Wo Tamfo A Ɔsen Biara​—Ne Sɔre Ne N’asehwe

BIBLE no kyerɛ sɛ ɔtamfo no sɔree wɔ bere a Onyankopɔn de ɔbarima ne ɔbea a wodi kan no traa wɔn Paradise fie no mu bere tiaa bi akyi. Esiane sɛ na Onyankopɔn rehwehwɛ nokwaredi ne osetie afi awarefo yi hɔ nti, ɔde ahyɛde tiaa maa wɔn sɛ: ‘Papa ne bɔne hu dua no de, munnni.’​—Genesis 2:16, 17.

Nanso, ɔtamfo no huu eyi sɛ ɛyɛ hokwan kɛse: “Na ɔwɔ yɛ anifere kyɛn wuram mmoadoma a [Yehowa] Nyankopɔn yɛɛ wɔn nyinaa. Na ɔka kyerɛɛ ɔbea no sɛ: Ampa na Onyankopɔn aka sɛ: Munnni turom ha nnua nyinaa bi?” Akyinnye biara nni ho sɛ na Hawa nim ɔwɔ no anifere akwan no enti na ntease nnim sɛ ɔbɛma ehu aka no ma waguan. Esiane sɛ wante ase sɛ tumi bi a ɛsen onipa de gyina saa ɔwɔ yi akyi nti, ɔmaa n’ani gyee n’adɔkɔdɔkɔsɛm no ho.​—Genesis 3:1; 1 Timoteo 2:14.

Enti bere a Hawa buae sɛ Onyankopɔn mmara a wɔbɛto no bɛkyerɛ owu ama wɔn no, ɔwɔ no de mmuae a ɛbɔ nea Onyankopɔn aka no abira koraa mae sɛ: Ɛnyɛ owu na mubewu: na Onyankopɔn nim sɛ da a mubedi bi no, mo ani bebue, na moayɛ sɛ Onyankopɔn ahu papa ne bɔne.”​—Genesis 3:2-5.

Nea aka no yɛ abakɔsɛm. Hawa a wɔdaadaa no ma osusuwii sɛ obetumi atew ne ho afi Onyankopɔn ho ma watumi atra ase no dii aduaba no, na Adam nso yɛɛ saa. Onyankopɔn buu wɔn kumfɔ bere a ɔreyɛ n’ade ntɛm atwe awarefo atuatewfo no aso no.​—Genesis 3:16-19.

Hena na Na Ɔhyɛ Ɔwɔ no Akyi?

Bible no ka Satan ho asɛm pɔtee sɛ “ɔwɔ dedaw no.” (Adiyisɛm 12:9) Yi Ɔbonsam fi Genesis nhoma no mu (sɛnea akyinnyefo binom bɛyɛ no) na wubehu sɛ ntease nni kyerɛwtohɔ no mu. Ɛnde na obi begye adi sɛ ɔwɔ no ankasa na ɔnam kwan bi so bɔɔ mmɔden kasae!

Nanso Bible no kyerɛ sɛ onipa nkutoo na wɔbɔɔ no “wɔ Onyankopɔn suban so” ma enti otumi kasa ma wɔte ase. (Genesis 1:27) Hyɛ atemmu a Onyankopɔn de baa ɔwɔ no so no nso nsow: “Na mede ɔtan mɛto wo ne ɔbea no ntam, ɛne w’asefo ne n’asefo ntam. Ɔno na ɔbɛbɔ wo ti, na wo nso woaka ne nantin.”​—Genesis 3:15.

Sɛ wɔka nsɛm yi kyerɛ ɔwɔ ankasa a, ɛbɛyɛ nea ntease kakraa bi na ɛda adi wom. So nnipa “tan” awɔ sen ebia akisi ne ananse ankasa? Ɛnde ɛda adi sɛ “ɔwɔ no,” “ɔbea no” ne ‘asefo’ a wɔwɔ saa asɛm no mu no yɛ sɛnkyerɛnne kwan so de a kyerɛw nsɛm afoforo nkutoo na ɛbɛma wɔatumi ate ase. (Galatifo 4:26; 3:29; Adiyisɛm 12:1-6: Mateo 23:33) Nanso, afei de emu ada hɔ sɛ Satan, obi a ɔsɔre tia Onyankopɔn anya kwan yɛ nea ɔpɛ.

