Sɛnea Abɔfo Betumi Aboa Wo

ONYANKOPƆN Asɛm foa so sɛ abɔfo wɔ hɔ. Ɛkyerɛ yɛn sɛ honhom abɔde yi ɔpepem pii na wɔwɔ hɔ. Yehowa Nyankopɔn somfo Daniel kyerɛw eyi faa ɔsoro nneɛma ho anisoadehu bi a onyae ho sɛ: “Mpem mpem som [Onyankopɔn], na ɔpedu huhaa gyina n’anim.”—Daniel 7:10.

Hyɛ no nsow sɛ Daniel asɛm no ma yehu pii sen abɔfo no dodow ara kwa. Ɛkyerɛ nso sɛ abɔfo som Onyankopɔn. Wɔyɛ n’asomfo. Nea ɛne eyi hyia no, odwontofo no too dwom sɛ: “[Yehowa, NW] abɔfo, munhyira no, mo tumi abran a mudi n’asɛm so na mutie ne kasa no. [Yehowa, NW] asafo nyinaa, munhyira no, n’asomfo a moyɛ nea ɛsɔ n’ani no.”—Dwom 103:20, 21.

Bible no san kyerɛkyerɛ mu sɛ abɔfo amfi wɔn asetra ase te sɛ nnipa wɔ asase so. Yehowa bɔɔ abɔfo no wɔ soro ansa na ɔrebɔ asase no mpo. Bere a Onyankopɔn ‘bɔɔ asase no, Onyankopɔn mma a wɔyɛ abɔfo no nyinaa bɔɔ ose.’—Hiob 38:4-7.

Abɔfo yɛ ahonhom abɔde—wontumi nhu wɔn, wɔwɔ tumi, wɔwɔ nyansa. Wɔ Bible mu no, wɔkyerɛ Hebri asɛmfua mal·ʼakhʹ ne Hela asɛmfua agʹge·los ase sɛ “ɔbɔfo” bere a wɔreka honhom abɔde bi ho asɛm no. Saa nsɛmfua yi pue wɔ Bible no mu bɛyɛ mpɛn 400. Ne nyinaa wɔ asekyerɛ biako, a ɛkyerɛ, “ɔsomafo.”

Abɔfo a Wɔne Wɔn Hyia

Akyinnye biara nni ho sɛ abɔfo yɛ asomafo. Ebia wunim Bible kyerɛwtohɔ a ɛka bere a ɔbɔfo Gabriel yii ne ho adi kyerɛɛ Maria no ho asɛm. Ɔka kyerɛɛ no sɛ, ɛwom sɛ ɔyɛ ɔbaabun de, nanso ɔbɛwo ɔbabarima na wɔato ne din Yesu. (Luka 1:26-33) Ɔbɔfo bi nso yii ne ho adi kyerɛɛ nguanhwɛfo bi a na wɔwɔ sare so. Ɔsee wɔn sɛ: “Nnɛ wɔawo agyenkwa a ɔne Kristo no, Awurade, ama mo.” (Luka 2:8-11) Saa ara nso na, abɔfo de nkrasɛm kɔmaa Hagar, Abraham, Lot, Yakob, Mose, Gideon, Yesu, ne afoforo wɔ Bible kyerɛwtohɔ mu.—Genesis 16:7-12; 18:1-5, 10; 19:1-3; 32:24-30; Exodus 3:1, 2; Atemmufo 6:11-22; Luka 22:39-43; Hebrifo 13:2.

Nea ɛsɛ sɛ yɛhyɛ no nsow ne sɛ na saa nkrasɛm a abɔfo yi de kɔmae no nyinaa fa Onyankopɔn atirimpɔw mmamu ho na na ɛmfa nnipa a wɔka kyerɛɛ wɔn no de ho ankasa. Abɔfo yii wɔn ho adi sɛ Onyankopɔn ananmusifo, sɛnea n’apɛde ne ne bere nhyehyɛe te. Ɛnyɛ nnipa na ɛfrɛɛ wɔn.

