Yesu Awo Ɛho Nokwasɛm Ankasa

SUSUW asɛm bi a wonim no yiye wɔ wo man abakɔsɛm mu ho. Wɔayɛ ho kyerɛwtohɔ pii, na abakɔsɛm akyerɛwfo pii na wɔkyerɛwee. Sɛ obi ka kyerɛ wo sɛ asɛm no ansi, na ne nyinaa yɛ atosɛm a, sɛn na anka wobɛte nka? Anaasɛ, sɛ yɛbɛma asɛm no afa yɛn ho paa a, fa no sɛ obi aka akyerɛ wo sɛ nsɛm a w’abusuafo aka akyerɛ wo afa w’ankasa wo nana awo ne ne mmofraberem ho no yɛ atosɛm a, anka dɛn na wobɛyɛ? Wɔ asɛm yi mu biara mu no, sɛ ɔka no kasakoa kwan so mpo a, ebetumi ahyɛ wo abufuw. Ɛda adi sɛ woremfa saa nsɛm yi agoru kɛkɛ!

Nanso, ɛnnɛ akyinnyegyefo taa bɔ Yesu awo ho kyerɛwtohɔ a ɛwɔ Nsɛmpa a Mateo ne Luka kyerɛwee no mu no gu. Wɔka sɛ Mateo ne Luka kyerɛwtohɔ no nhyia koraa, a yɛkyerɛkyerɛ mu biara a ɛrenyɛ yiye, ma ne saa nti nsɛm a ɛwɔ kyerɛwtohɔ abien no mu nyinaa yɛ atoro ne abakɔsɛm hunu. So eyi betumi ayɛ nokware? Sɛ anka yebegye sobo a ɛte saa atom no, momma yɛn ankasa nyɛ nhwehwɛmu wɔ Nsɛmpa kyerɛwtohɔ no mu. Bere a yɛreyɛ eyi no, momma yɛnhwɛ nea yebetumi asua afi mu nnɛ.

Nea Enti a Wɔkyerɛwee

Nea edi kan koraa no, mfaso wɔ so sɛ yɛbɛkae atirimpɔw a wɔde kyerɛw Bible kyerɛwtohɔ ahorow yi. Ɛnyɛ obi asetra mu nsɛm ho kyerɛwtohɔ kɛkɛ; ɛyɛ Nsɛmpa. Nsonsonoe a ɛda ntam no ho hia. Wɔ obi asetra mu nsɛm ho kyerɛwtohɔ mu no, ɔkyerɛwfo no betumi akyerɛw asɛm tenteenten de akyerɛ nea ɛyɛe a onii a ɔreka ne ho asɛm no ba bɛyɛɛ obi a wonim no yiye saa. Enti, nkurɔfo asetra mu nsɛm ho kyerɛwtohɔ bi de nkratafa pii ka nea wɔreka ne ho asɛm no awofo, n’awo, ne ne mmofraberem ho nsɛm pii. Ɛnte saa wɔ Nsɛmpa no ho. Wɔ Nsɛmpa kyerɛwtohɔ anan no mu no, Mateo ne Luka de no nkutoo ne kyerɛwtohɔ abien a ɛka Yesu awo ne ne mmofraberem ho asɛm. Nanso, ɛnyɛ wɔn atirimpɔw ne sɛ wɔbɛkyerɛ sɛnea Yesu nyin benyaa suban a na okura no. Kae sɛ, Yesu akyidifo no gye toom sɛ na watra ase sɛ honhom abɔde pɛn ansa na ɔreba asase so. (Yohane 8:23, 58) Ɛno nti Mateo ne Luka antwe adwene ansi Yesu mmofraberem nsɛm so na wɔde akyerɛ nipa ko a onyin bɛyɛe. Mmom no, wɔkaa nsɛm a esisii a na ɛfata ma atirimpɔw a wɔde kyerɛw wɔn Nsɛmpa no.