Ɔtamfo no Mfiase

“Ɔno na ɔyɛ owudifo fi mfiase, na onnyina nokware so; efisɛ nokware nni no mu.” (Yohane 8:44) Enti Yesu kyerɛe sɛ bere bi no na Satan ‘wɔ nokware no mu,’ na akyinnye biara nni ho sɛ na ɔka “Onyankopɔn mma” a wɔyɛ abɔfo anuonyamfo no ho. (Hiob 38:7) Eyi yɛ soronko koraa wɔ yɛ a wɔyɛ ne ho mfonini sɛ abɔde bi a ɔwɔ mmɛn ne tɔte a wɔapae mu abien no ho.a Nanso Bible no nhyɛ no anuonyam denam ne mfitiase din a ɔde bɛfrɛ no so.

Ebinom ka sɛ, ‘Nanso ɛbɛyɛ dɛn na ɔbɔfo atumi ayɛ bɔne?’ Wɔanka nea osusuw ho a ɛma ɔtew atua no ho asɛm pɔtee wɔ Bible no mu. Ebia osusuw nneɛma ho te sɛ nea Babilon hene ɔhantanfo no yɛe no: “Ɔsoro na mɛforo makɔ, Onyankopɔn nsoromma no atifi na mɛma m’ahengua so masi.” (Yesaia 14:13; Fa toto 1 Timoteo 3:6 ho.) Ɛte sɛ nea pɛ a ɔpɛe sɛ wɔsom no ho akɔnnɔ ntraso na ɛmaa nsɛm a anibere wom yi sisii: “Na wɔsɔ obiara hwɛ a, na ɛyɛ n’ankasa akɔnnɔ a egyigye na ɛdaadaa no na ɛsɔ no hwɛ; ansa na akɔnnɔ no nyinsɛn a, ɛwo bɔne, na bɔne no wie nyin a, ɛwo owu.”​—Yakobo 1:14, 15.

Amansan no mu a Apaapae

Ɛnde dɛn nti na Onyankopɔn ansɛe Satan kɛkɛ? Efisɛ twe a Adam ne Hawa twee wɔn ho no maa nsemmisa a anibere wom sɔree: So Onyankopɔn nniso hyɛ nnipa so? Anaa so na ne nniso yɛ nea ɛteɛ? Hena na ɔwɔ hokwan sɛ odi tumi? So na Onyankopɔn de ahofadi rekame ne nkoa? Sɛ wɔma wɔn hokwan a, so Onyankopɔn asomfo nyinaa bɛpow no?

Satan a wɔbɛsɛe no remma wonnya saa nsemmisa yi ho mmuae. Enti wɔ nyansa mu no Onyankopɔn ama Satan kwan sɛ ɔntra hɔ​—bere tiaa bi. Eyi ama nnipa ne abɔfo nyinaa kwan sɛ wonhu Onyankopɔn ne Satan akwan a wɔfa so di tumi a ɛbɔ abira no. Enti nnipa betumi de wɔn ho abɔ Onyankopɔn anaa Satan ho. Saa asɛm a ɛfa Onyankopɔn nniso ne “ahofadi” a edi asi ho no apaapae amansan no mu de besi nnɛ!

Wɔdaa saa ɔsɛmpɔw yi fã foforo adi wɔ mfehaha bi akyi. Wɔ anisoadehu bi a ɛmaa wohuu soro ankasa mu no, Bible no ka abɔfo nhyiam bi a Satan de animtiabu kɔɔ bi ho asɛm wɔ Hiob 1:6-11 sɛ:

“Na [Yehowa] ka kyerɛɛ Satan sɛ: Ɛhe na wufi bae yi? Na Satan buaa [Yehowa] sɛ: Mifi asase so kyini ne ɛso anantenantew na mereba. Na [Yehowa] ka kyerɛɛ Satan sɛ: So woadwen m’akoa Hiob ho? Na obiara nni hɔ a ɔte sɛ ɔno asase no so, ɔbarima a odi mu na ɔteɛ, osuro Onyankopɔn, na oyi ne ho fi bɔne ho. Na Satan buaa [Yehowa] sɛ: So ɔkwa ara na Hiob suro Onyankopɔn no? . . . Teɛ wo nsa ka nea ɔwɔ nyinaa hwɛ, sɛ ɔrennome anaa!”

