Som “Amanaman Hene” No Na Nya Nkwa

 1. Sɛnea nhwɛso a Ɔhene Yehoiakim ne ne nuabarima Sedekia a obedii n’ade no yɛe no kyerɛ no, so nnɛyi wiase sodifo bɛsakra ɔkwan a wɔnam so no esiane nea Yeremia kuw no ka no nti?

Sɛ Wiase sodifo, titiriw wɔn a wɔwɔ Kristoman mu no, gye tom sɛ nnɛyi Yeremia kuw bi wɔ hɔ ɛ? Na sɛ wɔsoma sɛ wonkobisa nea Yehowa nkɔmhyɛ asɛm no ka sɛ ɛbɛba wɔn so daakye ho no nso ɛ? So anka ɛbɛkyerɛ sɛ wɔpɛ sɛ wɔdan wɔn ho na wɔfa ɔkwan a ɛbɛma wɔafi “ahohiahia kɛse” a ɛbɛba wiase yi so a wɔaka ho asɛm asie no mu anaa? Dabi! Titiriw sɛ yɛfa Sedekia, Yuda hene a otwa to wɔ Yerusalem a na ɔyɛ Ɔhene Yehoiakim nuabarima, no sɛ nhwɛso a. Ná Ɔhene Yehoiakim ahyɛ Yeremia ne ne kyerɛwfo Baruk ma wɔakohintaw​—wɔankyerɛw bere tenten a wɔde yɛɛ saa. Nanso Ɔhene Yehoiakim nuabarima Sedekia yɛɛ bɔne a ɛkyɛn saa tiaa Yehowa dansefo nokwafo, Yeremia. Saa ara nso na nnɛyi wiase sodifo rensakra ɔkwan a wɔnam so no. Wɔn amammuisɛm ho anigye no mu yɛ den dodo. Na eyi mfa adepa biara mmrɛ wɔn a wodi wɔn so no.​—Yer. 37:2.

 2. Tebea horow bɛn mu na Sedekia ka kyerɛɛ Yeremia sɛ ɔmmɔ mpae mma Israelfo no, nanso dɛn na Yeremia ka kyerɛɛ no?

² Bere fam no, na ɛyɛ Sedekia ahenni afe a ɛto so akron no mu. Ná Babilon ntua a ɛto so abiɛsa na etwa to wɔ Yerusalem so no rekɔ so! Na asraafo a wofi Misraim reba abɛboa kurow a dɔm atwa ho ahyia no. Sɛnea ɛbɛyɛ na wobedi asraafo dɔm a ɛreba no ho dwuma no, Babilonfo a na wɔatwa kurow no ho ahyia no twee wɔn ho. Ɛyɛɛ te sɛ bere a na ɛsɛ sɛ wɔde srɛ Yehowa nhyira ma Misraim dɔm a wɔreba abɛboa no. Enti Ɔhene, Sedekia ka kyerɛɛ Yeremia sɛ “bɔ Awurade [Yehowa] wo Nyankopɔn mpae ma yɛn.” Nanso na Yehowa aka akyerɛ Yeremia sɛ mma ɔmmɔ eyi ho mpae. Na Yehowa rentie mpaebɔ a ɛte saa. (Yer. 37:3; 14:11, 12) Enti Yeremia kyerɛe sɛ Babilonfo no bedi Misraim asraafo a wɔreba abɛboa wɔn no so nkonim denam ka a ɔka kyerɛɛ Sedekia sɛ Babilonfo no bɛsan aba na wɔabɛhyew Yerusalem no so.​—Yer. 37:4-10.

 3. Dɛn nti na Yerusalem mmapɔmma ma wɔde Yeremia too “mpokyerɛfo dan” mu?

³ Bere a Babilonfo no twee wɔn ho no, Yeremia tee nka sɛ obetumi afi Yerusalem kurow no mu akɔ Anatot a ɛyɛ asɔfo kurow, wɔ Benyamin abusua no asasesin mu no mu. Bere a wɔkyeree no wɔ Yerusalem kusuufam ponkɛse, Benyamin Ponkɛse no ano no, ɔkae sɛ ɛnyɛ sɛ na ɔreguan akɔka ɔtamfo Babilonfo no ho. Bere a na wɔne no redi te sɛ nea ɔyɛ ɔman ase tutufo anaasɛ otirisopamfo no, kurow no mu mmapɔmma no de no kɔtoo “mpokyerɛ dan” mu, na wɔma ɔdaa hɔ “nna pii.” (Yer. 37:11-16) Hwɛ sɛnea ɛne nea wɔde yɛ nnɛyi Yeremia kuw no di nsɛ!

