛhyɛ Onyankopɔn anuonyam.’ Nanso, adan ahorow yi mu ahe na Yehowa Nyankopɔn din da so ankasa? Nea ɛne no bɔ abira no, wɔma obi kae adansifo a wɔkyerɛɛ ɔkwan a ɛsɛ sɛ wɔfa so si dan no, mfoniniyɛfo a wɔde nneɛma siesiee mu, asikafo a wotuaa ka anaasɛ “ahotefo” a wohyiraa so maa wɔn no. Ahotoso a Kristoman wɔ wɔ tete nneɛma ne atetesɛm mu no yɛ nnaadaa te sɛ nea ahotoso a na Yuda wɔ wɔ n’asɔrefi kronkron no mu no te no.​—Yeremia 7:4.

 6. Ɔkwan bɛn so na kasa a Yesu kasa tiaa Yudafo asɔfo no fa Kristoman asɔfo no ho nnɛ?

⁶ Nea ɛne sɛnea Yeremia kasa tiaa Yudafo asɔfo ne adiyifo hyia no, dɛn na wobetumi aka wɔ Kristoman asɔfo ho nnɛ? Ɛdenam nsɛm a Yesu kaa no pefee te sɛ Yeremia so no, ɔkaa Yudafo asɔfo no ho asɛm a ɛfata Kristoman asɔfo de besi nnɛ: “Wonni nea wɔka no so . . . Biribiara a wɔyɛ no wɔyɛ de twetwe adwene ba wɔn ho so . . . te sɛ pɛ a wɔpɛ sɛ wɔtra nidi trabea wɔ apontow ase ne hyiadan mu nkongua a ɛwɔ anim so.” (Mateo 23:3-7, The Jerusalem Bible) Hwɛ sɛnea yɛtaa hu asɔfo ne asɛnkafo a wɔagye din sɛ wohyira amammui ne ɔmampɛ nhyiam horow so denam kɔ a wɔkɔ hɔ no so​—na nsɛm ho amanneɛbɔfo ka wɔne amammuifo ho asɛm kyerɛ.

 7. (a) Ɔkwan bɛn so na asɛnkafo binom redaadaa ɔmanfo no? (b) Adwumaden bɛn na asɔfo akwati?

⁷ Mprempren wɔ Television bere yi mu no, yɛwɔ TV so asɛnkafo a wɔnam saa afiri no so de agodi mu nnaadaa ne nneɛma a enya adwene no so tumi biara di dwuma de daadaa ɔmanfo na wogye nguankuw no sika. Hwɛ sɛnea Yeremia ɔkasatia no fata nnɛ mpo wɔ bɛyɛ mfe 2,600 akyi! “Na efi wɔn mu akumaa so kosi wɔn mu ɔkɛse so, wɔn nyinaa yɛ adifudepɛfo, na efi odiyifo so kosi ɔsɔfo so, wɔn nyinaa yɛ nkontompofo.” Wɔ bere koro no ara mu no, wɔn mu biara nni hɔ a ɔpɛ sɛ ogye adwumaden a ɛne nokware Kristofo ɔsom adwuma no, nnipa no nkyɛn a wɔbɛkɔ wɔ afie afie no tom. Yehowa Adansefo nkutoo​—Yeremia kuw a wɔasra wɔn no ne “nnipakuw kɛse” no​—na wɔagye saa asɛyɛde no atom.​—Yeremia 6:13; Asomafo no Nnwuma 20:20, 21.

So Wɔagye Kristoman?

 8. Dɛn nti na Kristoman gye di sɛ Harmagedon rentumi nka no?

⁸ Saa TV so asɛnkafo koro yi ara nam ‘awo foforo’ ne “wogye a na wɔagye wo” fene ne nkyerɛkyerɛ a wɔde di dwuma pii no so daadaa ɔmanfo kɔ atoro ahobammɔ mu. Wɔama nnipa ɔpepem pii a ɛkame ayɛ sɛ wofi Kristoman nyamesom biara mu no agye adi sɛ ‘wɔawo wɔn foforo’ na “wɔagye wɔn.” Amammuifo a wɔn ani nwu ade taa ka saa asɛm no. Yiw, wɔn asɛnkafo a wɔpɛ wɔn asɛm ka kyerɛ wɔn sɛ wɔne Onyankopɔn wɔ asomdwoe efisɛ “wɔagye wɔn”​—wɔ wɔn nyamesom, amammui, ne ɔmampɛ mu mpaapaemu no nyinaa akyi! Na nnipa no pɛ no saa, sɛnea wɔyɛe wɔ wɔ Yeremia bere so mpo no! (Yeremia 5:31; 14:14) Wosusuw sɛ Onyankopɔn Harmagedon atemmu no rentumi nka wɔn.​—Yeremia 6:14; 28:17; 1 Korintofo 1:10; Adiyisɛm 16:14, 16.

