Wɔyɛɛ Yehowa Apɛde

Daniel Som Onyankopɔn Daa

ƐYƐ den sɛ abakɔsɛm mu ade bi bɛsesa prɛko pɛ. Nanso, saa na ɛbae wɔ 539 A.Y.B. mu bere a Mediafo ne Persiafo tuu Babilon Ahemman gui nnɔnhwerew kakraa bi mu no. Saa afe no, na Yehowa diyifo Daniel de bɛyɛ mfe 80 atra Babilon sɛ Yudani otukɔfo. Ná Daniel a akyinnye biara nni ho sɛ ɔwɔ ne mfe 90 mu no rebehyia ne mudi mu kura ma Onyankopɔn ho sɔhwɛ a ɛsen biara no mu biako.

Babilon asehwe akyi no, ɛte sɛ nea na nneɛma rekɔ yiye ma Daniel mfiase no. Ná ɔhene foforo no ne Dario a ɔyɛ Mediani, ɔbarima a na wadi mfe 62 a ɔpɛ Daniel asɛm no. Nnwuma a Dario dii kan yɛe no biako ne amantam ahene 120 a ɔpaw wɔn, ne mmarima baasa a ɔyɛɛ wɔn abirɛmpɔn.a Ná Daniel yɛ saa mmarima baasa a wonyaa ɔhene anim dom no mu biako. Bere a Dario hui sɛ Daniel wɔ tumi soronko no, ɔyɛɛ n’adwene mpo sɛ ɔbɛma no dibea sɛ soafo panyin! Nanso, ɛno akyi no, biribi sii a ɛsakraa ɔhene no nhyehyɛe mpofirim.

Ɛpɔ Bɔne Bi

Daniel mfɛfo abirɛmpɔn a amantam ahene pii ka wɔn ho de adwene bi a ɛyɛ nwonwa baa ɔhene nkyɛn. Wɔpaa Dario kyɛw sɛ ɔnhyɛ mmara bi a ɛkyerɛ sɛ: “Obiara a obebisa onyame bi anaa onipa bi hɔ ade biara adaduasa yi, gye wo, ɔhene, hɔ no, wɔde no bɛto agyata amoa mu.” (Daniel 6:7) Ɛbɛyɛ sɛ ɛyɛɛ Dario sɛ na saa mmarima yi reka nokware a wodi ma no no ho ntam. Ebi nso a na osusuw sɛ saa mmara yi bɛboa ɔno a ɔyɛ hɔho no ma ne dibea sɛ ahemman no ti no ayɛ den.

Nanso, na ɛnyɛ ɔhene no nti na abirɛmpɔn ne amantam ahene no rehyɛ mmara yi. Ná ‘wɔhwehwɛ sɛ wobenya Daniel ho asɛm bi, ahenni no fam; nanso wɔannya asɛm anaa bɔne biara, efisɛ odi nokware, na wonhu ne ho mfomso anaa bɔne biara.’ Enti saa mmarima nkɔnkɔnsafo yi susuwii sɛ: “Yɛrennya Daniel yi ho asɛm biara, gye sɛ yehu bi ne Nyankopɔn mmara ho.” (Daniel 6:4, 5) Esiane sɛ na wonim sɛ Daniel bɔ Yehowa mpae daa nti, wɔhwehwɛe sɛ wɔbɛma eyi ayɛ bɔne a ɛfata owu asotwe.

Ebia abirɛmpɔn ne amantam ahene no nyaa Daniel ho tan efisɛ ‘ná ɔkyɛn wɔn, na na honhom a ɛkyɛn so wɔ no mu; na ɔhene no reyɛ de no asi ahemman no nyinaa so.’ (Daniel 6:3) Ɛbɛyɛ sɛ Daniel nokwaredi no siw dwowtwa ne asisi ano ma wɔn ani annye ho. Sɛnea asɛm no te biara no, saa mmarima yi maa ɔhene no hyɛɛ mmara no mu den, na ɔyɛɛ no “Media ne Persia mmara a wɔnnan ani” no fã.—Daniel 6:8, 9.

