⁶ Nanso, na Belsasar rebɛyɛ animtiaabude a ɛsen saa. ‘Ɔhene ne n’abirɛmpɔn ne ne yerenom ne ne yefamnom nonom nsa na wɔkamfoo sika ne dwetɛ ne kɔbere ne dade ne dua ne ɔbo anyame no.’ (Daniel 5:3, 4) Enti na Belsasar pɛ sɛ ɔpagyaw n’atoro anyame no sen Yehowa! Ɛte sɛ nea na Babilonfo da saa su yi adi. Wobuu Yudafo a wɔafa wɔn nnommum no animtiaa, dii wɔn som ho fɛw, na wɔamma wɔannya anidaso biara sɛ wɔbɛsan akɔ wɔn man a wɔn ani gye ho no mu. (Dwom 137:1-3; Yesaia 14:16, 17) Ebia ɔhempɔn a na wabow yi tee nka sɛ nnommum yi a ɔbɛbrɛ wɔn ase ayeyaw wɔn Nyankopɔn no bɛsɔ ne yerenom ne n’abirɛmpɔn no ani, na ama wayɛ sɛ obi a ɔyɛ den.a Nanso sɛ saa tumidi no maa Belsasar n’ani gyei a, ɛnde ankyɛ.