Na dɛn ne atirimpɔw a wɔde kyerɛwee? Asɛmfua “asɛmpa” kyerɛ “anigyesɛm.” Ná mmarima baanu yi kura nkrasɛm koro—sɛ Yesu ne Mesia a wɔhyɛɛ ne ho bɔ, anaa Kristo no; na owu maa adesamma bɔne; ne sɛ wonyanee no kɔɔ soro. Nanso na ɛsono akyerɛwfo baanu yi mu biara ntetee koraa na ɛsono nnipa a wɔkyerɛw maa wɔn. Mateo, towgyeni no, siesiee ne kyerɛwtohɔ no maa Yudafo titiriw. Luka, oduruyɛfo no, kyerɛw kɔmaa “Teofilo pa”—a ebia na ɔwɔ dibea a ɛkorɔn—na sɛ yɛbae mu a, ɔde kɔmaa Yudafo ne Amanaman mufo nso. (Luka 1:1-3) Akyerɛwfo yi mu biara paw nsɛm a esisii a na ɛfata na ebetumi atɔ n’atiefo no asom. Enti, Mateo kyerɛwtohɔ no si Hebri Kyerɛwnsɛm no mu nkɔmhyɛ horow a enyaa ne mmamu wɔ Yesu so no so dua. Luka nso kyerɛw ne de no sɛ abakɔsɛm sɛnea ɛbɛyɛ a wɔn a wɔbɛkenkan a wɔnyɛ Yudafo no bɛhyɛ no nsow.

Nea ɛnyɛ nwonwa no, ɛsono wɔn mu biara kyerɛwtohɔ no. Nanso kyerɛwtohɔ abien no mmɔ abira, sɛnea akyinnyegyefo kyerɛ no. Obiara de bi ka ne yɔnko de ho, na ɛka bom kama ma emu ntease wie pɛyɛ.

Yesu Awo Wɔ Betlehem

Mateo ne Luka baanu nyinaa kyerɛwee anwonwade soronko a ɛfa Yesu awo ho no ho asɛm—ɔbaabun na ɛwoo no. Mateo daa no adi sɛ saa anwonwasɛm yi maa nkɔm a Yesaia hyɛ too hɔ mfehaha pii no nyaa ne mmamu. (Yesaia 7:14; Mateo 1:22, 23) Luka kyerɛkyerɛ mu sɛ wɔwoo Yesu wɔ Betlehem efisɛ mmara a Kaesare hyɛe sɛ nkurɔfo nkɔkyerɛw wɔn din no hyɛɛ Yosef ne Maria ma wotuu kwan kɔɔ hɔ. (Hwɛ adaka mu nsɛm a ɛwɔ kratafa 7 no.) Wo a wɔwoo Yesu wɔ Betlehem no kyerɛ biribi. Mfehaha ansa na eyi resi no, na odiyifo Mika aka asie sɛ Mesia no bepue wɔ kurow bi a wommu no hwee a ɛbɛn Yerusalem no mu.—Mika 5:2.

Nkurɔfo taa ka sɛ anadwo a wɔwoo Yesu no na wogyinaa so yɛɛ Yesu Awo ho mfonini ahorow no. Nanso, ɛho nokwasɛm ankasa no yɛ soronko koraa wɔ nea wɔtaa yɛ ho mfonini no ho. Abakɔsɛm kyerɛwfo Luka, a ɔkaa nnipakan a ɛde Yosef ne Maria baa Betlehem ho asɛm no, san kaa nguanhwɛfo a na saa anadwo titiriw no na wɔde wɔn nguan afi adi ho asɛm kyerɛɛ yɛn. Saa tebea horow abien yi ama nnipa pii a wɔyɛ Bible no mu nhwehwɛmu no de asɛm no aba awiei sɛ wɔanwo Yesu wɔ December mu. Wɔka sɛ ɛrentumi nyɛ yiye sɛ Kaesare bɛhyɛ Yudafo a wɔrepɛ basabasa ayɛ no sɛ wontu kwan nkɔ wɔn nkurow mu wɔ saa awɔw ne osutɔbere no mu, biribi a anka ɛbɛhyɛ atuatewfo no abufuw bi aka ho. Nhomanimfo ka nso sɛ, saa ara na ɛrentumi nyɛ yiye sɛ, na nguanhwɛfo ne wɔn nguankuw wɔ adiwo wɔ saa wim tebea a na ano yɛ den no mu.—Luka 2:8-14.

