Tie​—Yehowa Wɛmfo Kasa!

“Mede wo masi Israel fi wɛmfo . . . na bɔ wɔn kɔkɔ ma me.”​—HESEKIEL 3:17.

 1. Dɛn nti na ɛsɛ sɛ wutie bere a Yehowa “wɛmfo” kasa no?

YEHOWA “wɛmfo” reka Onyankopɔn nkrasɛm akyerɛ mprempren. So woretie? Wo nkwa gyina saa nkrasɛm a wode anisɔ betie na woadi ho dwuma no so. Ɛrenkyɛ, ‘amanaman no behu Yehowa’ bere a ɔnam nhyehyɛe bɔne yi a ɔbɛsɛe no na wakora ne nkurɔfo so no so tew ne din kronkron no ho no. So wowɔ anidaso sɛ wobɛka wɔn ho? (Hesekiel 36:23; 39:7; 2 Petro 3:8-13) Wubetumi ayɛ wɔn mu biako, nanso gye sɛ bere a Yehowa “wɛmfo” kasa no, wutie.

 2. Onyankopɔn adiyifo a Yuda ahemman no antie wɔn no kowiee dɛn maa wɔn?

² Yehowa adiyifo a wɔantie wɔn no de amanehunu baa Yuda ahemman no so wɔ 607 A.Y.B mu. Aman a wɔyɛ wɔn atamfo ani gyei wɔ sɛe a Babilon sɛee wɔn no ho. Nanso hwɛ sɛnea wɔhyɛɛ Yehowa din anuonyam bere a ɔyɛ maa Yudafo anokwafo san baa wɔn asase so wɔ 537 A.Y.B mu no!

 3. Dɛn na ɛwɔ Hesekiel nhoma no mu?

³ Yehowa wɛmfo, Hesekiel, kaa saa Yudafo no sɛe ne wɔn sanba no ho asɛm siei. Bible nhoma a ne din da so a ɔkyerɛw wiei wɔ Babilon wɔ bɛyɛ 591 A.Y.B. mu no kura (1) ahyɛde a wɔde maa Hesekiel; (2) nkɔmhyɛ mu ɔyɛkyerɛ ahorow; (3) nkrasɛm ahorow a etia Israel; (4) Yerusalem atemmu ho nkɔmhyɛ ahorow; (5) nkɔmhyɛ ahorow a etia aman afoforo; (6) san a Yudafo no bɛsan aba wɔn asase ho nkɔmhyɛ ahorow; (7) nkɔmhyɛ a etia Gog a ofi Magog; ne (8) Onyankopɔn kronkronbea ho anisoadehu. Yɛto nsa frɛ wo sɛ kenkan Hesekiel nhoma no bere a yesua no. Wonam saayɛ so behu sɛnea ɛka yɛn nnɛ, na wubetie bere a Yehowa “wɛmfo” kasa no.a

Wɔpaw Onyankopɔn Wɛmfo

 4. (a) Dɛn na Hesekiel hui wɔ anisoadehu mu? (b) Na henanom ne “ateasefo” no, na su bɛn na na wɔwɔ?

⁴ Wɔ Tamus 5,613 A.Y.B. mu (wɔ Yuda hene Yoiakin nnommumfa wɔ Babilon no afe a ɛto so anum mu) no, na ɔsɔfo Hesekiel a wadi mfe 30 no ka Yudafo nnommum bi a na wɔwɔ “asu Kebar,” Asubɔnten Eufrate nsuka titiriw bi ho no ho. Ohuu Yehowa ɔsoro teaseɛnam a “ateasefo baanan” na wɔtwe. (Kenkan Hesekiel 1:4-10.) Na ‘ɔteasefo’ biara anaasɛ kerubim a ɔwɔ ntaban no wɔ anim anan. (Hesekiel 10:1-20; 11:22) Eyi kyerɛ sɛ kerubim no wɔ ɔdɔ a Onyankopɔn de ama (onipa) , atɛntrenee (gyata) , tumi (nantwi) , ne nyansa (ɔkɔre) . Na kerubim no mu biara gyina ‘nkyimii kɛse biako a ɛbea biako mu’ no ho, na na Onyankopɔn honhom anaasɛ adeyɛ tumi dan wɔn kɔ baabiara.​—Hesekiel 1:1-21.