 9. (a) Henanom na ‘wo a wɔwo obi foforo no’ fa wɔn ho ankasa? (b) Dɛn na Bible no ka wɔ ɔkra no ho? (Ɛdefa nsemmisa abien yi nyinaa ho no, fa biribi foforo fi Reasoning From the Scriptures no mu gyina akyi.)

⁹ Nanso, Onyankopɔn Asɛm a wɔde boasetɔ sua ne Kristo nkyerɛkyerɛ da no adi sɛ nnipakuw ketewa bi pɛ na wɔwɔ hokwan a ɛne sɛ ‘wɔawo wɔn foforo,’ ‘nsu ne honhom’ a wofi mu wo wɔn ma enti wɔne Kristo nya ɔsoro nniso mu kyɛfa. (Yohane 3:3-5; Romafo 8:16, 17; Adiyisɛm 14:1-3) Ɛho nhia sɛ wɔwo nokware Kristofo a wɔyɛ “nnipakuw kɛse” a wɔwɔ hɔ nnɛ no foforo efisɛ wɔn daa nkwa ho anidaso no yɛ asase so de, na ɛnyɛ ɔsoro de. (2 Petro 3:13; Adiyisɛm 21:3, 4) Bio nso, Kristoman nkyerɛkyerɛ gyina atoro nsusuwii so​—sɛ onipa wɔ ɔkra a enwu da a ehia nkwagye. Biribiara nni Bible no mu a wɔde begyina nkyerɛkyerɛ a ɛte saa a nokwarem no wonya fii tete Hela nyansapɛ mu no akyi.a

N’Asɛm Anaasɛ Ne Din Nyɛ Wɔn Dɛ

10. Asɔfo no mu pii bu Bible no dɛn?

¹⁰ Nsɛdi afoforo a ɛfa tete Yerusalem ne nnɛ bere yi mu Kristoman ho wɔ hɔ: “Yeremia kae sɛ: [Yehowa] asɛm adan wɔn ahohorade, ɛnyɛ wɔn dɛ.” (Yeremia 6:10) Asɔfo no pɛ mmom sɛ wɔbɛfa nyansapɛfo ne nyansahufo nsɛm aka sen Yehowa Asɛm. Pii ani wu wɔ Bible no ho; wɔnam wɔn “ɔkasatia kɛse” no so di ho fɛw. Wɔkyerɛ sɛ ɛyɛ anansesɛm a wɔde ma sɛ nhoma pa. (Yeremia 7:28) Na wobu ne Kyerɛwfo din animtiaa. Adanse bɛn na yɛwɔ wɔ nea yɛka yi ho?

11. Nsonsonoe bɛn na ɛda Kristoman ne Yeremia ntam wɔ Onyankopɔn din a wɔde di dwuma no mu?

¹¹ Ɛwom sɛ ɛkame ayɛ sɛ Hebri tetragrammaton ((יהוה) no pue 7,000 wɔ Hebri Kyerɛwnsɛm no mu de, nanso wɔde “AWURADE” a ɛnkyerɛ obi pɔtee no asi edin “Yehowa” anaasɛ “Yahweh” no ananmu wɔ Engiresi Bible pii mu. Sɛ nhwɛso no, wɔayi din no afi mprempren Bible nkyerɛase ahorow a ɛwɔ Afrikaan kasa mu no mu koraa. Spania Franquesa-Sole nkyerɛase no de din no dii dwuma wɔ ne kan nkyerɛase no mu. Bere a wotintim foforo no, na din kronkron no nnim na wɔde Senor (Awurade) asi ananmu. Na sɛ Kristoman nkyerɛase ahorow no de Onyankopɔn din ka ho a, asɔfo no ntaa mfa nni dwuma. Nanso, Yeremia de Onyankopɔn din a ɛda nsow no dii dwuma mpɛn 726 wɔ ne nkɔmhyɛ nsɛm no mu!b

“Ɔsoro Hemmaa” ne Ahonisom

12-14. (a) Na adwuma a wɔde nnamyɛ yɛ bɛn na na Yudafo mmusua de wɔn ho ahyem? (b) Yehowa buu wɔn som no dɛn?