Hyɛ no nsow sɛ ɛnyɛ nhomanimfo ne saa bere no mu nyamesom akannifo a wɔagye din no, na Yehowa bɔɔ ne Ba no awo ho dawuru kyerɛɛ wɔn, na mmom apaafo a wɔmfa wɔn nyɛ hwee a na wɔte abɔnten. Ɛda adi sɛ na akyerɛwfo ne Farisifo no ne nguanhwɛfo a na wɔn bere a wɔde yɛ adwuma no mma wontumi nni mmara a na wɔde wɔn ano ahyehyɛ no binom so no, nni twaka pii. Nanso saa mmarima anokwafo a wɔbrɛ wɔn ho ase yi nyaa nidi kɛse fii Nyankopɔn hɔ—abɔfo no mu bi a wɔasoma wɔn ka kyerɛɛ wɔn sɛ wɔawo Mesia no, nea Onyankopɔn nkurɔfo ahwɛ no kwan mfe mpempem ni no, foforo wɔ Betlehem. Ɛyɛ saa mmarima yi, na ɛnyɛ “ahene baasa” a mpɛn pii no yehu wɔn wɔ Yesu Awo ho mfonini mu no na wɔkɔsraa Maria ne Yosef na wohuu abofra a ne ho nni asɛm yi sɛ ɔda mmoa adididaka mu no.—Luka 2:15-20.

Yehowa Dom Wɔn a Wɔde Ahobrɛase Hwehwɛ Nokware

Onyankopɔn dom ahobrɛasefo a wɔdɔ no na wɔn ani gye ho sɛ wobehu n’atirimpɔw horow mmamu. Eyi yɛ asɛm bi a ɛda adi kɛse wɔ nsɛm a esisii wɔ Yesu awo mu no mu. Wɔ abofra no awo akyi bɛyɛ ɔsram biako no, Yosef ne Maria de no kɔɔ asɔrefie sɛnea na Mose Mmara no kyerɛ no, na wɔde “nturukuku abien anaa mmorɔnoma mma abien” kɔbɔɔ afɔre. (Luka 2:22-24) Na Mmara no hwehwɛ sɛ wɔde odwenini na ɛbɔ afɔre yi, nanso na ɛma kwan ma wɔde nea na ne bo ba fam yi si ananmu, sɛ ahia obi a. (Leviticus 12:1-8) Susuw ho hwɛ. Ɛnyɛ abusua a na edi yiye na Yehowa Nyankopɔn, amansan Hene no, pawee, na mmom ɔpaw nea na edi hia sɛ wɔntete ne Ba a wɔwoo no koro, na ɔdɔ no no wom. Sɛ woyɛ ɔwofo a, ɛsɛ sɛ eyi kae wo sɛ akyɛde a eye sen biara a wubetumi de ama wo mma—a ɛsen honam fam ahonyade anaa nhomasua a anuonyam wom—ne abusua a ɛde honhom fam nneɛma di kan.

Wɔ asɔrefie hɔ no, asomfo anokwafo, a wɔbrɛ wɔn ho ase baanu nso nyaa Yehowa anim dom. Obiako ne Hana, okunafo a na wadi mfe 84 “na ɔmpa asɔrefi hɔ da.” (Luka 2:36, 37) Nea ɔka ho ne ɔbarima panyin nokwaredifo a na wɔfrɛ no Simeon. Wɔn baanu nyinaa ani gyee hokwan a Onyankopɔn de dom wɔn no ho—ansa na wɔrewu no, wɔde wɔn ani huu nea na ɔbɛyɛ Mesia a wɔhyɛɛ ne ho bɔ no. Simeon hyɛɛ nkɔm wɔ abofra no ho. Ɛyɛ nkɔmhyɛ a na anidaso wom nanso na awerɛhodi kakra bata ho. Ɔkae sɛ ɔwofo a ɔyɛ ababaa yi, Maria, bedi yaw da bi wɔ ne ba a ɔdɔ no yiye no ho.—Luka 2:25-35.