 4. Dɛn na Yeremia ka kyerɛɛ Ɔhene Sedekia sɛ ɔnyɛ na ama nneɛma mu ayɛ mmerɛw kakra ama no, na dɛn nti na woyii Yeremia kɔɔ Awɛmfo Abangua no mu?

⁴ Sɛ wɔde Yeremia kɔ Ɔhene Sedekia anim ankasa a, so obegyae asɛm a emu yɛ den a ɔka kyerɛ no? Bere a Ɔhene Sedekia ma woyii no fii mpokyerɛ dan no mu de no kɔɔ kokoam baabi kobisabisaa no nsɛm no, ɔde akokoduru ka kyerɛɛ ɔhene no sɛ Babilonfo a Yehowa de wɔn redi dwuma sɛ n’adwinnade no bɛfa no dommum. Sɛ ɔhene fi ne pɛ mu de ne ho kɔma wɔn o, sɛ wɔkyere no na wɔde no kɔ sɛ deduani o, ɛbɛkɔ akɔwie ade koro mu. Yeremia pɛe sɛ ɔhene no yɛ ade ma ɛyɛ mmerɛw ma n’ankasa ho. Yeremia amma ɔhene anidaso bi a ɛnyɛ nokware. Ɛda adi pefee sɛ na ɛnyɛ bɔne na Yeremia reyɛ n’ankasa ne nkurɔfo anaasɛ wɔn hene no, enti, dɛn nti na na ɛsɛ sɛ wɔde no sie nneduadan mu, a anka ɛbɛma wawu ntɛm? Bere a obisae no, ɔhene Sedekia ma woyii no fii hɔ kɔɔ Awɛmfo Abangua mu, biribi te sɛ asraafo afiase ma Yeremia. Na n’aduan yɛ abodoo ne nsu.​—Yer. 37:17-21.

ADEYƐ A NYANSA WOM NYƐ ƆMAN ASE TUTU

 5. Ná dɛn ne ade a ɛteɛ na ɛfata sɛ Ɔhene Sedekia yɛ wɔ Babilon ahemman no ho, na dɛn nti na na ɛsɛ sɛ obiara si n’ankasa ne gyinae wɔ nea ɔbɛyɛ wɔ Yerusalem ho no ho?

⁵ Ná Ɔhempɔn Nebukadnesar de Sedekia asi Yerusalem so hene. Nanso, bere a ɔsom Ɔhene Nebukadnesar mfe awotwe akyi no, Sedekia tew atua tiaa no. Ɔkwan a eye na ɛfata ne sɛ anka obegyae n’atuatew no na ɔde ne ho akɔhyɛ ahemman a Yehowa ama kwan ma abɛyɛ Wiase Tumi a Ɛto so Abiɛsa wɔ Bible nkɔmhyɛ mu no ase asomdwoe mu. Sɛ ɔno, sɛ ɔhene no anyɛ saa a, ɛnde ɛbɛyɛ papa ama ɔmanfo no sɛ wɔyɛ saa. Yiw, na ɛsɛ sɛ wɔyɛ sɛnea Yeremia apae mu aka akyerɛ nnipa a wɔwɔ Yerusalem no:

“Sɛ Awurade [Yehowa] se ni: Nea ɔbɛtra kurow yi mu no bewu afoa ne ɔkɔm ne owuyare ano, na nea ofi adi kɔ Kaldeafo nkyɛn no benya nkwa, na ne kra bɛyɛ no sɛ asade, na ɔbɛtra ase. Sɛ Awurade [Yehowa] se ni: Oyi na wobeyi kurow yi ahyɛ Babel hene dɔm no nsa, na wɔafa.” (Yer. 38:2, 3)

Ná anka ɛsɛ sɛ Ɔhene Sedekia di kan wɔ saa afotu a efi honhom mu yi ho osetieyɛ mu. Nanso esiane sɛ wanyɛ saa nti, ɛbɛyɛɛ ɔmanfo asɛyɛde sɛ obiara fi gyidi mu di Yehowa akwankyerɛ ho dwuma.