Ɛyɛ nea yetumi hu fi sɛnea wɔkaa saa nsɛm yi mu sɛ na Satan sɔre tia Onyankopɔn.b Ɔkyerɛe sɛ Onyankopɔn asomfo mu biara nni hɔ a ɔbɛkɔ so adi nokware, sɛ wɔma ohu amane a. Esiane eyi nti, nsemmisa afoforo sɔree: Onipa befi ne pɛ mu ahu amane esiane ɔdɔ a ɔwɔ ma Onyankopɔn nti akodu he? So pɛsɛmenkominya na ɛkanyan Onyankopɔn asomfo? Bio nso, wobetumi abua saa nsemmisa yi denam nsɛmmɔnedi a wɔbɛma atra hɔ kakra no so.

So Honhom Mu Nniso Horow ne Atumfoɔ wɔ Hɔ?

Satan de bɛyɛ mfe 6,000 ahwehwɛ akyidifo. Onyaa abɔfo atuatewfo bi a wɔ ne nkɛntɛnso ase no, “wogyaw wɔn ankasa trabere” wɔ soro begyinaa n’akyi. (Yuda 6; Genesis 6:2) Nanso wadi nkonim wɔ adesamma a ɔredaadaa wɔn akɔ ne nkyɛn no mu akodu he? Ne nkɛntɛnso mu atrɛw akodu he nnɛ?

Sɛnea asɛm a ɔbɔfo biako ka kyerɛɛ odiyifo Daniel kyerɛ no, ɛyɛ nea atrɛw kɛse. Ɔrekyerɛkyerɛ nea enti a wakyɛ mu no, ɔbɔfo no kae sɛ: “Na Persia ahemman bapɔmma siankaa me adaduonu da biako, na hwɛ [ɔbɔfo] Mikael bae bɛboaa me.” (Daniel 10:13) Nanso hena na obetumi ne ɔbɔfo adi asi? Nokwarem no, onipa biara nni hɔ. Ɛdɛn, egyee ɔbɔfo biako anadwo biako na ɔde sɛee nnipa 185,000! (Yesaia 37:36) Enti ɛbɛyɛ sɛ bapɔmma ɔsɔretiafo no yɛ ɔtamfo kɛse Satan no ankasa somafo!

Nea eyi kyerɛ no dɔɔso. Ɔsomafo Paulo kyerɛɛ sɛ wɔaboaboa “ahonhommɔne a ɛwɔ ɔsoro hɔnom” ano ayɛ wɔn “atumfoɔ” ne “mpanyinni.” (Efesofo 6:12) Ɛnde akyinnye biara nni ho sɛ ahonhommɔne “bapɔmma” a aniwa nhu no biako di wiase tumi biako biara so wɔ honhom mu! (Daniel 10:20) Nokwarem no, akyiri yi Satan de “wiase ahenni nyinaa” a ɛyɛ ne dea no hoahoaa ne ho kyerɛɛ Yesu.c Wɔ nokwarem no, Yesu powee sɛ obenya kyɛfa wɔ saa nniso a ɛyɛ Satan de no mu. (Luka 4:5-8) Na nnipa a wodi tumi sɛ aman mpanyimfo mprempren no nso ɛ? So wɔnyɛ wɔn a wɔyɛ Satan apɛde?​—Hwɛ Adiyisɛm 13:2 nso.

“Di Nam Bebree”

So Satan nniso anya adesamma so nkɛntɛnso a wotumi hu ankasa? Wɔama eyi ho mmuae a ɛma awɔse gu obi wɔ Daniel ti 7. Ɛhɔ na wɔde “aboa” bi a ɔte sɛ osisi yɛɛ Medopersia Ahemman no ho mfonini. Wɔ nkyekyem 5 awiei no, Bible no ka sɛ: “Na wɔka kyerɛɛ no sɛ: Sɔre di nam bebree!” Ɛda adi sɛ na Satan ahonhommɔne mmapɔmma no rekanyan Persiafo ahemfo no sɛ ‘wɔnsɔre’ mfi wɔn dibea sɛ tumidi a ɛto so abien no mu na wɔnko mfa asasesin no ntɛmntɛm wɔ adifudepɛ mu.