¹² Yehu nsɛdi foforo bere a yɛhwehwɛ Yeremia asɛm a ɔka kyerɛɛ Yerusalem no mu no. Bere a Yehowa ka kyerɛɛ ne diyifo no sɛ ɔmmmɔ mpae mmma nnipa no, ɔdaa nea enti a ɔkaa saa no adi. “So wunhu nea wɔreyɛ Yuda nkurow mu ne Yerusalem mmorɔn so no anaa? Mma tase nnyina, na agyanom sɔ ogya, na mmea fɔtɔw mmɔre.” Na adwuma bɛn na na abusua mũ no nyinaa reyɛ no? “Sɛ wɔreyɛ tetare ama ɔsoro hemmaa no.”​—Yeremia 7:16-18; 44:15, 19.

¹³ Yudafo kyerɛwtohɔ bi ka sɛ: “Wɔde anigye dii ‘ɔsoro hemmaa’ no som akyi wɔ baguam.” Nea ɛyɛ nwonwa no, na Yuda man no resom abosom, na wɔresom abosonsomfo onyamewa bi, ebia Babilonfo awo onyamewa, Ishtar, onyame a ɔto so abiɛsa wɔ Babilonfo anyame baasakoro no mu no. Anaasɛ saa “ɔhemmaa” yi betumi ayɛ Kanaanfo onyamewa, Astoret.​—1 Ahene 11:5, 33.

¹⁴ Na wɔde wɔn ho hyɛ ahonisom afoforo mu de ka saa onyamewa yi som ho. Yehowa kasa tiaa wɔn wɔ eyi ho bere a ɔkaa eyi no: “Ɛdɛn nti na wɔde wɔn ahoni ne amannɔne ahuhude no ahuru me bo?” Afobu no toa so sɛ: “Na wɔantie me, na wɔannantew mu ntia. Na wodii wɔn koma denyɛ akyi ne Baalim akyi, sɛ wɔn agyanom kyerɛɛ wɔn no.” (Yeremia 8:19; 9:13, 14) So Kristoman atɔ afiri koro no ara mu?

15. (a) Tebea a ɛfa ahonisom ho bɛn na yehu wɔ Kristoman mu nnɛ? Fa nhwɛso a ɛwɔ faako a mote no ma. (b) Maria ho gyinabea bɛn na nokware Kristofo paw? (Hwɛ Reasoning From the Scriptures, nkratafa 254-61 nso.)

¹⁵ Kɔ asɔredan biara mu​—Protestant, Katolek, anaasɛ Ortodoks​—na anyɛ yiye koraa no wobehu mmeaemudua ahoni wɔ hɔ. Nanso wɔ Katolekfo ne Ortodoksfo mu no, wɔwɔ “ɔbaabun Maria Kronkron, Nokware Nyankopɔn no Na” a wɔayɛ no wɔ akwan horow pii so wɔ hɔ.c Wɔde abodin a ɛso sen biara ma no a nea ɛka ho ne “Ɔsoro Hemmaa” ne “amansan no Hemmaa”!d Nea ɛne yi bɔ abira no, bere a Yeremia kuw no de obu ma Maria sɛ Yesu ne na ne gyidini a wɔasra no no, wɔde ahwɛyiye adi asomafo no afotu yi akyi: “Mma nkumaa, monwɛn nyi mo ho mfi abosom ho.”​—1 Yohane 5:21; Yeremia 10:14.

Baasakoro Si Amansan Hene Biako Yehowa no Ananmu

16. Nkyerɛkyerɛ bɛn na ebuee kwan maa Maria som, na ɔkwan bɛn so?

¹⁶ Nanso ebia wubebisa sɛ, ‘Ɛyɛɛ dɛn na Maria som yi bae?’ Efi ade foforo a awaefo a wodi kan asɔre no yɛe sɛ ɛde begye abosonsomfo no. Na wokura anyame baasa a wɔyɛ biako adwene no wɔ abosonsomfo wiase no mu. Na tete Romafo no wɔ asɔre adan a adan nketewa abiɛsa wom a na “wɔahyira so ama anyame baasa a wɔde wɔn bata gyidi ne ɔsom ho no. Saa na na asɛm no te wɔ Jupiter Optimus Maximus asɔredan a ɛwɔ Capitol a wɔahyira so ama onyame baasa a ɔne Jupiter-Juno-Minerva no.”e

17, 18. (a) Dɛn na wɔakata so ma enti ama Baasakoro nkyerɛkyerɛ anya nkɔso? (b) Fa nsɛm afoforo fi Reasoning From the Scriptures no mu ma.