 6. Dɛn nti na mmapɔmma no ma wɔde Yeremia too abura bi mu wɔ ɔhene ba no adiwo hɔ?

⁶ Yerusalem mmapɔmma pɛe sɛ wokum Yeremia, efisɛ wɔkyerɛe sɛ ɔretu asraafo a wɔbɔ kurow no ho ban no abasam; ɔrema ɔpɛ a na nkurɔfo no wɔ sɛ wɔbɛko no ano abrɛ ase. Enti, bere a ɔhene mmaa wɔn kwan no, wɔma wɔtoo Yeremia kyenee abura bi a ɛwɔ Awɛmfo Abangua, a na ɛwɔ Sedekia “ba” Malkia fi no mu. Abura no ase hɔ no, Yeremia mene kɔɔ dontori no mu. Afei de na ontumi nni afotu a ɔno ankasa de maa afoforo no ho dwuma.

 7. Hena na afei ɔkɔ kogyee Yeremia, na dɛn ntia?

⁷ Bere a na ɛte sɛ nea anidaso biara nni hɔ mma Yeremia no, wogyaagyaa ntampehama mu guu abura no mu a na ntamagow ka ho ma ɔde ahyɛ ne mmɔtoam na wɔde atwe no afi dontori no mu. Ná Etiopiani piani bi a wɔfrɛ no Ebed-melek a ɔyɛ adwuma ma ɔhene no ate odiyifo no amanehunu ho asɛm. Esiane sɛ na osuro sɛ Yeremia bewu wɔ abura a dontori wɔ mu no mu nti, osii ne bo sɛ ɔne ɔhene no bɛkasa. Ɔhene no maa no kwan sɛ ɔmfa mmarima aduasa nka ne ho na onkoyi Yeremia.​—Yer. 28:10-12.

 8, 9. (a) Kokoam nkɔmmɔ bi a wɔbɔe mu no, ɔkwan bɛn so na Ɔhene Sedekia ammɔ mmɔden sɛ ɔbɛhyɛ Yeremia ma wɔahyɛ nkɔm a ɛnyɛ nokware? (b) Afotu a ɛnsakra bɛn na Yeremia de maa Sedekia, na dɛn a obetumi ayɛ na ɔde sii n’anim?

⁸ Na Ɔhene Sedekia a ɔhyɛ ma woyii Yeremia no yɛɛ nhyehyɛe sɛ ɔne no behyia abɔ nkɔmmɔ kokoam bio wɔ asɔrefi aboboano. Sedekia kaa Yehowa a ɔma nkwa no ntam sɛ ɔremma wonkum odiyifo no wɔ Onyankopɔn nokware asɛm a ɔbɛka akyerɛ no nti, nanso wanhyɛ bɔ sɛ obetie. Bere a wɔagye no afi owu mu a anka ebetumi ama wadan ɔtoro diyifo no, Yeremia gyinaa asɛm koro no ara a ɔkae a enti anka wɔrekum no no akyi denneennen:

⁹ Ɔhene Sedekia, sɛ́ ɔhene no, ɛsɛ sɛ woankasa wode Yerusalem ma Kaldeafo no, anyɛ saa a Yehowa ankasa de bɛhyɛ wɔn nsa ma Kaldeafo no ahyew. Nsuro sɛ Yudafo a wɔadi kan atie m’afotu na wɔaguan akɔka asraafo a wɔatwa kurow no ho ahyia no ho no begoru wo ho. Sɛ woamfa wo ho amma a, dɛn na ɛbɛba? Ɛnde wɔbɛma mmea a wobenya wɔn ti adidi mu no ato dwom aka sɛnea wɔn a wɔne wo traa hɔ asomdwoe mu no daadaa wo na wogyaa wo atirimɔden mu ma wɔmene kɔɔ dontori mu, bere a wɔn de woguanee. Afei nso, wɔbɛfa woankasa wo yere ne wo mma nnommum de wɔn akɔ. Wo ankasa woremfi Babilon hene nsam. Ao, wubedi kurow no a wɔbɛhyew no no ho sõ!’​—Yer. 38:17-23.

10. Ɔkwan bɛn na Yeremia faa so ma ɛyɛɛ mmerɛw maa Ɔhene Sedekia denam nea ɔka kyerɛɛ mmapɔmma a wobebisabisaa no nsɛm no so, na ɔtraa beae foforo a wɔde no kɔe no kosii bere bɛn?

