Yudafo Kristofo, Ne Mesia Ho Anidaso No

“Migye di yiye sɛ Mesia no bɛba, na ɛwom sɛ ebia ɔbɛkyɛ de, nanso da biara da mɛtwɛn ne ba no.”—Moses Maimonides (wɔfrɛ no Rambam nso). (1135-1204).¹

MESIA! Yudafo kuraa ba a ɔbɛba mu gyidi no mu mfehaha pii. Nanso, bere a Yesu a ofi Nasaret bae no, Yudafo mu dodow no ara pow no sɛ ɛnyɛ ɔno ne Mesia no. Wɔ Yudafo adwenem no, Yesu anyɛ n’ade sɛnea na wɔhwɛ kwan.

“Mesia” kyerɛ “nea wɔasra no.” Wɔ Yudafo mu no asɛmfua no begyinaa hɔ maa Ɔhene Dawid aseni a ɔde anuonyam nniso bi bɛba. (2 Samuel 7:12, 13) Ebeduu Yesu bere so no na Yudafo ahu amane mfehaha pii wɔ Amanaman mufo atirimmɔden nniso horow ase. Na wɔhwehwɛ amammui mu ogyefo.² Enti bere a Yesu a ofi Nasaret ba bɛkaa sɛ ɔne Mesia a wɔde bere tenten atwɛn no no, mfiase no ɛde anigye bae. (Luka 4:16-22) Nanso nea ɛmaa Yudafo no aba mu bui kɛse ne sɛ na Yesu nyɛ amammui mu ɔkatakyie. Nea ɛne no bɔ abira no, ɔkae sɛ n’Ahenni ‘nyɛ wiase no fa.’ (Yohane 18:36) Bio nso, Yesu amfa Mesia anuonyam nniso bere a odiyifo Yesaia hu siei no amma. (Yesaia 11:4-9) Na bere a wokum Yesu sɛ nsɛmmɔnedifo no, ɔman no nyinaa hweree ne ho anigye a wɔwɔ no.

Yesu akyidifo a nneɛma a esisii yi ammu wɔn aba mu no kɔɔ so bɔɔ no ho dawuru sɛ ɔne Mesia no. Dɛn na ɛma wɔyɛɛ nnam kɛse saa? Na ɛyɛ gyidi a ɛne sɛ Yesu wu no maa nkɔmhyɛ nyaa mmamu, titiriw Yesaia 52:13-53:12 nkɔmhyɛ no. Ne fa bi kenkan sɛ:

“Hwɛ, M’akoa bedi yiye, wɔbɛpagya no na wɔama no so, . . . efisɛ ofifii sɛ duforo, sɛ asase kesee mu ntini . . . Wobuu no animtiaa, na nnipa paa no, onipa a ohuu ayayade na onim yare, obi a nnipa yi wɔn ani hintaw no: Wobuu no animtiaa, na yɛammu no hwee. Ampa, yɛn yare no, ɔno na wafa, na yɛn ayayade nso, wasoa . . . Na ɔno de, yɛn mmarato nti na wopiraa no: Yɛn asomdwoe ho asotwe daa no so, na ne mmaa atape na wɔde asa yɛn yare. Yɛn nyinaa yerae sɛ nguan, obiara faa ne kwan so. . . Wɔhyɛɛ no ahoɔyaw na ɔno de ɔbrɛɛ ne ho ase na wammue n’ano; sɛ oguammaa a wɔde no rekɔ akokum no, . . . wotwaa no fii ateasefo asase so. . . . Na wɔmaa ne damoa fraa abɔnefo.”—JP.a

Mesia Ɔmanehunufo?

So ɛha no, Yesia hyɛɛ Mesia ɔmanehunufo bi a obewu ho nkɔm? Nnɛyi Yudafo akyerɛwfo pii se dabi. Ebinom ka sɛ Akoa Ɔmanehunufo no ne Israel man no ankasa bere a wɔkɔɔ Babilon nkoasom mu no. Afoforo nso se na amanehunu no ne Mmeamudua akodi anaa Nasi Okunkɛse mmere no.³ Nanso so nhwehwɛmu a ɛkɔ akyiri kyerɛ sɛ nkyerɛkyerɛmu yi teɛ? Ɛyɛ nokware sɛ Yesaia ka Israel ho asɛm wɔ mmeae bi sɛ Onyankopɔn “akoa.” Nanso ɔka Israel ho asɛm sɛ akoa ɔbɔnefo a wafom kwan! (Yesaia 42:19; 44:21, 22) Enti Encyclopaedia Judaica kyerɛkyerɛ abirabɔ yi mu sɛ: “Israel ankasa no yɛ ɔbɔnefo na Akoa [a ɔwɔ Yesaia 53] no nni bɔne.”⁴

