Ɔyɛ Wɔn a Wɔsom No Nyinaa Katuafo

“MEDA WO ASE.” Hena na sɛ ɔyɛ adwuma bi wie anaa oyi ne yam kyɛ ade na wɔda no ase a, ɛrenyɛ no dɛ? Yɛn nyinaa pɛ sɛ nkurɔfo ani sɔ nea yetumi yɛ, titiriw yɛn adɔfo. Yɛdɔ yɛn Nyankopɔn Yehowa paa sen yɛn adɔfo nyinaa. Nea yɛyɛ sɔ n’ani anaa? Ma yɛnhwɛ sɛnea ɔne ɔbarima bi dii, ɔbarima a wɔfrɛ no Ebed-Melek a ɔde ne nkwa too ne nsam gyee Onyankopɔn diyifo bi nkwa no.—Kenkan Yeremia 38:7-13 ne 39:16-18.

Hena ne Ebed-Melek? Ɛbɛyɛ sɛ na ɔyɛ ɔpanyin wɔ Yuda Hene Sedekia ahemfie.a Yeremia a Onyankopɔn somaa no sɛ ɔnkɔbɔ Yuda man a na wɔawae no kɔkɔ sɛ ne sɛe reba no, ne bere so na Ebed-Melek tenaa ase. Ná mpanyimfo a wɔne Ebed-Melek wɔ ahemfie no yɛ amumɔyɛfo, nanso na Ebed-Melek suro Onyankopɔn na na obu Yeremia paa. Biribi too Yeremia a na ɛbɛma Ebed-Melek akyerɛ sɛ ɔyɛ ɔnokwafo ampa. Wotwaa asɛm too Yeremia so sɛ otutu ɔman ase, na wɔtow no too abura a atɛkyɛ na ɛwom mu sɛ onwu. (Yeremia 38:4-6) Ná dɛn na Ebed-Melek bɛyɛ?

Ebed-Melek ansuro nea ahemfie mpanyimfo no betumi ayɛ no, na mmom ɔde akokoduru yɛɛ asɛm no ho biribi ntɛm pa ara. Ebed-Melek kɔɔ Sedekia anim bere a obiara wɔ hɔ kɔka kyerɛɛ no sɛ ade a wɔde ayɛ Yeremia no nteɛ. Ebetumi aba sɛ ɔde ne nsa kyerɛɛ awudifo no so ansa na ɔreka akyerɛ ɔhene sɛ: “Mmarima yi ayɛ [Yeremia] bɔne.” (Yeremia 38:9) Sedekia tiee Ebed-Melek asɛm no, na ɔmaa no mmarima 30 ma ɔne wɔn koyii Yeremia.

Saa bere no nso Ebed-Melek yɛɛ biribi de kyerɛe sɛ ɔwɔ su pa foforo a ɛne ayamye. Ɔfaa “ntamagow ne ntama dedaw . . . na ɔde ahama susoo mu gyaa mu maa Yeremia.” Adɛn nti na ɔfaa ntamagow ne ntama dedaw? Sɛnea ɛbɛyɛ a Yeremia de bɛhyehyɛ ne mmɔtoam na sɛ wɔretwe no afi atɛkyɛ no mu a, ahama no antwitwa no.—Yeremia 38:11-13.

Yehowa huu nea Ebed-Melek yɛe no. N’ani gyee ho anaa? Onyankopɔn nam Yeremia so ka kyerɛɛ Ebed-Melek sɛ Yuda sɛe abɛn. Afei Onyankopɔn maa Ebed-Melek biribi a ɔbenfo bi frɛ no “nkwagye ho awerɛhyem anum.” Yehowa kae sɛ: “Megye wo, . . . na wɔremfa wo nhyɛ nnipa . . . no nsa . . . Ofi na mɛma woafi mu, na worentɔ nkrante ano; wubenya wo kra sɛ asade.” Dɛn nti na Yehowa hyɛɛ Ebed-Melek bɔ sɛ ɔbɛkora ne so? Yehowa ka kyerɛɛ no sɛ: “Efisɛ wode wo ho too me so.” (Yeremia 39:16-18) Yehowa hui sɛ nea Ebed-Melek yɛe no, ɛnyɛ Yeremia a na odwen ne ho no nko ara nti na ɔyɛe, na mmom na ɔwɔ ahotoso ne gyidi wɔ Onyankopɔn mu.

Asuade a ɛwom ne sɛ Yehowa ani sɔ nea yɛyɛ wɔ ne som mu no. Bible ma yɛn awerɛhyem sɛ, sɛ yefi yɛn komam de gyidi yɛ nneɛma nketenkete mpo wɔ ne som mu a, ɔkae. (Marko 12:41-44) Wunhu sɛ ɛsɛ sɛ wutumi bɛn Onyankopɔn a n’ani sɔ adepa a yɛyɛ no? Sɛ saa a, ɛnde wubetumi anya awerɛhyem sɛ, ɔbɛyɛ “wɔn a wɔn ani abere rehwehwɛ no no katuafo” sɛnea n’ankasa Asɛm aka no.—Hebrifo 11:6.

May Bible akenkan:

◼ Yeremia 32-50

[Ase hɔ asɛm]