Abofra a Ne Nkwa Da Asiane Mu

Ná Simeon nkɔmhyɛ no yɛ nkaebɔ a ɛyɛ ahodwiriw sɛ wɔbɛtan abofra a ne ho nni asɛm yi. Bere a na ɔyɛ akokoaa mpo no na saa nitan yi afi ase dedaw. Mateo kyerɛwtohɔ no kyerɛkyerɛ ɔkwan a eyi faa so bae no mu kɔ akyiri. Ná asram kakra atwam, na na Yosef, Maria ne Yesu te fie bi mu wɔ Betlehem saa bere no. Ahɔho bi a wɔnhwɛ wɔn kwan ba bɛsraa wɔn. Ɛmfa ho nneɛma a ɛwɔ Yesu Awo ho mfonini pii mu no, Mateo nkyerɛ mmarima yi mu dodow a wɔbae, na wamfrɛ wɔn “mmarima anyansafo,” na kampɛsɛ wafrɛ wɔn “ahene baasa.” Ɔde Hela asɛmfua maʹgoi na edii dwuma, a ɛkyerɛ “nsoromma mu ahwɛfo.” Ɛsɛ sɛ eyi nkutoo ma ɔkenkanfo no hu sɛ Ɔbonsam nhyehyɛe bi na ɛrekɔ so wɔ ha, efisɛ nsoromma mu hwɛ yɛ adeyɛ a Onyankopɔn Asɛm kasa tia ma enti Yudafo anokwafo ko tiae denneennen.—Deuteronomium 18:10-12; Yesaia 47:13, 14.

Ná saa nsoromma mu ahwɛfo yi adi nsoromma bi akyi fi apuei fam a wokurakura akyɛde de rekɔma “Yudafo hene a wɔawo no no.” (Mateo 2:2) Nanso nsoromma no anni wɔn anim ankɔ Betlehem. Ɛde wɔn kɔɔ Yerusalem ne Herode Ɔkɛseɛ hɔ. Ná ɔbarima biara nni asase yi so a ɔwɔ hokwan ne adwemmɔne a ɔde bɛsɛe abofra Yesu sɛ ɔno. Ná saa ɔbarima onuonyampɛfo, ne owudifo yi akunkum n’ankasa abusuafo a wɔbɛn no pɛɛ a osusuw sɛ wɔyɛ asiane ma no no.a Bere a asɛm a ɔtee sɛ wɔawo obi a ɔbɛyɛ “Yudafo hene” daakye no haw n’adwene no, ɔsomaa nsoromma mu ahwɛfo no sɛ wɔnkɔhwehwɛ Onii ko no wɔ Betlehem. Bere a wɔrekɔ no anwonwasɛm bi sii. “Nsoromma” a edii wɔn anim ma wɔkɔɔ Yerusalem no dii wɔn anim!—Mateo 2:1-9.

Sɛ́ eyi yɛ kanea bi ankasa a na ɛwɔ wim anaasɛ anisoadehu bi kɛkɛ no, yennim. Nanso yenim sɛ na saa “nsoromma” yi mfi Onyankopɔn. Esiane adwemmɔne a na ɛwɔ akyiri nti, edii saa abosonsomfo yi anim kɔɔ Yesu hɔ tee—abofra a onnim hwee na ontumi nyɛ ne ho hwee, a dua dwumfo hiani bi ne ne yere pɛ na wɔhwɛ ne so no. Ɛda adi sɛ, anka nsoromma mu ahwɛfo no, a na wonnim sɛ Herode redaadaa wɔn no bɛsan de amanneɛ akɔbɔ ɔhene a esum aba ne tirim yi, na ama wɔakum abofra no. Nanso Onyankopɔn de ne ho gyee mu denam dae so na ɔma wɔfaa ɔkwan foforo so kɔɔ wɔn kurow mu. Ɛnde, na “nsoromma” no bɛyɛ ɔkwan a Onyankopɔn tamfo Satan, a ɔbɔɔ mmɔden biara sɛ ɔbɛsɛe Mesia no faa so. Hwɛ sɛnea ɛmfa kwan mu sɛ wɔda “nsoromma” no ne nsoromma mu ahwɛfo adi wɔ Yesu Awo ho mfonini mu sɛ Onyankopɔn asomafo.—Mateo 2:9-12.

Nanso, Satan ampa abaw. Nea na ɔnam ne so redi n’atirimpɔw ho dwuma, Ɔhene Herode, hyɛe sɛ wonkunkum Betlehem mmofra a wonnii mfe abien nyinaa. Nanso Satan rentumi ne Yehowa nni asi nni nkonim. Mateo ka sɛ, na Onyankopɔn ahu mmofra a wɔn ho nni asɛm a wobekunkum wɔn wɔ atirimɔden so yi ho asɛm asie bere tenten mpo. Yehowa sɛee Satan nnwuma bio, denam kɔkɔbɔ a ɔnam ɔbɔfo bi so de maa Yosef sɛ wonguan nkɔ Misraim nkɔbɔ wɔn ho ban no so. Mateo bɔ amanneɛ sɛ bere bi akyi no Yosef ne n’abusua ketewaa no tui bio na awiei koraa no ɔde wɔn bɛtraa Nasaret, na ɛhɔ na Yesu ne ne nuabarimanom ne ne nuabeanom nyinii.—Mateo 2:13-23; 13:55, 56.