¹⁰ Yerusalem mmapɔmma no na wɔyɛɛ te sɛ Ɔhene Sedekia “nnamfo.” Esiane sɛ osuro eyinom nti, ɔka kyerɛɛ Yeremia sɛ, wɔ owu mu mpo no, ɛnsɛ sɛ ɔka nokware no kyerɛ wɔn, sɛ wobisa a. Ná ɛsɛ sɛ ɔbɔ wɔn asemmisa no gu ara kwa sɛ ɔhene ato nsa afrɛ no, esiane sɛ na ɔmpɛ sɛ wɔsan de no kɔto mpokyerɛ dan mu wɔ Yehonatan, ɔkyerɛwfo no, fi na wakowu wɔ hɔ nti. Ɛdenam kokoam nkɔmmɔ a wɔbɔe no mu nsɛm no nyinaa a ɔrenka nkyerɛ wɔn a wobisa no so no, na ɔbɛma ayɛ mmerɛw ama ɔhene no. Nea ɛne asɛm a Yeremia ka kyerɛɛ mmapɔmma a na wɔn adwenem ayɛ wɔn nãa no hyia no, wɔde no too baabi foforo sɛ deduani, Awɛmfo Abangua no mu. Ɔtraa hɔ kosii ɔsram a ɛto so anan (Tamus) da a ɛto so akron no so wɔ afe 607 A.Y.B. mu, bere a Babilon ba bebubuu Yerusalem, dii so nkonim na Ɔhene Sedekia ne ne dɔm guanee no.​—2 Ahe. 25:2-5.

11. Da a wodii Yerusalem so nkonim no, ɔkwan bɛn so na wosiw Mfinimfini Ponkɛse no a anka Yudafo a wɔaka wɔn ahyɛ mu no betumi afa hɔ aguan no ano?

¹¹ Enti, sɛnea na Yeremia abɔ kɔkɔ no, ɛho behiae sɛ Yehowa a na Sedekia te n’asase so ahengua so wɔ Yerusalem no de kurow no hyɛ dɔm a wɔatwa ho ahyia no nsa. Ne saa nti, saa Tamus da a ɛto so 9, 607 A.Y.B. mu no, sɛ́ anka Yudafo atemmufo no bɛtra Yerusalem Mfinimfini Ponkɛse no ano adi nsɛm ahorow no, Babilon mmapɔmma baanum, a wɔakyerɛkyerɛw wɔn din, na wɔtraa kurow no ponkɛse no mu. Saa kwan yi so no wosiw ɛhɔ a na anka Yudafo a wɔaka wɔn ahyem no mu binom bɛfa aguan no ano. (Yer. 39:1-3; 1 Be. 29:23) Asɛm bɛn ni!

12. Ɔkwan bɛn so na Ɔhene Sedekia antumi amma nkɔm a Yeremia hyɛ faa ne ho no anyɛ ɔkwa, na dɛn na wɔma ɔde n’ani hui wɔ Nebukadnesar anim?

¹² Bere a Ɔhene Sedekia ne ne dɔm no guan fii kurow a na asraafo atwa ho ahyia no mu anadwo sum no mu no, ebia ɔkamfoo ne ho sɛ watumi ama Yeremia nkɔmhyɛ a emu yɛ den a ɛfa ne ho no ayɛ ɔkwa. Nanso wantumi ankodu ne boafo Farao Hofra a ɔwɔ Misraim no nkyɛn. (Yer. 44:30) Babilonfo a wotiw no no kɔtoo no Yeriko sare no so, wɔ Araba Bon no mu, a ɛne Yerusalem ntam twe akwansin kakraa wɔ kusuufam apuei. Wɔde kɔbere nkɔnsɔnkɔnsɔn guu no na wɔde no kɔɔ kusuufam kurow a wɔfrɛ no Ribla no mu wɔ Hamat asase so, ma wakohyia Ɔhene Nebukadnesar. Ansa na Ɔhene Nebukadnesar rehyɛ ma wɔatutu n’ani no, wodii kan hyɛɛ no ma ɔhwɛɛ n’ankasa ne mmabarima a wokunkum wɔn yayaaya. Wokunkum n’ahemfie mpanyimfo ne asraafo mpanyimfo no pii nso. Wokum Ɔsɔfo Panyin Seraia ne ne boafo Sefania a wɔannyina wɔn yɔnko sɔfo Yeremia akyi no, na wokunkum asɔrefi pon ano ahwɛfo baasa kaa wɔn ho.​—2 Ahe. 25:6, 7, 18-21.