 5. Ɔsoro teaseɛnam no gyina hɔ ma dɛn, na ɛsɛ sɛ adwene yi ka Yehowa nkurɔfo dɛn?

⁵ Na Onii a ɔte teaseɛnam no mu no yɛ Yehowa anuonyam nsɛso. (Kenkan Hesekiel 1:22-28.) Hwɛ sɛnea teaseɛnam no gyina hɔ ma Onyankopɔn abɔfo honhom mu ahyehyɛde no yiye! (Dwom 18:10; 103:20, 21; Daniel 7:9, 10) Na Yehowa te teaseɛnam no mu a ɛkyerɛ sɛ odi ateasefo yi so tumi na ɔde wɔn di dwuma sɛnea n’atirimpɔw te. Na Nea ɔte mu no ayɛ komm, te sɛ nyankotɔn a ɛka ho no, nanso Hesekiel ho dwiriw no. Nokwarem no, ɛsɛ sɛ Yehowa anuonyam ne tumi sɛ ne soro asafo no Hyehyɛfo a Ɔkorɔn ho mfonini a ɛyɛ hu yi ma yefi ahobrɛase mu de aseda ma wɔ hokwan a yɛanya de som no sɛ n’asase so ahyehyɛde no mufo no ho.

 6. (a) Ahyɛde bɛn na Hesekiel nyae, na obuu ɔsom a wɔde ma Onyankopɔn no dɛn? (b) Nnipa a na wokura su bɛn mu na na ɛsɛ sɛ Hesekiel hyɛ nkɔm, na mfaso bɛn na ɛyɛ sɛ yebehu sɛnea Onyankopɔn ne wɔn dii no?

⁶ Ɛwom sɛ wɔnam “onipa ba” a wɔfrɛɛ Hesekiel no so kaee no sɛ ɔyɛ onipa na ɔba fam de, nanso wɔpaw no sɛ Yehowa diyifo. (Kenkan Hesekiel 2:1-5.) Na Hesekiel bɛkɔ “amanaman atuatewfo,” Israel ne Yuda ahemman no nkyɛn. Nea edi kan no, ɔnam ɔsoro ahyɛde bi so dii nhoma mmobɔwee bi a kwadwom wɔ so, nanso na ɛyɛ dɛ te sɛ ɛwo efisɛ ɔde aseda mae sɛ wɔayɛ no Yehowa diyifo. Saa ara na Kristofo a wɔasra wɔn ne wɔn mfɛfo asomfo hu sɛ ɛyɛ dɛ sɛ wɔyɛ Yehowa adansefo. Na ɛsɛ sɛ Hesekiel hyɛ nkɔm wɔ nnipa asowuifo ne atirimɔdenfo mu, nanso na Onyankopɔn bɛma n’anim ayɛ den te sɛ wɔn anim, na ne momaso ayɛ den sɛ ahemmo. Na ɔde akokoduru bɛhyɛ nkɔm sɛ ebia wobetie anaasɛ dabi no. Ɛyɛ anigye sɛ yebehu sɛ sɛnea Onyankopɔn gyinaa Hesekiel akyi wɔ tebea horow a na emu yɛ den mu no, saa ara nso na Ɔbɛboa yɛn ma yɛde akokoduru adi adanse wɔ asasesin biara mu.​—Hesekiel 2:6-3:11.

 7. Na asɛyɛde bɛn na ɛwɔ Hesekiel ahyɛde no mu?

⁷ Nhoma mmobɔwee a Hesekiel dii no ma onyaa ‘abufuw honhom’ a ɛfata n’asɛm no wɔ ne mu. Ɔde ‘ahodwiriw traa Tel-Abib nnanson,’ na osuaa nkrasɛm no guu ne tirim. (Hesekiel 3:12-15) Ɛho hia sɛ yɛn nso yedwen nneɛma ho na yɛde nsiyɛ sua ade na ama yɛate honhom mu nneɛma a emu dɔ ase. Esiane sɛ na Hesekiel wɔ nkrasɛm a ɔbɛka akyerɛ nti, wɔpaw no sɛ Onyankopɔn wɛmfo. (Kenkan Hesekiel 3:16-21.) Na ɛsɛ sɛ ɔwɛmfo a wɔapaw no foforo no bɔ Israelfo mmaratofo no kɔkɔ sɛ ɔsoro atemmu bɛba wɔn so.