So Ɛsɛ sɛ Yɛhwehwɛ Mmoa Fi Abɔfo Hɔ?

So ɛyɛ papa sɛ yɛbɛhwehwɛ mmoa afi abɔfo hɔ wɔ ahohia mmere mu? Sɛ ɛte saa a, yɛbɛpɛ sɛ yehu ɔbɔfo a obetumi aboa yɛn yiye no din. Ne saa nti, nhoma a wɔtontɔn no bi bobɔ din a wosusuw sɛ wɔde frɛ abɔfo pii a wɔn dibea, abodin, ne dwumadi ka ho. Nhoma biako ahyehyɛ “abɔfo a wonim wɔn yiye wɔ Atɔe fam aman mu” no din nnidiso nnidiso afrɛ wɔn “ɔsoro abɔde mu atitiriw du a wodi kan.” Afotu a ɛka din a wɔahyehyɛ yi ho ne sɛ kata w’ani, bɔ ɔbɔfo no din toatoa so brɛoo, twe mframa pii kɔ wo mu, home nkakrankakra, na “bue hokwan no ma wɔne wo nni nkitaho.”

Nea ɛne eyi bɔ abira no, Nyankopɔn abɔfo anokwafo yi mu baanu pɛ din na Bible no bɔ kyerɛ yɛn, Mikael ne Gabriel. (Daniel 12:1; Luka 1:26) Ebia wɔbɔɔ wɔn din de kyerɛe sɛ ɔbɔfo biara yɛ honhom abɔde soronko a ɔwɔ din, na mmom ɛnyɛ sɛ wɔyɛ tumi bi kɛkɛ a wonni nipasu.

Ɛsɛ sɛ yɛhyɛ no nsow sɛ abɔfo binom ampɛ sɛ wɔbɔ wɔn din kyerɛ nnipa. Bere a Yakob bisaa ɔbɔfo bi sɛ ɔnkyerɛ no ne din no, wammɔ ankyerɛ no. (Genesis 32:29) Bere a Yosua bisaa ɔbɔfo bi a ɔbaa ne nkyɛn din no, nea ɔkae ara ne sɛ “[Yehowa, NW] dɔm so safohene” ne no. (Yosua 5:14) Bere a Simson awofo bisaa ɔbɔfo bi din no, ɔkae sɛ: “Ɛdɛn [nti] na wubisa me din a ɛyɛ nwonwa yi?” (Atemmufo 13:17, 18) Bible no nam abɔfo no din a ammobɔ no so bɔ yɛn ho ban fi nidi a ɛmfata ne ɔsom a anka yɛde bɛma wɔn no ho. Sɛnea yebehu no, ɛnkyerɛ yɛn sɛ yɛne wɔn nni nkitaho nso.

Onyankopɔn Hɔ a Yɛbɛhwehwɛ Mmoa Afi

Bible no ka nea ehia sɛ yehu fa honhom atrae hɔ nyinaa kyerɛ yɛn. Ɔsomafo Paulo kyerɛwee sɛ: “Kyerɛw nyinaa fi Nyankopɔn home mu, na eye ma ɔkyerɛkyerɛ . . . Na Onyankopɔn nipa ayɛ pɛ a wɔasiesie no koraa ama nnwuma pa nyinaa.” (2 Timoteo 3:16, 17) Sɛ na Onyankopɔn pɛ sɛ yehu abɔfo no pii din a, anka ɔbɛda no adi wɔ N’asɛm, Bible no mu. Na sɛ na Onyankopɔn pɛ sɛ ɔkyerɛ yɛn ɔkwan a yɛbɛfa so ne abɔfo adi nkitaho na yɛakasa akyerɛ wɔn wɔ mpaebɔ mu a, anka ɔbɛma wɔakyerɛw ɛho nsɛm wɔ Kyerɛwnsɛm no mu.