13. (a) Saa tete abakɔsɛm no nyinaa faa afe 1914 Y.B. ho dɛn? (b) Dɛn nti na ntease wom sɛ yebisa sɛ ebia Ebed-melek yɛɛ kuw bi a ɛwɔ hɔ nnɛ ho mfonini, na mmuae no ne dɛn?

¹³ So saa tete abakɔsɛm yi nyinaa fa yɛn afeha a ɛto so 20 yi ho wɔ ɔkwan bi so? Yiw! Amanehunu a ɛtoo ɔhene Sedekia no akyi bɛyɛ asram abien no, n’ahenni no, Yuda asase no, bɛyɛɛ amamfo koraa. Ɛhɔ na amanaman no “mmere ason,” “amanaman mmere” a ɛyɛ mfirihyia 2,520 no fii ase, a na ɛbɛba awiei 1914 Y.B. mu. (Dan. 4; Luka 21:24) Sɛnea Yehowa, “Amanaman Hene,” no atemmu kyerɛ no, nea wɔde Yerusalem a na ɛwɔ hɔ Ɔhene Sedekia bere so yɛɛ ho mfonini no sɛe rebɛn. (Yer. 10:7) Ɛnde, hwɛ fata ara a ɛfata sɛ ɛsɛ sɛ Yehowa Nyankopɔn asomfo kuw bi a odiyifo ne ɔsɔfo Yeremia yɛɛ wɔn ho mfonini wɔ hɔ wɔ saa bere a emu yɛ den yi mu! Esiane eyi nti, yebisa ma ɛfata sɛ, so kuw bi a Etiopiani piani a ɔbɛyɛɛ Yeremia adamfo a wɔfrɛ no Ebed-melek, Ɔhene Sedekia akoa, yɛɛ wɔn ho mfonini bi wɔ asase so anaa? Adanse ahorow a ɛwɔ hɔ nnɛ kyerɛ sɛ kuw bi wɔ hɔ saa.

14. (a) Ɛdefa honam ani hwɛbea ho no, na Ebedmelek yɛ dɛn? (b) Dɛn nti na wammɔ mmɔden sɛ ɔne ne wura ɔhene no beguan afi Yerusalem?

¹⁴ Ebed-melek ammɔ mmɔden sɛ ɔne ne wura, Ɔhene Sedekia, beguan afi Yerusalem. Ná ɔyɛ Etiopiani, nnipa a Yeremia bisaa wɔ wɔn ho sɛ, “So Etiopiani betumi asakra ne were, anaasɛ ɔsebɔ bɛsakra ne ho nworanworan?” no. (Yer. 13:23) Ná Ebed-melek yɛ tuntum,a na Byington nkyerɛase mu no wɔfrɛ no “Ebed-melek obibini.” (Yer. 38:7, 12; 39:16) Ná ɛho nhia sɛ oguan fi Yerusalem sɛ ɔkɔhwehwɛ guankɔbea. Ná Yeremia Nyankopɔn no ahyɛ no bɔ wɔ kora a wɔbɛkora no so ho. Ɛno nti na bere a wɔaka nea Nebukadnesar de yɛɛ Yudafo ahiafo ne Yeremia ho asɛm kyerɛɛ yɛn no akyi no, wɔde nsɛm a ɛfa ne ho no toaa Yeremia 38:28 so. Nokwarem no, A New Translation of the Bible a Moffatt yɛe no yi Yeremia 39:15-18 fi baabi a ɛwɔ no de bedi Yeremia 38:28 akyi pɛɛ, sɛnea ɛbɛyɛ na emu nsɛm no atoam a emu ntwa.

15. (a) Bere bɛn na Yeremia nsa kaa Yehowa asɛm a ɛfa Ebed-melek ho no? (b) Dɛn na saa asɛm yi ka wɔ Etiopiani no ho?