Daniel Kura Ne Mudi Mu Pintinn

So bere a Daniel hui sɛ wɔahyɛ mmara foforo no, ogyaee sɛ ɔbɛbɔ Yehowa mpae? Dabida! Ɔkotow n’abansoro dan mu wɔ ne fie bɔɔ Onyankopɔn mpae mprɛnsa da koro “sɛ ɔyɛ kan no ara.” (Daniel 6:10) Bere a na ɔrebɔ mpae no, n’atamfo no “bɛtoaa Daniel na wohuu no sɛ ɔrebisa ade kotɔ srɛ Onyankopɔn anim.” (Daniel 6:11) Bere a wɔbɛkaa asɛm no kyerɛɛ ɔhene no, ɛyɛɛ Dario yaw sɛ mmara a wahyɛ no bɛma Daniel ho akyere no. Kyerɛwtohɔ no ka kyerɛ yɛn sɛ: “Ɔbɔɔ mmɔden ara kosii owiatɔ bere sɛ obegye no.” Nanso na ɔhene no ntumi ntwa mmara a wahyɛ no mu. Enti wɔde Daniel kɔtoo gyata amoa mu, a ɛda adi sɛ ɛyɛ bon bi a watu anaa asase ase. Ɔhene no maa Daniel awerɛhyem sɛ: “Wo Nyankopɔn a wosom no daa yi no, ɔno na onnye wo.”—Daniel 6:12-16.

Wɔ kɔdaanna ne mmuadadi akyi no, Dario yɛɛ ntɛm kɔɔ amoa no ano. Ná Daniel te ase a hwee nyɛɛ no! Ɔhene no yɛɛ ho ade ntɛm. Ɔma wɔde Daniel atamfo ne wɔn mmusua koguu gyata amoa no mu de tuaa wɔn ka. Dario san ma wohui wɔ ahemman no nyinaa mu sɛ ‘wɔ n’ahemman a odi so tumi nyinaa mu no, wɔmfɛre na wonsuro Daniel Nyankopɔn.’—Daniel 6:17-27.

Asuade Ma Yɛn

Daniel yɛɛ nokwaredi ho nhwɛso pa. Ɔhene no a na ɔnsom Yehowa mpo no hui sɛ Daniel som No “daa.” (Daniel 6:16, 20) Nea Aram asɛmfua ankasa a wɔkyerɛɛ ase “daa” no kyerɛ titiriw ne sɛ “biribi bedi kyinhyia.” Ɛkyerɛ biribi a ɛkɔ so daa. Hwɛ sɛnea eyi ka nokware a Daniel di maa Yehowa daa no ho asɛm ma ɛfata!

Daniel nyaa daa adeyɛ su no bere tenten ansa na wɔde no rekɔto gyata amoa mu. Sɛ́ aberantewa a ɔwɔ nnommum mu wɔ Babilon no, wanni aduan anaa anonne a Mose Mmara no mma ho kwan anaa wɔde abosonsom amanne agu ho fĩ no. (Daniel 1:8) Akyiri yi, ɔde akokoduru kaa Onyankopɔn asɛm kyerɛɛ Babilon hene Nebukadnesar. (Daniel 4:19-25) Nnɔnhwerew kakraa bi ansa na Babilon rehwe ase no, Daniel kaa Onyankopɔn atemmu kyerɛɛ Ɔhene Belsasar a wansuro. (Daniel 5:22-28) Enti bere a wɔde Daniel kɔtoo gyata amoa mu no, ɔkɔɔ so nantew gyidi kwan a wapaw no so.

Wo nso wubetumi asom Yehowa daa. Woyɛ aberante anaa ababaa? Ɛnde yɛ ade mprempren nya daa adeyɛ su denam wiase yi fekubɔne ne nneyɛe a aporɔw no a wobɛpow so. Sɛ wode bere bi asom Onyankopɔn a, fa nokwaredi gyina mu bere nyinaa. Mpa abaw, efisɛ sɔhwɛ biara a yehyia no ma yenya hokwan de kyerɛ Yehowa sɛ yɛasi yɛn bo sɛ yɛbɛsom no daa.—Filipifo 4:11-13.

[Ase hɔ asɛm]