Tie Onyankopɔn Nkɔmhyɛ Asɛm ma Yɛn Bere Yi

“Monhwɛ sɛnea kan nkɔmhyɛ ahorow aba mu. Afei nneɛma foforo na mereka ho asɛm ato hɔ; ansa na ɛbɛba no, merema moate.”​—YESAIA 42:9, The Jerusalem Bible.

 1. Dɛn nti na yebetumi aka sɛ Yehowa yɛ Onyankopɔn a ne nkɔmhyɛ nni huammɔ?

YEHOWA yɛ Onyankopɔn a ne nkɔmhyɛ nni huammɔ. Eyi daa adi sɛ ɛyɛ nokware wɔ amamfõ a Yerusalem yɛe ne san a wɔsan kyekyee, tete nhemman ahorow a ɛhwehwee ase ne Mesia ho nkɔmhyɛ ahorow a enyaa mmamu no mu! Nanso so Bible nkɔmhyɛ ahorow no nyinaa nyaa mmamu wɔ mmere a atwam no mu nkutoo? Hwɛ mfomso ara a ɛyɛ sɛ yebesusuw saa!

 2. Ɛdefa nkɔmhyɛ ho no, ɔkwan bɛn so na Yehowa asomfo yɛ soronko wɔ wiase no ho?

² Onyankopɔn ka kyerɛɛ ne tete nkurɔfo no sɛ: “Monhwɛ sɛnea kan nkɔmhyɛ ahorow aba mu. Afei nneɛma foforo na mereka ho asɛm ato hɔ; ansa na ɛbɛba no, merema moate.” (Yesaia 42:9, JB) Ɛdenam nkɔmhyɛ ahorow a ɛwɔ Bible mu dedaw a ɔma wonya mu ntease so no, Yehowa da so ara rema n’asomfo anokwafo adi kan ahu nea ɛbɛba, na ɛyɛ nea ɛsɛ sɛ yetie. Sɛnea ɔsomafo Petro daa nneɛma adi yiye no, sɛ: “Sɛ mode mo ho to nkɔmhyɛ so na moma ɛyɛ sɛ kanea a ɛharan ɔkwan mu baabi a ɛhɔ yɛ kusuu kosi sɛ ade bɛkye a, moyɛ no yiye.” (2 Petro 1:19, JB) Nokwarem no, Onyankopɔn nkɔmhyɛ a wotie hyɛ Yehowa nkurɔfo agyirae sɛ wɔyɛ soronko wɔ wiase a aduru sum na emu ayɛ basabasa yi ho. Mmebusɛm 4:18, 19 ka ma ɛfata sɛ: “Treneefo kwan te sɛ owia hann, ɛkɔ so hyerɛn kodu awia ketee. Abɔnefo kwan te sɛ esum kabii, wonnim nea wohintiw.”​—Fa toto Dwom 119:105 ho.

Sɛ Onyankopɔn Ba No Kasa A, Tie!