¹⁵ Enti ɛsɛ sɛ yɛte nkyekyem a wɔde emu nsɛm aba ase ha no ase sɛ ɛbae ansa na Babilon dɔm a na wɔatwa Yerusalem ho ahyia no redi so nkonim wɔ Tamus 9, 607 A.Y.B. mu, wɔ Ɔhene Sedekia ahenni afe a ɛto so 11 no mu:

“Na Yeremia da so da duam awɛmfo abangua no mu [ansa na Yudafo asraafo reguan afi Yerusalem wɔ n’asehwe no mu] no, Awurade [Yehowa] asɛm baa ne nkyɛn sɛ: Kɔ na kɔka kyerɛ Etiopiani Ebedmelek sɛ: Sɛ asafo Awurade [Yehowa], Israel Nyankopɔn, se ni: Hwɛ, merema me nsɛm no aba mu kurow yi so, na asi wɔn bɔne, na ansi wɔn yiye, w’anim na ɛbɛba mu da no. Nanso ɛda no, meyi wo, Awurade [Yehowa] asɛm ni, na wɔremfa wo nhyɛ mmarima a wusuro wɔn anim no nsa. Na ofi na mɛma woafi mu afi, na worentɔ [Babilonfo] afoa ano; na wo kra bɛdan wo asade, efisɛ wode wo ho too me so, Awurade [Yehowa] asɛm ni.”​—Yer. 39:15-18.

16. Enti na dɛn ho ahurusi na Ebed-melek bedi te sɛ wɔn a wodi asade ho ahurusi no, na dɛn na aka, ɛwom sɛ yenni ne ho abakɔsɛm bio de?

¹⁶ Enti, bere a Yerusalem hwee ase no, Yehowa diyifo adamfo yi de ne ho hyɛɛ Yeremia Nyankopɔn no nsa. Sɛ́ wotwaa no asu kɔɔ Babilon ma okowuu n’ankasa ne wu wɔ hɔ anaasɛ wogyaw no wɔ Yuda asase no so sɛ ahiafo a wogyaw wɔn wɔ hɔ wɔ Amrado Gedalia ase no mu biako no de, Bible no nka. Nanso, ɔkwan biara so no, wanwu wɔ Babilon asraafo no nsam, na mmom wɔma onyaa ne ti didii mu te sɛ obi a n’ani gye asade ho. Enti na obetumi akɔ so atra ase na wasom Nyankopɔn a ɔde ne ho too no so no, Onyankopɔn a ogyee ne diyifo fii owu mu abura a dontori ayɛ mu ma mu wɔ Yerusalem a na ɛdɔm atwa ho ahyia no mu no. Akyinnye biara nni ho sɛ ɔnam eyi so maa mmapɔmma a wɔde Yeremia too abura no mu ma wawu wɔ hɔ no nyaa ne ho tan. Nanso na ɔremfa Ebed-melek nhyɛ wɔn nsa mma wɔnnyɛ no nea wɔpɛ mfa ntua ka. Esiane sɛ na Yehowa ahyɛ no bɔ sɛ ɔbɛbɔ ne ho ban nti, na ɛho nhia sɛ osuro nea saa mmapɔmma no bɛpɛ sɛ wɔyɛ no. Efi saa bere yi yɛante ne ho asɛm bio wɔ Bible abakɔsɛm mu, nanso ne din ne bɔ a Onyankopɔn hyɛɛ no no da so wɔ hɔ.

WƆN A WƆTE SƐ EBED-MELEK NNƐ

17. Etiopiafo din Ebed-melek no ase ne dɛn, na ne din no fata no wɔ ɔkwan bɛn so?

¹⁷ So nnipa bi wɔ hɔ a wɔte sɛ Ebed-melek nnɛ wɔ nnɛyi Yeremia kuw no dwumadi mu anaa? Yiw! Ɛnde, henanom na wɔte sɛ Ebed-melek nnɛ? Yennim nea ɛyɛe a obenyaa saa din no. Sɛ́ edin no, Ebed-melek ase kyerɛ “Ɔhene Somfo,” anaasɛ “Ɔhene Akoa.” Sɛ́ piani no, ebia na ɔyɛ obi a wɔasãb no a ɔrentumi nwo n’ankasa ne mma. Nanso, nea ɛne ne din hyia no, na ɔwɔ Yuda hene ahemfie hɔ resom. Bio nso, esiane Yehowa mu ahotoso a na ɔwɔ nti, ɛda adi sɛ na ɔsom obi a ɔkorɔn sen asase so hene. Sedekia’traa ahengua a wɔfrɛɛ no “Yehowa Agua” so wɔ Yerusalem. (1 Be. 29:23) Ɛnde, ɛda adi sɛ, Ebed-melek kyerɛe wɔ ɔkwan a ɛfata so sɛ ɔwɔ “Amanaman Hene” Yehowa no som mu. Esiane sɛ na ɔwɔ Yehowa nsɛso ahenni a na ɛwɔ Yuda asase so no som mu nti, wɔmaa no akatua denam kora a wɔkoraa no so bere a wɔsɛee Yerusalem a anni nokware no so.