Enti, ebinom ka sɛ Akoa no gyina hɔ ma Israel mu ‘atreneefo kuw titiriw’ bi a wohuu amane maa Yudafo abɔnefo no.⁵ Nanso Yesaia anka kuw titiriw bi a ɛte saa ho asɛm da. Nea ɛne eyi bɔ abira no, ɔhyɛɛ nkɔm sɛ ɔman mũ no nyinaa bɛyɛ abɔnefo! (Yesaia 1:5, 6; 59:1-4; fa toto Daniel 9:11, 18, 19 ho.) Afei, wɔ amanehunu mmere mu no, na Yudafo a wɔyɛ atreneefo ne wɔn a wɔnte saa nyinaa hu amane.

Asɛnnennen foforo ni: Akoa no huu amane maa henanom? Yudafo Soncino nkyerɛkyerɛmu no se ɛyɛ Babilonfo no. Sɛ eyi te saa a, henanom na wɔkae sɛ ‘yɛn bɔne nti’ na Akoa no huu amane no? (Yesaia 53:5) So ntease wom sɛ yebegye adi sɛ Babilonfo no (anaasɛ Amanaman mufo biara) begye atom—sɛ Yudafo huu amane maa wɔn?⁶

Nea ɛyɛ anigye ne sɛ afeha a edi kan mu rabifo (ne pii a wɔbae fi ɛno akyi) ka sɛ Akoa Ɔmanehunufo no ne Mesia no.⁷ (Hwɛ adaka a ɛwɔ kratafa 11 no.) Yudafo mpempem pii behuu Akoa Ɔmanehunufo no ne Yesu a ofi Nasaret no ntam nsɛdi ahorow a wontumi nnye ho akyinnye. Te sɛ saa Akoa no, na Yesu ba fam. Awiei koraa no, wobuu no animtiaa na wɔpow no. Ɛwom sɛ wanni amammui mu nkonim biara de, nanso ɔsoaa afoforo nyarewa, nam anwonwa kwan so saa wɔn yare. Ɛwom sɛ na onni fɔ, nanso owui esiane atɛnkyea nti—ade a ogye toom a wankasa antia.

Mesia a Owui?

Na dɛn nti na ɛsɛ sɛ Mesia no wu? Yesaia 53:10 kyerɛkyerɛ mu sɛ: “Nanso AWURADE pawee sɛ ɔde yare bɛdwerɛw no, sɛ, sɛ ɔde ne ho yɛ asodi afɔre a, obenya asefo na ne nna aware, na AWURADE atirimpɔw nam no so ayɛ yiye.” (Ta) Na eyi twe adwene si sɛnea Lewifo de mmoa bɔ bɔne ne afɔdi ho afɔre no. Na Mesia no bewu animguase wu, nanso te sɛ aboa a wɔde no bɔ afɔre no, na ne wu no betumi ayɛ mpata.

Nanso, sɛ Mesia no wu a, ɔbɛyɛ dɛn na wama nkɔmhyɛ ahorow a ɛfa n’anuonyam nniso ho no aba mu, na wanya “asefo na ne nna aware”? Ntease wom sɛ ɛdenam owusɔre so. (Fa toto 1 Ahene 17:17-24 ho.) Na Mesia no wusɔre no nso bɛma nea ɛte sɛ abirabɔ wɔ Daniel 7:13 a ɛka too hɔ sɛ Mesia no nam ɔsoro amununkum mu bɛba wɔ nkonimdi mu no ne Sakaria 9:9 a ɛkae sɛ ɔbɛtra afurum so aba ntam no mu ada hɔ. Talmud no bɔɔ mmɔden sɛ ɛbɛkyerɛkyerɛ asɛnnennen no mu bere a ɛkae sɛ: “Sɛ wɔbɔ wɔn bra yiye a, ɔnam omununkum so na ɛbɛba; sɛ ɛnte saa a, ɔbɛba sɛ obi a ɔba fam a ɔte afurum so.” (Sanhedrin 98a)⁸ Eyi bɛkyerɛ sɛ nkɔmhyɛ a ɛwɔ Daniel 7:13 anaasɛ nea ɛwɔ Sakaria 9:9 no rennya mmamu. Nanso, na Mesia no wusɔre no bɛma watumi ama nkɔmhyɛ abien no nyinaa anya mmamu. Mfiase no, ɔbɛba wɔ ahobrɛase mu abehu amane na wawu. Wɔ ne wusɔre akyi no, ɔbɛsan aba wɔ anuonyam mu na ɔde Mesia ɔsoro nniso no aba.