¹⁷ Sɛnea ɛbɛyɛ a wɔbɛma “Baasakoro Kronkron a Ɛsen Biara” nkyerɛkyerɛ a na ɛrefi ase no anya nkɔso wɔ mfeha a ɛto so abiɛsa ne anan no mu no, na ɛho hia sɛ Katolek Asɔre no kata Hebrifo adwene a wɔada no adi pefee wɔ Yeremia nsɛm no mu no so: “Obiara nni hɔ a ɔte sɛ wo, [Yehowa]; wo na woyɛ kɛse, na wo din nso so, mmaninyɛ mu. Na [Yehowa] ne nokware Nyankopɔn no, ɔne Onyankopɔn teasefo ne daa hene.” Yesu sii saa ntease no so dua bere a ɔfaa asɛm fii Mose nsɛm mu kae no: “Israel tie, [Yehowa] yɛn Nyankopɔn yɛ [Yehowa] koro.”​—Yeremia 10:6, 10; Marko 12:29; Deuteronomium 6:4.

¹⁸ Esiane Yudafo atoro gyidi a ɛne sɛ ɛnsɛ sɛ wɔbɔ “Yahwe” anaasɛ “Yehowa,” no nti, Kristoman a awae no amfa Onyankopɔn din anni dwuma. Eyi maa wonyaa ɔkwan bi wɔ nyamekyerɛ mu a ɛbɛma wɔatumi de ‘Baasakoro Kronkron’ no ahyɛ ananmu.f

19. (a) Dɛn na afi Baasakoro a Kristoman agye atom no mu aba? (b) Nnaadaa bɛn na wɔde dii dwuma sɛnea ɛbɛyɛ a wɔbɛhyɛ Baasakoro no mu den?

¹⁹ Enti, Kristoman apaw sɛ ‘wobedi onyame foforo akyi,’ baasakoro nyame a na Yudafo, Kristo ne nokware Kristofo nnim koraa no. Na sɛnea ɛbɛyɛ a wɔbɛhyɛ saa abiɛsa a ɛka bom yɛ biako yi mu den no, Kristoman nhoma asekyerɛfo de nnaadaa dii dwuma mpo wɔ wɔn King James Version no mu.g Afei nso, Kristoman mufo fã kɛse no ara nso som “ɔsoro Hemmaa” no, ma enti ayɛ ade a ntease wom sɛ efi mu ba.​—Yeremia 7:17, 18, New International Version.

Asɔfo Ma Ɔtaa Nya Nkɔso

20, 21. Ɔkwan bɛn na Kristoman asɔfo afa so, na nsemmisa bɛn na mprempren ɛfata?

²⁰ Esiane nea yɛadi kan aka no nti, Yeremia asemmisa yi fata Kristoman asɔfo: “Ɛdɛn na moka sɛ: Yɛyɛ anyansafo, na [Yehowa] mmara wɔ yɛn hɔ? Ampa, hwɛ, kyerɛwfo atoro pɛnsere ama adan atoro. . . . Hwɛ, [Yehowa] asɛm na wɔapa yi, na nyansa bɛn na wɔwɔ?” (Yeremia 8:8, 9) Wɔapow Yehowa ne n’ananmusifo, n’adansefo. Te sɛ nea asɔfo ne adiyifo no taa Yeremia no, saa ara nso na Kristoman agyina ɔtaa a atirimɔden wom a wɔde aba Yehowa Adansefo so wɔ afeha yi mu nyinaa no pii akyi.

²¹ Nanso dɛn nti na wɔama ɔtaa yi anya nkɔso? Dɛn na Adansefo no ayɛ de ahyɛ wɔn abufuw na ɛma wɔka wɔn ho nsɛmmɔne? Asɛm a etwa to wɔ eyi mu no bɛhwehwɛ saa nsemmisa ne afoforo a ɛfa ho no mu.

[Ase hɔ nsɛm]

So Wokae?

◻ Ɔkwan bɛn so na wɔanhu nnɛ bere yi mu Yeremia kuw no?

◻ Nsɛdi ahorow a ɛfa tete Yerusalem ne Kristoman ho no bi ne nea ɛwɔ he?

◻ Ɔkwan bɛn so na asɔfo no adaadaa nnipa no ma wɔagye adi sɛ wɔne Onyankopɔn wɔ asomdwoe?

◻ Nneɛma a wɔabu ani agu so ne abosonsom bɛn na ɛkɔ so wɔ Kristoman mu?

[Mfonini wɔ kratafa 16]

Wɔ 1938 mu no, na Adansefo no kasa tia atoro som

[Mfonini wɔ kratafa 17]

Kristoman de ne ho to ne tete abosonnan so te sɛ nea Yudafo de wɔn ho too wɔn asɔrefi no so no

[Mfonini wɔ kratafa 18]

Kristoman mu TV so asɛnkafo daadaa ɔpepem pii ma wogye di sɛ “wɔagye wɔn” anaasɛ ‘wɔawo wɔn foforo’