18. Sɛnea nkyerɛkyerɛmu a wɔde ma wɔ Adiyisɛm 7:14, 15 no kyerɛ no, onipa bɛn na ɔyɛɛ “nnipakuw kɛse” no ho mfonini wɔ Yeremia nna no mu?

¹⁸ Ɛdefa kora a wɔbɛkora wɔn so wɔ Kristoman “ahohiahia kɛse” no mu no ho no, Adiyisɛm 7:14, 15 ka wɔ “nnipakuw kɛse” a wɔka wɔn ho asɛm wɔ hɔ no ho sɛ: “Eyinom ne wɔn a wofi ahohia kɛse no mu, na wɔahohoro wɔn ntade ma ahoa oguammaa no mogya mu. Eyi nti na wɔwɔ Onyankopɔn ahengua anim, na wɔsom no awia ne anadwo n’asɔredan mu.” Sɛ kuw no, wɔde Ebed-melek a ofii Yerusalem sɛe no mu kae no yɛɛ “nnipakuw kɛse” a wobefi ahohiahia no mu aka no ho mfonini.

19. Nea Ebed-melek kuw no pɛ titiriw ne sɛ wɔbɛsom hena, na dɛn na wɔpene so sɛ wobehyia esiane Yeremia kuw no akyi a wogyina nti?

¹⁹ Saa kuw yi ba benya Yehowa ho suro ankasa na wɔde wɔn ho to no so. Wɔn pɛ titiriw ne sɛ wɔbɛtra Amansan Hene, “Amanaman Hene,” no som mu mmom sen sɛ wɔbɛsom amammui sodifo ne nniso horow a nnipa ahyehyɛ so ahemfo. Wohu sɛnea sodifo a wɔn ani bere tumidi, te sɛ Adolf Hitler a obedii tumi wɔ Germane, afe 1933 Y.B. mu, abɔ mmɔden na wɔda so ara bɔ mmɔden sɛ wɔbɛtɔre Yehowa nkurɔfo a wɔde honhom asra wɔn no nkaefo a ne diyifo Yeremia yɛɛ wɔn ho mfonini no ase. Enti Ebed-melek kuw no sɔre tia na wɔde akokoduru di dwuma de boa Yeremia kuw no, ɛwom sɛ eyi de Yeremia kuw no atamfo a wɔyɛ nyamesomfo ne amammuifo no abufuw ne ɔtaa ba wɔn so de.

20, 21. (a) Afe titiriw bɛn mu na Ebed-melek kuw no bɛdaa adi? (b) Ɔkwan bɛn so na saa kuw yi bɔ mmɔden sɛ wobesuasua Yeremia bere so Ebed-melek, na dɛn na wɔhyɛ nnipa nyinaa sɛ wɔnyɛ wɔ atoro som wiase ahemman no ho?

²⁰ Wobehuu wɔn a Wogyina Yehowa Adansefo a wɔde honhom asra wɔn no nkaefo yi akyi no titiriw wɔ afe 1935 mu, bere a wohuu nea “nnipakuw kɛse a wobefi ahohiahia kɛse” no mu aka no yɛ no.