 3. Adanse bɛn na ɛwɔ hɔ a ɛkyerɛ sɛ Yesu aba nnɛ?

³ Ɛho hia sɛ Yehowa Adansefo ‘so nneɛma a’ Yesu Kristo kaa ho asɛm no mu “ma ɛboro so.” (Hebrifo 2:1-4) Na hwɛ nkɔmhyɛ a ɛyɛ nwonwa a ɔde mae a ɛfa yɛn bere yi ho! Ɔretwe adwene asi nneɛma nhyehyɛe a ɛresɛe yi nna a etwa to no so no, Yesu de ne “ba” ho “sɛnkyerɛnne” a ɛkanyan adwene no mae. Ɔkaa nneɛma a ebesisi te sɛ ɔko, ɔyaredɔm, ɔkɔm ne asasewosow ho asɛm too hɔ. (Mateo 24:3-8) So onipa bi a onim nea akɔ so no yiye betumi agye adanse a ɛda adi pefee sɛ Yesu aba nnɛ no ho kyim? Wiase Ko I kunkum asraafo a wɔn dodow boro ɔpepem 9 ne nnipa a wɔnyɛ asraafo ɔpepem pii, na wiase ko a ɛto so abien nso kunkum nnipa ɔpepem 55. Spanish influensa a ɛbae wɔ 1918-19 mu maa nnipa bɛyɛ ɔpepem 20 wuwui. Sɛnea Wiase Aduan ne Kuadwuma Ahyehyɛde no akontaabu bi kyerɛ no, mprempren mpo ɔkɔm reyɛ aka nnipa a wɔn dodow yɛ ɔpepem 450, na bɛyɛ ɔpepepem biako nso nnya aduan a ɛdɔɔso nni. Asasewosow ahorow akunkum nnipa bɛyɛ 1,600,000 wɔ afeha a ɛto so 20 yi mu​—dodow a wɔboro 22,000 afe biara fi 1914.

 4. (a) Bere bɛn na Amanaman Mmere no fii ase, na bere bɛn na ɛbaa awiei? (b) Adanse bɛn na ɛwɔ hɔ a ɛkyerɛ sɛ Yehowa nkurɔfo dii kan huu 1914 ansa na ɛreba?

⁴ Saa afe 1914 no​—dɛn na ɛwɔ ho? Nea ɛboro mfirihyia ɔha a atwam ni no, C. T. Russel (a ɔbɛyɛɛ Ɔwɛn Aban Asafo no titrani a odi kan no) de Amanaman Mmere no tõaa “mmere nson” a wɔaka ho asɛm wɔ Daniel nhoma no mu no mu. (Daniel 4:16, 23, 25, 32; Luka 21:24) Ɔrekyerɛw wɔ Bible Examiner, October 1876 de no mu no, Russell kae sɛ: “Mmere nson no bɛba awiei wɔ A.D. 1914 mu.” Ɔka ho nso na wotintim nhoma a ɛbae wɔ 1877 mu a wɔfrɛ no Three Worlds, and the Harvest of This World, a ɛkyerɛe (wɔ nkratafa 83 ne 189) sɛ mfirihyia 2,520 a Amanaman no de bedi wiase so tumi a Onyankopɔn ahenni biara mfa ne ho nnye mu no fii ase bere a Babilon tuu Yuda ahenni no gui wɔ afeha a ɛto so ason A.Y.B. fã a etwa to no mu no, na ɛbɛba awiei wɔ 1914 Y.B. mu. Saa ara na Watchtower a ɛbae wɔ March 1880 mu no kae sɛ: “‘Amanaman no Mmere’ no kɔ kosi 1914 mu, na ɔsoro ahenni no renni dwuma kɛse kosi saa bere no.”

 5. Ɔkwan bɛn so na Yehowa Adansefo tumi dii kan huu nea 1914 kyerɛ no ansa na ɛreba?

⁵ Ɛnnɛ, Yehowa Adansefo dan adwene si “sɛnkyerɛnne” a Yesu de mae no so na wɔdan wɔn ani hwɛ 1914 sɛ afe a ɔbaa Ahenni tumi mu ankasa a aniwa ntumi nhu. Nanso ɔkwan bɛn so na wotumi dii kan huu eyi ansa na ɛreba? Ɛnyɛ sɛ wɔwɔ nyansa a ɛboro onipa de so nti. Dabi, na mmom esiane sɛ na wɔnam mpaebɔ so asua Kyerɛwnsɛm no, atie Onyankopɔn nkɔmhyɛ asɛm no na wɔaso nea Onyankopɔn Ba no ka too hɔ no mu ma aboro so nti. (2 Petro 1:19; Hebrifo 1:1, 2; 2:1) Esiane sɛ ɛyɛ wɔn dɛ sɛ Yehowa ‘aka nneɛma foforo akyerɛ wɔn ansa na ɛreba’ nti, Adansefo no ani agye sɛ wɔrema saa nimdeɛ yi atrɛw wɔ asase nyinaa so. (Yesaia 42:9) Wɔyɛ saa ma ɛne Yesu asɛm no hyia, sɛ: “Wɔbɛka ahenni no ho asɛmpa yi wiase nyinaa de adi amanaman nyinaa adanse.” Ɛno ansa na dɛn? “Ɛno ansa na awiei no bɛba”!​—Mateo 24:14.