Mmom no, Yesu Kristo kyerɛkyerɛe sɛ: “Wobɔ mpae a, hyɛn wo piam, na to wo pon mu bɔ w’agya a ɔwɔ kokoam no mpae . . . Enti mommɔ mpae sɛ: Yɛn Agya a wowɔ soro, wo din ho ntew.” (Mateo 6:6, 9) Nea Kyerɛwnsɛm no ka wɔ eyi ho ni: Ɛnsɛ sɛ yɛhwehwɛ mmoa fi abɔfo hɔ anaa yɛbɔ wɔn mpae, na mmom ɛsɛ sɛ yɛkɔ wɔn Bɔfo, Onyankopɔn ankasa anim wɔ mpaebɔ mu. Ne din nyɛ ahintasɛm, na enhia ɔdehufo na wada no adi. Ɛwom sɛ wɔabɔ mmɔden sɛ wɔbɛkata din kronkron no so de, nanso epue wɔ Bible kyerɛwtohɔ no mu bɛboro mpɛn 7,000. Sɛ nhwɛso no, odwontofo no too dwom yi faa ɔsoro Agya no ho: “Wo a wo din de [Yehowa, NW] no, wo nko ara ne ɔsorosoroni, asase nyinaa so.”—Dwom 83:18.

Yehowa nyɛ obi a onni adagyew sɛ obetie yɛn, sɛ yɛkɔ n’anim ɔkwan pa so wɔ mpaebɔ mu a. Bible de awerɛhyem yi ma: “[Yehowa, NW] de n’aniwa kyini fa asase nyinaa so, sɛ ɔde ne denyɛ bedi ama wɔn a wɔn koma di mũ wɔ ne ho no.”—2 Beresosɛm 16:9.

Abɔfo ne Abrabɔ

Nea ɛne nsɛm a wɔtaa ka wɔ atesɛm krataa mu bɔ abira no, abɔfo mmu nnipa atɛn. Ɛno fata, efisɛ abɔfo nni hokwan sɛ wobu nnipa atɛn. Yehowa ne “nnipa nyinaa ɔtemmufo,” ɛwom sɛ “ɔde atemmu nyinaa ahyɛ ɔba no,” Yesu Kristo “nsa” de. (Hebrifo 12:23; Yohane 5:22) Nanso, ɛbɛyɛ mfomso sɛ yebesusuw sɛ abɔfo mfa sɛnea yɛbɔ yɛn bra ho. Yesu kae sɛ: “Anigye ba Onyankopɔn abɔfo anim ɔdebɔneyɛfo biako a ɔsakra n’adwene ho.”—Luka 15:10.

Nanso ɛnyɛ sɛ abɔfo no rehwɛ nea ɛrekɔ so kɛkɛ. Mmere a atwam no, wɔsomee sɛ abrafo, a wodi Onyankopɔn atemmu ho dwuma. Sɛ nhwɛso no, Onyankopɔn maa abɔfo twee Misrifo aso. Sɛnea Dwom 78:49 kyerɛ no, “ɔtow n’abufuw hyewhyew no guu wɔn so; anibere, ahi ne ahohia, abɔfo bɔne a ɔsomaa wɔn baa wɔn so no.” Nea ɛte sɛ eyi no, Bible no bɔ amanneɛ sɛ ɔbɔfo biako kunkum Asiria asraafo 185,000 anadwo biako pɛ.—2 Ahene 19:35.

Saa ara nso na daakye, abɔfo bɛsɛe wɔn a wɔde afoforo yiyedi to asiane mu denam Onyankopɔn trenee gyinapɛn a wɔboapa bu wɔn ani gu so no so. Yesu ‘ne ne tumi abɔfo bɛba ogyaframa mu, na wadi wɔn a wonnim Nyankopɔn ne wɔn a wɔantie asɛmpa no were.’—2 Tesalonikafo 1:7, 8.