Yudafo ɔhaha pii a wɔde wɔn ani hui no di adanse sɛ wonyan Yesu fii awufo mu. (1 Korintofo 15:6) So wobetumi abɔ saa nsɛm no agu?

Yudasom ne Yesu

Afeha a edi kan mu Yudafo pii annye anni sɛ Yesu yɛ Mesia. Nanso, onyaa Yudasom so nkɛntɛnso kɛse. Ɛwom sɛ wɔntaa mmɔ Yesu din wɔ Talmud no mu de, nanso ne ho asɛm kakraa a wɔka no bɔ mmɔden sɛ “ebebu Yesu animtiaa denam ka a ɛka sɛ ɔyɛ aguaman ba, nkonyaayifo, ne obi a owui animguase wu no so.”b—The Jewish Encyclopedia.⁹

Yudani nhomanimfo Joseph Klausner gye tom sɛ saa nsɛm yi “te sɛ nea ɛhyɛda bɔ nneɛma a esisii a wɔakyerɛw wɔ Nsɛmpa no mu no abira.”¹¹ Na ɛwɔ ntease pa! Katolek Asɔre no nam Yudafo a ɛsɔre tia wɔn no so ama sɛnea Yudafo mpɛ Yesu asɛm no ayɛ kɛse. Ama Yudafo atwe wɔn ho nso denam Yesu a ɛkae sɛ ɔyɛ ‘Onyankopɔn Ɔba’—Baasakoro a ntease nim bi fa—a na ɛbɔ Yesu ankasa nkyerɛkyerɛ abira tee no so. Wɔ Marko 12:29 no Yesu fa Torah no mu nsɛm ka sɛ: “Tie, O Israel; Awurade yɛn Nyankopɔn yɛ Awurade koro.”—King James Version; Deuteronomium 6:4.

Ɛwom sɛ Yudasom ko tiaa nsakrae a ɛbɛyɛ wɔ ɔsom mu de, nanso “Kristosom nyaa Yudasom so nkɛntɛnso kɛse. Ɛhyɛɛ Rabifo no ma wɔsakraa nea wosi so dua pii no na wɔsesaa wɔn adwene wɔ nneɛma binom mu.”¹² Na tete Rabifo gye di sɛ Mesia ho anidaso no abu so wɔ Kyerɛwnsɛm no mu. Wohuu anidaso a ɛte saa ho ade wɔ Bible no mmeae te sɛ Genesis 3:15 ne 49:10. Palestinian Targum no ka sɛ nea edi kan no mmamu bɛba wɔ “Ɔhene Mesia da no mu.”¹³ Midrash Rabbah kaa nea ɛto so abien no ho asɛm sɛ: “Eyi fa ɔhene Mesia no ho.”¹⁴ Talmud no nso ka sɛ Yesaia, Daniel, ne Sakaria nkɔmhyɛ ahorow no fa Mesia no ho.¹⁵ “Adiyifo no nyinaa hyɛɛ Mesia no nna no nkutoo ho nkɔm,” Talmud, Sanhedrin 99a.¹⁶

Nanso wɔ Kristoman mmɔden a ɛbɔe sɛ ɛbɛsakra nkurɔfo nhyɛso ase no, Yudasom sakraa emu nsusuwii ahorow. Wɔsan kyerɛɛ Kyerɛwsɛm mu nsɛm a na wɔka sɛ ɛfa Mesia no ho no mu pii ase wɔ ɔkwan foforo so.¹⁷ Ɛreba nnɛ bere yi mu, wɔ Bible mu nhwehwɛmu fefeefe nkɛntɛnso ase no, Yudafo nhomanimfo binom kae sɛ Mesia ho anidaso no mpue wɔ Bible no mu koraa!¹⁸