Ahene A Wɔne Wɔn Ho Di Asi No Ntawntawdi

 6. Ahene baanu bɛn na wɔka wɔn ho asɛm wɔ Daniel ti 11, na nsemmisa bɛn na ɛsɔre wɔ wɔn ho?

⁶ Nanso, ansa na “awiei no” bɛba no, ɛho hia sɛ yesusuw nneɛma afoforo a akɔ so wɔ afeha a ɛto so 20 yi mu ho. Sɛ nhwɛso no, Daniel nkɔmhyɛ no ka sɛ: “Awiei bere no mu na kesee fam hene no ne [kusuu fam hene] besi anim, na kusuu fam hene no betu aba no so sɛ ahum.” (Daniel 11:40, NW) Henanom ne ahene a wɔne wɔn ho di ako yi, na dɛn na wɔn adeyɛ a wɔaka ho asɛm ato hɔ no kyerɛ?

 7. (a) Bere bɛn na ahene baanu no ntam ntawntawdi no fii ase? (b) Dɛn nti na na edin “kusuu fam hene” ne “kesee fam hene” no yɛ nea ɛfata? (d) Ɛdaa adi sɛ na afeha a edi kan tumi bɛn ne “kusuu fam hene” no, na ɔkwan bɛn so na ‘ɔtowgyefo bi faa ahemman no mu’?

⁷ Saa ahene yi ntam ntawntawdi no fii ase bere a wɔpaapae Aleksanda Ɔkɛseɛ no ahemman no mu akyi. Ne fã bi no, Seleucus Nicator dii Siria so tumi na Ptolemi Lagus de n’ahenni sii hɔ wɔ Misraim. Esiane sɛ na ahene a wɔredi ako yi wɔ Yehowa nkurɔfo, Israelfo, asase no kusuu fam ne kesee fam nti, wɔn na wɔbɛyɛɛ “kusuu fam hene” ne “kesee fam hene” a wodi kan. (Daniel 11:25) Nanso bere a bere kɔɔ so no, nea na saa ahene yi yɛ no sakrae. Ansa na afeha a edi kan Y.B. redu no na Roman ahemman no tumi na abɛyɛ “kusuu fam hene” no. Saa bere no mu wɔ abakɔsɛm mu na ‘obi bɛsɔre a ɔbɛma ɔtowgyefo bi abɛfa ahemman no anuonyanne mu akɔ.’ (Daniel 11:20-22) Sɛnea na wɔaka ato hɔ no, Kaesare Augusto maa “ɔtowgyefo” bi kɔe denam ka a ɔkae sɛ “wɔnkan wiasefo nyinaa nkyerɛw wɔn din” no so. Esiane mmara yi nti, Yosef ne Maria kɔɔ Betlehem sɛ wɔnkyerɛw wɔn din na ɛno na ɛma wɔwoo Yesu wɔ beae a na wɔaka ato hɔ no.​—Luka 2:1-7; Mika 5:2.

 8. (a) Yɛyɛ dɛn hu sɛ na nneɛma ahorow bɛkɔ so wɔ afeha a ɛto so 20 yi mu a ɛfa ahene baanu no ho? (b) Bere bɛn na na ɛyɛ “bere a wɔahyɛ” a “kusuu fam hene” bɛsɔre atia kesee fam no? (d) Afeha yi mfiase mu tumi ahorow bɛn na wobetumi aka sɛ wɔne ahene baanu no?