 8. Henanom na wɔsom sɛ Yehowa “wɛmfo” nnɛ, na henanom na wɔde wɔn ho abɔ wɔn?

⁸ Sɛ Hesekiel di nkogu sɛ ɔwɛmfo a, Yehowa de nnipa a wobewuwu no ho asodi bɛto no so. Ɛwom sɛ wɔn a na wɔmpɛ sɛ ɔde nteɛso ma no de sɛnkyerɛnne kwan so nhama begu no so de, nanso ɔde akokoduru bɛka Onyankopɔn nkrasɛm akyerɛ. (Hesekiel 3:22-27) Wɔ yɛn bere yi mu no, Kristoman pow sɛ obetie Kristofo a wɔasra wɔn no na ɔbɔ mmɔden sɛ ɔde anohyeto ahorow bɛto wɔn so. Nanso wɔn a wɔasra wɔn yi asom sɛ Yehowa “wɛmfo” fi 1919, na wɔde akokoduru reka ne nkrasɛm a ɛfa nhyehyɛe yi “awiei bere” ho akyerɛ. (Daniel 12:4) Wɔn a wɔka wɔn ho wɔ adwuma yi mu no ne “nnipakuw kɛse” a wɔyɛ Yesu “nguan foforo” no. (Adiyisɛm 7:9, 10; Yohane 10:16) Esiane sɛ ‘ɔwɛmfo’ kuw no kɔ so ka Onyankopɔn nkrasɛm kyerɛ nti, akyinnye biara nni ho sɛ wɔn a wɔasra wɔn ne “nnipakuw kɛse” no muni biara bɛpɛ sɛ ɔka nkrasɛm no kyerɛ sɛ daa ɔdawurubɔfo.

Nkɔmhyɛ Ahorow ho Ɔyɛkyerɛ

 9. (a) Ɔkwan bɛn so na Hesekiel yɛɛ nhwɛso maa yɛn? (b) Dɛn na Hesekiel yɛ de yɛɛ Yerusalem a Babilon twaa ho hyiae no ho mfonini, na wɔde nnafua 390 ne 40 no kyerɛɛ dɛn?

⁹ Afei Hesekiel de ahobrɛase ne akokoduru yɛɛ nkɔmhyɛ mu nneɛma ho ɔyɛkyerɛ, na ɔyɛɛ nhwɛso a ɛsɛ sɛ ɛkanyan yɛn ma yɛde ahobrɛase ne akokoduru yɛ nnwuma a Onyankopɔn de ahyɛ yɛn nsa no. Sɛnea ɛbɛyɛ a Hesekiel bɛyɛ Babilonfo nkahyem no ho mfonini no, na ɛsɛ sɛ ɔda fam a n’anim kyerɛ ntayaa a wayɛ Yerusalem mfonini wɔ so. Na ɛsɛ sɛ Hesekiel da ne mfẽ benkum so nnafua 390 de soa Israel mmusuakuw du ahemman no amumɔyɛ, na afei ɔda ne mfẽ nifa so nnafua 40 de soa Yuda mmusuakuw abien no bɔne. Ná da koro gyina hɔ ma afe. Enti mfe 390 no fii ase fii bere a wɔkyekyee Israel wɔ 997 A.Y.B. mu besi Yerusalem sɛe so wɔ 607 A.Y.B. mu. Yuda mfe 40 no fii ase fii bere a wɔpaw Yeremia sɛ Onyankopɔn diyifo wɔ 647 A.Y.B. mu besi Yuda sɛe so wɔ 607 A.Y.B. mu.​—Hesekiel 4:1-8; Yeremia 1:1-3.

10. Hesekiel yɛɛ nea ebefi nkahyem no mu aba no ho ɔyɛkyerɛ dɛn, na dɛn na yebetumi asua afi nokwasɛm a ɛyɛ sɛ Onyankopɔn wowaw no no mu?

¹⁰ Afei Hesekiel yɛɛ nea ebefi nkahyem no mu aba no ho ɔyɛkyerɛ. Sɛ nea ɛkyerɛ ɔkɔm no, odii aduan a ɛboro nkaribo fã kakraa bi na ɔnom nsu toa biako da koro. Na n’abodoo (awi, atoko, asɛ, asedua, kɔkɔte ne aburow a wɔde afra a mmara mma ho kwan a wɔato wɔ sɛbew so) no ho ntew. (Leviticus 19:19) Saa adeyɛ yi kyerɛe sɛ asetra mu nneɛma ho behia Yerusalemfo kɛse. Nanso hwɛ sɛnea ɛyɛ anigye sɛ yebehu sɛ sɛnea Yehowa wowaw Hesekiel wɔ tebea horow a emu yɛ den mu no, saa ara na Onyankopɔn bɛboa yɛn ma yɛakɔ so adi nokware na yɛadi yɛn asɛnka ho ahyɛde no ho dwuma wɔ ahokyere nyinaa akyi!​—Hesekiel 4:9-17.