Nanso, Mesia ho anidaso no kɔɔ nea ɛte sɛ awo foforo mu bere a wɔhyehyɛɛ Israel Man no wɔ 1948 mu no. Harold Ticktin kyerɛw sɛ: ‘Yudafo akuw horow pii bu Israel Man a ɛsɔree no sɛ nkɔmhyɛ mu ade titiriw bi.’¹⁹ Nanso, bere a Mesia a wɔde bere tenten atwɛn no no bɛba ho ɔsɛmpɔw no da so ara yɛ nea Yudafo nhuu ano ɛ. Talmud no se: “Sɛ wuhu awo ntoatoaso a ɔhaw ayiri no sɛ asuten a, twɛn [Mesia no].” (Sanhedrin 98a)²⁰ Nanso, Yudafo Mesia no amma wɔ Okunkɛse bere bɔne no anaasɛ wɔ Israel Man no awo bere mu hooyɛ no bere mu. Obi bebisa sɛ, ‘Ɔhaw bɛn bio na ɛsɛ sɛ Yudafo no kɔ mu ansa na Mesia no aba?’

Mesia no Hwehwɛ

Mesia ho anidaso no fii ase na enyinii wɔ Yudafo mu. Saa anidaso no ano abrɛ ase wɔ wɔn mu. Mfehaha mu amanehunu ne akwanhwɛ a anya mmamu ama ne hann no reyɛ adum. Nea ɛne akwanhwɛ bɔ abira no, Amanaman mufo ɔpepem pii ahwehwɛ Mesia no na awiei koraa no wɔagye no adi. So Yesaia kaa Mesia no ho asɛm sɛ: “Amanaman [Amanaman mufo] bɛhwehwɛ no” no kwa? (Isaiah 11:10, JP) So ɛnsɛ sɛ Yudafo nso hwehwɛ Mesia no? Dɛn nti na ɛsɛ sɛ wɔde anidaso a wɔahwɛ kwan bere tenten no kame wɔn ho?

Nanso, Mesia bi a ɔbɛba daakye a wɔbɛhwehwɛ no no yɛ ɔkwa. Sɛ ɔba a, ɔbɛyɛ dɛn atumi akyerɛ sɛ ɔyɛ Ɔhene Dawid aseni ampa? So wɔansɛe anato ho kyerɛwtohɔ ahorow no anka asɔrefi a ɛto so abien no ho? Ɛwom sɛ na kyerɛwtohɔ a ɛte saa wɔ hɔ wɔ Yesu bere so de, nanso wɔantumi ammɔ Dawid nokware aseni a ɔkae sɛ ɔyɛ no angu.c So obi a daakye ɔbɛba sɛ ɔne Mesia no betumi de adanse a ɛte saa ama? Enti ɛsɛ sɛ obi hwehwɛ Mesia a ɔbae bere a atwam no.

Eyi hwehwɛ sɛ wosusuw Yesu ho bio, na woyi ne ho adwene a wɔadi kan anya biara fi hɔ. Sɛnea wɔyɛ no sɛ ɔhotuafo bi a ɔte sɛ ɔbea wɔ asɔre mfonini ahorow mu no nsɛ Yesu ankasa no. Nsɛmpa no mu kyerɛwtohɔ—a Yudafo kyerɛwee no—da no adi sɛ ɔyɛ ɔbarima a ɔwɔ tumi, ɔhoɔdenfo, rabi a ɔwɔ nyansa soronko. (Yohane 3:2) Nokwarem no, Yesu sen amammui mu ogyefo biara a na Yudafo no hwɛ no kwan. Sɛ Ɔhene nkonimdifo no, ɛnyɛ amammui man a ɛyɛ mmerɛw bi na ɔde bɛba, na mmom ɔsoro Ahenni a obiara ntumi nni so nkonim a ɛde Paradise bɛba asase so nyinaa a ase no, “habɔdɔm ne oguanten ba bɛtra.”—Yesaia 11:6, JP; Adiyisɛm 19:11-16.

So wobɛtra ase wɔ saa Mesia nniso bere no mu? Maimonides tuu Yudafo fo tiawa sɛ ‘wɔntwɛn Mesia no ba.’²² Nanso yɛn bere yi mu yɛ den dodo sen nea ɛsɛ sɛ obi renhu ne sanba no. Adesamma abusua mũ no nyinaa hia Mesia yiye, obi a obegye wɔn afi nsɛnnennen a ɛhaw okyinsoromma yi mu. Enti bere aso sɛ wɔhwehwɛ no—denneennen, nnam so. Yehowa Adansefo ayɛ krado sɛ wɔbɛboa wo ma woayɛ saa. Kae sɛ, Mesia no a obi bɛhwehwɛ no no nyɛ ne Yudafo agyapade a ɔsɔre tia, efisɛ Mesia ho anidaso no yɛ Yuda som mu ade. Na sɛ wohwehwɛ Mesia no a, ebia wubehu sɛ waba dedaw.