Enti Kyerɛwnsɛm no kyerɛ sɛ Onyankopɔn abɔfo anokwafo no yɛ n’apɛde da biara denam n’akwankyerɛ a wɔde yɛ adwuma ne ne trenee gyinapɛn a wogyina akyi no so. Ɛda adi sɛ, sɛ yɛpɛ sɛ Onyankopɔn abɔfo boa yɛn a, ehia sɛ yehu nea Onyankopɔn pɛ na yɛbɔ mmɔden dennennen de yɛ adwuma.

Abɔfo a Wɔbɔ Nkurɔfo Ho Ban

So abɔfo hwɛ nkurɔfo so bɔ wɔn ho ban? Ɔsomafo Paulo bisae sɛ: “Wɔn [abɔfo] nyinaa nyɛ ahonhom asomfo a wɔn a wɔbɛyɛ nkwagye no difo no nti wɔsoma wɔn sɛ wɔnkɔsom?” (Hebrifo 1:14) Ɛda adi sɛ, Paulo asɛmmisa no ho mmuae yɛ yiw.

Esiane sɛ wɔankotow sika honi a Babilonni Ɔhene Nebukadnesar de sii hɔ no nti, wɔde Hebrifo baasa no Sadrak, Mesak ne Abed-Nego guu fononoo a na adɔ aboro so mu. Nanso, ogya no antumi anyɛ saa Nyankopɔn nokware asomfo no hwee. Bere a ɔhene no hwɛɛ fononoo no mu no, ohuu “mmarima baanan” na ɔkae sɛ “nea ɔto so anan no tebea te sɛ anyame ba bi.” (Daniel 3:25) Mfe bi akyi no, wɔtow Daniel kyenee agyata amoa mu esiane ne nokwaredi nti. Wɔbɔɔ ɔno nso ho ban a hwee anyɛ no na ɔkae sɛ: “Me Nyankopɔn asoma ne bɔfo ma wabemuamua agyata no ano.”—Daniel 6:22.

Bere a wɔhyehyɛɛ Kristo akyidifo asafo no wɔ afeha a edi kan Y.B. mu no, abɔfo san yii wɔn ho adi, na woyii asomafo no fii afiase. (Asomafo no Nnwuma 5:17-24; 12:6-12) Na bere a na Paulo nkwa da asiane mu wɔ po so no, ɔbɔfo bi maa no awerɛhyem sɛ ɔbɛkɔ akodu Roma dwoodwoo.—Asomafo no Nnwuma 27:13-24.

Yehowa Nyankopɔn asomfo a wɔwɔ hɔ nnɛ no gye di yiye sɛ Onyankopɔn abɔfo dɔm a aniwa ntumi nhu wɔn no wɔ hɔ na wobetumi de ahobammɔ ama, te sɛ nea wɔyɛ maa Elisa ne ne somfo no. (2 Ahene 6:15-17) Nokwarem no, “[Yehowa, NW] bɔfo bɔ wɔn a wosuro no ho nsra hyia, na ogye wɔn.”—Dwom 34:7; 91:11.

Nkrasɛm a Abɔfo Kura

Bere a abɔfo dwen wɔn a wɔsom Yehowa Nyankopɔn no yiyedi ho no, wɔsan boa ma nkurɔfo sua ɔne n’atirimpɔw ho ade. Ɔsomafo Yohane kyerɛwee sɛ: “Mihuu ɔbɔfo foforo a otu nam ɔsoro mfinimfini a okura daa asɛmpa bi rekɔka akyerɛ wɔn a wɔte asase so, ne aman ne mmusuakuw ne kasa ne nkurɔfo nyinaa, na ɔde nne kɛse teɛɛm sɛ: Munsuro Onyankopɔn na monhyɛ no anuonyam.”—Adiyisɛm 14:6, 7.

So wopɛ sɛ wuhu nsɛm a ɛwɔ “daa asɛmpa” yi mu? Ɛnde, bisa Yehowa Adansefo. Wɔn ani begye sɛ wɔbɛkyerɛ wo.

[Kratafa 7 mfonini ahorow]

Ɔbɔfo bi a ɔwɔ soro mfinimfini reka daa asɛmpa. So wopɛ sɛ wusua ho ade?