11. (a) Nneyɛe bɛn na wɔaka ho asɛm wɔ Hesekiel 5:1-4, na na ɛkyerɛ dɛn? (b) Ɛsɛ sɛ nokwasɛm a ɛyɛ sɛ Onyankopɔn maa Hesekiel ɔyɛkyerɛ ahorow no nyaa mmamu no nya yɛn so tumi dɛn?

¹¹ Afei Hesekiel de nkrante yii ne ti nhwi ne n’abogyesɛ. (Kenkan Hesekiel 5:1-4.) Na wɔn a ɔkɔm ne ɔyaredɔm rekunkum wɔn no dodow bɛyɛ te sɛ odiyifo no ti nhwi a ɔhyew wɔ Yerusalem mfinimfini no mu nkyem abiɛsa mu biako. Wɔn a wobewuwu wɔ ɔko no mu no dodow bɛyɛ te sɛ nea wɔde afoa bobɔɔ wɔn no nkyem abiɛsa no mu biako. Wɔbɛbɔ wɔn a wobefi mu aka no apete amanaman no mu te sɛ ne ti nhwi a ɔde petee mframa mu no nkyem abiɛsa mu biako. Nanso wɔn a wɔde wɔn bɛkɔ nnommumfa mu no mu binom bɛyɛ te sɛ nhwi kakra a Hesekiel yi fii nea ɔde petee mframa mu no mu na ɔde kyekyeree n’atade ano de kyerɛe sɛ wɔde nokware som bɛma wɔ Yuda wɔ mfe 70 amamfoyɛ no akyi no. (Hesekiel 5:5-17) Ɛsɛ sɛ nokwasɛm a ɛyɛ sɛ Yehowa maa eyi ne nkɔmhyɛ ahorow mu nneɛma ho ɔyɛkyerɛ afoforo nyaa mmamu no kanyan yɛn ma yenya ne mu ahotoso sɛ Nea ɔma nkɔmhyɛ nya mmamu.​—Yesaia 42:9; 55:11.

Ɔsɛe Reba!

12. (a) Hesekiel 6:1-7 kyerɛ sɛ ntuafo no bɛyɛ dɛn? (b) Sɛnea Hesekiel nkɔmhyɛ no kyerɛ no, dɛn ne Yerusalem nsusuwso, na dɛn na ɛbɛba no so?

¹² Wɔ 613 A.Y.B. mu no, Hesekiel kasa kyerɛɛ asase no de kyerɛɛ nea ɛbɛba Yudafo abosonsomfo no so. (Kenkan Hesekiel 6:1-7.) Ntuafo bɛsɛe sorɔnsorɔmmea, nneɛma a wɔde aduhuam sisii so, ne afɔremuka ahorow a wɔde di dwuma wɔ atoro som mu no. Ɔsɛe a ɛbɛba denam ɔkɔm, ɔyaredɔm ne akodi so no ho a obi besusuw no bɛma wateɛm sɛ “Ao,” na ɔnam ne nsambɔ ne ne nan a ɔde pempem fam no so si eyi so dua. Honhom mu aguamammɔfo afunu bɛdeda sorɔnsorɔmmea so. Sɛ Kristoman a ɛyɛ Yerusalem nsusuwso no hyia ɔsɛe a ɛte saa ara a, obehu sɛ n’amanehunu no fi Yehowa.​—Hesekiel 6:8-14.