Kristo Awoda—Nea Ɛkyerɛ Ma Wo

So wo ho adwiriw wo kakra wɔ asɛm tiawa a ɛfa Yesu awo ne ne mmofraase pɛɛ ho no ho? Nnipa pii ho dwiriw wɔn. Ɛyɛ wɔn nwonwa sɛ wohu sɛ kyerɛwtohɔ horow no hyia na ɛyɛ nokware nso, ɛmfa ho nea nnipa binom ka no denneennen a ɛne no bɔ abira no. Ɛbɛyɛ wɔn nwonwa bere a wobehu sɛ wɔkaa nsɛm a ebesisi no bi ho asɛm siee mfehaha ansa na ɛresisi no. Na wɔn ho dwiriw wɔn bere a wohu sɛ nsɛntitiriw bi wɔ Nsɛmpa no mu a ɛne nneɛma a wɔda no adi wɔ nsɛm a wɔka fa Yesu Awo ho nsɛm ne ɛho mfonini horow ho bɔ abira koraa no.

Nanso, ebia nea ɛyɛ ahodwiriw kɛse wɔ ne nyinaa mu ne sɛ Buronya amammerɛ horow no dodow no ara yera nsɛntitiriw a Nsɛmpa no ka ho asɛm no. Sɛ nhwɛso no, nsɛm kakraa bi na wɔka fa Yesu Agya ho—ɛnyɛ Yosef, na mmom Yehowa Nyankopɔn. Susuw sɛnea ɔbɛte nka wɔ ne Ba a ɔdɔ no no ho bere a ɔde no hyɛɛ Yosef ne Maria nsa sɛ wɔntete no na wɔnhwɛ no no. Susuw yaw a ɔsoro Agya no bedi sɛ ɔmaa ne Ba no nyinii wɔ wiase a ɔhene a nitan ahyɛ no ma wom na ɔbɛbɔ ne kum ho pɔ bere a na ɔyɛ abofra mpo no ho! Ɛyɛ ɔdɔ a ɛkyɛn so ma adesamma na ɛkaa Yehowa ma ɔbɔɔ saa afɔre no.—Yohane 3:16.

Mpɛn pii no Yesu ankasa ho asɛm nni Buronya afahyɛ ahorow mu. Hwɛ, kyerɛwtohɔ biara nni hɔ a ɛkyerɛ sɛ ɔkaa da a wɔde woo no mpo kyerɛɛ n’asuafo no; na biribiara nni hɔ nso a ɛkyerɛ sɛ n’akyidifo dii n’awoda.

Ɛnyɛ Yesu awoda na mmom ɛyɛ ne wu—sɛ adeyɛ titiriw wɔ adesamma abakɔsɛm mu—na ɔhyɛɛ n’akyidifo sɛ wɔnkae. (Luka 22:19, 20) Dabi, Yesu mpɛ sɛ yɛkae no sɛ abofra a ontumi nyɛ ne ho hwee a ɔda mmoa adididaka mu, efisɛ ɔnte saa bio nnɛ. Wɔ ne kum akyi bɛboro mfe 60 no, Yesu daa ne ho adi wɔ anisoadehu mu kyerɛɛ ɔsomafo Yohane sɛ Ɔhene kɛse a ɔte pɔnkɔ so rekɔ ɔko. (Adiyisɛm 19:11-16) Ɛyɛ saa dibea no, Onyankopɔn soro Ahenni no Sodifo, na ɛsɛ sɛ yehu Yesu wom nnɛ, efisɛ ɔyɛ Ɔhene a ɔbɛsesa wiase.

[Ase hɔ asɛm]

[Kratafa 7 adaka/mfonini]

So Luka Dii Mfomso?