⁸ Wɔ 33 Y.B. ahuhuru bere mu no, Yesu Kristo de nkɔmhyɛ a ɛyɛ nwonwa bi mae wɔ “awiei bere no” ho. Ɔfaa asɛm a ɛwɔ Daniel 11:31 no kae na ɔnam so kyerɛe sɛ nneɛma ahorow a ɛyɛ nwonwa bɛkɔ so wɔ afeha a ɛto so 20 yi mu a ɛfa “kusuu fam hene” ne “kesee fam hene” no ho. (Mateo 24:15) Na wɔaka ato hɔ sɛ “kusuu fam hene” no bɛsɔre atia kesee fam wɔ “bere a wɔahyɛ no mu.” (Daniel 11:29, 30) Ɛno yɛ bere bɛn? Ɛdɛn, wɔ 1914 mu afe a Amanaman Mmere no baa awiei na wɔde Onyankopɔn Ahenni no sii hɔ wɔ soro no ara mu! Wɔ saa afe no mu no, Germanfo “kusuu fam hene” bi fii ase ko tiaa “kɛsee fam hene,” Anglo-Amerika Wiase Tumi no. Wodii Germany ne n’aboafo no so nkonim wɔ Wiase Ko I mu ne wɔ wiase ko a etia abien no nso mu. Afei wobenyaa “kusuu fam hene” foforo.

 9. (a) Gyinabea bɛn na Yehowa Adansefo kura mu wɔ amammuisɛm ho? (b) So eyi mma wonni kan nhu nneɛma bi a ɛbɛkɔ so wɔ amamuisɛm mu ansa na aba?

⁹ Yehowa Adansefo kura afã biara a Kristofo nni no mu denneennen. Wɔnyɛ wiase yi fã na wɔmfa wɔn ho nhyehyɛ n’amammuisɛm mu. (Yohane 17:16) Nanso, wotie Onyankopɔn nkɔmhyɛ asɛm no, na eyi ama wɔatumi ahu sɛnea Daniel nkɔmhyɛ no kɔ so nya ne mmamu a etwa to mprempren. (Yesaia 42:9) Bio, wɔ Wiase Ko II akyi bere no mu no, tumi a ɛyɛ den kɛse abien daa adi titiriw a wɔne wɔn ho di asi wɔ akodeyɛ ho akansi a ɛyɛ hu mu a ama ka a wiase no bɔ wɔ sraadi ho afe biara no akɔ soro akodu Amerika sika dɔla ɔpepepem 800.

10. (a) Dɛn ne “akyide” a wɔaka ho asɛm wo Daniel 11:31 no? (b) Ahene baanu no ayɛ wɔn ade dɛn wɔ Yehowa nkurɔfo ho, na dɛn ntia?

¹⁰ Ɔreka Daniel nkɔmhyɛ a ɛfa “akyide a ɛbɔ ɔman” ho no ho asɛm no, Yesu kae sɛ: “Ma ɔkenkanfo no mfa nhumu nni dwuma.” (Mateo 24:15, NW; Daniel 11:31) Bible nkɔmhyɛ mmamu mu “nhumu” ada no adi sɛ saa “akyide” no ne Amanaman Nkabom ahyehyɛde a wɔama so de asɔre atia Onyankopɔn Ahenni no. “Nhumu” mma yɛn adwene mu nyɛ yɛn naa wɔ nea “kusuu fam hene” no yɛ nso ho (wɔ nkɔmhyɛ no mmamu a etwa to yi mu) bere a ɔne “kesee fam hene” no di asi wɔ tumi ho apereperedi a emu yɛ den a etwa to mu no. Na ɔno anaa “kesee fam hene” no mu biara nni hɔ a ɔbɛpɛ sɛ ogyaa ne tumidi mu ma Onyankopɔn soro Ahenni a Yehowa Adansefo reka ho asɛm wɔ asase nyinaa so akyerɛ mprempren no. Ahene baanu no nyinaa anya kyɛfa wɔ Adansefo no a wɔtaa wɔn mu.​—Daniel 11:36-39; Mateo 5:10-12; Yohane 15:19, 20.