13. Na dɛn ne “abaa” a na Yehowa kurae no, na dɛn na ebefi dwuma a wɔde di no mu aba?

¹³ Na ‘awiei reba asase no ntwea anan,’ Yuda nyamesom nhyehyɛe a enni nokware no ‘so.’ Ɛbɛyɛ nea ‘nhwiren’ a ɛyɛ amanehunu nneɛma kyekyere ɔbosonsonni ti bere a “abaa” a Onyankopɔn kura no​—Nebukadnesar ne ne Babilonfo dɔm​—yɛ ade tia Yehowa nkurɔfo ne n’asɔrefi no. Wobekunkum Yudafo adetɔfo ne adetɔnfo ‘asafo’ no mufo no anaasɛ wɔde wɔn bɛkɔ nnommumfa mu na wɔn mu biara a ɔbɔɔ mmɔden nyaa nkwa no nsa mu begow. Sɛ wotu wɔn atoro nyamesom nhyehyɛe no gu a, wobeyi wɔn ti so kokwakokwa de ayɛ ayi.​—Hesekiel 7:1-18.

14. Dɛn na adanmude antumi anyɛ amma Yerusalem, na dɛn na ɛno kyerɛ ma Kristoman?

¹⁴ Wɔrentumi mma Yehowa ne n’abrafo dɔm no adanmude. (Kenkan Hesekiel 7:19.) Adanmude rentumi ‘nkora’ Kronkron mu Kronkron no so wɔ hura a wobehura ho no mu bere a Kaldeafo “adwowtwafo” no fa nnwinne kronkron no na wodwiriw asɔrefi no gu no. Yehowa ‘twaa ahoɔdenfo ahantanfo to’ bere a wɔkyeree Ɔhene Sedekia na wokunkum Lewifo asɔfo mpanyin no. (2 Ahene 25:4-7, 18-21) Dabi, abɔnefo a na wɔwɔ Yerusalem a na wɔatwa ho ahyia no mu no antumi anguan amanehunu denam adanmude so bere a Onyankopɔn ‘buu wɔn atɛn’ sɛ apamsɛefo no. Saa ara nso na wɔ bere a wobehura nneɛma a Kristoman bu no kronkron ho no mu no, ɔrentumi mma adanmude na ama wakwati ɔsoro atemmu a ɛbɛba no so no. Ɛbɛyɛ nea aka akyi dodo saa bere no sɛ obetie Yehowa “wɛmfo” no.​—Hesekiel 7:20-27.

Akyide ho Apinisi

15. Dɛn na Hesekiel hui wɔ Yerusalem, na tumi bɛn na ɛsɛ sɛ eyi nya wɔ yɛn so?

¹⁵ Bere a Hesekiel huu Onyankopɔn wɔ anuonyam mu wɔ anisoadehu mu wɔ Elul 5, 612 A.Y.B. mu no, wɔnam honhom so ‘de nsa nsɛso soo n’atifi nhwi mu’ de no kɔɔ Yerusalem. Na ɔsoro teaseɛnam no nso akɔ hɔ. Ɛsɛ sɛ nea Hesekiel hui wɔ hɔ no ma yekwati adwene a yebenya sɛ yebetie awaefo no. (Mmebusɛm 11:9) Na Israelfo awaefo no resom abosom ahoni (ebia Asera dua) a ɛkanyan Onyankopɔn ma ɔtwe ninkunu wɔ asɔrefi hɔ. (Exodus 20:2-6) Bere a Hesekiel hyɛn adiwo hɔ no, hwɛ akyide ahorow a ohui! (Kenkan Hesekiel 8:10, 11.) Hwɛ animguase ara a ɛyɛ sɛ na Israelfo mpanyimfo 70 rehyew aduhuam ama atoro nyame a animtiaabu mfonini ahorow a ɛwɔ ɔfasu ho no yɛ ho mfonini no!​—Hesekiel 8:1-12.

16. Hesekiel anisoadehu no kyerɛ dɛn wɔ nneɛma a efi ɔwae mu ba no ho?

¹⁶ Hesekiel anisoadehu no kyerɛ sɛnea ɔwae di awu wɔ honhom mu. Ɛdɛn, na wɔadaadaa Israelfo mmea ma wosu Tamus, Babilonfo onyame bi ne awo onyamewa Istar dɔfo! Na hwɛ atantanne a ɛyɛ sɛ ohuu Israelfo mmarima 25 wɔ asɔrefi mufam abangua so sɛ wɔresom owia! (Deuteronomium 4:15-19) Wɔde akyide dubaa bi, ebia egyina hɔ ma ɔbarima awode kaa Onyankopɔn hwene. Ɛnyɛ nwonwa sɛ Yehowa antie wɔn mpaebɔ, te sɛ nea Kristoman bɛhwehwɛ ne mmoa wɔ “ahohiahia kɛse” no mu nanso wɔn nsa renka no.​—Hesekiel 8:13-18; Mateo 24:21.

