3, 4. Henanom na “wɔsɔre tia apam no atirimɔden so” no, na abusuabɔ bɛn na na wɔne atifi fam hene no anya?

³ Onyankopɔn bɔfo no kae sɛ: “[Atifi fam hene no] de tɛkrɛmakyene bɛma wɔn a wɔsɔre tia apam no atirimɔden so no awae.” Ɔbɔfo no de kaa ho sɛ: “Nanso wɔn a wonim wɔn Nyankopɔn no bedi nkonim, na wɔayɛ ade wɔ ɔkwan a etu mpɔn so. Na ɔman no mufo a wɔwɔ nhumu no bɛma nnipa pii anya ntease. Akyinnye biara nni ho sɛ wɔnam nkrante ne ogyaframa, nnommumfa ne afowde so bɛma wɔatotɔ nna bi.”—Daniel 11:32, 33, NW.

 5, 6. Na henanom ne “wɔn a wonim wɔn Nyankopɔn” no, na dɛn na ɛtoo wɔn wɔ atifi fam hene no ase?

⁵ Na nokware Kristofo—“wɔn a wonim wɔn Nyankopɔn,” anaa “wɔn a wɔwɔ nhumu” no nso ɛ? Ɛwom sɛ na Kristofo ‘brɛ wɔn ho ase hyɛ tumi a ɛkorɔn’ no ase sɛnea ɛfata de, nanso na wɔn a wɔte atifi fam hene no nniso ase no nyɛ wiase yi fã. (Romafo 13:1; Yohane 18:36) Bere a wɔhwɛ yiye hu sɛ wɔde ‘Kaesare de bɛma Kaesare’ no, wɔde ‘Onyankopɔn de nso maa Onyankopɔn.’ (Mateo 22:21) Eyi nti, wɔsɔre tiaa wɔn mudi mu a wokurae no.—2 Timoteo 3:12.

⁶ Esiane eyi nti, nokware Kristofo ‘totɔe,’ nanso “wodii nkonim.” Wɔtotɔe efisɛ wɔtaa wɔn denneennen, na wokunkum ebinom mpo. Nanso wodii nkonim efisɛ wɔn mu dodow no ara kɔɔ so dii nokware. Wodii wiase no so nkonim sɛnea Yesu yɛe no. (Yohane 16:33) Afei nso, wɔannyae asɛm no ka da, bere a na wɔda afiase anaa nnadeban mu mpo no. Bere a wɔyɛɛ saa no, ‘wɔmaa nnipa pii nyaa ntease.’ Ɛmfa ho sɛ wɔtaa Yehowa Adansefo wɔ aman a na atifi fam hene no di so no dodow no ara mu no, wɔn dodow kɔɔ anim. Esiane ‘wɔn a na wɔwɔ nhumu’ no nokwaredi nti, “nnipakuw kɛse” a wɔredɔɔso bere nyinaa aba saa aman no mu.—Adiyisɛm 7:9-14.