11. (a) Dɛn na “kusuu fam hene” no ka sɛ ɔbɛyɛ? (b) Ɔkwan bɛn so na saa ‘ɔhene’ yi kasa tia Yehowa?

¹¹ Ɛdefa “kusuu fam hene” no ho no, nkɔmhyɛ no se: “Ɔbɛma ne ho so adi onyame biara so akokurokosɛm, na ɔbɛka anwonwasɛm atia anyame mu Nyame no, . . . na obedi ade nyinaa so akokurokosɛm.” (Daniel 11:36, 37) Saa “kusuu fam hene” a onnye Onyankopɔn nni yi kyerɛ sɛ Ɔman no wɔ hokwan sɛ ɛhwehwɛ pii fi ne manfo hɔ. Bio nso, saa ‘ɔhene’ yi kasa tia Yehowa denam yɛ a ɛde ayɛ ne botae sɛ ebedi wiase so tumi a Onyankopɔn Ahenni nka ho no so. Ɛwom, “kesee fam hene” no nso mpɛ sɛ ɛne saa Ahenni no bɛyɛ biribiara ,ɛmfa ho sɛ n’amansɛmdifo fa Bible mu nsɛm ahorow ka.​—Adiyisɛm 11:17, 18.

‘Ɔhene’ A Ɔwɔ Onyame Soronko

12. Onyame bɛn na “kusuu fam hene” no di no ni?

¹² Nanso, wɔ nea ɛte sɛnea ebia “kusuu fam hene” no mpɛ nyamesom no nyinaa akyi no, ɔwɔ onyame. Nkɔmhyɛ no se: “Obedi abannennen nyame no ni.” (Daniel 11:38) So ‘ɔhene’ yi adi “abannennen nyame” no ni, ama nnɛyi sraadi mu nyansahu so sɛ nnipa a wɔwɔ aman horow a wɔhyɛ n’ase no mu no agyenkwa?

13. Dɛn nti na wobetumi aka sɛ ahene baanu yi nyinaa ‘de wɔn ho reto ɔko nteaseɛnam so’?

¹³ Ampa wayɛ saa! Sɛnea The Military Balance 1981-1982 kyerɛ no, International Institute for Strategic Studies kyerɛ sɛ ɔman a edi kan wɔ ‘kusuu fam hene’ no ahemman mu no asraafo dɔm dodow boro 4,000,000 bere a ɔman a edi anim wɔ “kesee fam” no de dodow boro 2,049,000. Wɔ 1982 mfinimfini mu hɔ no, SIPRI (Stockholm amanaman ntam ahyehyɛde a ɛyɛ asomdwoe ho nsɛm mu nhwehwɛmu) bɔɔ amanneɛ sɛ “kesee fam” betumi anya nuklea nsramman 9,540 a ɔtopae tumi a ɛwom no ano den yɛ megatons 3,448 bere a “kusuu fam” de yɛ nsramman 8,802 a ahoɔden a ɛwom yɛ megatons 4,535. Hwɛ sɛe ara a wobetumi de asɛe ade, efisɛ megaton biako pɛ wɔ tumi a ano den te sɛ nea wɔfrɛ no TNT no ton ɔpepem biako! Ɛda adi sɛ ahene baanu a wɔne wɔn ho di asi no nyinaa ‘de wɔn ho reto ɔko nteaseɛnam so.’​—Yesaia 31:1.

14. (a) ‘Asidi’ bɛn na ɛrekɔ so mprempren? (b) So wubetumi de adanse ama a ɛkyerɛ sɛ adesamma wɔ asiane mu?