Wɔahyɛ Wɔn Agyirae Ama Nkwagye

17. Mmarima baason bɛn na Hesekiel huu wɔn wɔ anisoadehu no mu, na dɛn na wɔyɛe?

¹⁷ Nea edi hɔ no, yehu mmarima baason​—wɔn mu biako yɛ ɔkyerɛwfo a ɔhyɛ nwera ne afoforo baasia a wokurakura akode a wɔde sɛe ade. (Kenkan Hesekiel 9:1-7.) “Mmarima baasia” no gyina hɔ ma Yehowa ɔsoro abrafo dɔm, ɛwom sɛ obetumi de asase so ananmusifo adi dwuma de. Onyankopɔn behu wɔn a ‘ɔbarima a ɔhyɛ nwera’ no hyɛ wɔn momaso agyirae no mmɔbɔ, efisɛ na wɔmpene akyide a wɔyɛ wɔ asɔrefi hɔ no so. Wɔ nnipa a “mmarima baasia” no kunkum wɔn no mu no, wofii ase fii mpanyimfo abosonsomfo 70 no, mmea a wɔresu Tamus ne nnipa 25 a na wɔsom owia no so. Babilonfo no kunkum eyinom ne afoforo a wɔanni Onyankopɔn nokware no wɔ 607 A.Y.B. mu.

18. (a) Hena ne nnɛyi ‘ɔbarima a ɔhyɛ nwera’ no? (b) Dɛn ne “agyirae” no, henanom na mprempren wɔwɔ bi, na dɛn na ebefi wɔwɔ a obi wɔ bi no mu aba?

¹⁸ Kristofo a wɔasra wɔn no yɛ ‘ɔbarima a ɔhyɛ nwera’ no ho mfonini. Wɔkɔ afie afie kɔhyɛ wɔn a wɔbɛyɛ “nnipakuw kɛse” a wɔyɛ Kristo “nguan foforo” no mufo no agyirae. “Agyirae” no yɛ adanse a ɛkyerɛ sɛ saa nguan no yɛ nnipa a wɔahyira wɔn ho so, wɔabɔ wɔn asu a wɔwɔ Kristo nipasu. ‘Wosi apini na wodi nkɔmmɔ wɔ akyide’ a wɔyɛ wɔ Kristoman mu no ho, na wɔafi Babilon Kɛse, wiase nyinaa atoro som ahemman no mu. (Adiyisɛm 18:4, 5) Wɔn “agyirae” no bɛma Onyankopɔn abrafo dɔm no ahu pefee sɛ ɛsɛ sɛ wɔkora wɔn so wɔ “ahohiahia kɛse” no mu. Wɔnam afoforo a wɔne wɔn a wɔasra wɔn no hyɛ wɔn agyirae no so betumi ama wɔn “agyirae” no atra hɔ. Enti, sɛ ‘wɔahyɛ wo agyirae’ a, fa nnamyɛ nya ‘agyirae a wɔhyɛ’ adwuma no mu kyɛfa.​—Hesekiel 9:8-11.

Ɔsɛe a Ɛyɛ Hu Reba

19. Dɛn na nnɛyi ‘ɔbarima a ɔhyɛ nwera’ no pete wɔ Kristoman mu?

¹⁹ Ɔbarima a ɔhyɛ nwera no kɔɔ ɔsoro teaseɛnam no anan ntam kɔfaa nnyansramma a adɔ. Ɔde eyi petee Yerusalem so de dii kan bɔɔ kɔkɔ sɛ ne sɛe bɛyɛ Onyankopɔn abufuhyew a ɔda no adi. (Hesekiel 10:1-8; Kwadwom 2:2-4; 4:11) Wɔ Hesekiel bere so no, wɔnam Babilonfo so hwiee Yehowa abufuw gui. (2 Beresosɛm 36:15-21; Yeremia 25:9-11) Na yɛn bere yi mu nso ɛ? ‘Ɔbarima a ɔhyɛ nwera’ no nsusuwso pete Onyankopɔn nkrasɛm a emu yɛ den no wɔ Kristoman mu nyinaa sɛ nkaebɔ a ɛkyerɛ sɛ ɛrenkyɛ ɔsoro abufuw bɛba ɔne Babilon Kɛse mufo a wɔaka no so. Nokwarem no, wɔn a wɔpow sɛ wobetie Yehowa “wɛmfo” no nni anidaso biara sɛ wobenya nkwa.​—Yesaia 61:1, 2; Adiyisɛm 18:8-10, 20.