ƐBƐYƐ dɛn na wɔatumi awo Yesu a onyinii wɔ Nasaret, na wonim no yiye sɛ Nasareni no, wɔ Betlehem, a ate ne ho bɛyɛ kilomita 150 no? Luka kyerɛkyerɛɛ mu sɛ: “Na ɛbae sɛ nna no mu no, [ansa na wɔrewo Yesu no] mmara bi fi Kaesare Augusto nkyɛn bae sɛ wɔnkan wiasefo nyinaa nkyerɛw wɔn din. Eyi ne ɔkan a edi kan bere a Kirenio di Siria amrado no. Na nnipa nyinaa kɔɔ wɔn kurom kɔkyerɛw wɔn din.”—Luka 1:1; 2:1-3.

Akyinnyegyefo kasa tia saa asɛm yi denneennen sɛ ɛyɛ mfomso anaa mpo bɔsrɛmka bi. Wogye kyim ka sɛ saa ɔkan no ne Kirenio tumidi baa so wɔ afe 6 anaa 7 Y.B. mu. Sɛ nea wɔreka no yɛ nokware a, eyi bɛma adwenem naayɛ a emu yɛ den asɔre wɔ Luka kyerɛwtohɔ no ho, efisɛ adanse no kyerɛ sɛ wɔwoo Yesu wɔ 2 A.Y.B. mu. Nanso saa akyinnyegyefo yi bu wɔn ani gu nokwasɛm abien so. Nea edi kan no, Luka gye tom sɛ na ɔkan no boro biako—hyɛ no nsow sɛ ɔkaa “ɔkan a edi kan” no ho asɛm. (Yɛn na yɛasi ɔfã bi so dua no.) Ná onim yiye sɛ foforo nso bae, ɔkan foforo a ɛbaa so akyiri yi. (Asomafo no Nnwuma 5:37) Saa ɔkan a edi akyiri yi ne ɔkan koro no ara a abakɔsɛm kyerɛwfo Josephus kaa ho asɛm, a esii wɔ 6 Y.B. mu no. Nea ɛto so abien no, Kirenio tumidi no nhyɛ yɛn sɛ yɛmfa akyiri yi de no sɛ bere a wɔwoo Yesu. Dɛn ntia? Efisɛ ɛda adi sɛ Kirenio som wɔ saa dibea no mu mprenu. Nhomanimfo pii gye tom sɛ n’adedi a edi kan no fã bi sii bɛyɛ 2 A.Y.B. mu.

Akyinnyegyefo binom ka sɛ Luka bɔɔ ne srɛ mu kaa ɔkan no ho asɛm na ama ntease abam sɛ wɔwoo Yesu wɔ Betlehem, na ɛnam so ama nkɔmhyɛ a ɛwɔ Mika 5:2 anya mmamu. Saa asɛm yi ma Luka bɛyɛ obi a ɔboapa twaa nkontompo, na okyinnyegyefo biara ntumi mfa asɛm a ɛte saa nto abakɔsɛm kyerɛwfo a ɔde ahwɛyiye kyerɛw Asɛmpa no ne Asomafo no Nnwuma no so.

Biribi foforo nso wɔ hɔ a okyinnyegyefo biara nni hɔ a obetumi akyerɛkyerɛ mu: Ɔkan no ankasa maa nkɔmhyɛ bi nyaa mmamu! Wɔ afeha a ɛto so asia A.Y.B. mu no, Daniel hyɛɛ sodifo bi a na “ɔbɛma ɔtowgyefo pempensifo bi abɛfa ahemman no anuonyanne mu akɔ” ho nkɔm. So na eyi fa Augusto ne n’ahyɛde a ɔde mae sɛ wɔnkan nnipa wɔ Israel no ho? Nkɔmhyɛ no toaa so ka siei sɛ na ‘wobebubu’ Mesia no, anaa ‘apam Birɛmpɔn no,’ wɔ nea obesi sodifo yi ananmu ahenni mu no. Nokwarem no ‘wobubuu’ Yesu, wokum no, wɔ nea obesii Augusto ananmu, Tiberio nniso mu.—Daniel 11:20-22.

[Mfonini ahorow]

Kaesare Augusto (27 A.Y.B.–14 Y.B.)

Tiberio Kaesare (14-37 Y.B.)

[Nsɛm Fibea]

Musée de Normandie, Caen, France

Photograph taken by courtesy of the British Museum

[Kratafa 8 mfonini]

Yehowa bɔfo dom nguanhwɛfo a na wɔbrɛ wɔn ho ase denam asɛmpa a ɛfa Kristo awo ho a ɔka kyerɛɛ wɔn no so