Abakɔsɛm si so dua sɛ bere tiaa bi akyi no Medo-Persia gyee saa ahonhommɔne ɔfrɛ a ese ‘onni nam bebree’ no so. The Historians’ History of the World ka sɛ: “Ɛyɛ anigye sɛ yebehu sɛ na saa ahemman yi yɛ nea ɛso sen biara a wiase no ahu pɛn wɔ sɛnea n’asase no mu trɛw te no mu; ɛyɛ kɛse sen Egypt, ɛtrɛw sen Asiria ahemman no na ɛyɛ kɛse sen ahemman biara a ebedi akyi aba bɛpem nnɛyi, gye sɛ bere tiaa bi wɔ Aleksanda Ɔkɛseɛ no [ase].”

Ɛnde besi nnɛ, amanaman no mpanyimfo da saa su koro no adi de trɛw wɔn tumi mu. Nanso asiane a ɛwɔ ho mprempren no yɛ kɛse. Aman horow no saw nea ɔkyerɛwfo biako frɛɛ no “asaw a ɛkyerɛ owu” de kura “sraadi tumi a wɔwɔ” no mu​—nuklea akode a ɛdɔɔso a wɔde bɛsɛe wiase no mpɛn pii. Ɔko a wɔremfa nuklea akode “nni dwuma kɛse wom” adaadaa “aman a wɔwɔ tumi kɛse no mu nnipa a wɔyɛ sraadi ho nhyehyɛe” ma wɔatow “adwene a wokura fi tete sɛ akode pii a wɔwɔ no remma ɔko mma no akyene. . . Mmom no wɔn ani abere rehwehwɛ ɔkwan a eye sen sen biara a wɔbɛfa so adi ako na wɔadi nkonim wɔ nuklea ɔko mu. Wodi nea ɛnsɛ sɛ wɔka ho asɛm no ho nkɔmmɔ; wɔresusuw nea nyansa nnim no ho.” (Maclean’s, February 15, 1982) So wɔabobɔ adam? Dabi, wɔreyɛ nea wɔn sodifo a aniwa nhu no​—Satan Ɔbonsam​—pɛ ara kwa.

Henanom ne Ɔbonsam Akyigyinafo?

Ɔbea biako kae sɛ: “Misusuw sɛ, migye [Ɔbonsam] di. Nanso bere tenten ni, minsusuw ne ho.” Nanso ɛnsɛ sɛ wɔ a Ɔbonsam wɔ hɔ no yɛ asɛm a yensusuw ho kɛse biara. Ɛsɛ sɛ yesusuw ho anibere so.

Nanso gye a yebegye adi sɛ Ɔbonsam wɔ hɔ no nkyerɛ sɛ ɛsɛ sɛ yesuro no ma yɛn koma tu, anaasɛ yɛma yɛn ani gye ahonhonsɛmdi ho. Kristofo twe wɔn ho fi adaemonesɛmdi ne ahonhonsɛmdi ho. (Deuteronomium 18:10-12; 1 Korintofo 10:21) Nea ɛyɛ anigye no, The Devil’s Dominion nhoma no kae sɛ: “Atirimpɔw titiriw nti a nkurɔfo anya anigye kɛse a ɛte sɛɛ wɔ ahonhonsɛmdi ne ɔbonsam mu . . . ne honhom mu aba a Asɔre a wɔahyehyɛ no ntumi nsow no, . . . Ɔbonsam akyigyinafo kuw ankasa a nkurɔfo nnim ne Asɔre ahorow a wɔahyehyɛ no asɔfo.”

Nanso, Yehowa Adansefo nyɛ wɔn a wontumi nsow “honhom mu aba” a ɛte sɛɛ. Na saa ara na wɔmɛyɛɛ Ɔbonsam akyigyinafo a nkurɔfo nnim denam wɔn ho a wɔde bɔ akyinnyegyefo kuw a wɔpow wɔ a ɔwɔ hɔ no ho so. (2 Korintofo 11:14) Nim a wonim oniiko a ɔyɛ onipa tamfo no boa wɔn ma wɔte nea enti a Onyankopɔn a ɔwɔ ɔdɔ no ma bɔne ho kwan no ase. Wonim faako a wogyina wɔ amansan ɔsɛmpɔw no mu, na wɔpɛ sɛ wɔbrɛ wɔn ho ase hyɛ Onyankopɔn nniso mmara horow a eye ne emu mfaso horow ase sen sɛ wɔbɛpaw berɛ tiaa bi “ahofadi.” Na wɔwɔ ahotoso sɛ denam Onyankopɔn mmoa so no wobetumi ‘agye wɔn afi ɔbɔne no nsam.’ (Mateo 6:13) Ebia gye a wobegye atom sɛ Ɔbonsam wɔ hɔ no bɛma wɔadi wɔn ho fɛw, nanso ɛyɛ ahobammɔ ankasa ma wɔn.