20. (a) Ɛsɛ sɛ ɔsoro teaseɛnam no anan ne kerubim no ntam biakoyɛ no ka yɛn dɛn? (b) Na dɛn na mmapɔmma binom reyɛ, na wodii mfomso de Yerusalem totoo dɛn ho?

²⁰ Wɔtwe adwene si ɔsoro teaseɛnam a ɛne Onyankopɔn soro ahyehyɛde no so bio. Bere a yehu teaseɛnam no anan ne kerubim no ntam biakoyɛ no, ɛsɛ sɛ ɛkanyan yɛn ma yɛne Onyankopɔn asase so ahyehyɛde no yɛ biako wɔ biribiara mu. Esiane nokwaredi nti, ɛsɛ sɛ yɛbɔ ho ban wɔ nnipa nnaadaafo ho. (Hesekiel 10:9-22) Na nnipa a wɔte saa wɔ Hesekiel bere so, efisɛ ohui sɛ mmapɔmma 25 nam Misraim so reyɛ atuatew ho nhyehyɛe atia Onyankopɔn abrafo dɔm no. Wɔde Yerusalem totoo ɔsɛn ho, na wɔde wɔn ankasa ho totoo nam a ɛwom no ho. Nanso hwɛ mfomso ara a wodii! Na Babilonfo “ananafo” “nkrante” bekunkum atirisopamfo no mu binom na wɔafa afoforo nso nnommum. Na eyi bɛba bere a Onyankopɔn ma Yudafo no bu n’apam a wobuu so ho akontaa no. (Hesekiel 11:1-13; Exodus 19:1-8; 24:1-7; Yeremia 52:24-27) Esiane sɛ Kristoman kyerɛ sɛ ɔne Onyankopɔn wɔ apam nanso ɔde ne ho to wiase no apam ahorow so nti, wɔbɛsɛe no bere a Yehowa abrafo dɔm tow hyɛ no so no.

21. Dɛn na esii wɔ mfe 70 Yuda amamfoyɛ no akyi, na biribi a ɛte saa ara bɛn na ɛtoo nkaefo a wɔasra wɔn no?

²¹ Ɛwom sɛ na Israelfo no ‘apete nsase so’ wɔ 617 A.Y.B. mu de, nanso na Onyankopɔn yɛ “kronkronbea,” anaasɛ guankɔbea ma nnommum a wɔanu wɔn ho no. (Hesekiel 11:14-16) Nanso dɛn bio na na wobetumi ahwɛ kwan? (Kenkan Hesekiel 11:17-21.) Wɔ Yuda mfe 70 amamfoyɛ no akyi no, wɔsan de nkaefo bi kɔtraa “Israel asase” a wɔatew so no so. Wɔ ntotoho kwan so no, wogyee nkaefo a wɔasra wɔn no wɔ 1919 mu wɔ Babilon nnommumfa no akyi, na wɔ Onyankopɔn honhom akwankyerɛ ase no, wɔatew honhom mu Israel “asase” a na anka ɛyɛ amamfo bere bi no ho. Enti, wɔn a ‘wɔahyɛ wɔn agyirae’ na ama wɔakora wɔn so no ne honhom mu Israel nkaefo a wɔasan agye wɔn atom no renya ɔsoro dom mprempren. Na sɛ wokɔ so tie Onyankopɔn “wɛmfo” no a, ebia wobɛka wɔn a wobefi mu aka no ho bere a Yehowa twe ne nkrante fi ne boha mu no.

[Ase hɔ asɛm]

So Wokae?

◻ Dɛn nti na ɛsɛ sɛ wutie bere a Yehowa “wɛmfo” kasa no?

◻ Dɛn na wɔde Onyankopɔn soro teaseɛnam gyinaa hɔ mae?

◻ Henanom na wɔsom sɛ Yehowa “wɛmfo” nnɛ?

◻ Awaefo nneyɛe bɛn na Hesekiel hui wɔ Yerusalem, na ɛsɛ sɛ anisoadehu yi ka yɛn dɛn?

◻ Hena ne nnɛyi ‘ɔbarima a ɔhyɛ nwera’ no, na dɛn ne “agyirae” a ɔhyɛ wɔ momaso no?