Nhwehwɛmu Nhoma Ahorow

1. The Book of Jewish Knowledge, a Nathan Ausubel kyerɛwee, 1964, kratafa 286; Encyclopaedia Judaica. 1971, Po II, kratafa 754.

2. The Messiah Idea In Jewish History, a Julius H. Greenstone kyerɛwee, 1973 (wodii kan tintimii 1906), kratafa 75.

3. Encyclopaedia Judaica. 1971, Po 9. kratafa 65; Soncino Books of the Bible—Isaiah, A. Coben yɛ ne samufo, 1949. kratafa 260; You Take Jesus, I’ll Take God, a Samuel Levine, kyerɛwee 1980, kratafa 25.

4. Encyclopaedia Judaica, 1971, Po 9. kratafa 65.

5. Encyclopaedia Judaica, 1971, Po 9. kratafa 65; The Suffering Servant in Deutero-Isaiah, fi Christopher R North kyerɛwee Nea Edi Kan, 1948, nkratafa 9, 202-3.

6. Soncino Books of the Bible—Isaiah, kratafa 261.

7. The Book of Isaiah, nsɛm a Amos Chakham kae, 1984, kratafa 575; The Targum of Isaiah, a J. F. Stenning yɛ ne samufo, 1949. kratafa 178; The Suffering Servant In Deutero-Isaiah a Christopher R. North, kyerɛwee Nea Edi kan, 1948, nkratafa 11-15; Encyclopaedia Judaica, 1971, Po 9, kratafa 65.

8. The Babylonian Talmud, a Ɔbenfo H. Freedman kyerɛɛ ase, 1959. Po II. kratafa 664.

9. The Jewish Encyclopedia, 1910, Po VII, kratafa 170.

10. Israelis, Jews and Jesus, a Pinchas Lapide kyerɛwee 1979, nkratafa 73-4.

11. Jesus of Nazareth—His Life, Times, and Teachings, a Joseph Klausner kyerɛwee, 1947 (a wodii kan tintimii wɔ Great Britain 1925), kratafa 19.

12. The Jewish People and Jesus Christ, a Jakób Jocz kyerɛwee, 1954 (wotintim nea edi kan wɔ 1949 mu), kratafa 153.

13. Neophyti 1, Targum Palestinense, Ms de la Biblioteca Vaticana, Génesis, 1968, Po I, nkratafa 503-4; The Messiah: An Aramaic Interpretation, a Samson H. Levey kyerɛwee, 1974, nkratafa 2-3.

14. Midrash Rabbah, a ɔbenfo H. Freedman ne Maurice Simon kyerɛɛ ase na wɔyɛ n’asamufo, 1961 (Nea Edi Kan 1939), Po II, page 956; Chumash With Targum Onkelos, Haphtaroth and Rashi’s Commentary, a A. M. Silbermann ne M. Rosenbaum kyerɛɛ ase, 1985, nkratafa 245-6.

15. The Babylonian Talmud, a ɔbenfo H. Freedman kyerɛɛ ase, 1959, Po II, pages 663-5, 670-1 (Sanhedrin 98a, 98b).

16. New Edition of the Babylonian Talmud, a Michael L. Rodkinson saa mu na ɔkyerɛɛ ase, 1903, Fa a ɛtɔ so IV, Po VIII, page 312 (Tract Sanhedrin); The Babylonian Talmud, Po II, kratafa 670 (Sanhedrin 99a).

17. The Suffering Servant in Deutero-Isaiah, by Christopher R. North, Nea Edi Kan, 1948, kratafa 18; The Jewish People and Jesus Christ, a Jakób Jocz, 1954 (wodii kan tintimii 1949), nkratafa 205-7, 282; The Pentateuch and Haftorahs, Ɔbenfo. J. H. Hertz yɛ ne samufo, 1929-36, Po I, kratafa 202; Palestinian Judaism in New Testament Times, a Werner Förster kyerɛwee, na Gordon E. Harris kyerɛɛ ase, 1964, pages 199-200.