Krataa a wɔde taree ban ho wɔ United States wɔ Wiase Nyinaa Ko II mu kenkan sɛ, “Hu Wo Tamfo!” Wɔadi nkogu wɔ ɔsa ahorow pii mu esiane sɛ ɔsahene ammu ne tamfo sɛ ɔyɛ den ahe biara nti. Yehowa Adansefo nim ɔtamfo no na ‘n’adwene no nhintaw wɔn.’ (2 Korintofo 2:11, New World Translation) Wonim sɛ “wiase nyinaa da ɔbɔne no mu” enti ɔkwan a ɔfa so yɛ ne nneɛma no nyɛ nea ɛdaadaa wɔn.​—1 Yohane 5:19.

Yehowa Adansefo nim nso sɛ ɛrenkyɛ Ɔbonsam nniso bɔne no bɛba awiei. Bible no aka ato hɔ sɛ ɛrenkyɛ amansan no Bɔfo a ɔwɔ tumi no bɛsɛe n’atamfo nyinaa afi n’ahemman mu. Sɛnea ɔsomafo Petro kyerɛwee no, ‘ɔsoro foforo ne asase foforo a yɛretwɛn sɛnea ne bɔhyɛ te no’ besi Satan nniso ananmu.​—2 Petro 3:7, 11-13; Adiyisɛm 20:1-3, 10.

Wɔ “bere tiaa” a aka yi mu no, yɛhyɛ wo nkuran sɛ sua Bible no na sua sɛnea wo nso wubetumi ‘asiw Ɔbonsam kwan.’ (Adiyisɛm 12:12; Yakobo 4:7) Yehowa Adansefo ani begye sɛ wɔbɛboa wo ma woayɛ eyi na woatumi anya anigye wɔ Bible no bɔhyɛ no mu sɛ: “Asomdwoe Nyankopɔn no bɛpɛtɛw Satan . . . ntɛm.”​—Romafo 16:20.

[Ase hɔ nsɛm]

[Kratafa 11 adaka]

“Onyankopɔn turo Eden mu na wote, aboɔden abo nyinaa yɛ wo nkataho: bogyanambo, akaratebo ne bɔwerɛbo, sikabereɛbo, apopobibiribo ne ahwehwɛbo, hoabo, nsrammabo ne ahabammono bo ne sika; wo mpintin ne wo bɔmma ɔsom wɔ w’anim, ɛda a wɔbɔɔ wo no na wosiesiei. Woyɛ kerub a wɔasra no a ɔkata so, na mede wo misii hɔ; Onyankopɔn bepɔw kronkron so na wowɔ, ogya abo ntam na wonennamee. Wudii mu w’akwan mu, fi da a wɔbɔɔ wo ara de kosii da a wohuu wo mu abusude no”​—Hesekiel 28:13-15.

[Kratafa 8 mfoni]

Ɔbonsam ho adwene a agye din no yɛ nea wɔfa fii nkyerɛkyerɛ ahorow a ɛfa onyame Pan a ɔwɔ Helafo anansesɛm mu ho no mu

[Kratafa 9 mfoni]

So wiase yi mu asraafo mpanyimfo a mprempren nuklea ɔko ho nhyehyɛe na wɔyɛ no reyɛ nea Satan pɛ?

[Map/Picture on page 10]

(For fully formatted text, see publication.)

Wɔ adaemone nkɛntɛnso ase no. Medo-Persia Ahemman no bɛyɛɛ nea ɛsa sen biara wɔ abakɔsɛm mu no mu biako

The Great Sea

Black Sea

Caspian Sea

Persian Gulf

Red Sea

GREECE

MEDIA

PERSIA

ARABIA

EGYPT

ARMENIA

INDIA

LIBYA

Jerusalem

Babylon

Nineveh

Damascus

MT. SINAI

THRACE

ETHIOPIA

Nile River

Tigris River

Euphrates River

PARTHIA

ASSYRIA

LYDIA

SYRIA