¹⁴ “Kesee fam hene” no ‘repia’ nea ɔne no di asi no mprempren wɔ amammui mu ne wɔ sraadi mu mpo. (Daniel 11:40) Nea ɛrekɔ so nnɛ ne akodeyɛ ho akansi a emu yɛ den a ɛma nuklea ɔsɛe ho hu ka adesamma no. Ɛresi asiane no so dua no, SIPRI Yearbook 1982 bɔɔ kɔkɔ sɛ:

“Nuklea akode a tumi akɛse abien no benya no pɛ no reyɛ nea entumi nyɛ yiye. . . . Sɛ́ anka nea na ɛte sɛnea ɛbɛma wɔasuro a ɛne sɛ, sɛ nea wɔwɔ no kari pɛ a, ɛbɛma wɔasuro ɔsɛe no bedi dwuma mmom no, nea wosuro mprempren ne adwene a ɛne sɛ nea obedi kan atow bedi nkonim a ama wɔreyɛ akode ahorow a ano den pii no. Tumi akɛse abien yi a wɔwɔ nuklea akode so tumi no wɔ nea sɛ wɔka ne nyinaa bom a, ebia ade a ebetumi asɛe no bɛyɛ sɛ Hiroshima atopae de no ɔpepem fã: nanso ɛno nyɛ nea ɛdɔɔso. Ɔkwan a akodeyɛ ho nimdeɛ afa so anya nkɔanim no ho nhwɛso biara nni hɔ wɔ sɛnea ama ahotɔ a onipa wɔ no so ahuan sen sɛ ɛbɛma anya nkɔso mmom no mu.”

15. (a) So ahene yi de wɔn akode ahorow yi bedi dwuma atia wɔn ho wɔn ho da bi? (b) Nanso dɛn na Onyankopɔn nkɔmhyɛ asɛm no ma emu da hɔ?

¹⁵ “Kesee fam hene” ‘asidi’ no bɛma “kusuu fam hene” no ‘de nteaseɛnam ne apɔnkɔfo ne ahyɛn bebree atu aba no so.’ Yiw, ahene no benya bere bi ma anyɛ yiye koraa no wɔde wɔn akode ahorow a ɛnyɛ nuklea de no adi dwuma de atia wɔn ho wɔn ho. “Kusuu fam hene” no benya tumi nso wɔ “afɛfɛde” a ɛwɔ wiase yi mu no pii so. (Daniel 11:40-43) Ɛrebedu 1981 mu no na “kusuu fam hene” no wɔ tumi wɔ nnipa bɛyɛ ɔpepepem biako ne fã so wɔ aman ahorow 16 so, na bere na ɛbɛkyerɛ faako a ‘ɔhene’ yi bɛtrɛw ne tumi mu akodu. Nanso atemmu a ɛba ahene yi so no fi beae foforo. Onyankopɔn nkɔmhyɛ asɛm ma ɛno mu da hɔ.

Nsɛm A Eyi Hu​—Na Afei Awiei No!

16. Ɛhe na ‘nsɛm a eyi hu’ no fi, na ɔkwan bɛn so na edu “kusuu fam hene” no nkyɛn?

¹⁶ Nkɔmhyɛ a ɛyɛ nwonwa yi ba awiei sɛ: “Nanso nsɛm a ɔbɛte afi apuei ne benkum fam beyi no hu, na ɔde anibere kɛse befi akɔ sɛ ɔkɔsɛe na wadwerɛw nnipa bebree. . . . Nanso n’awiei bɛba a obi nni hɔ a obedi aboa no.” (Daniel 11:44, 45) Nsɛm a eyi hu yi fi Yehowa hɔ ankasa denam Yesu Kristo so. Kyerɛwnsɛm no ka Onyankopɔn ho asɛm wɔ ntoto ho kwan so sɛ ɔwɔ benkum fam, na wɔfrɛ ɔne Kristo wɔ sɛnkyerɛnne kwan so sɛ “ahene a wofi owia apuei,” apuei fam. (Adiyisɛm 16:12; Dwom 48:2; 75:6, 7) Nanso ɔkwan bɛn so na “nsɛm” yi betumi adu “kusuu fam hene” no nkyɛn? Ɛdɛn, denam Onyankopɔn ahyehyɛde a ɛwɔ asase so, Yehowa kronkronbea kuw no ne wɔn mfɛfo “nnipakuw kɛse” no so!