18. Encyclopaedia Judaica, 1971, Po 11, kratafa 1407; U.S. Catholic, December 1983, kratafa 20.

19. U.S. Catholic, December 1983, kratafa 21; What Is Judaism?, a Emil L. Fackenheim kyerɛwee, 1987, nkratafa 268-9.

20. The Babylonian Talmud, a Ɔbenfo H. Freedman kyerɛɛ ase, 1959, Po II, page 663.

21. The Works of Josephus, a William Whiston kyerɛɛ ase, 1987, “The Life of Flavius Josephus,” 1:1-6, ne “Flavius Josephus Against Apion,” asehɔ asɛm a ɛfa 7:31, 32 ho.

22. The Book of Jewish Knowledge, a Nathan Ausubel kyerɛwee, 1964, kratafa 286.

23. The Targum of Isaiah, a J. F. Stenning yɛ ne samufo, 1949, nkratafa vii, 178; The Messiah: An Aramaic Interpretation, nkratafa 63, 66-7; The Suffering Servant in Deutero-Isaiah, a Christopher R. North kyerɛwee, Nea Edi Kan, 1948, kratafa 11.

24. The Fifty-Third Chapter of Isaiah—According to the Jewish Interpreters, a S. R. Driver ne A. Neubauer, 1969 kyerɛwee, Po II, kratafa 7; New Edition of the Babylonian Talmud, a Michael L. Rodkinson yɛ ne samufo na ɔkyerɛɛ ase, 1903, Ɔfã IV, Po VIII, page 310.

25. The Fifty-Third Chapter of Isaiah—According to the Jewish Interpreters, a S. R. Driver ne A. Neubauer kyerɛwee, 1969, Po II, nkratafa 374-5.

26. The Fifty-Third Chapter of Isaiah—According to the Jewish Interpreters, a S. R. Driver ne A. Neubauer kyerɛwee, 1969, Po II, nkratafa x, 99-100.

[Ase hɔ nsɛm]

[Kratafa 11 adaka]

Rabifo Nhoma Horow mu Akoa Ɔmanehunufo No

Wɔ mfehaha no mu no, Yudafo abenfo a wobu wɔn no mu binom akyerɛ sɛ Yesaia 52:13-53:12 nkɔmhyɛ no fa Mesia no ho:

The Targum of Jonathan ben Uzziel (Afeha 1 Y.B.). Targum kyerɛ Yesaia 52:13 no ase sɛ: “Hwɛ, m’akoa a Wɔasra no (anaasɛ, Mesia no) bedi yiye.”²³

The Babylonian Talmud (Sanhedrin 98b) (bɛyɛ afeha a ɛto so 3 Y.B.): “Mesia no—ne din de den? . . . Rabifo no se, Ɔkwatani no [; wɔn a]wɔwɔ Rabi fie [se, Ɔyarefo no], sɛnea wɔka sɛ, ‘Nokwarem no ɔno na wɔasoa yɛn nyarewa.’”—Fa toto Yesaia 53:4 ho.²⁴

Moses Malmonides (Rambam) (Afeha a ɛto so 12): “Mesia no sanba no bɛyɛ dɛn, na ɛhe na obedi kan apue? . . . Wɔ Yesaia [52:15] nsɛm no mu, bere a ɛreka sɛnea ahene bɛyɛ wɔn ade wɔ ne ho no, Ahene bemua wɔn ano wɔ ne ho.” ²⁵

Moses Ibn Crispin Cohen (Afeha a ɛto so 14): “Ɛyɛ me anigye sɛ mɛkyerɛ [Yesaia 53] ase, ma ɛne yɛn Rabifo nkyerɛkyerɛ a ɛfa Ɔhene Mesia ho no ahyia, na mɛyɛ ahwɛ yiye biara a metumi na mabata ntease no ankasa ho: saa kwan no so no, sɛ ebetumi a, mɛde me ho afi nkyerɛase ahorow a ɛrentumi nyɛ nokware a [Yudafo akyerɛwfo] afoforo adi ho fɔ no ho.”²⁶

[Kratafa 10 mfonini]

Yudafo pii pow ‘Mesia ɔmanehunufo” ho ɔdwene no. Na ɛne ɔhene nkonimdifo a wɔhwɛ no kwan no bɔ abira

[Kratafa 12 mfonini]

Mesia no nkutoo na obetumi ama anuonyam tebea horow a Yesia hyɛɛ ho nkɔm no abam