²¹ Ɛmfa ho sɛ Ebed-melek kuw no wɔ Kristoman mu nniso horow no so nkɛntɛnso bi anaasɛ wonni bi, wɔn ani nnyee mmɔden a nyamesomfo ne amammuifo bɔ sɛ wobekum Yeremia kuw no anaasɛ wɔbɛsɛe Yeremia kuw no dwumadi wɔ Yehowa som mu te sɛnea wɔde wɔn hyɛ abura a dontori wɔ mu mu wɔ awɛmfo abangua mu no ho da. Hyia a wohyia amammui ne anyamesom mu tumidifo no abufuw a ano yɛ den no nyinaa akyi no, wɔayɛ nea wobetumi nyinaa de ayi Yeremia kuw no afi “abura” a dontori wɔ mu a wontumi nyɛ hwee wɔ mu no mu. Ɛde besi nnɛ no wɔakɔ so ne Yeremia kuw no anantew akokoduru so wɔ wiase nyinaa, aka Kristoman ne atorosom wiase ahemman, Babilon kɛse, no sɛe ho asɛm akyerɛ. Wɔrehyɛ nnipa ahorow nyinaa nkuran na wɔaguan afi nneɛma nhyehyɛe a wɔabu no fɔ ama ɔsɛe yi mu na wɔakogyina Yehowa asraafo dɔm a wɔwɔ ɔsahene a ɔso sen Nebukadnesar, a ɔne Yesu Kristo no ase no afa. Na wɔnam eyi so kyerɛ sɛ wɔde wɔn werɛ nyinaa ahyɛ Yehowa, “Amanaman Hene” no mu.

22. Sɛnkyerɛnne kwan so “afoa” bɛn ano na saa kuw yi rentɔ?

²² Esiane saa ahofama a edi mu a wɔde ma ɔno ne ne nnɛyi Yeremia kuw no nti, Yehowa dɔ Ebed-melek kuw yi. Ɔhyɛ bɔ sɛ saa kuw yi rentɔ “Onyankopɔn Ade Nyinaa so Tumfoɔ no, da kɛse no mu ko” a ɛreba wɔ Harmagedon no “afoa” ano.​—Adi. 16:13-16.

23. Asade a wɔfa no bɛyɛ dɛn, na ɔkwan bɛn so na wɔyɛ ade te sɛ “nguanten” a wɔka wɔn ho asɛm wɔ Yesu bɛ a ɛwɔ Mateo 25:31-34 no mu no?

²³ Sɛ́ akatua a efi Yehowa nkyɛn no, wɔn nsa bɛka wɔn nkwa wɔ asase so, wɔn akra, a wɔakora so ama wɔn te sɛ akodi mu asade, na wɔanya nkwa atra ase. Te sɛ nguanten a wɔka wɔn ho asɛm wɔ Yesu bɛ a ɛfa “nguanten” ne “mpapo” no ho no mu no, ayɛ honhom mu anuanom nkaefo no yiye. Bere a wɔde eyinom koguu “afiase” wɔ “abura” a dontori wɔ mu mu anaasɛ owu dan mu no, wɔkɔsraa wɔn kokoam anaasɛ baguam na wɔaboa ma wɔayi wɔn na wɔatumi ayɛ adwuma bio wɔ Yehowa adansedi adwuma a etwa to koraa wɔ wiase nneɛma nhyehyɛe a wabu no fɔ ama ɔsɛe mu.​—Mat. 25:31-36, 46.

24. Mmoa a kuw bɛn de ma na nnɛyi Yeremia kuw no da Onyankopɔn ase wɔ ho, na dɛn na wɔbɛbom ayɛ bere a wɔatwa “ahohiahia kɛse” no?

²⁴ Ma wɔnte wɔ baabiara sɛ Yeremia kuw no da Yehowa ase sɛ ɔmaa “nnipakuw kɛse” a wɔyɛ “nguan foforo” no mufo a Etiopiani piani Ebed-melek a ɔtraa ase wɔ Yerusalem a anni nokware, Yuda ahenni no ahenkurow, no nna a edi akyiri wɔn ho mfonini no bae. Anigye a enni kabea na Yeremia kuw no benya sɛ wɔne Ebed-melek kuw no befi “ahohiahia kɛse” no mu aka. Wɔde biakoyɛ befi ase ayɛ adwuma wɔ nhyehyɛe foforo a wɔde wɔn bɛkɔ mu wɔ Kristo mfirihyia apem ahenni no mu no mu. Nhyehyɛe Foforo fɛfɛ mu a wɔde wɔn bɛkɔ no bɛyɛ wɔn akatua sɛ wɔsom amansan Hene, Yehowa, “Amanaman Hene,” no nnɛ.

[Ase hɔ nsɛm]

[Kratafa 11 mfoni]

Ebed-melek, a mmarima 30 ka ne ho, yi Yeremia