17. (a) Esiane “nsɛm” no nti, dɛn na “kusuu fam hene” no bɛyɛ? (b) So “kesee fam hene” no begyina hɔ a ɔmmfa ne ho nhyem? (d) Afei dɛn na Yehowa bɛyɛ ama n’adansefo anokwafo?

¹⁷ Onyankopɔn na ɔbɛkyerɛ nea ɛwɔ saa “nsɛm” yi mu. Nanso sɛnea ɛte biara no, ɛbɛhyɛ “kusuu fam hene” no abufuw araa ma ɔbɛka sɛ ɔrebɛsɛe Yehowa nkurɔfo. Nokwarem no, Satan Ɔbonsam, sɛnkyerɛnne kwan so Gog a ofi Magog no bɛkyerɛ “kusuu fam hene” ne “kesee fam hene” no nyinaa kwan wɔ ɔhaw kɛse a ɔde ba Onyankopɔn nokware asomfo so no mu. (Hesekiel 38:10-12) Nanso ɛho nhia sɛ Yehowa adansefo anokwafo suro eyi. Ɔsorosoroni no begye wɔn, na ahene baanu no nyinaa bɛka wɔn a wɔbɛsɛe wɔn wɔ “Onyankopɔn, ade nyinaa so tumfoɔ no, da kɛse no mu ko” wɔ Harmagedon no ho.​—Adiyisɛm 16:14-16; Hesekiel 38:18-23.a

18. (a) So ɛho hia sɛ Yehowa Adansefo suro nneɛma a ebesisi daakye? (b) Dɛn nti na wɔkɔ so ara nya ahotoso wɔ Onyankopɔn nkɔmhyɛ asɛm no mu.

¹⁸ Enti, wɔ nneɛma nhyehyɛe yi awiei yi mu no, Yehowa Adansefo bɛka Ahenni asɛm no a wonsuro. (Mateo 24:14) “Kusuu fam hene” no anaa “kesee fam hene” no anaa Ɔbonsam ne n’adaemone dɔm no rentumi mma wonnyae. Yegye eyi di kɛse. Dɛn ntia? Efisɛ gyidi a ɛte sɛɛ yɛ nea egyina yɛn soro Agya no bɔhyɛ ahorow so denneennen, na Yehowa asɛm nso yɛ nokware. (2 Petro 3:13; Adiyisɛm 21:1-5) Ɔsoro nkɔmhyɛ ne bɔhyɛ ahorow anya mmamu bere nyinaa. Ɛnde, wɔ ahotoso a efi koma nyinaa mu no, momma Yehowa nkurɔfo a wɔaboaboa wɔn ano nyinaa nkɔ so ntie Onyankopɔn nkɔmhyɛ asɛm ma yɛn bere yi.

[Ase hɔ nsɛm]

So Wutumi kae?

□ Yɛyɛ dɛn hu sɛ Yesu aba Ahenni tumi mu nnɛ?

□ Ɛdefa ammamuisɛm ho no, gyinabea bɛn na Yehowa Adansefo kura mu?

□ Henanom ne nnɛyi “kussu fam hene” ne “kesee fam hene” no?

□ Awiei bɛn na ɛretwɛn ahene yi?

□ Dɛn nti na ɛsɛ sɛ yenya ahotoso wɔ Onyankopɔn asɛm no mu?

[Nsɛm a wɔahyehyɛ wɔ kratafa 10]

607 A.Y.B. 1914 Y.B.

October, 607 A.Y.B.​—October, 1 A.Y.B. = MFE 606

October, 1 A.Y.B.​—October, 1914 Y.B. = MFE 1,914

AMANAMAN MMERE NSON = MFE 2,520

[Kratafa 12 mfoni]

“Kusuu fam hene” no de nidi ma “abannennen nyame”